Taki den wortu soifri leki fa yu musu taki den

A NO ala Kresten kisi furu skoroleri. Sma ben sabi den apostel Petrus nanga Yohanes srefi leki ’mofina sma di no ben kisi leri na skoro’ (Tori. 4:13). Ma toku yu musu luku bun taki yu no e hari a prakseri fu sma puru fu a Bijbel waarheid fu di yu no e taki den wortu soifri.

Sani fu hori na prakseri. Na ini ibri tongo, wortu e taki na wan tra fasi. Na ini furu tongo, sma e gebroiki letter fu skrifi. Boiti den letter na ini Sranantongo, dan yu abi letter sosrefi na ini Arabiatongo, Grikitongo, nanga Hebrewtongo. Na presi fu skrifi letter, dan den Sneisi e skrifi a Sneisitongo nanga prenki di abi wan lo pisi na ini. Furu tron den prenki disi e skrifi na presi fu wan wortu noso na presi fu wan pisi fu wan wortu. Aladi den sma fu Yapan nanga Korea leni den prenki disi fu den Sneisi, toku den kan gebroiki den srefi prenki disi fu taki wan sani di de heri tra fasi na ini Sneisitongo.

Fu man taki den tongo bun di e skrifi nanga letter, dan yu musu gebroiki yu sten na so wan fasi, taki yu kan taki ibri letter noso ibri pisi fu wan wortu, na a yoisti fasi. Te den tongo abi den srefi markitiki soleki fa dati de na ini Grikitongo, Spanyorotongo, nanga Sulutongo, dan disi no muilek. Ma te tra tongo abi krakti tapu a tongo di yu e taki, dan dati kan meki taki a fasi fa yu e taki den wortu gersi a fasi fa dati e taki na ini a tongo pe a wortu komoto. Dati meki son leisi yu kan taki wan spesrutu letter fu wan wortu na moro leki wán fasi nomo, èn sontron sma no e taki son pisi fu wan wortu srefi. Yu sa musu meki muiti fu memre o ten yu e taki en tra fasi, èn dan yu musu gebroiki dati furu tron te yu e taki. Na ini Sneisitongo, yu sa musu memre dusundusun prenki efu yu sa wani taki ala den sani disi soifri fa yu musu taki den. Na ini son tongo yu kan taki a srefi wortu na difrenti fasi fu di yu e kenki yu sten fu taki a wortu nanga wan pikinso moro hebi, noso nanga wan pikinso moro fini sten. Te yu e kenki yu sten so, dan a wortu dati wani taki wan heri tra sani baka. Efu yu no e poti nofo prakseri na den sani disi fu wan tongo, dan trawan kan frustan tra sani leki san yu abi na prakseri te yu e taki nanga den.

Efu wan tongo de pe yu kan prati den wortu na ini moro leki wan pisi nomo, dan a de prenspari fu yu sabi tapu sortu pisi fu a wortu yu musu poti krakti te yu e taki. Furu tongo di e wroko so, abi wán fasi fa yu kan kon sabi tapu sortu pisi fu wan wortu yu musu poti krakti. Ma te dati no de so, dan a kan, taki den e poti wan letimarki, kruktumarki, noso topimarki fu yu sabi pe yu musu poti krakti. Disi e yepi yu so taki a no muilek fu taki den wortu soifri. Ma efu a no wán fasi nomo de fu kon sabi fa yu musu taki wan wortu, dan dati e meki en moro muilek. Na ini a kefal dati, efu yu wani taki den wortu soifri, dan kande yu sa musu hori furu sani na ede.

Na ini Sranantongo, yu musu poti prakseri tu na den marki di skrifi tapu den letter. Den marki disi de na tapu den letter, fu eksempre: è, é, ô. Efu yu wani leisi den wortu nanga den marki disi bun, dan yu sa musu sreka yusrefi bun te yu sa musu leisi gi sma.

Te yu wani taki den wortu soifri leki fa den musu taki, dan yu musu luku bun nanga wan tu sani. Te yu e taki wortu tumusi soifri, dan trawan kan denki taki na meki yu e meki en nomo, noso den sa kan denki taki yu e denki tumusi furu fu yusrefi. A srefi sani wi kan taki tu efu yu e taki wortu na wan fasi fa sma ben gwenti taki en fositen. A wan-enkri sani di yu sa du nanga dati, na taki sma sa poti prakseri na yu, na presi fu den poti prakseri na a boskopu. Na a tra sei baka, a no ben sa bun fu taki na so wan fasi taki sma no man frustan krin san yu e taki. Wan tu fu den sani disi taki kaba na ini a les di abi leki nen „Taki den wortu krin”.

A fasi fa sma e taki wan tongo na ini wán kondre, kan de heri tra fasi na ini wan tra kondre, èn sontron a kan de tra fasi srefi na ini ibri kontren fu a srefi kondre. Wan sma fu wan tra kondre kan taki a tongo fu yu, èn sontron na a fasi fa a e taki, yu e yere wantewante taki a komoto fu wan tra kondre. Wan tu tongo abi wortubuku di e sori yu fa yu musu taki den wortu soifri. Efu wan tongo no abi den sortu buku disi, dan yu ben sa kan arki den sma di e taki a tongo èn yu kan aksi den fa fu taki den wortu. Disi kan yepi yu fu taki a tongo moro soifri. Leki Yehovah Kotoigi, wi wani taki na so wan fasi taki sma sa lespeki a boskopu di wi e preiki, èn wi wani taki den sma fu wi birti musu arki nanga prisiri san wi e taki.

Te yu e taki ala dei, dan a moro bun fu taki wortu di yu sabi. Furu tron te wi e taki nanga trawan, dan wi no sa abi problema fu taki den wortu soifri leki fa den musu taki. Ma te yu e leisi nanga wan tranga sten, dan kande yu sa si wan tu wortu di yu no e gebroiki ala dei. Leki Yehovah Kotoigi wi e leisi nanga wan tranga sten furu tron. Wi e leisi Bijbel gi sma te wi e gi den kotoigi. Wan tu brada mag leisi den paragraaf na a Waktitoren-studie, noso na a Gemeente Bukustudie. A de prenspari taki wi e leisi soifri èn taki wi no e leisi wortu tra fasi leki fa den musu leisi, so taki wi no e hari sma prakseri puru fu a boskopu.

Wan tu fasi fu kon moro bun. Furu sma di no e taki wortu soifri, no sabi srefi taki den abi a problema disi. Efu yu skoro-opziener e sori yu wan tu fasi fa yu kan taki den wortu moro bun, dan warderi a switifasi di a e sori yu. Ma te yu sabi san na a problema, dan san yu kan du fu lusu a problema?

Na a fosi presi, te yu musu leisi nanga wan tranga sten, dan teki ten fu taki nanga wan sma di sabi a tongo heri bun. Aksi en den wortu di yu no sabi, èn meki a fruteri yu san den wortu dati wani taki. Efu wan wortu abi tu pisi, noso efu wan wortu de moro langa, dan kande a kan sori yu tapu sortu pisi fu a wortu yu musu poti krakti. Kande a kan sori yu tu fa yu musu taki ala den letter. Sontron yu kan taki wan wortu na moro leki wán fasi nomo, ma dati e anga fu a tori pe a wortu skrifi. Efu yu no abi wortubuku na ini a tongo fu yu, yu kan aksi sma di sabi a tongo fa yu musu leisi son wortu. Ma awansi sortu wortu yu aksi a sma fu yepi yu nanga dati, taki a wortu dati difrenti leisi nanga wan tranga sten na fesi a sma di e yepi yu.

Leki nomru tu, dan wan tra fasi fu yu kan taki den wortu moro soifri, na te yu e leisi gi wan tra sma. Ma a sma disi musu man taki den wortu soifri tu leki fa den musu taki. Te yu sa leisi gi en, dan aksi en fu sori yu pe yu e meki fowtu.

Leki nomru dri, dan ete wan tra fasi fa yu kan taki wortu moro soifri na te yu e arki bun te bun takiman e taki. Efu a Nieuwe-Wereldvertaling noso A Waktitoren nanga Ontwaakt! de fu kisi tapu cassette-lolo na ini a tongo fu yu, dan gebroiki den bun. Te yu e arki den lolo, dan poti yesi spesrutu fu arki den wortu di yu e taki tra fasi leki fa yu e yere den e taki dati tapu a lolo. Skrifi den wortu disi, èn pruberi fu taki den soifri soleki fa yu ben yere dati tapu a lolo. Baka wan pisi ten, yu sa man taki sondro taki yu e meki fowtu, èn disi sa meki taki trutru yu sa taki moro bun.