„Stré sondro foe weri gi na bribi”
„Oen lobiwan, . . . mi ben feni en fanowdoe foe skrifi oenoe èn foe fermane oenoe foe stré sondro foe weri gi na bribi di ben gi abra wan èn foe alaten na den santawan.” — Judas 3.
1. San na wantoe foe den sani di Satan ben sa kan gebroiki ini en moeiti, sondro winimarki, foe pori na troe kristendom?
JEHOVAH dienstknekti moe stré wan hebi stré gi na troe bribi. Na féanti foe den, na Didibri, e proeberi nanga jepi foe ferfolgoe èn fini „triki” foe pori a diri matifasi foe den nanga Jehovah di kon nanga jepi foe Jezus Kristus (Ef. 6:11, Kingdom Interlinear Translation; 1 Petr. 5:8). Ini na moeiti foe en, sondro winimarki, foe roetoe na troe kristendom poeroe, Satan ben proeberi foeroe tron foe njan en na ondro. Na mindri den pori sani di ben sa kan dini na marki disi de: (1) falsi leri, (2) loesoe fasi foe libi, (3) mankeri foe bribi, (4) a wiswasi foe makti di Gado ben poti, (5) knoroe èn kragi, èn (6) na anbegi foe soema nanga na marki foe kisi wini.
2. Sortoe fini tori wi e kisi dja foe a brifi foe Judas?
2 Jehovah e gi precies san de fanowdoe ini jeje fasi foe kibri en dienstknekti èn foe stré dorodoro nanga na Granbidrigiman (Jes. 59:1). Wan foe den sortoe sani di ben seti de na brifi foe Judas di skrifi ondro Gado jeje. Na discipel Judas kande séker ben skrifi ini Palestina bifo 66 G.T., bikasi a no e ferteri foe na kon foe Cestius Gallus na Jeruzalem ini na jari dati èn sosrefi a no e ferteri dati na foto dati ben fadon ini 70 G.T. ini anoe foe den Romein ondro Titus.
3. Na sortoe fasi na brifi foe Judas di ben skrifi ondro Gado jeje kan abi bigi waarde ini disi ten?
3 Ala di a brifi foe Judas ben skrifi someni hondro-hondro jari pasa kaba, tokoe a abi bigi waarde gi wi ini disi ten. Den kristen opziener di santa jeje ben teki poti foe doe wroko, kan èn moesoe foe gebroiki en leki fundamenti foe a gi foe rai. Efi ondro begi èn nanga sakafasi wi go studeri na brifi disi, dan a kan jepi wi persoonlek toe. Disi de spesroetoe so, efoe wi e si dati falsi leri de wan bigi gevaar ofoe dati na kori foe hoeroedoe e kon moro bigi, ofoe te wi e si ini wi ati wan firi di e gro kon moro bigi foe wiswasi makti di Gado ben poti, foe knoroe èn kragi ofoe foe korkori bepaalde sma foe wi égi wini èn gridi lostoe. Te wi e go loekoe na brifi disi di ben skrifi ondro Gado jeje vers foe vers, dan sondro degedege wi sa si esesi fa foe gebroiki na faste rai foe en ini wi persoonlek libi èn ini na gemeente.
Tranga fanowdoe aksi foe moro sari-ati, vréde nanga lobi
4. Fa Judas ben tjari ensrefi kon ini a tori, èn o prenspari disi de?
4 Judas ben bigin en brifi nanga den wortoe disi:
„Judas, wan srafoe foe Jezus Kristus, ma wan brada foe Jakobus, gi den wan di den ben kari, di den lobi ini gemeenschap nanga Gado, na Tata, èn di ben kibri gi Jezus Kristus” (Judas 1).
Leki wan „srafoe foe Jezus Kristus”, Judas no ben de ini wan wiswasi, veragti katibo. Na „srafoefasi” disi moro foeroe ben abi en fundamenti ini disi, dati den bakaman foe Jezus ben bai kon fri nanga en diri broedoe gi na switi dienst foe en, nanga tégo libi na den fesi. Jezus lobi ben kisi den leki strafoeman èn den ben de klari foe gi densrefi abra na en (Matt. 11:29, 30; teki gersi Efese 6:21-23). Judas ben taki dati a ben de wan „srafoe” foe Kristus, „ma wan brada foe Jakobus”, a de krin dati a ben de na Jakobus di ben de wan foe den jeje „postoe” foe na gemeente Jeruzalem èn „na brada foe Masra” (Gal. 2:9; 1:19; teki gersi Tori foe den Apostel 12:17; 15:13-21). A de krin dati Judas ben de soboen wan afoe brada foe Jezus, ma a ben abi sowan sakafasi foe no feti baka barinen tapoe a gron foe en famiribanti nanga na Manpikin foe Gado. — Mark. 6:3.
5. (a) Soema ben de „den wan di den ben kari”? (b) Fa den „wan di den ben kari” „e kibri gi Kristus”? (c) Gi soema moro, boiti den „wan di den ben kari”, a brifi foe Judas de wan dekati?
5 Na prakseri foe na brifi foe Judas ben de foe panja en alape. En brifi ben seni go na „den wan di den ben kari”, dati wani taki, na den sma di Gado ben kari foe kon ini na glori hemel kownoekondre foe en Manpikin (Joh. 6:44; teki gersi Tori foe den Apostel 16:14). Jehovah ben lobi „den wan disi di den ben kari”, èn a ben plisi en foe gi den na Kownoekondre, efoe densrefi ben sa tan ini wan jeje toestand di en e feni boen (Luk. 12:32; Rom. 8:38, 39; teki gersi Jesaja 52:11). Den ben „kibri den gi Jezus Kristus”, foe di Jehovah Gado ben kibri den, bika den, leki memre foe Kristus skin, ben de ini wanfasi nanga en Manpikin. Efoe den ben sa tan getrow, dan den ben sa kon de makandra nanga Jezus ini en Kownoekondre (Ef. 4:15, 16; 2 Tim. 1:12; 1 Petr. 1:3-5). Den toemsi boen fermane ini na brifi disi no de wawan gi den „wan disi di den ben kari”. Na brifi kan gi sosrefi toe foeroe dekati na a „bigi ipi” tra loyaalsma di de now èn di makandra nanga Kristus jeje „brada”, e teki prati na a tranga wroko foe na Kownoekondre. — Matt. 24:14; 25:34-40; Openb. 7:4, 9, 15.
6. Na sortoe fasi na sari-ati foe Gado ben sori gi den sma di ben anbegi makandra nanga Judas?
6 Moro fara Judas e tjari den firi disi foe en ati kon a fesi:
„Meki sari-ati èn vréde èn lobi kon moro foeroe gi oenoe” (Judas 2).
Den sma di Judas brifi ben skrifi gi, ben kisi sari-ati, vréde èn lobi foe Gado, di den ben tron bribisma di ben gi densrefi abra na Jehovah Gado èn a ben gi den pardon foe den sondoe nanga jepi foe Jezus Kristus. Na sari-ati foe Gado ben tjari kon na krin ini na ferloesoe di ben seti nanga jepi foe Jezus (Tit. 3:4-7). Boiti dati, na sari-ati foe Gado ben kon na krin ini disi, dati den no ben de ini katibo na a wet foe Mozes, na gwenti di no ben tanapoe ini bijbel, na libifasi di e afrontoe Gado èn den sortoe sani dati moro (Rom. 7:4; Gal. 5:13; 1 Petr. 1:18, 19; teki gersi Openbaring 18:1-5). Moro fara a ben de wan sari-ati sani foe na sé foe Gado, dati a ben kibri den gi Jezus Kristus, sodati leki en „srafoe” den ben kan barwroko gi na „boen njoensoe” (Mark 13:10). Na winsi nanga begi foe Judas ben de dati den tra anbegiman foe en ben sa kisi moro nanga moro sari-ati foe Gado.
7. Foe san-ede èn fa kristen e ondrofeni vréde?
7 Judas ben begi sosrefi toe ofoe en tra bribiman ben sa kan ondrofeni moro vréde. Foe di Jehovah Kotoigi ini disi ten ben gi densrefi abra na Gado sondro wan kondisi di den ben poti, meki den abi wan krosbé matifasi nanga en. Na so fasi den de ini vréde nanga Jehovah èn sosrefi toe den abi „na vréde foe Gado di e pasa ala prakseri”, wan kerostoe fasi foe ati nanga froestan di sma di no e bribi no kan graboe (Fil. 4:6, 7; Kol. 1:19, 20). Boiti dati, den e kweki vréde, wan froktoe foe Gado jeje di den e sori ini den libi èn den man foe feti baka vréde nanga tra sma (Gal. 5:22, 23; Hebr. 12:14). Boiti dati, getrow kristen no e frede a ten di e kon èn gi na dede srefi, ma den de ini vréde, foe di den sabi dati Jehovah de nanga den èn e meki ala en wroko wroko makandra foe na boen foe den di lobi en. — Matt. 10:28; Rom. 8:28.
8. Fa a lobi foe Jehovah ben sori gi wi?
8 Na bigi lobi foe Jehovah ben sori ensrefi, foe di a ben gi en Manpikin „sodati ibriwan sma di e sori bribi ini en, no ben sa go ini pori, ma ben sa abi tégo libi” (Joh. 3:16). Di wi ben de ete sondari èn no ben abi wan persoonlek matifasi nanga Jehovah, a ben sori a lobi disi gi wi (Rom. 5:8). Ma nanga bribi ini na seti dati foe ferloesoe, wi moe kibri wisrefi ini na lobi foe Gado. Judas ben begi sosrefi toe efoe lobi ben kan kon moro foeroe gi den sma di a ben skrifi en brifi gi.
9. Foe san-ede meki den tra bribiman foe Judas ben abi fanowdoe foe moro foeroe sari-ati, vréde èn lobi?
9 Judas ben begi ofoe Gado sari-ati, vréde èn lobi ben kan kon moro foeroe gi en tra lobi bribiman, foe di a jeje tanboen foe den ben de ini gevaar. Den ben abi Gado sari-ati, vréde nanga lobi foe datede moro fanowdoe leki oiti wan ten na fesi.
„Stré sondro foe weri”
10. Foe san Judas ben wani skrifi?
10 Judas ben poti moro fara krakti tapoe na tranga fanowdoe foe sani, di a ben taki:
„Oen lobiwan, ala di mi ben doe ala moeiti foe skrifi oenoe foe na gemeenschappelek ferloesoe foe wi, tokoe mi ben feni en fanowdoe foe skrifi oenoe èn foe fermane oenoe foe stré sondro foe weri gi na bribi di ben gi abra wan èn foe alaten na den santawan.” (Judas 3).
Den boboi wortoe „oen lobiwan”, di Judas ben gebroiki, e gi en tra anbegiman na djaranti foe a lobi foe en gi den, ala di en boskopoe ben de wan krakti wan (Joh. 13:35; teki gersi Romeini 1:7; 3 Johannes 1, 2). A ben wani skrifi foe na „gemeenschappelek ferloesoe” foe „den di den ben kari” foe go ini na hemel kownoekondre (Gal. 3:26-29). Na gemeenschappelek ferloesoe disi ben abi foe doe nanga na diri howpoe di kristen ben abi „akroederi wan bribi di kristen ini Judas ten ben e teki prati na ini” — Tit. 1:4.
11. San ben de na „bribi” di ben gi abra na den santawan?
11 Na „bribi di ben gi abra na den santawan”, ben de ala bribi ini waarheid leki Jehovah Gado èn en kownoekondre, soleki Jezus nanga en discipel di ben abi Gado jeje ben gi disi abra. A ben de krin, dati a bribi disi ben gi abra „wan èn foe alaten” ini na fasi disi, dati den salfoe bakaman foe Jezus den „santawan”, ben kisi en 1900 jari pasa kaba leki na wán enkri troe boen njoensoe. A de tan na „bribi”, di Jehovah Kotoigi ini disi ten e froestan dati den moe hori tranga na en, foe di troetroe no wan tra boen njoensoe, ofoe boskopoe foe ferloesoe de di joe kan bribi (Gal. 1:6-8). Èn wan prenspari pisi foe na boen njoensoe dati de, dati Jezus Kristus ben dede gi na heri grontapoe foe libisma. Foe datede meki a de a moro prenspari sani gi na „bigi ipi” „tra skapoe” ini wi ten. — Joh. 10:16; 1 Joh. 2:1, 2; Openb. 7:9.
12. Foe san-ede Judas e gi tranga na tra bribiwan ini en brifi foe stré gi na bribi?
12 Ini Judas ten falsi leriman di ben taki dati den ben anga na a kristendom, ben proeberi tapoe wan bidrigi fasi foe tjari wan falsi „boen njoensoe” kon tapoe a pipel foe Gado. Den sortoe leri dati ben de wan gevaar gi na bribi èn ferloesoe foe den (Matt. 24:13; 2 Kor. 11:3, 4). Foe kan tapoe na sani disi èn nanga na tranga foe santa jeje èn lobi Judas „ben feni en fanowdoe” foe datede foe skrifi tra bribiman èn foe gi den dekati „foe stré sondro foe weri gi na bribi”.
13. San Jehovah Kotoigi ini disi ten moe doe foe lon komoto foe kori èn foe no lasi a ferloesoe foe den?
13 Efoe wi leki disiten kristen kotoigi foe Jehovah wani tan loyaal na Gado èn no wani dati den kori wi èn leki wan bakapisi foe dati lasi ferloesoe, dan wi toe moe „stré sondro foe weri” tegen ibri falsi boen njoensoe, ala di nanga krakti wi e kakafoetoe gi moeiti di e doe foe poti ofoe foe poeroe sani ini na leri foe na soifri Wortoe foe Jehovah di ben skrifi nanga santa jeje (Deut. 4:2; Odo 30:5, 6; Openb. 22:18, 19). Wi moe marki ala njoen ofoe vreemde leri ini na leti foe a heri Wortoe foe Gado èn hori krakti na a bribi di e tjari wi go na ferloesoe. — Hebr. 1:1, 2; 2:3, 4.
14, 15. (a) Sortoe verklari Judas ben gi foe na reden foe san-ede a ben kenki na tori foe en brifi? (b) Foe san-ede meki den falsi leriman no ben sa man foe njan na heri kristen gemeente na ondro ofoe foe doti en?
14 Te Judas e tjari kon na krin foe san-ede a kenki prakseri di a ben skrifi, a ben taki:
„Na reden di mi abi foe dati, de, dati na wan kibri fasi séker sma ben kon na ini, di den Boekoe langa ten kaba ben poti den foe na kroetoe disi, sma di de sondro Gado, di e kenki na no-ferdini boenfasi foe wi Gado kon ini wan krin foe densrefi foe loesoe libifasi èn den no de getrow na wi wan enkri Éginari èn Masra, Jezus Kristus” (Judas 4).
Den sma di „ben kon na ini” na mindri troe kristen, ben leri sma tapoe wan bidrigi fasi lé. (Teki gersi Galacia 2:4; 1 Joh. 2:19). Jezus ben taki na fesi foe wan féanti, orga wroko, di ben abi na marki foe pori Jehovah pipel, bika a ben sori moro fara dati na Didibri ben sai „takroe wiwiri”, ofoe falsi kristen, na mindri na „alési”, ofoe Kristus troe bakaman (Matt. 13:24-30; 36-43). Sosrefi toe warskow foe den apostel ben de foe a fadon komoto foe bribi; Petrus foe eksempre ben ferteri foe „falsi leriman”. — 2 Petr. 2:1; Tori foe den Apostel 20:29, 30; 2 Thess. 2:3.
15 Den soema disi di no e frede Gado no ben sa man foe njan na gemeente krinkrin na ondro ofoe foe doti en. „Langa ten kaba”, srefi ete bifo na getrow Henoch ben taki na fesi, den sortoe sma disi ben poti kaba gi na kroetoe foe Gado di no ben boen (Gen. 3:15; 5:21-24; Judas 14, 15). Ini na tra pisi foe na brifi foe Judas, a de krin, den e taki moro fara foe na „kroetoe disi”.
16. San den „sma di no e frede Gado” ben doe foe „kenki na no-ferdini boenfasi foe Gado kon ini wan krin foe densrefi foe loesoe libifasi”, èn san ben de fowtoe ini den denki?
16 Den falsi leriman dati ben de „sma sondro Gado”, ofoe sma di no „ben abi respeki gi Gado” (The New Testament in Modern English, di J. B. Phillips ben vertaal). Den ben loekoe Jehovah krin pipel nanga doti bewégi foe ati nanga ai di no ben soifri. Den sma disi di no ben respeki Gado ben meki na fowtoe dati foe di Gado ben gi pardon na fosten hoeroeman, afkodréman, soetadoeman nanga so moro fara, a ben sa abi nofo sari-ati-fasi foe gi wan sma pardon di ben doe den sortoe sondoe sani disi baka foe espresi. No nanga reti den ben prakseri dati den ben kan pasa Gado moreel wet sondro foe kisi strafoe, moro fara foe sori wan sortoe beraw èn ben kan tan na mindri Jehovah pipel te a tra tron dati den e lostoe tranga foe gi densrefi abra na sondoe èn ben sabi foe kori „sili di no tanapoe faste” ini hoeroedoe (2 Petr. 2:14). Na so fasi den „sma disi di de sondro Gado” e kenki na „no-ferdini boenfasi foe wi Gado kon ini wan krin foe densrefi foe loesoe libifasi”. Den no ben sabi ofoe erken troetroe dati Gado ben abi so wan sari-ati foe krin bribiwan foe den sondoe nanga jepi foe na broedoe foe Kristus, sodati sensi na ten dati den ben sa kan waka baka wan regtvaardiki libifasi. — Rom. 6:11-23; 1 Kor. 6:9-11.
17. Na sortoe fasi son sma „no ben sa kan de getrow na wi wan enkri Éginari èn Masra”, èn san e wakti den?
17 Efoe wantoe na wi mindri, leki kotoigi foe Jehovah, ben sa boigi ede gi sma di no frede Gado èn ben sa tron srafoe foe sondoe foe gridi skinlostoe ede, dan wi „no ben sa de getrow” na a sma di ben bai wi nanga en diri broedoe; wi no ben sa wani sabi Jezus Kristus leki Éginari nanga Masra (1 Kor. 7:22, 23). Den sma di e doe disi, pori e wakti den. Fa a de foe datede toemsi prenspari, dati wi e kakafoetoe gi den sortoe sma disi di no frede Gado!
Krakti rai gi wi ten
18, 19. (a) A sortoe sondoe libifasi son sma di taki den de kristen ben waka na en baka? (b) Fa son tra sma ben kon na ondro den krakti? (c) Sortoe rai foe santa jeje sa jepi getrow kristen foe de sreka-sreka foe „stré gi na bribi”?
18 Ini na ten disi, wantoe sma di ben sroiti densrefi na a gemeente foe Jehovah Kotoigi, ben proeberi foe meki falsi leri nanga loesoe libifasi go na fesi. Den sma disi di de sondro konsensi e poti Gado regtvaardiki markitiki na wan sé, èn den de wan troetroe gevaar gi loyaal kristen.
19 Na wan sari sani, dati regtvaardiki bakaman foe Jezus Kristus di e wroko tranga kan kon na ondro na krakti foe falsi leri èn wan loesoe libifasi. Ma na krakti rai foe Judas sa gi den getrowwan tranga, sodati den no kan fadon gi den sortoe moeiti foe Satan di de foe pori na matifasi nanga Jehovah Gado. Now di wi o go moro fara foe loekoe na brifi foe Judas, meki wi de srekasreka foe „stré sondro foe weri gi na bribi”.
Joe kan piki den aksi di e kon now?
□ Foe sortoe sani di kan tjari troe kristen kon ini gevaar, na brifi foe Judas e handri?
□ Na sortoe fasi na brifi foe Judas de wan bigi jepi gi wi ini disi ten?
□ Foe san-ede den sma di Judas ben skrifi gi, ben sa abi moro foeroe sari-ati, vréde nanga lobi fanowdoe?
□ San na „a bribi di ben gi abra wan èn foe alaten na den santawan”?
□ Foe san-ede Judas e gi kompe-bribiman tranga „foe stré sondro foe weri gi na bribi”?
[Prenki na tapoe bladzijde 267]
Joe sa ’stré sondro foe weri gi na bribi’ nanga foeroe froetrow, neleki kristen ini ala pisi ten di pasa?