„Loekoe! Jehovah ben kon nanga en santa tindoesoendoesoen”
„Loekoe! Jehovah ben kon nanga en santa tindoesoendoesoen foe tja a strafoe foe kroetoe kon tapoe ala soema, èn foe overtoigi ala den ogri sma foe ala den ogridoe foe den di den ben doe tapoe wan ogri fasi, èn foe ala den tergi sani di den ogri sondari ben doe tegen en.” — Jud. 14, 15.
1. Fa wi moe si Jehovah leki na Moro Hé Kroetoeman?
JEHOVAH, na Moro Hé Kroetoeman, e ferdini dati sma respeki en (Jes. 33:22). Tokoe foeroe sma e handri nanga en sondro respeki. Na mindri den sortoe asranti ogridoe sma disi joe abi sosrefi toe den „ogri sma” foe soema na discipel Judas ben skrifi foe den ini en brifi di Gado ben gi en ondro santa jeje. Ma nowan sma no kan poti Gado na wan sé sondro foe no kisi strafoe, bikasi no wan degedege no de dati „Jehovah e kon foe tjari a strafoe foe kroetoe kon tapoe den ogri sma”. — Jud. 14, 15; Joh. 9:1-4.
2. (a) Sortoe punt wi loekoe te nanga now ini na brifi foe Judas? (b) San den rai di Judas gi moro fara moe doe gi wi?
2 Ini na takimakandra foe wi na fesi foe a brifi foe Judas, krakti ben poti a tapoe o fanowdoe a de foe kakafoetoe gi falsi leriman èn sma di wani flaka na skin, ma foe poti prakseri tapoe warskow foe a bijbel èn foe sori respeki gi makti di Gado ben poti (Jud. 1:10). Meki na rai di Judas e gi moro fara meki na respeki foe wi gi na Moro Hé Kroetoeman kon moro bigi, sodati wi kan tan tanapoe na mindri en kotoigi stéfi nanga tégo libi na wi fesi.
„Heloe foe den!”
3. Sortoe fowtoe Kain ben meki?
3 Judas ben skrifi foe den „ogri sma” di e tergi Jehovah:
„Heloe foe den, bika den ben go ini na pasi foe Kain èn den ben hari go ini na verdwaal pasi foe Bileam foe paiman ede, èn den ben lasi gwe ini na oproeroe taktaki foe Korach!” (Jud. 11)
Foe di Judas ben taki „heloe foe den”, a ben sori dati den „ogri sma” di ben foefoeroe pasi kon ini na gemeente foe Jehovah pipel, heloe e wakti den. (Teki gersi Lukas 11:42-47, 52.) Den sma dati ben „go ini na pasi foe Kain”. Ala di Gado ben feni Abel nanga en ofrandi foe meti nanga broedoe boen, a ben trowe na sondro broedoe ofrandi foe Kain, di ben tjari go nanga wan jeje fasi di no ben de joisti. Kain no ben abi bribi èn a no ben abi respeki gi na glori nanga warti fasi di Gado ben gi Abel. Ini en djaroesoe nanga ogr’ati Kain ben poti srefi wan warskow foe Gado na wan sé èn a ben kiri en brada. — Gen. 4:2-8; Hebr. 11:4; 1 Joh. 3:12.
4. (a) San ben de „na pasi foe Kain”? (b) Foe san-ede joe moe tan farawe foe a „pasi foe Kain”?
4 Kain ben sori spesroetoe dati a no ben abi respeki gi Jehovah, èn na libifasi foe en pe a no ben sori respeki, ben kon nen na „pasi foe Kain”. En oproeroe libifasi nanga takroe bewégi foe ati ben fowtoe krinkrin, èn a srefi de so ini disi ten nanga ibriwan sma toe di e taki dati a de wan Kotoigi foe Jehovah, ma di e proeberi foe kenki na no-ferdini boen-fasi foe Gado kon ini wan rede foe krin ensrefi foe libi wan loesoe fasi. So wan sma e go ini na „pasi foe Kain”. Neleki Kain di ben abi ogr’ati gi en brada èn ben kiri en, na so den sortoe sma disi de „kiriman”, foe di den abi ogr’ati gi getrow kristen, di Jehovah gi na grani foe en dienst (1 Joh. 3:15). Gado ben froekoe Kain, èn ini na ten foe na Froedoe en bakapikin ben wai poeroe. Na a srefi fasi „heloe” e wakti den sma di e waka baka „na pasi foe Kain”, foe di a libifasi foe den no e prisi Jehovah èn e tjari pori kon.
5. (a) Sortoe libifasi Bileam ben waka na en baka? (b) Soema ini Judas ten „ben hari go ini na verdwaal pasi foe Bileam”? (c) San sa pasa nanga sma di e proeberi foe pori now na pipel foe Jehovah foe di den e tjari den go so fara foe bribi falsi leri èn foe gi densrefi abra na lostoe foe meti?
5 Den ogri sma di ben doti na skin „ben hari go toe ini na verdwaal pasi foe Bileam foe wan paiman ede”. Bileam ben saka ede gi na paiman di kownoe Balak ben presteri en alaten baka èn a ben proeberi foe froekoe den Israëlsma dri tron, ma Jehovah alaten baka ben kenki na froekoe kon ini wan bresi. Foe dat’ede na gridi Bileam ben gi na rai, dati efoe den Israëlsma ben sa kan kori go ini falsi anbegi èn ben sa kan kori go ini lostoe foe meti, Gado srefi ben sa froekoe en égi pipel. Na ogri rai disi ben teki, èn foe na loesoe libifasi foe den djoe ede, 24.000 foe den ben dede foe wan plaag di ben komoto foe Gado èn foe direct dedestrafoe (Num. 22:1-25:9; Openb. 2:14). Bakaten Bileam srefi ben lasi libi foe di den sma di a ben proeberi foe froekoe, ben kiri en. (Num. 31:8). Na so toe rampoe sa kon toe tapoe sma di e taki dati den de Kotoigi foe Jehovah, ma di nanga gridi bewégi foe ati e proeberi foe pori Jehovah pipel foe tjari den kon so fara foe bribi falsi leri èn foe gi densrefi abra na lostoe foe meti. Na sani disi ben pasa wantoe tron ini na ten disi, èn getrow Kotoigi foe Jehovah di gi densrefi abra moe loekoe boen foe dat’ede!
6, 7. (a) Sortoe fowtoe na levietsma Korach ben meki? (b) San ben psa nanga Korach nanga den sma di ben sroiti densrefi na en? (c) Fa wi moe si „oproeroe taktaki”?
6 Judas ben sori toe tapoe na warskow eksempre foe na levietsma Korach, di ben bigin foe proeberi „oproeroe taktaki”. Foe di a soekoe foe bigi nen ben troesoe en, meki tapoe wan falsi fasi a ben gi Mozes nen dati na wan gridi fasi a ben seti sani dati en égi brada Aäron, ben tron granpriester. ala di a ben gi Aäron nen dati a ben teki na grani foe na priesterwroko gi ensrefi nanga en famiri. Korach no ben respeki na glori ofoe wartifasi di Jehovah ben gi na Aäron nanga en manpikin, ma a ben meki oproeroe nanga den sma di Gado ben poti.
7 Ala di Korach nanga bepaalde Rubensma di ben teki en sé, ben loesoe poeroe foe Egypte, tokoe den no ben kon ini na Pramisi Kondre. Na presi foe dati, na gron ben opo en mofo èn sonwan foe den ben beri libilibi, ala di faja di ben komoto foe Jehovah ben njan trawan. Moro fara 14.700 Israëlsma di ben knoroe foe na kroetoe disi foe Jehovah ben dede, leki wan bakapisi foe wan krawasi di ben komoto foe Jehovah (Num. kap. 16). Na tjari foe na strafoe foe na kroetoe foe Gado kon tapoe den oproeroe „ogri sma” ben tanapoe so faste, dati Judas ben taki dati den „ben lasi gwe”. A ben de leki na kroetoe tapoe den ben tjari kon kaba! Fa disi moe gi wi tranga foe tan farawe foe „oproeroe taktaki”!
8. O prenspari den warskow eksempre foe Kain, Bileam nanga Korach de gi wi ini disi ten?
8 Ja, sma di e waka baka wan oproeroe libifasi kontrari Jehovah nanga en seti di a orga, séker rampoe e wakti den. Judas e meki wi si dati den sma di no ben abi lobi nanga bribi (soleki Kain), di (neleki Bileam) nanga ala prisiri ben wani kisi pai foe a leri foe sma wan leri di ben meki loesoe libifasi go na fesi èn di (neleki Korach) no ben abi respeki gi makti di Gado ben gi, „heloe” ofoe ogri e wakti den. Èn Judas wortoe ben gi séker wan krakti warskow na sma di e taki dati den de Jehovah Kotoigi, ma di tokoe abi gi Gado theokratis seti wan fasi foe feni fowtoe èn foe no sori respeki.
Warskow ini na fasi foe teki na wan sani gersi na trawan
9. San a ben wani taki dati den ogri falsi leriman ben teki gersi nanga „stonbergi di ben kibri ondro watra”?
9 Judas e go moro fara nanga en warskow, foe di a de kari baka makandra wan lo sani foe gersi wan trawan:
„Den sma disi de den stonbergi di kibri ondro watra tapoe oen lobi-fesa njanjan, ala di den e njan fesa nanga oenoe, herder di sondro frede e wé densrefi; workoe sondro watra, di winti wai go wai kon; bon ini na herfstten, ma sondro froktoe, dede toe tron, roetoe poeroe; krasi skwala foe na se, di e skoema den égi oorzaak foe sjen; stari sondro wan faste pasi, di na doistri foe na doengroe ben poti gwe gi den foe tégo” (Jud. 12, 13).
Den falsi leriman ben de leki „stonbergi di kibri ondro watra”. Den man dati ben meki a gersi dati den abi lobi gi bribiwan èn ben de foe dat’ede leki stonbergi nanga punt di kibri ondro watra, di ben kan gi swenman mankeri te foe dede ofoe meki boto soengoe. Efoe Jehovah Kotoigi no go doro foe „stré sondro foe weri gi na bribi” dan den sortoe leriman disi sa kori sili di no tanapoe faste, sodati „den bribi sa soengoe”. — 1 Tim. 1:19.
10. (a) San ben kan de na fosten kristen „lobifesanjanjan”, èn nanga sortoe bewégi foe ati den „ogri sma” ben fisiti den njanjan disi? (b) Foe san wi moe tan farawe foe en tapoe prisiri konmakandra na mindri Jehovah Kotoigi?
10 Den „ogri sma” dati ben fisiti foeroetron den „lobifesanjanjan” foe den kristen. Den sortoe okasi disi ben kan de fesanjanjan di kristen di ben goedoe ben kari den pòti tra bribiman kon. Ma den sma di ben wani doti na skin, ben de drape nanga takroe bewégi foe ati. (Teki gersi 2 Petrus 2:13.) Na so joe abi ini na ten disi toe, sma di e proeberi foe kenki prisiri okasi na mindri Jehovah Kotoigi kon ini okasi foe hebi dringi, njanjan nanga grontapoe singi nanga dansi. Meki getrow kristen kotoigi noiti gi pasi dati disi pasa tapoe den prisiri konmakandra.
11. (a) Sortoe herder den ogri falsi leriman ben de? (b) Sortoe fasi loyaal kristen moe abi gi den sortoe falsi leriman disi?
11 Den ogri falsi leriman ben de toe leki herder di ben koti a wiwiri foe na ipi èn di ben srakti den skapoe foe kan gi densrefi njanjan èn foe weri krosi gi densrefi. Den ben proeberi foe tjari den wan di no ben tanapoe faste foe waka baka wan tranga-ede libifasi èn den no ben gi den joisti jeje njanjan. (Teki gersi Ezechiël 34:7-10.) Fa a de toemsi prenspari dati loyaal kristen trowe a fasi foe loekoe sani foe den sortoe falsi leriman disi ini disi ten!
12. Fa den falsi leriman ini Judas ten ben de leki workoe sondro watra di winti ben wai?
12 Den falsi leriman ini Judas ten ben de sosrefi toe leki workoe di e kori sma, èn di abi na pramisi foe wan alen di sma wani toemsi, ma di no abi watra èn di winti e wai go e wai kon. Winti foe law prakseri ben troesoe den man dati, èn foe di den ben de leki „workoe sondro watra”, meki den ben de na jeje fasi légi èn sondro waarde. Meki Jehovah Kotoigi loekoe boen gi ala den sortoe falsi èn asranti leriman disi.
13. Foe san-ede den falsi leriman ben de leki bon sondro froktoe, di ben „dede toe tron” èn di ben „roetoe poeroe”?
13 Foe di den wiswasi man dati ben misi den froktoe foe Gado santa jeje, meki den ben de sosrefi toe leki bon di ini na herfst, na a kaba foe a fatoe ten, ben de sondro froktoe. Den ben de leki bon di ben „dede toe tron” ofoe di ben „dede krinkrin” (Petrus Canisiusvertaling). Den sma dati ben „boro kon” ini na gemeente, foe di den ben sori leki den ben de na libi na jeje fasi, baka di den ben teki dopoe. Ma foe di den no ben meki froktoe foe Gado kisi glori, meki den ben moe handri nanga den soleki na froktoe bon ini na owroeten Palestina, di no ben meki froktoe. Den disi ben roetoe poeroe èn pori, sodati wan sma no ben abi foe pai lantimoni gi den froktoebon dati. Dati den leriman dati di no ben abi beraw ben „roetoe poeroe” ben sori krin dati pori ben e wakti den.
14. Fa den falsi leriman ben de leki „krasi skwala foe na se”?
14 Foe di den falsi leriman dati no ben abi Gado santa jeje, meki den ben de sosrefi toe leki „krasi skwala foe na se”. Den ben krasi neleki sekseki seskwala di e tjari tokotoko nanga sewiwiri kon na tapoesé. Te wi teki disi gersi, dan den sondro rostoe sma nanga meti fasi ben bari tranga dati den abi bribi, ma den ogri doe nanga leri ben sori dati den de leki ogri sma di nanga reti moe sjen. — Jes. 57:20, 21.
15. Leki sortoe stari den falsi leriman ben de, èn san ben poti gwe gi den?
15 Foe di den falsi leriman dati no ben tan waka baka wan faste pasi ini regtvaardiki fasi, meki den ben de leki „verdwaalstari” (PC). A no de foe taki dati a no kan foe tiri wan boto nanga jepi foe den stari efoe den disi ben sa kenki komoto foe den pasi sondro foe joe sabi dati na fesi. Neleki stari di no abi wan „faste pasi”, na so wan sma no ben kan poti en froetrow foe kisi gesontoe jeje rai tapoe den sma dati di ben fadon komoto foe bribi. Gi den falsi leti dati, Gado no ben „poti gwe” gi den noiti moro leki na tégo „doistri foe na doengroe”, san wani taki na tégo pori foe den. Getrow kristen kotoigi foe Jehovah abi foe troe foeroe reden foe trowe krinkrin falsi leriman nanga den leri foe den.
Jehovah e opo tanapoe foe tjari na kroetoe kon
16. Soema ben de Henoch, èn san a ben taki na fesi?
16 Leki wan bewijsi dati Jehovah e opo doe wan sani nanga ogri sma, Judas ben taki:
„Ia, foe den na di foe sébi man komoto foe Adam, Henoch, ben taki na fesi, di a ben taki: ’Loekoe! Jehovah ben kon nanga en santa myriade foe tjari a strafoe foe kroetoe kon tapoe ala soema, èn foe overtoigi ala den ogri sma foe ala den ogridoe foe den di den ben doe tapoe wan ogri fasi, èn foe ala den tergi sani di den ogri sondari ben doe tegen en.’” (Jud. 14, 15).
Te wi teri na fosi libisma Adam, dan Henoch ben de „a di foe sébi man komoto” foe en. Den sma di ben de na mindri den ben de Seth, Enos, Kenan, Mahalaleël nanga Jered (Gen. 5:3-18). „Henoch ben waka nanga Gado” foe di a ben waka baka wan libifasi di ben de ini wanfasi nanga na waarheid di Jehovah ben tjari kon na krin (Gen. 5:24; Hebr. 11:5). Jeje bidrigi fasi ben lontoe Henoch, ma nanga dek’ati a ben doe dienst leki Gado proféti.
17. Fa Judas ben kan kon sabi na profétitori foe Henoch?
17 Fa Judas ben kisi sabi foe a profétitori foe Henoch, no e tjari kon na krin. A no e kon a fesi ini den Santa Boekoe. Kande Jezus ben teki Henoch profétitori taki ini wan lezing èn disi ben taki moro fara nanga mofo. Ma bewijsi no de dati Judas ben teki wan srefi verklari di wi e feni ini na apocrief boekoe Henoch. Foedi Judas ben skrifi ondro santa jeje foe Gado, dan foe di Henoch profétitori teki poti ini en brifi, e sori dati den wortoe dati de troe.
18. (a) Foe san-ede wi kan taki dati Henoch ben taki sosrefi toe foe den falsi leriman ini Judas ten? (b) San ben sa kon akroederi na profétitori foe Henoch foe na sé foe na Moro Hé Kroetoeman tapoe den sma di no e respeki en?
18 Henoch ben ’taki na fesi toe foe den (falsi leriman ini Judas ten)’, foe di, èn dati de krin, den sani di a ben taki na fesi foe fosten ogri sma, e kon troe tapoe den toe. Jehovah, na Moro Hé Kroetoeman, foe soema den ogri sma no abi respeki, ben sa tjari en ogri kroetoe kon tapoe den. Te Jehovah ben sa doe dati, a ben sa kon nanga en „santa myriade”, ofoe „santa tindoesoendoesoen”, dati wani taki, nanga bigi nomroe foe regtvaardiki engel. (Teki gersi Deuteronomium 33:2; Daniël 7:9, 10.) Na moro prenspari wan foe den „santa myriade” de na Messias, nanga jepi foe soema Jehovah e kon èn e tjari na strafoe foe na kroetoe. — Luk. 1:35; Joh. 5:27; Tori 17:30, 31.
19. (a) Fa den „ogri sma”, neleki den ogri sma ini Henoch dé, ben taki „tergi sani” tegen Jehovah? (b) San ben sa kon séker tapoe ogri sma di e doti na skin? (c) Fa Jehovah Kotoigi moe tjari densrefi soboen?
19 Jehovah ben gi den ogri sma dati ofoe sma di no abi respeki, boen foeroe na okasi foe sori nanga na „loesoe libifasi foe den” o fowtoe den ben de. Na ogri fasi foe den ben kon nanga den wiswasi doe nanga wortoe foe den na krin. Disi ben de leki wan bewijsi foe a fowtoe foe den èn tapoe na gron foe dati Gado ben „overtoigi den foe fowtoe”. Neleki den ogri sma ini a ten foe Henoch ben taki „tergi sani” kontra Gado, na so den „ogri sma” dati ben wiswasi tirimakti èn den ben taki skempi foe den sma di Jehovah ben gi wan séker fasi foe glori (Jud. 8-10). Na so fasi den ben taki „tergi sani” kontra Jehovah èn den ben kisi kroetoe. Ini kroederi nanga Henoch profétitori, dan Gado ben tjari na kroetoe kon tapoe den ogri sma ini na ten foe na froedoe foe Noach dé. Na tjari kon foe na kroetoe foe Gado tapoe den ogri sma di ben doti na skin ben de foe dat’ede séker, èn Jehovah Kotoigi kan froewakti foe si wan srefi sortoe tjari kon foe kroetoe ini a ten disi. Foe dat’ede meki wi moe loekoe séker boen tapoe wi doe nanga taki foe prisi Gado èn foe lon komoto foe na pori.
Tan farawe foe knoroe èn bigi memre taki
20. Fa Jehovah dienstknekti moe si na knoroe nanga kragi foe „ogri sma”?
20 Judas ben sori tapoe ete tra ogri doe nanga den wortoe:
„Den sma disi na sma di e knoroe èn kragi foe den libi, di e waka akroederi den égi lostoe, èn den mofo e taki bigi memre sani, ala di foe den égi boen den e froewondroe gi soema persoon” (Jud. 16).
Den kristen kotoigi foe Jehovah e kisi tranga „foe doe ala sani sondro knoroe” (Fil. 2:14, 15). Ma den „ogri sma” dati ben de sma di ben e knoroe, neleki den Israëlsma di ben knoroe tegen Mozes nanga Aäron, nanga na bakapisi dati den ben moe dede ini a gran sabana, foe di den, te joe loekoe en boen ben knoroe tegen Gado (Num. 14:1-38; 1 Kor. 10:10). Den sma nanga meti fasi ben de sosrefi toe „sma di ben knoroe foe den libi”, neleki den pòti sma ini disi grontapoe kande e kragi foe di den no goedoe, èn so moro fara. Neleki den troe kristen ini Judas ten, na so Jehovah Kotoigi e poti den froetrow tapoe a koni foe hemel nanga na jepi foe Gado jeje foe kaka foetoe gi moeiliki omstandigheden. Meki wi no de noiti leki den ogri knoroeman ini Judas ten!
21. (a) Fa den „ogri sma” ben waka „akroederi den égi lostoe”? (b) Fa den tranga-ede sma dati ben froewondroe „gi soema persoon foe den égi boen”, èn foe san-ede dati ben de fowtoe?
21 Den tranga-ede sma dati ben „waka akroederi den égi lostoe”, bika na presi dati den ben meki den komando foe Gado ofoe en Manpikin tiri den, den hoeroedoe lostoe nanga firi ben basi den. (Teki gersi Jakobus 4:1-3.) Èn ala di „den mofo ben taki bigi memre sani” ofoe ben „foeroe nanga bigi taki” (Willibrordvertaling), den ben teki wantoe sma di den ben froewondroe gi den tapoe wan onopregtifasi. (Teki gersi Psalm 140:11; Titus 1:10, 11; 2 Petrus 2:18, 19.) Den hoeroedoe sma dati ben „froewondroe gi soema persoon foe den égi boen”. Den ben proeberi foe kisi na boen-ati nanga jepi foe den goedoeman, den héman, ofoe tra sma, ini na howpoe foe kisi wini na skin fasi ofoe foe kisi bigi nen. Ma disi ben de wan toemsi gridifasi èn a ben breni den ogri sma dati foe doe moeiti foe feti baka wan moro hé marki, namkoe foe kisi na boen-ati foe Jehovah. Den ben misi foe dat’ede foe respeki na Moro Hé Kroetoeman èn foe dat’ede ben kon na ondro en kroetoe foe kisi pori.
22. San Judas ben tjari kon na krin so fara foe na boen foe wi, èn san de ini en laatste wortoe?
22 Judas ben gi tranga na en tra bribiman foe „stré sondro foe weri gi na bribi”. A ben sori tapoe warskow foe bijbel foe hoeroedoe, oproeroe nanga knoroe èn a no ben meki degedege de foe a tjari kon foe na kroetoe foe a sé foe Gado. A de séker na joisti ten dati Jehovah Kotoigi go denki foe den sani disi! Soleki wi sa si, dan den laatste wortoe foe Judas toe de toemsi prenspari gi Jehovah anbegi. Wan tranga opregti begi de ini den laatste wortoe dati.
Joe kan piki den aksi di e kon now?
□ San ben de na „pasi foe Kain”, èn foe san-ede Jehovah pipel moe tan farawe foe en?
□ Soema „ben hari go ini na verdwaal pasi foe Bileam”, èn foe san-ede joe ben sa tan farawe foe a pasi dati?
□ Sortoe warskow eksempre wi abi ini na tori foe na levietsma Korach?
□ Fa den „ogri sma” di Judas ben taki foe den, ben kan teki gersi nanga bon di no e meki froktoe, di „ben dede toe tron” èn di ben „roetoe poeroe”?
□ San Henoch ben taki na fesi, èn foe doe san en wortoe gi wi tranga?
□ Sortoe fasi wi moe abi tapoe na gron foe Judas rai ini na tori foe knoroe èn „a froewondroe gi soema persoon foe wi égi boen”?
[Prenki na tapoe bladzijde 277]
Pori e wakti den leriman di fadon komoto na bribi èn di no ben abi beraw, neleki froktoebon di no e meki froktoe e roetoe poeroe