„Oen lobiwan . . . kibri oensrefi ini a lobi foe Gado”
„Oen lobiwan, oen moe bow oensrefi ini oen moro santa bribi èn begi nanga santa jeje, èn na so fasi kibri oensrefi ini a lobi foe Gado.” — Jud. 20, 21.
1, 2. Sortoe leri na brifi foe Judas e gi wi, boiti dati warskow de na ini?
NA NO-FERDINI boen-ati foe Jehovah e kon na krin ini a fasi fa a de handri nanga den sma di lobi en. Nanga jepi foe en Wortoe di skrifi nanga santa jeje a de sori san a wani foe den. Èn fa wi kan de nanga grantangi dati wan pisi foe a wortoe foe Gado, na brifi Judas, e gi warskow di kan jepi wi foe tan tanapoe ini wan joisti matifasi nanga Jehovah Gado!
2 Ma boiti dati Judas e gi fanowdoe warskow, a de sori toe san wi moe doe foe bow wisrefi na jeje fasi èn „foe kibri wisrefi ini a lobi foe Gado”. Wi sa kisi foe dat’ede foeroe wini te wi sa loekoe na laatste pisi foe a brifi foe Judas.
Spotoeman sa kon
3, 4. Judas ben sori tapoe sortoe wortoe foe Jezus apostel?
3 Foe memre wi na wan toemsi prenspari sani, Judas ben skrifi moro fara:
„Ma oen lobiwan, oen memre den wortoe foe den apostel foe wi Masra Jezus Kristus di den ben taki a fesi, fa den ben taigi oen alaten taki: ’Ini den laatste dé spotoeman sa de, di akroederi den égi lostoe e go doro nanga ogri sani’. Disi de den wan di e tjari prati kon, sma nanga meti fasi, di no abi jeje fasi” (Jud. 17-19).
Judas ben taki foeroe kaba foe kaka foetoe gi „ogri sma” di ben boro kon ini na gemeente na wan kibri fasi. Moro fara, a de begi en tra bribiman, foe soema a ben abi bigi lobi gi, foe memre spesroetoe den wortoe di Jezus apostel ben taki a fesi. Te opregti kristen ben tjari den wortoe dati kon ini prakseri, dan den ben sa kisi tranga „foe stré sondro foe weri gi a bribi”.
4 Na apostel Paulus ben warskow mede-opziener, dati a den mindri man ben sa „opo tanapoe di ben sa taki kronkron sani foe hari den discipel kon na den baka” (Tori foe den Apostel 20:29, 30). A ben taigi Timoteus dati „bakaten son sma ben sa fadon komoto foe bribi” (1 Tim. 4:1, 2). Èn na apostel Petrus ben warskow spesroetoe dati „ini den laatste dé spotoeman ben sa kon, di ben sa taki: ’Pe na pramisi de-noja foe en de?’” — 1 Petr. 3:1-4.
5. Fa den „ogri sma” di ben boro kon ini na gemeente kande ben behandel getrow kristen, ma fa sma di abi frede foe Gado ben teki disi?
5 Den sma di ben kisi na brifi foe Judas ben abi foe dat’ede boen rede foe froewakti dati ini na pisi ten di ben waka wantronwantron baka na kaba foe na djoe seti foe sani, „spotoeman” ben sa kon. A no de wan sani di no kan, dati den „ogri sma” di ben boro kon ini na gemeente, ben spotoe den getrow bribiman di ben hori stéfi na Jehovah regtvaardiki markitiki èn di no ben sroiti densrefi na den „falsi brada” ini loesoe libifasi. Ma a ben de toemsi prenspari dati sma di ben frede Gado „ben stré sondro foe weri gi na bribi”, awinsi den ben kisi spotoe foe na sé foe falsi leriman di „akroederi den égi hoeroedoe lostoe ben go doro nanga ogri sani” èn den ben meki disi tiri den. — Teki gersi 2 Korinte 11:26; Galasia 2:4, 5.
6. San den ogri spotoeman ben proeberi foe doe, ala di Gado ben djaranti na wanfasi foe den sma di ben lobi en?
6 Ala di Gado, nanga jepi foe en jeje, ben djaranti na wanfasi foe den sma di ben lobi en, tokoe den ogri spotoeman dati ben proeberi „foe meki prati kon” èn den ben poti leki marki foe sai pratifasi na mindri Jehovah pipel (Jud. 19; Ps. 133:1-3; 1 Kor. 1:10). Ala di den spotoeman ben soekoe fowtoe na getrow, frantwortoe man ini na gemeente foe broko den saka, na a tra sé den ben taki nanga foeroe froewondroe foe sma foe soema den ben kan njan boen (Jud. 8, 16). Neleki den Farisésma den ben loekoe den sakafasi memre foe na gemeente di ben abi frede gi Gado leki noti. Na presi dati den ben proeberi foe tjari kon makandra nanga na Masra, den ben proeberi foe panja sani. Srefi ini disi ten son sma e proeberi foe tjari den wan di no tanapoe faste kon ini privégroepoe foe hori ini nen „bijbelstudi”. Disi noiti ben sa meki lobi gi Gado, Kristus nanga na kristen gemeente kon na fesi. — Luk. 11:23.
7. Foe san-ede den „ogri sma” nanga reti den ben kari den „nanga meti fasi”?
7 Nanga reti den ben kari den man dati ’nanga meti fasi’ (letterlek: „ziel-lijk”), bika den ben de mekisani nanga firi, di ben gi densrefi abra na skin firi, lostoe nanga aptéti. (Teki gersi Kingdom Interlinear Translation, vers 19.) Ala di den ben si densrefi leki sma di abi leti na jeje fasi, tokoe Judas ben skrifi foe den leki sma „di no abi jeje fasi”, ofoe letterlek, di e misi na „jeje”. Te joe loekoe en boen, dan den sma „nanga meti fasi”, ben misi Jehovah jeje; den no ben man foe froestan jeje sani èn pikinso nomo den ben de tapoe na nivo foe den meti di no abi froestan. Te wi abi Jehovah jeje èn e froestan „den dipi sani foe Gado”, dan wi kan de wi hemel Tata toemsi grantangi. — 1 Kor. 2:6-16.
Fa foe tan ini Gado lobi
8. Tapoe san wortoe „na moro santa bribi” kan sori?
8 Judas e go abra foe begi gi en brada tranga, te a de taki:
„Ma oenoe, oen lobiwan, oen moe bow oensrefi ini oen moro santa bribi èn begi nanga santa jeje, èn a so fasi kibri oensrefi ini a lobi foe Gado, ala di oen e wakti tapoe a sar’ati foe wi Masra Jezus Kristus, nanga tégo libi na oen fesi” (Jud. 20, 21).
Judas ben sori tapoe wan lobi fasi fa en lobi mede-bribiman ben kan tan ini na lobi foe Jehovah. Na waka baka en rai ben sa wani taki séker toe, dati den ben sa moe kweki bribi, wan froktoe foe Gado jeje (Gal. 5:22, 23). Ma te wi loekoe san Judas ben taki a fesi foe na stré gi ’na bribi di ben gi na den santawan’ (vs. 3), dan den wortoe „moro santa bribi” kan abi fandoen nanga na heri kristen leri, èn na boen njoensoe foe loesoe toe. Kristus de na fundamenti foe so wan troe bribi, èn den ben kari en „moro santa”, foe di na Gado foe santafasi ben teki na moro prenspari presi ini na bribi disi èn a ben abi spesroetoe en roetoe ini en santa Wortoe. — Tori 20:32; 1 Kor. 3:10-15.
9. San wi moe doe foe „bow oensrefi ini oen moro santa bribi”?
9 Efoe kristen wani „bow densrefi ini den moro santa bribi” ofoe tranga den bribi, dan densrefi èn ini gemeenteverband den moe stoeka a Wortoe foe Gado fajafaja. Te wi abi nofotron takimakandra foe na Bijbel nanga kristen mede-kotoigi foe Jehovah, èn boiti dati e meki na boen njoensoe bekenti gi tra sma, dan na marki di na bijbel e meki tapoe wi ati, sa kon moro dipi. Ma noti foe dati sa kan foe kon de so sondro opregti begi. Wan sma ’e begi nanga santa jeje’ te ini begi a de poti ensrefi ondro na krakti foe na jeje disi èn e begi ini wanfasi nanga den sani di de ini Jehovah Wortoe. Boiti dati, den Boekoe di skrifi nanga Gado jeje e meki wi si fa wi moe begi èn san wi kan aksi ini begi. Foe eksempre, nanga foeroe froetrow wi kan begi ofoe wi kan kon foeroe nanga Gado santa jeje. Efoe wi ’e begi nanga santa jeje’, dan wi begi sa sori wan joisti fasi foe na ati, wan fasi foe na ati di Gado wani si sote na wi. Na so fasi wi sa kisi kibri tegen krakti di no de joisti, so toe foe fasi foe loekoe sani foe son „ogri sma” di ben kan boro kon ini na gemeente. — Luk. 11:13; Rom. 8:9.
10. San a de aksi foe Judas mede-bribiman efoe den ben wani „kibri densrefi ini na lobi foe Gado”?
10 Foe kan „kibri densrefi ini a lobi foe Gado”, dan Judas mede-bribiman ben moe hori Jehovah komando nanga di foe en Manpikin (Joh. 15:10; 1 Joh. 5:3). Foe kan tan ini na lobi foe Gado, dan na taki nanga na libifasi foe kristen moe de sani di Jehovah e feni boen. Foe di den getrow-wan de nanga fowtoe èn sondoe, meki den abi alaten fanowdoe dati Jehovah sori den sar’ati nanga jepi foe Jezus Kristus, foe kan tan ini a lobi foe Gado. èn disi ben kan nanga jepi foe na loesoe-ofrandi foe a Masra foe den (Rom. 5:8; 9:14-18; 1 Joh. 4:9, 10). Te den getrow bakaman foe Jezus kisi alaten sar’ati, dan disi te foe kaba e tjari tégo libi kon. — Joh. 3:16.
Na fanowdoe foe sori sarati gi tra sma
11. (. . . ?)
11 Judas ben taki foe na fanowdoe foe sori sar’ati:
„Go doro foe sori sar’ati gi son wan di e degedege; loesoe den foe di joe e hari den poeroe foe na faja. Ma tan sori sar’ati gi trawan, èn doe disi nanga frede, ala di oen no moe wani si srefi na ondrokrosi, di na skin ben flaka, na ai” (Jud. 22, 23).
Te den mede-bribiman foe Judas ben tan wani kisi sar’ati foe Gado, dan den ben moe sori sar’ati gi trawan di ben kan lasi tégo libi (Jak. 2:13). Ma foe „kan go doro foe sori sar’ati gi son wan di e degedege”, den getrowwan ben moe si na difrenti na mindri den di boen foe kisi sar’ati èn den „drenman”.
12. (a) Sortoe degedege sonwan kande ben sa abi, foe di „ogri sma” ben wroko tapoe den? (b) Fa ’sonwan ben sa kan hari poeroe foe na faja’?
12 Nanga a falsi leri, knoroe, kragi, nanga so moro fara foe den, den „ogri sma” ben meki sma di no ben tanapoe stéfi na jeje fasi kon foeroe nanga degedege. Foe di den sma di ben e degedege ben lasi den balans nanga jepi foe bigi wortoe foe den falsi leriman, meki den ben go aksi densrefi kande ofoe den kristen di ben gi densrefi abra de troetroe Jehovah pipel èn den ben stop kande foe teki prati nanga den na a anbegi foe Gado èn na a préki foe na boen njoensoe. Den sortoe sma disi di no ben tanapoe stéfi ben de ini gevaar foe kon ini na „faja”, ofoe tego pori. (Teki gersi Matteus 18:8, 9; 25:31-33, 41-46.) Ma te den kristen di tanapoe stéfi, spesroetoe gemeente-opziener, kon jepi den gaw nanga jeje vermane nanga begi, den kan ferloesoe den èn „hari den poeroe foe na faja”. — Gal. 6:1; Jak. 5:13-20.
13. (a) Fa sonwan ben ’flaka den ondrokrosi’? (b) Fa sma di weri ’krosi di flaka ben sa kan kisi loesoe’?
13 Sonwan kande ben boigi ede gi den sma di e flaka na skin èn fadon makandra nanga den go ini hoeroedoe, noso ini jeje soetadoe (Jak. 4:4). Foe di den gi densrefi abra na doe foe meti, a gersi leki den „flaka na ondrokrosi”. Leki troe kristen, den ben poti wan flaka tapoe den inisé égifasi, di ben de leki wan krosi di e weri direct tapoe na skin. (Teki gersi Openbaring 3:4, 5.) Getrow kotoigi foe Jehovah ben e loekoe boen foe flaka na so wan fasi a kristen ’égifasikrosi’ foe den, foe di disi no e prisi Jehovah Gado èn ben sa kan tjari den go na pori. Tokoe sma di e frede Gado, spesroetoe den owroeman di Gado ben poti ben doe moeiti nanga foeroe sar’ati foe jepi den sma di no tanapoe stéfi èn di e weri den „flaka krosi” foe drai baka kon tapoe na pasi foe ferloesoe. Efoe den tranga-ede sma ben sori troetroe beraw, den ben sa kan kisi „loesoe” foe na dede ini na atibron foe Gado, san wan libifasi di no krin ben sa kan tjari kon. — Odo 28:13.
Gi glori, majesteiti, makti nanga krakti na wi Gado
14, 15. (a) Soema ben kan kibri den salfoe mede-anbegiman foe Judas foe stotoe foetoe fadon, èn ini san wan sma ben sa kan go? (b) Fa getrow salfoe kotoigi foe Jehovah ben kan tanapoe „sondro flaka” na fesi Gado? (c) Na „bigi ipi” e loekoe san foe kon?
14 Leki laatste, Judas ben gi en lésiman abra na Gado, nanga den wortoe:
„Na sma now di kan kibri joe foe stotoe joe foetoe fadon èn di kan meki joe tanapoe sondro flaka, nanga bigi prisiri na fesi en glori, na wan enkri Gado, wi Ferloesoeman nanga jepi foe Jezus Kristus, wi Masra, moe kisi glori, majesteiti, makti nanga krakti ini ala tégo ten di ben pasa èn now èn te ini ala tégo ten. Amen” (Jud. 24, 25).
Baka di Judas ben gi warskow foe santa jeje èn boen rai, a ben moesoe gi den mede-bribiman di ben de ini gevaar abra na a sorgoe foe Gado. Soso Jehovah ben kan sorgoe dati den ben sa kaka foetoe gi den „ogri sma” na den mindri èn wini. Judas foe dat’ede ben tapoe en brifi na wan fasi di fiti, foe di a gi na Moro Hé Wan grani.
15 Den salfoe mede-anbegiman foe Judas ben kan poti froetrow ini Jehovah leki ’na sma di ben kan kibri den foe stotoe foetoe fadon’. Leki wan bakapisi foe a kibri foe En, a ben sa jepi den foe no pasa en wet èn foe gi den srefi abra na hoeroedoe, di den ogri sma di e flaka na skin ben gi den tranga foe doe. Ia, Jehovah ben kan kibri den sma di frede en foe „stotoe foetoe fadon” foe di den doe bigi sondoe èn foe ondrofeni na pori di e wakti kristen di abi meti fasi èn di no abi beraw. Boiti dati, Jehovah kan meki en getrow kotoigi „tanapoe sondro flaka na fesi en glori” (ofoe ’na fesi en glori persoon’) (NW Ingris uitgave foe 1950). Leki wan bakapisi foe Gado no-ferdini boen-ati den ben sa kan de sondro flaka ini jeje fasi (Ef. 2:1-7; Kol. 1:21-23). Den getrow salfoe kotoigi foe Jehovah wani sote dati Jezus Kristus wiki den foe dede èn presteri den ini jeje volmaakti fasi na fesi na „glori persoon” foe Gado (Joh. 5:25; 11:24, 25). Disi sa gi den séker „bigi prisiri”. Na sosrefi toe na „bigi ipi” e loekoe na fesi foe den tjari den boen pasa na na „bigi benawtoe”, soleki wan herder e wé en skapoe, èn foe njan moro grani foe „santa dienst” ala di den e go a fesi na grontapoe foe kisi libisma volmaakti fasi. — Openb. 7:9, 10, 14-17.
16. (a) Foe san-ede wi kan kari Jehovah „na wan enkri Gado, wi Ferloesoeman nanga jepi foe Jezus Kristus, wi Masra”? (b) San Judas ben gi Gado èn foe san-ede nanga reti?
16 Soleki Judas ben taki, dan Jehovah de, „na wan enkri Gado, wi Ferloesoeman nanga jepi foe Jezus Kristus, wi Masra”. Foeroe tron den Boekoe e meki wi kon sabi Jehovah leki wan Ferloesoeman (Ps. 106:21; Jes. 43:3; Jer. 14:8; Luk. 1:46, 47). En de na Sma di e gi ferloesoe nanga jepi foe na Masra Jezus Kristus (Matt. 20:28; Joh. 3:16; Rom. 5:8; 1 Joh. 4:9, 14). Nanga reti Judas ben gi Jehovah „glori” (Griki: doxa), san e sori tapoe toemsi moi fasi. (Teki gersi Psalm 29:1, 2.) A ben gi Gado „majesteiti” toe (Griki: megaloosunè), san e sori tapoe a „gran fasi” foe wan kownoe (Int.). Disi na wan joisti fasi foe erken Jehovah moro hé kownoe makti leki „kownoe foe tégo” (1 Tim. 1:17) So srefi toe den ben gi Jehovah kratos, ofoe „makti”, san kande séker abi fandoen nanga en tirimakti, ofoe tiri, ofoe ini hemel noso na grontapoe. (Teki gersi Daniël 4:25; Openbaring 11:16-18.) Judas ben gi moro fara Gado „krakti” (Griki: exousia), foe di Jehovah abi na krakti ofoe na powa foe doe san e prisi en. — Dan. 4:34, 35.
17. (a) Foe san-ede na sani di Judas ben taki Jehovah moe kisi ben fiti (a) ”ini ala tégo ten di ben pasa” (b) „now” èn (c) „te ini ala tégo ten”?
17 A ben de nanga reti dati Judas ben gi „glori, majesteiti, makti nanga krakti na Jehovah ini ala tégo ten di pasa — ofoe „bifo ala ten” soleki sma sabi dati — bika Jehovah de na Gado „foe ten di no abi marki te ten di no abi marki” (Jud. 25, NW, voetnoot ini na Ingris uitgave foe 1950; Ps. 90:2). Jehovah anbegiman e taki tapoe wan fasi di fiti taki En moe kisi ala den sani disi „now”, dati wani taki, ini a ten di Judas ben skrifi èn ini disi ten. Boiti dati, Jehovah ferdini na erkenning disi „te ini ala tégo ten”, bika noiti a sa dede èn alaten a sa abi getrow sma di e prijse en (Hab. 1:12; Ps. 148). Judas e besroiti den wortoe disi, di te joe loekoe boen de wan begi, foe di a de taki „Amen” ofoe „a moe de so”. Èn ala getrow kristen kotoigi foe Jehovah e sroiti densrefi nanga den heri ati na en prijse.
Teki na boskopoe foe Judas na ati
18. (a) San wi ben leri foe a brifi foe Judas foe (a) falsi leriman? (b) „loesoe libifasi”? (c) mankeri foe bribi? (d) respeki foe makti? (e) knoroe nanga kragi? (f) froewondroe gi trawan foe na boen foe gridi wini ede?
18 A brifi foe Judas wani taki foe troe wan sani gi Jehovah Kotoigi ini disi ten. Wi moe tan getrow na a Wortoe foe Gado èn tan farawe foe falsi leriman (Job 13:16; 27:8, 9; Jer. 13; Jud. 4, 19). Den getrowwan moe kaka foetoe gi ibri kori foe go ini „wan loesoe libifasi” (Jud. 3, 4; Gen. 39:7-12). Sosrefi toe wi moe kibri wisrefi gi mankeri foe bribi, bika disi ben sa kan meki wi lasi na tégo libi (Hebr. 3:12; Jud. 5). A boskopoe foe Judas moe tjari wi go so fara foe abi respeki gi makti di Gado ben poti èn foe kaka foetoe gi ibri kori foe go feni fowtoe tapoe den sma di e tjari getrow gemeente frantwortoe foe broko den saka (Hebr. 13:17; Jud. 8, 9). Na presi foe knoroe èn foe kragi, na brifi foe Judas moe tjari wi go so fara foe sori lobi gi Jehovah Gado èn wi mede-bribiman (Matt. 22:37-40; Joh. 13:34, 35; Rom. 13:8-10; Jud. 16). Den wortoe foe Judas e jepi wi toe foe tan farawe foe froewondroe gi trawan ofoe foe gafa den foe gridi wini ede, foe di disi de wan foe den falsi fasi, di e meki wi meki wisrefi de wan tegoe sani ini Jehovah ai. — Odo 3:32; Jud. 16.
19. Foe san-ede wi moe teki na boskopoe foe Judas di a ben kisi foe Gado na ati?
19 Foe dat’ede leki kristen Kotoigi foe Jehovah èn foe en lobi Manpikin, meki wi alamala teki na prenspari èn lobi fasi boskopoe foe na discipel Judas na ati. (Teki gersi Jes. 43:10-12; Tori foe den Apostel 1:8.) En wortoe sa jepi wi foe waka na „pasi foe libi” nanga moro froetrow ete (Ps. 16:11). Meki wi „Tan loekoe boen akroederi Jehovah wortoe”, èn akroederi a brifi foe Judas (Ps. 119:9-16). Na a fasi dati wi sa „stré sondro foe weri gi na bribi” èn wini èn wi sa „kibri wisrefi ini a lobi foe Gado” nanga a jepi foe Gado.
Joe kan memre den punt di e kon now?
□ Soema ben warskow dati „ini den laatste dé spotoeman ben sa kon”, èn foe san-ede Judas e poti prakseri tapoe disi?
□ San ben de „na moro santa bribi”, èn fa wi kan bow wisrefi na tapoe?
□ Fa den mede-bribiman foe Judas ben kan „kibri densrefi ini a lobi foe Gado?
□ Foe sortoe rede ede meki son sma di ben taki den de kristen ben abi sar’ati fanowdoe, èn san a ben wani taki „foe hari den poeroe foe na faja”?
□ Foe san-ede a ben de wan sani di fiti dati Judas ben taki dati Jehovah ben moe kisi glori, majesteiti nanga krakti?
□ Gi sortoe problema wi kan kaka foetoe gi èn wini, te wi teki na boskopoe foe Judas na ati?
[Prenki na tapoe bladzijde 280]
Jehovah getrow kotoigi ini a fosi eeuw, „ben e stré sondro foe weri gi na bribi”, awinsi falsi leriman ben spotoe den toe
[Prenki na tapoe bladzijde 282]
Begi nanga santa jeje