Poti prakseri tapoe den ’warskow di poti na wi fesi’!
1, 2. Sortoe leri na brifi foe Judas e gi?
JEHOVAH de wan Gado di e gi warskow. (2 Kon. 17:12-15; Ezech. 3:17-21). En pipel sabi dati a no wani dati wan sma lasi gwe, foe di a de feti baka wan libifasi di e tjari pori kon (Ezech. 18:23, 32). Èn Jehovah Kotoigi de séker grantangi dati a hemel Tata foe den e warskow, e tiri èn ferloesoe den sma di lobi en.
2 Na brifi foe Judas di skrifi ondro krakti foe santa jeje e gi warskow èn tiri toe. Ini na artikel na fesi wi ben leri foe san-ede Judas ben gi tra bribiman tranga foe „stré sondro foe weri gi na bribi”. Meki wi poti prakseri now ondro begi na den warskow foe en ini na ten di psa. — Rom. 15:4.
Loekoe boen nanga na mankeri foe bribi
3. Foe san Judas „ben wani foe memre” tra bribiman?
3 Judas e meki wi jere moro fara wan warskow foe a tori foe bribi:
„Mi wani memre oenoe, ala di oen sabi ala sani wan tron foe alaten, taki Jehovah, ala di a ben loesoe wan pipel poeroe foe Egypte, bakaten ben pori den di no ben sori bribi” (Judas 5).
Efoe kristen no „stré sondro foe weri gi na bribi” tapoe wan fasi foe wini, den kan lasi na boen positsi foe den na fesi Jehovah Gado. Foe meki disi no pasa, Judas „ben wani foe memre” tra bribiman di ben de ini gevaar na den sani di den ben leri wan tron foe na fasi fa Gado ben handri nanga sma di no ben de getrow ini fosi ten.
4. Fa èn foe san-ede Jehovah ben „ferloesoe” den Israëlsma di ben de ini katibo?
4 Ini vers 5 Judas e tjari fosi kon na krin taki Jehovah Gado ben „ferloesoe” ofoe ben fri den Israëlsma poeroe foe na katibo foe Egypte, pe den ben tjari go na ini. Gado ben doe disi baka di den ben gi jesi na a njan foe na fosi Pascha. Na wondro ferloesoe komoto foe Egypte Jehovah ben meki doe kon, foe di na pipel di ben tjari go wan dé ini katibo ben handri ini bribi. — Ex. 12:1-14, 31
5. (a) San de na agersi Egypte, èn tapoe na gron foe san Jehovah e ferloesoe sma foe na Egypte disi? (b) San den kotoigi foe Jehovah di gi densrefi abra moe doe te foe kaba foe kisi ferloesoe?
5 So srefi toe Jehovah e ferloesoe sma komoto foe na agersi Egypte, na grontapoe foe libisma di kon de vreemd foe Gado (Openb. 11:18). A de doe disi, foe di ini bribi den e teki en leki na Gado foe a ferloesoe foe den èn Jezus Kristus leki na agersi prenki Pascha-Lam di nanga na broedoe foe en den ben bai komoto foe na grontapoe disi (1 Kor. 5:7). Ma efoe wan kotoigi foe Jehovah di gi ensrefi abra wani kisi ferloesoe, efoe ini hemel ofoe na grontapoe, dan a moe tan getrow na en èn noiti fadon komoto foe a bribi èn drai go baka na a ogri grontapoe disi nanga na sondoe katibo, neleki den Israëlsma di ben kon fri no ben mag drai go na Egypte baka (Deut. 17:16; Matt. 24:13). Wan bribi di no e stop noiti de toemsi prenspari, bika ala di Jehovah ben „ferloesoe” wan pipel komoto foe Egypte, „bakaten ben pori den di no ben sori bribi”, den di ben wani drai go baka na Egypte ofoe na a libifasi foe Egypte. (Teki gersi 1 Korinte 10:1-12; Exodus 32:4-6; Numeri 25:1-18; 21:4-9; 14:35-38). Efoe den kotoigi foe Jehovah ini disi ten wani kisi ferloesoe te foe kaba, dan den moesoe foe kibri na bribi foe den. — Hebr. 3:12, 13.
Takroe bakapisi foe hoeroedoe
6. (a) San ben de na „fosi positsi” foe den engel, èn de na „a joisti presi” foe den? (b) Sortoe sondoe bepaalde engel ben doe? (c) Fa wi kan teki na sondoe libifasi foe den oproeroe engel gersi nanga di foe den „sma sondro Gado”, foe soema Judas e taki foe den?
6 Judas ben gi wan warskow eksempre di e meki toe, di a ben skrifi:
„Èn den engel di no ben hori den fosi positsi, ma ben libi den égi joisti libipresi, a ben kibri ini tégo banti ondro deki doengroe gi na kroetoe foe na bigi dé” (Judas 6).
Den engel ben meki leki jeje mekisani, nanga na tégo libi na den fesi ini hemel (Ps. 103:20; 104:4; Hebr. 1:7). Dati ben de na bigin foe den, „a fosi positsi foe den”. „Den égi joisti libipresi”, ofoe na presi pe den ben sa moe libi, ben de ini den hemel di wi no kan si. Ma son engel ben de so asranti foe libi den joisti hemel oso. Na apostel Petrus ben taki dati den „ben sondoe”, ala di wantron-wantron baka dati, a de ferteri foe sani di ben pasa ini Noach ten (2 Petr. 2:4, 5). Disi e poti wi prakseri tapoe na ten bifo na froedoe. di „den manpikin (na Alexandrijnse Anoeboekoe foe na Septuaginta-vertaling foe na eeuw di e meki féfi e taki „engel”) foe na troe Gado”, a de krin, foe di den teki wan skin foe meti, ben trangajesi èn ben teki moi oema leki wefi (Gen. 6:1, 2). Foe di seks-libi nanga oema ben de wan sani di no de natuurlijk gi jeje mekisani, den engel disi ben sondoe, foe di den ben waka baka wan lostoe di ben fowtoe krinkrin (Jak. 1:13-15). Na sosrefi toe den „sma sondro Gado” di Judas ben taki foe den, ben abi na lostoe foe abi hoeroedoe nanga sma foe na tra sekse.
7, 8. (a) San ben psa nanga den trangajesi engel? (b) San wi moe doe foe datede foe tan ini wan positsi foe ferloesoe?
7 Na sani di ben psa nanga den trangajesi engel, ben moe de leki wan warskow gi kristen ini Judas ten èn a moe de leki wan warskow gi Jehovah Kotoigi ini disi ten toe. Ala di den engel dati ben kan lon komoto gi na dede ini na sondoefroedoe, foe di den ben libi na libisma skin na baka, tokoe na pasi ben tapoe gi den foe drai go baka na a „fosi positsi” foe den leki santa, jeje mekisani di e prisiri densrefi ini na leti foe a rai èn boen-ati foe Gado. Moro foeroe den ben kibri den ini „tégo banti” nanga na makti foe Gado foe skotoe sani, gi na „kroetoe foe na bigi dé” foe Gado foe a pori foe den. Bewijsi no de, dati ini na pisi ten disi den kan teki wan skin foe meti èn den e tan na dorosé foe Jehovah dienst, ini deki jeje doengroe, ini na sokari Tartarus. — 2 Petr. 2:4.
8 Foe di trangajesi engel no ben de fri foe fadon go ini pori, Jehovah Kotoigi ini disi ten e froestan, dati den kan tan soso ini wan toestand foe kisi ferloesoe te den „stré sondro foe weri gi na bribi”. Wi moe kakafoetoe troetroe gi sma di wani pasa den marki di Gado ben poti èn di e proeberi foe doti na skin.
9, 10. (a) Na sortoe morele sondoe den sma foe Sodom nanga foto di ben de krosbé ben gi densrefi abra? (b) Sortoe warskow eksempre Sodom, Gomorra èn tra foto ben gi?
9 Judas e kari wan eksempre di e meki dri èn e taki:
„Na sosrefi toe Sodom nanga Gomorra nanga den foto di ben de na lontoe, baka di a tapoe a srefi fasi den ben doe hoeroedoe pasa marki leki den di ben kari na fesi èn ben waka baka skin foe gebroiki na wan fasi di no fiti, ben poti gi wi leki wan warskow eksempre, foe di den e ondrofeni na strafoe foe kroetoe foe tégo faja” (Judas 7).
„Sodom nanga Gomorra nanga den foto di ben de na lontoe”, a de krin, ben de Adama nanga Zeboïm, èn kande tra foto ete ini na District. Foe na ogri ede foe den sma di ben libi drape, meki Jehovah ben pori ala den foto disi nanga jepi foe wan alen foe swarfoe nanga faja di ben komoto foe hemel, soso Zoar ben poeroe na ini, pe „na regtvaardiki Lot” nanga en oemapikin ben lon go (2 Petr. 2:6-10; Gen. 14:2; 19:18-29; Deut. 29:22, 23). A de krin dati nanga den wortoe „Na sosrefi toe”, Judas ben tjari den sani di ben pasa nanga den foto dati kon akroederi nanga san ben pasa nanga den trangajesi engel, di ben teki oema leki wefi, san ben de onnatuurlijk gi jeje meki-sani. The Jerusalem Bible e taki foe disi: „Na hoeroedoe foe Sodom nanga Gomorra nanga den tra foto di ben de krosbé ben de sosrefi toe onnatuurlijk.” Den sma di ben libi ini den foto disi no wawan ben doe hoeroedoe nanga oema, ma ben kowroe den lostoe foe man èn kande srefi foe meti. (Teki gersi Leviticus 18:22-25.) Wan ipi foe man nanga boi ini Sodom ben lostoe foe abi sekslibi nanga den sma di ben kon ini Lot oso èn di na ipi ben denki dati den ben de man, ma den no ben man foe doe disi di den toe engel ben naki den nanga breni, èn baka dati ben fri Lot foe na foto di ben go na pori. — Gen. 19:1-17.
10 Sodom nanga Gomorra nanga den foto di ben de na lontoe ben gi wan warskow eksempre, foe di den ben ondrofeni foe Jehovah Gado na „strafoe foe kroetoe foe tégo faja”, tégo pori. Den broko ston-ipi di ben tron krofaja foe moro pikinso Sodom, Gomorra, Adama nanga Zeboïm de, soleki sma e prakseri, ondro den watra foe na zuidsé pisi foe na Sowtoese (Dede se), ofoe ini na kontren dati. No foe den foto disi, no foe den sma foe den, wi kan taki soboen, dati den e bron ete. A de krin dati den foto srefi, èn no ala den sma di ben libi na ini den, ben pori foe tégo, bikasi a gersi dati moro pikinso wantoe sma di ben libi wan dé drape, sa kisi wan opobaka (Matt. 10:15; 11:24; Openb. 20:12, 13). San ben psa nanga den porifasi foto disi, de wan dramatisch warskow foe wan hoeroedoe libifasi, wan warskow pe Jehovah Kotoigi ini disi ten moe poti prakseri a tapoe.
No wiswasi makti di Gado ben gi èn di de a joe tapoe
11. Fa den „sma sondro Gado” di ben kon na mindri Gado pipel ben kan teki gersi nanga den porifasi sma foe Sodom nanga den foto di ben de na lontoe?
11 Judas ben sori tapoe den „sma sondro Gado” nanga den wortoe:
„Ma na sosrefi toe den sma disi di e gi densrefi abra na dren, e doti na skin, èn den e wiswasi tirimakti èn e taki skempi foe gloriwan” (Judas 8).
„Ma sosrefi toe”, ofoe a de krin tapoe net so wan fasi leki den porifasi sma foe Sodom nanga den foto na lontoe ben doti den skin nanga jepi foe loesoe libifasi nanga onnatuurlijk sekslibi, na so den ogri sma di ben kon na mindri a pipel foe Gado ben doti a skin foe den foe meti. Den no ben abi respeki foe na rai foe na apostel foe „lon komoto gi hoeroedoe”. — 1 Kor. 6:18-20.
12. (a) Fa den „sma sondro Gado” „ben gi densrefi abra na dren”? (b) San e wakti sma di e doe hoeroedoe èn di no abi beraw?
12 Den sma dati di ben kon na ini „ben gi densrefi sosrefi toe na dren”, kande foe di den ben proeberi foe hori den loekoe foe sani hé nanga jepi foe proféti dren di den taki den ben kisi. (Teki gersi 2 Petr. 2:1; Deut. 13:1-5.) Foe taki foe dati, ini den dren foe den kande seks fantasie di no ben de krin ben de na ini, noso den wortoe disi kan sori a tapoe dati den leri foe den ben de soso „sani di den ben denki”. Wans fa a no fa, den „sma dati sondro Gado” ben e loekoe na maniri pe den ben sa kan feni okasi foe doe hoeroedoe, nanga ini prakseri dati sondro foe kisi strafoe den ben kan gi densrefi abra na wan libifasi di no de krin. No meki nowan kotoigi foe Jehovah ini disi ten no fadon noiti go ini so wan trapoe! Na Moro Gran-kroetoeman sondro degedege sa tjari na strafoe kon tapoe sma di ben doe hoeroedoe èn di no abi beraw. — Gen. 18:25.
13. Sortoe fasi den hoeroedoe „drenman” ben sori gi den makti di Gado ben poti?
13 Den hoeroedoe „drenman” dati „ben wiswasi sosrefi toe tiri-makti èn ben taki skempi foe gloriwan”. Tapoe wan asranti fasi den ben wiswasi makti di Gado ben poti (Odo 21:4; 2 Petr. 2:10). Neleki den trangajesi engel den man dati ben abi wan oproeroe jeje fasi èn den ben ferdini foe kisi wan takroe kroetoe, foe di den no ben abi troetroe respeki gi na Universele Soeverein èn en lobi Manpikin.
14. Soema ben de den „gloriwan”?
14 Den sma dati sondro Gado ben taki skempi toe foe „gloriwan” (Letterlek „foe glorifasi”), a de krin dati a de den sma di Jehovah Gado nanga Jezus Kristus ben gi wan séker glori (Joh. 17:22; 1 Petr. 4:12-14). Foe di so wan glori, ofoe grani, ben komoto foe Gado, a no de foe taki, dati wan direct grani no ben moe gi na a boen-ede sma na grontapoe di ben kisi na grani disi. Ma ala kotoigi foe Jehovah moe respeki so wan „glori” èn taki a srefi fasi foe en, nanga bigi grani gi Jehovah Gado na a fosi presi. — 1 Sam. 2:30.
15. (a) Fa den „drenman” di ben doti na skin ben taki foe „gloriwan”? (b) San wi moe doe efoe wi ben sa kisi na firi foe wiswasi makti di Gado ben gi?
15 Den sma foe Kristus salfoe bakaman di e dini getrow leki kristen opziener, ben kisi séker glori ofoe grani. Kompe-Kotoigi moe wroko makandra nanga den èn jepi den ini a diniwroko foe Gado. Meki wi no tjari wisrefi leki den „drenman” ini Judas ten, di ben doti na skin, ben wiswasi Jehovah tirimakti èn no ben abi respeki gi na glori di ben komoto foe en, ma ben taki skempi foe den sma di den weri so wan glori fasi gi leki wan krosi. (Teki gersi 3 Joh. 9, 10.) Soboen, srefi efoe wi e kisi wan firi foe wiswasi makti di komoto foe Gado, meki ondro begi wi soekoe a jepi foe Jehovah foe kenki wi fasi foe loekoe sani.
Na toemsi moi eksempre foe Michaël
16. Sortoe difrenti de na mindri na gran-engel Michaël èn den „drenman” di no abi respeki?
16 Gi na boen foe wi Judas e teki wan moi eksempre, te a de taki:
„Ma di na gran-engel Michaël ben abi wan kesekese nanga Didibri èn ben tak-go-tak-kon foe Mozes skin, a no ben dorfoe foe tjari wan kroetoe kon tegen en ini skempi wortoe, ma a ben taki: ’Jehovah moe strafoe joe’” (Judas 9).
Fa a ben de wan bigi difrenti di ben de na mindri den „drenman” di no ben abi respeki èn na gran-engel Michaël, di ben tron wi Masra Jezus Kristus! (Teki gersi Odo 8:22-31; Johannes 6:62; Filipi 2:5-11; 1 Thessalonika 4:15, 16). Te den „drenman” sondro Gado ben o taki skempi foe Gado dienstknekti, dan den e gi densrefi wan fri di srefi Jehovah Manpikin no ben gi ensrefi di a ben abi wan kesekese nanga Satan foe na skin foe na hebrew proféti Mozes. Wan tori di ben skrifi kaba ini bijbel foe a sani disi no ben de. Ma tapoe wan ofoe tra fasi di no kon na krin, Judas ben kisi den bodoi disi èn ben skrifi den foe na boen foe wi.
17. (a) San Michaël no ben doe ini na kesekese foe na skin foe Mozes, èn foe san-ede? (b) Fa Michaël ben gi Jehovah pipel wan eksempre foe respeki gi makti di Gado ben poti?
17 A ben kan de so dati na Didibri ben wani abi Mozes dede skin foe bigin wan sortoe anbegi foe na skin disi èn na a fasi disi doti a pipel foe Jehovah. Tokoe Michaël no ben gebroiki skempi wortoe foe tjari wan kroetoe kon tegen na Didibri. Michaël no „ben dorfoe” foe doe disi, foe di a ben abi wan joisti frede gi Jehovah. Sosrefi toe a no ben waka a fesi na ten di Jehovah ben poti foe handri nanga Satan (Openb. 12:7-9; 20:1-3, 7-10). Na presi foe dati, Jehovah lobi Manpikin ben sori respeki gi na Moro Gran-kroetoeman èn a ben gi en na reti foe strafoe na Didibri. Foe datede meki Michaël ben taigi Satan: „Jehovah moe strafoe joe.” Ala di den wortoe foe Michaël no ben de srapoe, tokoe a ben sori en krakti foe di a ben tan hori ai tapoe Mozes skin, èn Jehovah ben beri na proféti Mozes ini wan grebi di nowan sma sabi pe a de (Deut. 34:1-6). Ini ala den sani disi, Gado Manpikin ben gi Jehovah pipel séker wan toemsi moi eksempre foe respeki gi makti di Gado ben gi. Meki wi waka baka na eksempre disi.
18. Foe san-ede wi kan taki dati den sma di ben wani doti na skin, no ben abi jeje fasi?
18 Leki wan kontrari, Judas e taki disi now:
„Ete den sma disi e taki skempi foe ala sani di den no sabi troetroe; ala den sani den e froestan foe nature neleki den meti di no abi froestan, ini den sani dati den e tan pori densrefi” (Judas 10).
Ala di den sma di ben wani pori na skin ben de moro lagi leki Michaël, di no ben tjari wan kroetoe kon tapoe Satan ini skempi wortoe, dan no wawan den ben taki skempi foe „gloriwan”, ma sosrefi toe „foe ala (jeje) sani di den no sabi troetroe” ofoe e froestan troetroe. Foe di den „no ben abi jeje fasi” (Judas 19), den no ben kan froestan jeje afersi (1 Kor. 2:6-16). Den prakseri, pasi, doe nanga wroko foe Jehovah ben de vreemd gi den sortoe „sma disi sondro Gado”.
19. Fa den „sma sondro Gado” ben de leki „meti di no abi froestan”?
19 Foe na respeki di den abi gi Jehovah Gado, meki no na gran-engel Michaël, no den tra regtvaardiki engel e taki skempi foe den sma di Gado ben gi wan séker glori. Ma den „sma disi sondro Gado” ben doe disi wel, foe di den ben gi densrefi abra krinkrin na lostoe foe meti. Den no ben e froestan jeje sani, ma soso den sani di ben wroko tapoe den lostoe foe den skin. Soboen, neleki meti, di e broko den ede soso foe na skin, na so den ben poti na prakseri foe prisiri na skin di fadon. Den sma disi di ben wani foe prisiri den lagi lostoe foe den senwe, ’ben pori densrefi’ ini sondoe foe a skin. Na so fasi den ben sori dati den no ben de moro betre leki „meti di no abi froestan, di foe nature gebore foe den kisi den èn kiri den”, sondro wan enkri howpoe tapoe wan opobaka. — 2 Petr. 2:9-13.
20. Te wi loekoe den wortoe foe Judas te so fara, dan sortoe libifasi getrow kotoigi foe Jehovah moe feti na en baka?
20 Fa a de wan toemsi prenspari sani dati Jehovah Kotoigi ini disi ten kakafoetoe krinkrin gi falsi leriman, sma di wani foe doti na skin, èn sma di e wiswasi den makti di Gado ben poti! Ma efoe na rai foe Judas di wi loekoe te nanga now tjari wan fowtoe kon na krin ini wi persoonlek fasi ofoe pasi, dan meki wi meki esi dan foe kenki wi libifasi, èn soekoe ondro begi na jepi foe wi hemel Tata. Èn meki alaten ini jeje fasi wi njan boen dati wi ben poti prakseri tapoe „den warskow di ben poti na wi fesi”.
(Wi sa go moro fara nanga na loekoe foe na boekoe Judas ini na tra nomroe foe Na Wachttoren.)
Joe kan memre den punt disi ete?
□ Fa na ondrofeni foe den Israëlsma ini owroeten e sori dati wi moe abi wan bribi di no e stop foe kisi ferloesoe?
□ Sortoe warskow eksempre den trangajesi engel e gi wi?
□ Sortoe warskow de gi kristen ini san psa nanga Sodom, Gomorra enz.?
□ Foe san-ede wi no moe poti makti di Gado ben poti na wan sé?
□ Sortoe eksempre foe respeki gi makti na gran-engel Michaël ben gi, èn fa wi moe handri datede?
[Prenki na tapoe bladzijde 270]
Neleki Gado „ben ferloesoe wan pipel poeroe foe Egypte”, na so kristen kisi ferloesoe komoto foe na ogri grontapoe disi. Ma foe na troetroe ferloesoe di e kon, wan bribi de fanowdoe di no e tapoe
[Prenki na tapoe bladzijde 272]
San ben pasa nanga Sodom nanga den foto a lontoe de wan warskow gi hoeroedoe libifasi