„Feti wan tranga feti gi a bribi”!

„Feti wan tranga feti gi a bribi di wan leisi èn foe ala ten ben gi abra na den santawan.” — JUDAS 3.

1. Na sortoe fasi troe kresten de na ini orlokoe na ini a ten disi?

SROEDATI di de na feti ala ten ben abi wan tranga libi. Prakseri pikinso foe weri a heri sroedatipaki èn waka someni kilometer ini ala sortoe weer, e oefen hebi foe man gebroiki wapen, noso foe abi foe kibri joesrefi teige ala sani di ben sa kan kiri joe noso gi joe mankeri. Ma troe kresten no e teki prati na den orlokoe foe den nâsi (Jesaja 2:2-4; Johanes 17:14). Tokoe, noiti wi moesoe frigiti taki wi alamala de na ini wan feti na jejefasi. Satan no wani si Jesus Krestes nanga den bakaman foe en na grontapoe na ai (Openbaring 12:17). Ala sma di teki a bosroiti foe dini Jehovah Gado, te joe loekoe en boen, e gi densrefi leki sroedati foe teki prati na a feti na jejefasi. — 2 Korentesma 10:4.

2. Fa Judas e froeteri foe kresten orlokoe, èn fa a brifi foe en kan jepi wi foe horidoro na ini disi?

² Na wan fasi di fiti, Judas, na afoe brada foe Jesus, skrifi: „Lobiwan, ala di mi ben doe ala moeiti foe skrifi oenoe foe a froeloesoe di wi abi makandra, tokoe mi ben feni en fanowdoe foe skrifi oenoe foe froemane oenoe foe feti wan tranga feti gi a bribi di wan leisi èn foe ala ten ben gi abra na den santawan” (Judas 3). Te Judas e gi krestensma deki-ati foe „feti wan tranga feti”, a e gebroiki wan wortoe di abi foe doe nanga a wortoe „hebi pen”. Ija, a feti disi kan hebi, a kan gi hebi pen srefi! Joe feni taki son tron a hebi foe horidoro ini na orlokoe disi? A sjatoe ma krakti brifi foe Judas kan jepi wi. A e gi wi tranga foe kakafoetoe gi hoeroedoe, foe lespeki tirimakti di Gado seti, èn foe tan na ini a lobi foe Gado. Meki wi go loekoe fa foe fiti a rai disi.

Kakafoetoe gi hoeroedoe

3. Sortoe onfroewakti situwâsi ben kon miti a kresten gemeente na ini den dei foe Judas?

³ Judas ben kan si taki a no ala den kompe kresten foe en ben e wini a feti teige Satan. Wan onfroewakti situwâsi ben miti na ipi. Kroeka man ben „kon na inisei na kibrifasi,” na so Judas e skrifi. Na wan triki fasi den man disi ben e horibaka gi hoeroedoe. Èn na wan koni fasi den ben regtfardiki den doe foe den, èn na so wan fasi ben „e kenki a no-froedini boen-ati foe wi Gado, kon tron wan reide foe tjari densrefi na wan loesoe fasi foe libi” (Judas 4). Kande, neleki den fositen gnostis-sma, den ben e taki dati o moro wan sma ben sa sondoe, o moro a sma ben kan kisi a no-froedini boen-ati foe Gado — so boen, dan a ben moro betre foe sondoe moro! Noso kande den ben kisi na prakseri taki wan Gado nanga switifasi no ben sa strafoe den. Awinsi san na a tori, den ben fowtoe. — 1 Korentesma 3:19.

4. Sortoe dri bijbel eksempre foe kroetoestrafoe foe Jehovah na ini a ten di pasa Judas e kari?

⁴ Judas e boeweisi a godelowsoe fasi foe a denki foe den foe di a e kari dri eksempre foe a kroetoe foe Jehovah na ini a ten di pasa: teige den Israèlsma di „no ben e sori bribi”; teige den „engel di . . . ben gowe libi den eigi reti tanpresi” so taki den ben kan sondoe nanga oemasma; èn teige den sma di ben e libi na Sodom nanga Gomora, di „ben doe soetadoe pasa marki èn ben go baka skin foe gebroiki dati na wan fasi di de teige a natoeroe” (Judas 5-7; Genesis 6:2-4; 19:4-25; Numeri 14:35). Na ini ala den kefal, Jehovah ben tjari wan tranga kroetoestrafoe kon teige den sondari.

5. Den wortoe foe sortoe owroe profeiti Judas e teki, èn fa a profeititori dati e sori taki a sa kon troe seiker?

⁵ Baka ten, Judas e sori go na wan kroetoestrafoe di bigi moro den disi. A e taki foe wan profeititori foe Heinok — wan pisi tori di no de foe feni no wan tra presi na ini den Boekoe foe bijbel di sma skrifi nanga jepi foe Gado en santa jeje (Judas 14, 15).a Heinok ben taki na fesi foe wan ten di Jehovah ben o kroetoe ala godelowsoewan nanga den godelowsoe doe foe den. A de prenspari foe si taki, Heinok ben taki leki a ben pasa kaba, bika den kroetoestrafoe foe Gado ben de so seiker leki den ben pasa kaba. Kande sma spotoe Heinok èn Noa baka ten, ma ala den spotoeman dati dede na ini a Froedoe di ben tapoe heri grontapoe.

6. (a) San Judas ben moesoe memre den kresten na ini a ten foe en? (b) Foe san ede wi moesoe teki den sani di Judas e memre wi, na ati?

⁶ Foe san ede Judas ben skrifi foe den kroetoestrafoe disi foe Gado? Bika a ben sabi taki son wan foe den sma di ben de pisi foe den kresten gemeente na ini a ten foe en ben e doe sondoe di ben doti èn ben warti foe kisi kroetoestrafoe neleki den sondoe di ben meki taki den kroetoestrafoe dati ben kon na ini a ten di pasa. So boen, Judas e skrifi dati a ben de fanowdoe foe memre a gemeente baka na son prenspari waarheid na jejefasi (Judas 5). Soleki fa a sori dan den ben frigiti taki Jehovah ben e si san den ben e doe. Ija, te den foetoeboi foe en e broko den wet foe en foe espresi, e doti densrefi èn trawan, dan a e si (Odo 15:3). Den sortoe doe dati e hati en srefisrefi (Genesis 6:6; Psalm 78:40). Na wan sani di e gi frede èn e dwengi lespeki taki wi lawlaw libisma kan wroko tapoe a firi foe na Soeverein Masra foe na universum. A e loekoe wi ibri dei, èn te wi e doe ala moeiti di wi kan foe waka na ini den foetoestap foe en Manpikin, Jesus Krestes, dan a fasi fa wi e tjari wisrefi e meki en ati firi prisiri. So boen, meki noiti wi trowe den sortoe sani disi di e memre wi soleki fa Judas e pristeri den, ma meki wi teki den na ati. — Odo 27:11; 1 Petrus 2:21.

7. (a) Foe san ede a de tranga fanowdoe gi den sma di kisi foe doe nanga serjoesoe ogridoe foe soekoe jepi wantenwanten? (b) Fa wi alamala kan tan fara foe hoeroedoe?

⁷ Jehovah no e si wawan, ma a e handri toe. Foe di a de wan Gado foe geregtighèit, a e tjari strafoe kon na tapoe ogridoeman, na en reti ten (1 Timoteus 5:24). Den sma di e denki taki den kroetoestrafoe foe en na foe fositen historia nomo èn taki a no e broko en ede nanga na ogri di den e doe now, e kori densrefi nomo. A de toemoesi prenspari gi iniwan sma ini a ten disi di kisi foe doe nanga hoeroedoe, foe soekoe jepi wantewante na den kresten owroeman! (Jakobus 5:14, 15) Wi alamala moesoe de serjoesoe na ai gi a kefar di hoeroedoe de ini a feti na jejefasi foe wi. Ibri jari sma e lasi gowe — sma di e sluit uit komoto na wi mindri, a moro bigi ipi foe den na foe di den e doe hoeroedoe sondro foe sori berow. Wi moesoe teki a fasti bosroiti foe kakafoetoe gi iniwan tesi di srefi ben kan bigin tjari wi go na a sei dati. — Teki gersi Mateus 26:41.

Lespeki tirimakti di Gado seti

8. Soema ben de den „santawan” di den taki foe den na ini Judas 8?

⁸ Wan tra problema di Judas e sori go na tapoe na a mankeri foe lespeki gi tirimakti di Gado seti. Foe eksempre, na ini vers 8 a e taki dati den srefi ogri man dati de frantiwortoe gi ’a taki di den e taki na wan skempi fasi foe den santawan’. Soema ben de den „santawan” disi? Den ben de onvolmaakti man, ma den ben abi frantiwortoe di Jehovah en santa jeje ben poti na tapoe den skowroe. Foe eksempre, den gemeente ben abi owroeman, di ben abi a wroko foe wei na ipi foe Gado (1 Petrus 5:2). Den ben abi opziener di e rèis toe, soleki na apostel Paulus. Èn a skin foe owroeman na Jerusalem ben e wroko leki wan tiriskin, èn ben e teki bosroiti di ben abi krakti tapoe a heri kresten gemeente (Tori foe den Apostel 15:6). Judas ben e broko en ede srefisrefi taki son sma ben de ini a gemeente di ben e taki na wan skempi fasi foe den sortoe man dati noso ben e taki na wan blasfemia fasi foe den.

9. Sortoe eksempre foe no sori lespeki gi den wan di abi tirimakti Judas e kari?

⁹ Foe kroetoe a fasi foe taki disi di no e sori lespeki, dan Judas e kari na ini vers 11 ete dri eksempre leki sani foe memre wi: Kain, Bileam nanga Korak. Kain ben trowe a lobi-ati rai foe Jehovah èn foe espresi ben feti na baka en eigi pasi foe bita-ati di ben o abi dede leki bakapisi (Genesis 4:4-8). Bileam ben kisi doronomo warskow di sondro foe tweifri ben komoto foe wan fonten di ben moro hei leki libisma — srefi en eigi oema-boeriki ben taki nanga en! Ma Bileam ben denki ensrefi wawan èn ben tan go doro nanga a doti plan teige Gado en pipel (Numeri 22:28, 32-34; Deuteronomium 23:5). Korak ben abi en eigi posisi foe frantiwortoe, ma a no ben nofo gi en. A ben meki sma opo densrefi teige Moses, a moro safri-ati man na grontapoe. — Numeri 12:3; 16:1-3, 32.

10. Fa son sma di e libi na ini a ten disi ben sa kan fadon ini a trapoe foe „taki na wan skempi fasi foe santawan,” èn foe san ede wi no moesoe taki den sortoe taki dati?

¹⁰ Den eksempre disi e leri wi krinkrin foe arki na rai èn foe lespeki den wan di Jehovah e gebroiki na ini frantiwortoe posisi! (Hebrewsma 13:17) A makriki srefisrefi foe feni fowtoe na tapoe den owroeman di poti na wroko, bika den de onvolmaakti neleki fa wi alamala de onvolmaakti. Ma efoe wi e tan sori tapoe den fowtoe foe den èn e meki sma lasi lespeki gi den safrisafri, dan a no ben sa kan de so taki wi „e taki na wan skempi fasi foe den santawan”? Na ini vers 10, Judas e taki foe den wan di „e taki na wan skempi fasi foe ala den sani di den no sabi kwetikweti”. Son sma, ten na ten sa kroetoe wan bosroiti di a skin foe owroeman noso di a kroetoe komte teki. Tokoe, den no sabi den finifini tori di den owroeman ben moesoe loekoe foe den ben man teki wan bosroiti. So boen, foe san ede den moesoe taki na wan skempi fasi foe sani di den no sabi srefisrefi? (Odo 18:13) Den sma di e go doro foe taki den sortoe negatief sani disi ben sa kan tjari pratifasi kon ini a gemeente èn kande den ben kan agersi den nanga kefalek „klipston di kibri na ondro watra” na tapoe den konmakandra foe kompe bribiman (Judas 12, 16, 19). Noiti wi ben sa wani tron wan kefar na jejefasi gi tra sma. A moro betre taki ibriwan foe wi teki a bosroiti foe warderi den frantiwortoe man foe a tranga wroko foe den èn a gi di den e gi densrefi na a ipi foe Gado. — 1 Timoteus 5:17.

11. Foe san ede Mikaèl ben hori ensrefi foe no kroetoestrafoe Satan nanga skempi wortoe?

¹¹ Judas e taki foe wan eksempre foe wan sma di ben abi wan joisti lespeki gi tirimakti di ben seti. A e skrifi: „Di Mikaèl, a gran engel ben abi wan strei nanga Didibri èn den ben abi wan kesekese foe a dedeskin foe Moses, a no ben prefoeroe foe kroetoe en nanga skempi wortoe, ma a ben taki: „Meki a de so taki Jehovah piri-ai gi joe’ ” (Judas 9). A moi verslag disi di Judas wawan skrifi foe en na ini den Boekoe foe bijbel di sma skrifi nanga jepi foe Gado en santa jeje, e leri toe aparti lès. Na a wan sei, a e leri wi foe libi a kroetoestrafoe gi Jehovah. Sondro tweifri Satan ben wani teki a dedeskin foe a getrow man Moses foe a ben kan hori baka gi falsi anbegi nanga dati. Disi ben takroe srefisrefi! Tokoe, na wan saka fasi Mikaèl ben hori ensrefi foe tjari wan kroetoestrafoe kon, bika na Jehovah wawan ben abi a makti dati. Dan wi moro foeroe moesoe hori wisrefi foe no kroetoe getrow man di e meki moeiti foe dini Jehovah.

12. San den wan di abi frantiwortoe posisi ini a kresten gemeente ben sa kan leri foe na eksempre foe Mikaèl?

¹² Na a tra sei, den wan di abi makti di skotoe ini a gemeente kan leri wan lès toe foe Mikaèl. Te joe kaba loekoe en boen, ala di Mikaèl ben de a „gran engel”, edeman foe ala den engel, a no ben gebroiki en posisi foe makti na wan fowtoe fasi, srefi di den ben tjalensi en. Getrow owroeman e waka krosibei na baka na eksempre dati, ala di den e erken taki a gebroiki di den e gebroiki den makti na wan fowtoe fasi no e sori lespeki gi a soevereiniteit foe Jehovah. A brifi foe Judas ben abi foeroe foe taki foe man di ben abi lespeki posisi ini den gemeente, ma di ben teki a makti foe den foe gebroiki en na wan fowtoe fasi. Foe eksempre, na ini den vers 12 te go miti 14, Judas e skrifi wan hebi kroetoe foe „skapoeman di e gi densrefi njanjan sondro foe frede”. (Teki gersi Esekièl 34:7-10.) Nanga tra wortoe, a sani di ben kon na a fosi presi gi den ben de foe kisi wini gi densrefi, no gi na ipi foe Jehovah. Owroeman na ini a ten disi kan leri foeroe foe den sortoe takroe eksempre dati. Foe troe, den wortoe djaso foe Judas e sori na wan krinkrin fasi san wi no wani kon tron. Te wi e broko kindi gi a prakseri di wi e prakseri wisrefi nomo, dan wi no man de sroedati foe Krestes; wi abi en toemoesi druk nanga wi eigi afersi. A moro betre taki wi alamala libi akroederi den wortoe foe Jesus: „Moro kolokoe de ini a gi foe sani, leki ini a kisi foe sani.” — Tori foe den Apostel 20:35.

„Tan na ini a lobi foe Gado”

13. Foe san ede wi alamala moesoe abi na opregti angri foe tan na ini a lobi foe Gado?

¹³ Krosibei a kaba foe a brifi foe en, Judas e gi a fajafaja rai disi: „Tan na ini a lobi foe Gado” (Judas 21). No wan sani de di sa jepi wi foe tan feti a kresten orlokoe moro boen leki a wan sani disi, foe tan de den sma di Jehovah Gado lobi. Te joe loekoe en boen, lobi na a moro prenspari eigifasi foe Jehovah (1 Johanes 4:8). Paulus ben skrifi gi den kresten na Rome: „Mi abi na overtoigi taki no wan dede noso libi, no wan engel noso tiri, no wan sani di de now noso wan sani di moesoe kon ete, no wan makti, no wan hei noso dipi, no wan tra mekisani sa man prati wi foe a lobi foe Gado, di de na ini Krestes Jesus, wi Masra” (Romesma 8:38, 39). Ma fa wi e tan na ini a lobi dati? Poti prakseri tapoe dri foe den bosroiti di wi kan teki, akroederi Judas.

14, 15. (a) San a wani taki foe bow wisrefi na tapoe a „moro santa bribi” foe wi? (b) Fa wi ben sa kan ondrosoekoe a fasi fa wi jeje fetisani de?

¹⁴ Judas e froeteri wi fosi foe tan bow oensrefi na tapoe a „moro santa bribi” foe wi (Judas 20). Soleki fa wi ben si na ini na artikel na fesi, dan disi na wan sani di e go doronomo. Wi de leki oso di moesoe kisi moro nanga moro krakti teige den elementi foe a weer di e kon takroe moro nanga moro. (Teki gersi Mateus 7:24, 25). So boen, meki wi noiti no froetrow toemoesi tapoe wisrefi. A moro betre taki wi loekoe pe wi kan bow wisrefi tapoe a fondamenti foe a bribi foe wi, kon tron moro tranga, moro getrow sroedati foe Krestes. Foe eksempre, wi ben sa kan loekoe den pisi foe wi jeje fetisani soleki fa a skrifi na Efeisesma 6:11-18.

¹⁵ Fa a de nanga wi eigi jeje fetisani? A „bigi skilt foe bribi” foe wi tranga soleki a moesoe de? Te wi e loekoe go baka na den jari di pasa no so langa ete, wi e si wan toe marki taki wi kon doe en safrisafri, soleki a go di a konmakandra fisiti foe wi e go na baka safrisafri, a lasi di wi e lasi faja gi a diniwroko, noso a lasi di wi e lasi faja gi persoonlijk studie? Den sortoe marki dati kan abi kefalek bakapisi! Now wi moesoe doe wan sani foe bow èn tranga wisrefi na ini a waarheid. — 1 Timoteus 4:15; 2 Timoteus 4:2; Hebrewsma 10:24, 25.

16. San a wani taki foe begi nanga santa jeje, èn san na wan sani di wi moesoe aksi Jehovah doronomo?

¹⁶ Wan di foe toe fasi foe tan na ini a lobi foe Gado na foe tan „begi nanga santa jeje” (Judas 20). Dati wani taki foe begi ondro a krakti foe a jeje foe Jehovah èn akroederi a Wortoe foe en di sma skrifi nanga jepi foe en santa jeje. Begi na wan prenspari jepisani foe kon persoonlijk moro krosibei na Jehovah èn foe sori en a gi di wi e gi wisrefi na en. Noiti wi moesoe sori mi-no-kefasi gi a heri moi grani disi! Èn te wi e begi, wi kan aksi — te joe loekoe en boen, tan aksi — foe kisi santa jeje (Lukas 11:13). Dati na a moro tranga krakti di wi kan kisi. Nanga a sortoe jepi dati, ala ten wi kan tan na ini a lobi foe Gado èn horidoro leki sroedati foe Krestes.

17. (a) Foe san ede na eksempre foe Judas ini a tori foe sori sari-ati de so aparti? (b) Fa ibriwan foe wi kan tan sori sari-ati?

¹⁷ A di foe dri, Judas e gi wi tranga foe tan sori sari-ati (Judas 22). En eigi eksempre ini a tori disi de aparti. Te joe loekoe en boen a ben abi leti foe atibron bika kroektoedoe, hoeroedoe èn a fadon di sma ben fadon komoto na bribi, ben e kon na wan kibri fasi na ini a kresten gemeente. Ma tokoe, a no ben broeja èn a no ben prakseri taki den ten ben de toemoesi kefalek foe sori so wan „safoe” fasi foe sari-ati. Nôno, a ben gi den brada foe en tranga foe tan sori sari-ati te dati kan, èn ben e taki-go-taki-kon na wan switi fasi nanga den sma di e tweifri èn a ben ’hari den wan’ di e go krosibei foe serjoesoe sondoe ’poeroe foe a faja’ srefi (Judas 23; Galasiasma 6:1). Na ini a ten disi di foeroe nanga someni problema, dan dati na wan heri moi froemane gi owroeman! Den toe e meki moeiti foe sori sari-ati pe wan gron de foe doe dati, ala di den e tan kánkan pe dati de fanowdoe. Wi alamala so srefi wani sori sari-ati gi makandra. Foe eksempre, na presi foe meki pikinpikin sani gro kon bigi, wi kan gi pardon foeroefoeroe. — Kolosesma 3:13.

18. Fa wi kan de seiker taki wi kan wini a feti na jejefasi foe wi?

¹⁸ Na orlokoe di wi e feti a no wan makriki wan. Soleki fa Judas e taki, na „wan tranga feti” (Judas 3). Den feanti foe wi krakti. A no Satan wawan ma a takroe grontapoe foe en èn wi eigi onvolmaakti fasi, alamala tanapoe teige wi. Tokoe wi kan de seiker taki wi o wini! Foe san ede? Bika wi de na a sei foe Jehovah. Judas e tapoe a brifi foe en nanga a memre di a e memre wi taki nanga reti, „glori, kownoefasi, makti nanga tirimakti, gi ala têgo ten di pasa èn now èn te na ini ala têgo ten”, e gi na Jehovah (Judas 25). Disi a no wan prakseri di e gi wi frede nanga lespeki? Tweifri kan de dan taki a sèm Gado disi „kan kibri oenoe foe no naki foetoe fadon”? (Judas 24) Kwetikweti! Meki ibriwan foe wi abi a fasti bosroiti foe tan kakafoetoe gi hoeroedoe, foe lespeki tirimakti di Gado seti, èn foe tan na ini a lobi foe Gado. Na a fasi dati, makandra wi sa prisiri ini wan toemoesi moi wini foe a feti.

[Foetoewortoe]

Aksi foe loekoe sani sjatoe baka

◻ Fa a brifi foe Judas e leri wi foe kakafoetoe gi hoeroedoe?

◻ Foe san ede a de so prenspari foe lespeki tirimakti di Gado seti?

◻ San de so serjoesoe te makti ini a gemeente e gebroiki na wan fowtoe fasi?

◻ Fa wi kan wroko foe tan na ini a lobi foe Gado?

[Prenki na tapoe bladzijde 15]

Tra fasi leki sroedati foe Rome, krestensma de ini wan feti na jejefasi

[Prenki na tapoe bladzijde 18]

Kresten skapoeman e dini, no foe di den e prakseri den eigi boen nomo, ma foe lobi ede