Yu osofamiri kan de koloku

1, 2. Fa Yehovah wani taki na osofamiri-libi musu de?

YEHOVAH GADO trow a fosi man nanga uma. Bijbel e fruteri wi taki a meki a fosi uma èn ’a tyari en go na a man’. Adam ben breiti so te dati a taki: „Ai, disi na trutru bonyo fu mi bonyo èn skin fu mi skin” (Genesis 2:22, 23). Disi e sori wi taki Yehovah wani taki sma di trow musu de koloku.

² Na wan sari sani taki furu sma no abi wan koloku osofamiri-libi. Ma Bijbel abi furu rai di kan yepi ala sma na ini na osofamiri fu de koloku èn fu prisiri nanga makandra.​—Lukas 11:28.

SAN GADO E FRUWAKTI FU WAN MASRA

3, 4. (a) Fa wan masra musu libi nanga en wefi? (b) Fu san ede a prenspari taki masra nanga wefi gi makandra pardon?

³ Bijbel e taki dati wan bun masra musu lobi en wefi èn a musu abi lespeki gi en. Grantangi, leisi Efeisesma 5:25-29. Ala ten wan masra musu sori en wefi taki a lobi en. A o sorgu en èn a o luku bun taki nowan ogri no pasa nanga en. Ensrefi no o du nowan ogri nanga en tu.

⁴ Ma san wan masra musu du te en wefi e meki fowtu? Bijbel e taigi masra: „Tan lobi un wefi èn no abi bita-ati gi den” (Kolosesma 3:19). Un masra, hori na prakseri taki unsrefi e meki fowtu. Efu un wani taki Gado gi un pardon, dan un musu gi un wefi pardon (Mateyus 6:12, 14, 15). Te masra nanga wefi de klariklari fu gi makandra pardon, dan dati o yepi den fu abi wan koloku trowlibi.

5. Fu san ede wan masra musu gi grani na en wefi?

⁵ Yehovah e fruwakti fu masra taki den e gi grani na den wefi. Wan masra musu sabi san en wefi abi fanowdu. Disi na wan seryusu sani. Efu wan masra no e libi bun nanga en wefi, dan a kan taki Yehovah no arki den begi fu en (1 Petrus 3:7). San prenspari gi Yehovah na taki sma musu lobi en. A no feni taki mansma betre moro umasma.

6. San a wani taki dati masra nanga wefi na „wán skin”?

⁶ Yesus ben sori taki wan masra nanga en wefi „no de tu skin moro, ma wán skin” (Mateyus 19:6). Den no o waka gi makandra, ma den o sori lobi gi makandra wawan (Odo 5:15-21; Hebrewsma 13:4). Masra nanga wefi musu hori den seksfiri fu makandra na prakseri, den no musu denki densrefi nomo (1 Korentesma 7:3-5). Wan masra no musu frigiti taki „nowan man abi bita-ati gi en eigi skin. Na presi fu dati, a e gi en nyanyan èn a lobi en.” Dati meki a musu lobi en wefi. San moro prenspari gi wan wefi na taki en masra lobi en èn taki a e sori switifasi gi en.​—Efeisesma 5: 29.

SAN GADO E FRUWAKTI FU WAN WEFI

7. Fu san ede wan osofamiri abi wan edeman fanowdu?

⁷ Ala osofamiri abi wan edeman fanowdu di kan yepi a famiri fu wroko bun nanga makandra. Na 1 Korentesma 11:3, Bijbel e taki: „Krestes na a ede fu ibri man. A man na a ede fu na uma, èn Gado na a ede fu Krestes.”

8. Fa wan wefi kan sori bigi lespeki gi en masra?

⁸ Ala masra e meki fowtu. Ma te wan wefi e horibaka gi den bosroiti di en masra e teki èn a e wroko makandra nanga en, dan a heri osofamiri e kisi wini (1 Petrus 3:1-6). Bijbel e taki: „A wefi musu abi bigi lespeki gi en masra” (Efeisesma 5:33). Ma san wan wefi musu du te en masra no abi a srefi bribi leki en? Toku a musu sori bigi lespeki gi en masra. Bijbel e taki: „Un uma . . . saka unsrefi na ondro un eigi masra, so taki te sonwan fu den no wani du san Gado wortu e taki, dan a fasi fa unu e tyari unsrefi kan meki den teki a bribi sondro fu unu taigi den wan sani, bika den si nanga den eigi ai fa unu e tyari unsrefi na wan krin fasi èn nanga bigi lespeki” (1 Petrus 3:1, 2). A bun eksempre fu wan wefi kan yepi en masra fu lespeki a bribi fu en.

9. (a) San wan wefi kan du te en nanga en masra no e agri fu wan tori? (b) Sortu rai wefi e kisi na ini Titus 2:4, 5?

⁹ San wan wefi kan du te en nanga en masra no e agri fu wan tori? Na wan lespeki fasi a musu taigi en masra fa a e denki fu a tori. Fu eksempre, Sara ben taki wan sani di Abraham no ben lobi, ma Yehovah taigi Abraham: „Arki en” (Genesis 21:9-12). Nofo tron wan masra di e dini Yehovah no o teki wan bosroiti di de teige den leri fu Bijbel. Dati meki en wefi musu horibaka gi en (Tori fu den apostel 5:29; Efeisesma 5:24). Wan bun wefi o sorgu en osofamiri. (Leisi Titus 2:4, 5.) Te en masra nanga den pikin fu en e si o tranga a e wroko fu sorgu den, dan den o abi moro lobi nanga lespeki gi en.​—Odo 31:10, 28.

10. Soleki fa Bijbel e leri, dan o ten wan trowpaar mag prati noso brokotrow?

¹⁰ Son trowpaar e bosroiti esi-esi fu prati noso fu brokotrow. Ma Bijbel e taki dati „wan wefi no musu prati fu en masra” èn „wan masra no musu gowe libi en wefi” (1 Korentesma 7:10, 11). Son leisi wan situwâsi kan de so muilek taki wan trowpaar e prati. Ma disi na wan seryusu bosroiti. San Bijbel e taki fu brokotrow? Bijbel e sori taki a trow mag broko soso te wan masra noso wan wefi abi seks nanga wan sma di a no en trowpatna.​—Mateyus 19:9.

SAN GADO E FRUWAKTI FU PAPA NANGA MAMA

11. San na a moro prenspari sani di pikin abi fanowdu?

¹¹ Papa nanga mama, du ala san unu man fu meki ten gi den pikin fu unu. Den abi unu fanowdu èn moro leki iniwan tra sani a prenspari taki unu yepi den fu kon sabi Yehovah.​—Deuteronomium 6:4-9.

12. San papa nanga mama musu du fu kibri den pikin fu den?

¹² A grontapu fu Satan e kon ogri moro nanga moro. Yu abi sma di wani du ogri nanga yu pikin. Sonwan fu den o pruberi fu abi seks nanga den srefi. Son papa nanga mama no lobi taki fu a tori disi. Ma toku den musu warskow den pikin gi den sortu sma disi èn den musu leri den fa den kan wai pasi gi den. Papa nanga mama, unu musu kibri den pikin fu unu.a​—1 Petrus 5:8.

13. Fa papa nanga mama musu gi den pikin leri?

¹³ Papa nanga mama abi a frantwortu fu leri den pikin fa den musu tyari densrefi. Fa yu kan yepi yu pikin? Den pikin fu yu abi leri fanowdu. Ma efu yu o strafu den, dan noiti yu musu du ogri-ati sani nanga den noso taigi den hati sani (Yeremia 30:11). Sobun, no strafu yu pikin te yu e atibron. Yu no wani taki den sani di yu e taigi den, de neleki na ’dyuku yu e dyuku den nanga wan feti-owru’ (Odo 12:18). Yepi den pikin fu yu fu frustan fu san ede den musu gi yesi na yu.​—Efeisesma 6:4; Hebrewsma 12:9-11; luku „Ete wan tu sani” 30.

SAN GADO E FRUWAKTI FU PIKIN

14, 15. Fu san ede pikin musu gi yesi na den papa nanga mama?

¹⁴ Ala ten Yesus ben gi yesi na en Papa, srefi te a ben muilek (Lukas 22:42; Yohanes 8:28, 29). Yehovah e fruwakti tu fu pikin taki den e gi yesi na den papa nanga mama.​—Efeisesma 6:1-3.

¹⁵ Pikin no musu frigiti taki efu den gi yesi na den papa nanga mama srefi efu a muilek, dan Yehovah nanga den papa nanga mama o breiti nanga den.b​—Odo 1:8; 6:20; 23:22-25.

16. (a) Fa Satan e pruberi fu meki yongusma du sani di no bun? (b) Fu san ede a prenspari fu suku mati di lobi Yehovah?

¹⁶ Didibri kan gebroiki mati noso tra yonguwan fu meki yu du sani di no bun. A sabi taki a kan hebi gi yu fu no du san yu mati e taki. Fu eksempre, Dina na umapikin fu Yakob ben abi mati di no ben lobi Yehovah. Disi tyari furu problema kon gi en nanga en famiri (Genesis 34:1, 2). Efu den mati fu yu no lobi Yehovah, dan den kan gi yu deki-ati fu du wan sani di Yehovah no lobi. A sani disi o hati yu, yu famiri, nanga Gado (Odo 17:21, 25). Dati meki a prenspari taki yu suku mati di lobi Yehovah.​—1 Korentesma 15:33.

YU OSOFAMIRI KAN DE KOLOKU

17. Sortu frantwortu ibri sma na ini na osofamiri abi?

¹⁷ Te ala sma na ini wan osofamiri e du san Gado e fruwakti fu den, dan den kan wai pasi gi furu problema. Sobun, efu yu na wan masra, sori yu wefi taki yu lobi en. Efu yu na wan wefi, sori lespeki gi yu masra, saka yusrefi na en ondro èn teki na eksempre fu a wefi di kari na Odo 31:10-31. Efu yu abi pikin, leri den fu lobi Gado (Odo 22:6). Efu yu na wan papa, tiri yu osofamiri „na wan bun fasi” (1 Timoteyus 3:4, 5; 5:8). Pikin musu gi yesi na den papa nanga mama (Kolosesma 3:20). No frigiti taki ibri sma na ini na osofamiri kan meki fowtu, dati meki unu musu abi sakafasi èn wi musu aksi makandra pardon. Iya, Bijbel abi rai gi ibri sma na ini na osofamiri.