De Gado Mati fu Têgo!

Yu musu du muiti fu feni wan mati; yu musu du muiti fu hori wan mati bun. Yu sa kisi blesi pasa marki fu a muiti di yu e du fu tron wan mati fu Gado èn fu hori en so. Yesus ben taigi den sma di ben bribi na ini en: „Waarheid sa meki unu kon fri” (Yohanes 8:32). San disi wani taki?

Yu kan de fri nownowde. Yu kan kon fri fu den falsi leri èn den lei di Satan panya. Yu kan kon fri fu a lasi-ati di milyunmilyun sma lasi-ati fu di den no sabi Yehovah (Romesma 8:22). Den mati fu Gado kon fri srefi fu a „frede gi dede”.​—Hebrewsma 2:14, 15.

Yu kan de fri na ini a nyun grontapu fu Gado. Yu kan de fri dorodoro na ini a ten di e kon! A Paradijs grontapu sa de sondro feti, siki, nanga ogridu. Drape sma no sa pôti èn angri no sa kiri den. A sa de sondro owrudei nanga dede. A sa de sondro frede, a kwinsi di sma e kwinsi trawan, nanga onregtfardikifasi. Bijbel e taki fu Gado: „Yu e opo yu anu èn e meki den lostu fu ala libisani kon tru.”​—Psalm 145:16.

Den mati fu Gado sa libi fu têgo. Têgo libi na wan warti presenti di Gado sa gi ala sma di e suku fu de en mati (Romesma 6:23). Prakseri nomo san wan libi sondro fu dede sa wani taki gi yu!

Yu sa abi ten fu du wan lo sani. Kande yu ben sa wani leri fa fu plèi wan fu den sani di sma e gebroiki fu meki poku. Noso kande yu wani leri fu meki skedrei noso yu wani tron wan temreman. Kande yu ben sa wani leri sani fu den meti noso fu den bon nanga bromki. Noso kande yu wani go koiri luku tra presi èn si tra kondre nanga sma. Te yu abi têgo libi, dan yu sa man du ala den sani disi!

Yu sa abi ten fu feni furu mati. Têgo libi sa meki taki yu man leri sabi furu trawan di tron mati fu Gado. Yu sa leri sabi den talenti fu den èn den moi eigifasi fu den, èn den sa de yu mati tu. Yu sa lobi den, èn den sa lobi yu (1 Korentesma 13:8). Te yu e libi sondro fu dede, dan yu sa abi a ten fu tron wan mati fu ala sma na grontapu! A moro bun sani, na taki ibri yarihondro di e pasa gowe, a matifasi di yu abi nanga Yehovah sa kon moro tranga. Meki yu de Gado mati fu têgo!