Tu boskopu fu Gado

Wi kan si heri Bijbel leki wan boskopu fu Gado. Wi Papa na hemel meki sma skrifi Bijbel fu gi wi rai. Ma meki wi poti prakseri na tu spesrutu boskopu di sma kisi moro leki 2000 yari pasa. Na engel Gabrièl di ben e „tanapu krosibei fu Gado” ben tyari den boskopu disi (Lukas 1:19). Ma gi suma a tyari den boskopu disi?

Meki wi luku san pasa sowan 3 yari fosi Krestes gebore. Gi suma Gabrièl e tyari a fosi boskopu? Gi Sakaria, wan priester fu Yehovah di e tan na a bergikontren fu Yudea krosibei fu Yerusalem. En nanga en wefi Elisabet owru kaba èn den no abi pikin. Now na Sakaria musu wroko leki priester na a tempel fu Gado na ini Yerusalem. Wantronso Gabrièl e sori ensrefi na Sakaria na ini a tempel, krosibei fu na altari pe den e bron switismeri.

Wi kan frustan taki Sakaria e frede. Ma na engel e taigi en: „No frede Sakaria, fu di Gado arki a fayafaya begi fu yu. Yu wefi Elisabet o meki wan manpikin gi yu di yu musu kari Yohanes.” Gabrièl e taki tu dati Yohanes „o de wan prenspari man na fesi Yehovah” èn taki a o „sreka a pipel gi Yehovah”.​—Lukas 1:13-17.

Sakaria no man bribi a tori. Fu san ede? Fu di en nanga Elisabet owru kaba. Dati meki Gabrièl e taigi en: „Fu di yu no bribi san mi taki, meki yu o kon babaw èn yu no o man taki teleki a dei te den sani disi pasa.”​—Lukas 1:20.

Disiten den sma na dorosei e aksi densrefi fu san ede Sakaria e tan so langa na inisei. Te fu kaba a e kon na doro, ma a no man taki. Dati meki a pruberi fu sori den nanga en anu san pasa. A de krin taki wan wondru pasa di a ben de na ini a tempel.

Te Sakaria kaba du en wroko na a tempel, a e drai go baka na en oso. A no langa baka dati Elisabet e kon de nanga bere! Feifi mun langa Elisabet no e gowe libi en oso, aladi a de nanga bere.

Baka dati Gabrièl e tyari a di fu tu boskopu. Gi suma? Gi Maria, wan yongu uma di no trow ete. A e libi na ini a foto Nasaret di de na ini a kontren Galilea, na a noordsei fu a kondre. San na engel e taigi en? A e taki: „Gado feni yu bun.” Gabrièl taigi Maria tu: „Yu o de nanga bere èn yu o kisi wan manpikin di yu musu kari Yesus.” A taki tu: „A o de wan prenspari sma èn den o kari en a Manpikin fu a Moro Heiwan. . . . A o tiri fu têgo leki Kownu fu a famiri fu Yakob èn en Kownukondre o tan fu ala ten.”​—Lukas 1:30-33.

A no de fu taki dati Gabrièl ben si en leki wan bigi grani fu tyari den tu boskopu disi. Te wi o leisi moro fu Yohanes nanga Yesus, dan wi o frustan fu san ede den boskopu disi di kon fu Gado prenspari so.