Heinok Ben E Waka Nanga Gado na ini wan Godelowsu Grontapu

DIDIBRI taki dati a kan drai ala libisma puru fu Gado, èn son leisi kande a ben musu gersi leki a ben abi bun bakapisi. Pikinmoro feifi hondro yari baka di Abel dede, no wan sma ben sori fu de wan getrow futuboi fu Yehovah. San ben pasa yoisti, na taki a ben kon de wan aladei sani fu du sondu èn fu handri na wan godelowsu fasi.

A ben de na ini a godelowsu pisi ten dati, taki Heinok ben libi na grontapu. Soleki fa Bijbel e sori, dan a ben gebore na ini 3404 b.G.T. Heinok ben de tra fasi leki den sma na ini a ten fu en, fu di a ben sori fu de wan man di Gado ben feni bun. Na apostel Paulus ben taki so srefi fu en di a ben taki fu futuboi fu Yehovah di ben abi wan bribi di de leki wan eksempre gi Kresten. Suma ben de Heinok? Sortu tyalensi ben o miti en? Fa a kakafutu gi den tyalensi disi? Èn san a soifri-retifasi fu en wani taki gi wi?

Na ini a ten fu Enos, pikinmoro fo yarihondro bifo a ten fu Heinok, „[sma] ben bigin kari a nen fu Yehovah” (Genesis 4:26). Sma ben gebroiki a nen fu Gado sensi a bigin fu a historia fu a libisma famiri. Fu dati ede, soleki fa buweisi e sori dan a kari fu a nen fu Yehovah na a ten di Enos ben de na libi, no ben abi fu du nanga bribi noso soifri anbegi na ini Yehovah. Wan tu Hebrew sabiman e denki taki Genesis 4:26 ben musu skrifi na a fasi disi ’bigin na wan godelowsu fasi’ noso ’na a ten dati godelowsufasi bigin’. A kan taki sma gebroiki Yehovah en nen gi densrefi noso gi trawan, èn kande den ben e du neleki den ben e anbegi Gado nanga yepi fu den sma disi. Noso kande den gebroiki a nen disi gi falsi gado.

’Heinok Ben Waka Nanga a Tru Gado’

Ala di godelowsu fasi ben de na Heinok lontu, toku a „ben tan waka nanga a tru Gado”, Yehovah. Bijbel no e taki efu den bakapikin fu en — Set, Enos, Kenan, Mahalalel, nanga Yared — ben waka nanga Gado. Wan sani di de seiker, na taki den no ben du dati na a srefi fasi leki fa Heinok ben du, bika a fasi fa a ben e libi, krinkrin ben difrenti fu den.—Genesis 5:3-27

Fu di Heinok ben libi akruderi a wani fu Gado, dan dati meki taki a ben abi wan krosibei matifasi nanga Yehovah. Yehovah ben lobi a fasi fa Heinok ben dini En nanga en heri ati. Fu taki en leti, a Griki Septuaginta e taki dati Gado „ben feni Heinok bun srefisrefi”, èn na apostel Paulus ben taki a srefi sani disi.—Genesis 5:22, futuwortu; Hebrewsma 11:5.

A moro prenspari sani di ben meki taki Heinok ben kan abi wan bun matifasi nanga Yehovah na a bribi fu en. A ben musu de so taki Heinok ben abi bribi na ini a pramisi „siri” fu Gado en „uma”. Efu Heinok srefi ben sabi Adam, dan a ben kan kon sabi moro fu a fasi fa Gado ben handri nanga a fosi libisma trowpaar na ini Eden. Den sani di Heinok ben sabi fu Gado ben meki taki a ben tron a sortu sma di ben ’e suku en seryusu’.—Genesis 3:15; Hebrewsma 11:6, 13.

Na ini a kefal fu wi nanga a di fu Heinok, dan sabi fu Gado wawan no sari fu man abi wan bun matifasi nanga en. Efu trutru wi abi furu warderi gi a krosibei matifasi di wi abi nanga wan spesrutu sma, dan a no de so taki a denki fu a sma dati abi krakti tapu den prakseri fu wi èn so srefi tapu den sani di wi e du? Wi no sa taki noso du sani di ben o pori a matifasi dati. Èn efu wi e prakseri fu tyari wan tu kenki kon na ini wi libi, dan wi no sa poti prakseri tu na a krakti di a sani disi ben kan abi tapu a matifasi dati?

Na a srefi fasi, wi sa luku bun san wi e du fu di wi wani tan abi wan krosibei matifasi nanga Gado. A de fanowdu fu kisi soifri sabi fu den sani di Gado feni bun èn fu den sani di a no feni bun. Baka dati wi musu meki a sabi dati tiri wi, ala di wi e du muiti fu plisi Gado nanga yepi fu den prakseri fu wi èn so srefi nanga den sani di wi e du.

Iya, wi musu plisi Gado efu wi wani waka nanga en. Na dati Heinok ben du hondrohondro yari langa. Fu taki en leti, a Hebrew werkwortu di e sori taki Heinok „ben waka” nanga Gado, wani taki dati a ben du dati doronomo. Wan tra getrow man di ’ben waka nanga Gado’ ben de Noa.—Genesis 6:9.

Heinok ben de wan man di ben abi wan osofamiri. A ben abi wan wefi èn so srefi „manpikin nanga umapikin”. Wán fu den manpikin fu en ben de Metusala (Genesis 5:21, 22). A ben musu de so taki Heinok ben du ala san a ben man du fu tiri en osofamiri bun. Ma fu di godelowsufasi ben de na en lontu, dan a no ben makriki gi en fu dini Gado. Lamech, a papa fu Noa, kande ben de a wan-enkri sma di ben bribi na ini Yehovah na ini a ten fu Heinok (Genesis 5:28, 29). Toku, Heinok ben hori ensrefi na a soifri anbegi.

San ben yepi Heinok fu tan getrow na Gado? A de seiker taki a no ben abi demakandra nanga sma di no ben lespeki a nen fu Yehovah noso nanga tra sma di no ben de bun kompe gi wan anbegiman fu Gado. A begi di Heinok ben begi Yehovah ben musu fu yepi en fu kisi wan moro fasti bosroiti fu wai pasi gi iniwan sani di a Mekiman fu en no ben feni bun.

Profeititori Teige den Godelowsuwan

A muilek kaba fu tan hori wisrefi na hei markitiki te wi de na mindri godelowsu sma. Ma Heinok ben meki krutu boskopu bekènti so srefi teige den godelowsu sma. Na ondro a krakti fu Gado en santa yeye, Heinok meki a profeititori disi bekènti: „Luku! Yehovah ben kon nanga den furu tin dusun santawan fu en, fu tyari strafu kon na tapu den alamala, èn fu krutu ala den godelowsu sma gi ala den godelowsu sani di den ben du na wan godelowsu fasi, èn fu ala den kefalek takru sani di den godelowsu sondari ben taki teige en.”—Yudas 14, 15.

Sortu krakti a boskopu dati ben abi tapu godelowsu sma di no ben e bribi na ini Gado? Wi kan prakseri taki den krakti wortu disi ben meki taki sma no lobi Heinok, kande den ben bari sani gi en, noso den ben pramisi en taki den ben o du en wan ogri. Kande son sma ben wani kiri en. Ma den sani dati no ben tapu skreki gi Heinok. A ben sabi san ben pasa nanga a regtfardiki man Abel, èn neleki en, Heinok ben abi a fasti bosroiti fu dini Gado, awansi san ben o pasa.

„Gado Ben Teki En”

A kan taki Heinok ben de na ini kefar di „Gado ben teki en” (Genesis 5:24). Yehovah sorgu taki ogri-ati feanti no ben man du a getrow profeiti fu en wan ogri. Soleki fa na apostel Paulus ben taki, „[Gado] ben puru Heinok so taki a no ben abi fu si dede” (Hebrewsma 11:5). Furu sma e taki dati Heinok no dede — den e taki dati Gado teki en fu kon na ini hemel, pe a tan na libi. Ma Yesus ben taki krinkrin: „No wan sma opo go na hemel, boiti a sma di saka kon fu hemel, a Manpikin fu libisma.” Yesus ben ’de a fosi wan’ fu ala den sma di opo go na hemel.—Yohanes 3:13; Hebrewsma 6:19, 20.

So bun, san pasa nanga Heinok? Taki „[Gado] ben puru [en] so taki a no ben abi fu si dede”, kande wani taki dati Gado ben meki a poti ala en prakseri dorodoro na a fisyun fu a profeititori èn baka dati a tyari wan kaba kon na a libi fu en ala di Heinok ben de na ini a situwâsi dati. Na ini a sortu situwâsi dati, Heinok no ben o ondrofeni den pen fu dede. Baka dati „a no ben de fu feni nowan presi”, kande fu di Yehovah puru en skin, neleki fa a ben puru a skin fu Moses.—Deuteronomium 34:5, 6.

Heinok libi 365 yari — a no ben doro a libimarki srefisrefi di furu sma na ini a ten fu en ben doro. Ma gi sma di lobi Yehovah, a de prenspari taki den e dini en na wan getrow fasi te na a kaba fu a libi fu den. Wi sabi taki Heinok ben du dati bika „bifo Gado ben puru en, a ben kisi a buweisi taki a ben plisi Gado”. Den Buku fu Bijbel no e taki na sortu fasi Yehovah ben taki nanga Heinok. Toku, bifo Heinok dede, a ben kisi a dyaranti taki Gado ben feni en bun, èn wi kan de seiker taki Yehovah sa memre en na ini na opobaka.

Abi wan Bribi Neleki a Di fu Heinok

A bun fu abi a srefi bribi leki a di fu sma di e anbegi Gado fayafaya (Hebrewsma 13:7). Na a bribi di Heinok ben abi, ben meki taki a ben man dini leki a fosi getrow profeiti fu Gado. Na ini a ten fu Heinok, a situwâsi na grontapu ben de a srefi leki now — sma ben e du ogri nanga tranga, sma no ben e lespeki Gado, èn den ben de godelowsu. Ma Heinok ben de tra fasi. A ben abi trutru bribi èn a fasi fa a ben e dini Gado fayafaya ben de leki wan eksempre gi trawan. Iya, Yehovah ben gi en wan tumusi prenspari krutu boskopu fu meki bekènti, èn a ben gi en tranga so srefi fu man du dati. Heinok ben du a wroko disi nanga deki-ati, èn Gado sorgu gi en ala di a ben kisi gens fu den feanti fu en.

Efu wi abi wan bribi neleki a di fu Heinok, dan Yehovah sa gi wi tranga fu meki a boskopu fu en bekènti na ini den lasti dei disi. A sa yepi wi fu kakafutu nanga deki-ati gi sma di e gens wi, èn te wi e dini Gado fayafaya, dan dati sa poti wi aparti fu den godelowsuwan. Bribi sa meki taki wi sa man waka nanga Gado èn taki wi sa man tyari wisrefi na wan fasi di e prisiri en ati (Odo 27:11). Nanga yepi fu bribi, Heinok di ben de regtfardiki, ben man waka nanga Yehovah na ini wan godelowsu grontapu, èn wi kan du dati tu.

[Faki na tapu bladzijde 30]

Bijbel Abi Sani Di Teki Puru fu a Buku Heinok?

A Buku Heinok no de wan pisi fu den Buku fu Bijbel, èn den tori di skrifi na ini na sani di sma skrifi sondro fu gebroiki den eigi nen. Sma e taki dati Heinok ben skrifi a buku disi, ala di dati no tru. A buku disi skrifi kande na ini a di fu tu nanga a fosi yarihondro b.G.T. A buku abi furu Dyu anansitori na ini di no abi noti fu du nanga historia, èn a krin fu si taki a buku disi kon fu di sma gi wan langabere fruklari fu den syatu sani di a buku Genesis e taki fu Heinok. A sani disi wawan e gi sma di lobi a Wortu fu Gado, di skrifi nanga yepi fu santa yeye, nofo reide fu no poti prakseri na a buku disi.

Na ini Bijbel, soso a buku Yudas e taki fu den profeiti wortu fu Heinok: „Luku! Yehovah ben kon nanga den furu dusun santawan fu en, fu tyari strafu kon na tapu den alamala, èn fu krutu ala den godelowsu sma gi ala den godelowsu sani di den ben du na wan godelowsu fasi, èn fu ala den kefalek takru sani di den godelowsu sondari ben taki teige en” (Yudas 14, 15). Furu sabiman e taki dati a profeititori di Heinok ben meki bekènti teige den godelowsu sma na ini a ten fu en, teki puru langalanga fu a Buku Heinok. A kan taki Yudas ben teki den wortu disi fu wan buku di no de wan pisi fu Bijbel?

Den Buku fu Bijbel no e tyari kon na krin fa Yudas ben sabi a profeititori fu Heinok. Kande a teki den wortu puru fu wan buku di furu sma ben sabi, wan fositen tori di sma ben kan frutrow. A sori leki Paulus ben du wan srefi sortu sani di ben a taki fu Yanes nanga Yambres leki den towfruman fu Farao di ben gens Moses, ala di a nen fu den no ben kari. Efu a skrifiman fu a Buku Heinok ben man gebroiki so wan owruten buku, dan fu san ede wi musu denki taki Yudas no ben o man du dati?a—Exodus 7:11, 22; 2 Timoteus 3:8.

Fa Yudas ben kon sabi a boskopu di Heinok ben musu gi den godelowsu sma, no de so prenspari. Fu di Yudas ben skrifi na ondro a krakti fu a santa yeye fu Gado, dan dati e meki taki wi kan bribi den sani di a skrifi (2 Timoteus 3:16). A santa yeye fu Gado sorgu taki a no skrifi nowan enkri sani di no tru.

[Futuwortu]

[Prenki na tapu bladzijde 31]

Heinok ben meki a boskopu fu Yehovah bekènti nanga deki-ati