Wan tu wortu na fesi

NA ALMAKTI GADO na a Moro Hei Masra fu hemel nanga grontapu. Wi abi en fanowdu fu man tan na libi nownow èn sosrefi na ini a ten di e kon. A abi a makti fu blesi sma èn a makti fu strafu sma. A abi a makti fu gi libi èn a makti fu teki a libi baka. Efu a feni wi bun, dan sani o waka bun gi wi, ma efu a no feni wi bun, dan dati o abi takru bakapisi gi wi. Iya, a de tumusi prenspari taki na anbegi fu wi e plisi en!

Sma e anbegi Gado na furu difrenti fasi. Efu den difrenti bribi de leki pasi di e tyari sma go na Gado, dan yu denki taki Gado e feni ala den pasi disi bun? Nôno, a no e feni ala den pasi disi bun. Yesus, a profeiti fu Gado, ben sori taki tu pasi nomo de. A ben taki: „A pasi di e tyari sma go dede, bradi èn a bigi, èn furu sma e waka a pasi dati; ma a doro di e tyari sma go na libi, pikin èn a pasi fu en smara, èn wan tu sma nomo e feni en.”​—Mateyus 7:13, 14.

Tu sortu fasi fu anbegi nomo de: wán di e tyari sma go na libi, èn wán di e tyari sma go dede. A brochure disi skrifi fu yepi yu fu feni a pasi di e tyari sma go na têgo libi.