Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • bhs kap. 17 blz. 174-184
  • A grani di wi abi fu begi

Felem no de na a pisi disi.

Sorry, wan sani no go bun di wi pruberi fu drai a felem.

  • A grani di wi abi fu begi
  • San Bijbel kan leri wi?
  • Leisi en na ini Bijbel leri
  • Edeprakseri
  • A srefi sortu tori
  • FU SAN EDE WI MUSU BEGI YEHOVAH?
  • SAN WI MUSU DU EFU WI WANI TAKI GADO ARKI WI?
  • AKSI DI ABI FU DU NANGA BEGI
  • FA GADO E PIKI DEN BEGI FU WI?
  • Begi o yepi yu fu tron wan mati fu Gado
    Yu kan de koloku fu têgo!—Wan moi fasi fu studeri Bijbel
  • Kon krosibei na Gado ini begi
    San Gado e aksi foe wi?
  • Fa jepi e kon nanga begi
    Joe kan libi foe têgo na ini wan paradijs na grontapoe
  • Begi gi makandra
    A Waktitoren—A e taki fu Yehovah Kownukondre 1984
Moro sani
San Bijbel kan leri wi?
bhs kap. 17 blz. 174-184

KAPITEL 17

A grani di wi abi fu begi

Wan uma e begi na dorosei pe yu e si den stari

„A Mekiman fu hemel nanga grontapu” wani taki wi taki nanga en.​—Psalm 115:15

1, 2. Fu san ede yu feni taki begi na wan moi kado? Fu san ede yu musu sabi san Bijbel e taki fu begi?

TE WI luku a hemel nanga ala den stari nanga den planeiti, dan grontapu pikin srefisrefi. Te Yehovah e luku kon na grontapu, dan den sma na grontapu de leki wan pikin dropu watra na ini wan emre (Psalm 115:15; Yesaya 40:15). Aladi na so Yehovah e si wi, toku Psalm 145:18, 19 e taki: „Yehovah de krosibei fu ala den wan di e kari en. A de krosibei fu ala den wan di e bari kari en nanga wan krin ati. San den wan di abi lespeki gi en e angri fu kisi, na dati a o gi den. Te den e bari suku yepi na en, a o yere den èn a o frulusu den.” Wi abi wan moi grani. Yehovah, wi bigi Mekiman, wani de krosibei fu wi èn a wani arki den begi fu wi. Iya, begi na wan grani, wan moi kado di Yehovah gi ibriwan fu wi.

2 Ma Yehovah o arki wi soso te wi e taki nanga en na a fasi di en feni bun. Fa wi kan du dati? Kon meki wi go luku san Bijbel e taki fu begi.

FU SAN EDE WI MUSU BEGI YEHOVAH?

3. Fu san ede yu musu begi Yehovah?

3 Yehovah wani taki yu taki nanga en na ini begi. Fa wi du sabi dati? Grantangi leisi Filipisma 4:6, 7. Prakseri a moi sani di a tekst e taki. A Mekiman fu hemel nanga grontapu wani kon sabi yu èn a wani taki yu taigi en fa yu e firi èn sortu problema yu abi.

4. Fa yu e tron moro bun mati fu Yehovah te yu abi a gwenti fu begi?

4 Begi e yepi wi fu tron moro bun mati fu Yehovah. Te mati abi a gwenti fu fruteri makandra fa den e denki, fa den e firi èn sortu broko-ede den abi, dan den e tron moro bun mati. Na a srefi te wi e begi Yehovah. Na ini Bijbel Yehovah e fruteri yu fa a e denki èn fa a e firi. A e taki tu san a o du na ini a ten di e kon. Yu o man fruteri en srefi den dipi firi fu yu, efu yu abi a gwenti fu taki nanga en. Te yu e du disi, dan yu o tron wan moro bun mati fu Yehovah.​—Yakobus 4:8.

SAN WI MUSU DU EFU WI WANI TAKI GADO ARKI WI?

5. Fa wi du sabi taki Yehovah no e arki ala begi?

5 Yehovah e arki ala begi? Nôno, a no e du dati. Na ini a ten fu a profeiti Yesaya, Yehovah ben taigi den Israelsma: „Awinsi unu e begi mi furu tron, toku mi no o arki. Unu kiri furu sma” (Yesaya 1:15). Sobun, efu wi no luku bun, dan wi kan du sani di Yehovah no lobi èn dati kan meki taki a no arki den begi fu wi.

6. Fu san ede bribi prenspari? Fa yu kan sori taki yu abi bribi?

6 Efu wi wani taki Yehovah arki den begi fu wi, dan wi musu abi bribi (Markus 11:24). Na apostel Paulus e taki: „Sondro bribi wan sma no kan prisiri Gado, fu di a sma di e anbegi Gado musu bribi taki a de trutru èn taki a e pai den wan di e suku en fayafaya” (Hebrewsma 11:6). Ma a no nofo fu taki dati wi abi bribi. Wi musu gi yesi na Yehovah ibri dei fu sori taki wi abi bribi.​—Leisi Yakobus 2:26.

7. (a) Fu san ede wi musu abi sakafasi nanga lespeki te wi e begi Yehovah? (b) Fa wi kan sori taki wi e begi komoto fu wi ati?

7 Wi musu abi sakafasi te wi e taki nanga Yehovah èn wi musu sori lespeki tu. Fu san ede? Te wi ben o taki nanga wan kownu noso president, dan wi ben o du dati na wan lespeki fasi. Yehovah na a Almakti Gado, dan wi no musu abi moro sakafasi nanga lespeki te wi e taki nanga en? (Genesis 17:1; Psalm 138:6) Te wi e begi Yehovah, dan wi musu begi en komoto fu wi ati na presi fu taki den srefi wortu ibri leisi baka.​—Mateyus 6:7, 8.

8. Te wi begi fu wan sani, dan san wi musu du moro?

8 Te wi begi fu wan sani, dan wisrefi musu du wan sani tu. Fu eksempre, efu wi begi Yehovah fu gi wi san wi abi fanowdu gi a dei, dan wi no musu lesi èn fruwakti taki Yehovah o gi wi ala sani aladi wi man wroko fu kisi den. Wi musu wroko tranga èn wi musu du iniwan wroko san wi man (Mateyus 6:11; 2 Tesalonikasma 3:10). Noso efu wi begi Yehovah fu yepi wi fu tapu nanga wan sani di no bun, dan wi musu wai pasi gi iniwan situwâsi di kan de wan tesi gi wi (Kolosesma 3:5). Meki wi go luku wan tu aksi di abi fu du nanga begi.

AKSI DI ABI FU DU NANGA BEGI

9. Suma wi musu begi? San Yohanes 14:6 e leri wi fu begi?

9 Suma wi musu begi? Yesus ben leri den bakaman fu en fu begi „wi Tata na hemel” (Mateyus 6:9). A ben taki tu: „Mi na a pasi, mi na san tru, èn mi na a libi. Nowan sma kan kon na a Tata sondro mi” (Yohanes 14:6). Sobun, wi musu begi Yehovah wawan èn wi musu du dati na ini a nen fu Yesus. San dati wani taki? Efu wi wani taki Yehovah arki den begi fu wi, dan wi musu sori lespeki gi a spesrutu posisi di Yehovah gi Yesus. Soleki fa wi leri, dan Yesus kon na grontapu fu frulusu wi fu sondu nanga dede (Yohanes 3:16; Romesma 5:12). Yehovah poti Yesus tu leki Granpriester nanga Krutuman.​—Yohanes 5:22; Hebrewsma 6:20.

Sma di e begi na ini difrenti situwâsi

Wi kan begi na iniwan ten fu a dei

10. Wi musu sidon noso tanapu na wan spesrutu fasi te wi e begi? Fruklari disi.

10 Wi musu sidon noso tanapu na wan spesrutu fasi te wi e begi? Nôno, Yehovah no e aksi dati fu wi. Bijbel e leri wi taki wi kan taki nanga Yehovah awinsi wi e kindi, sidon noso tanapu, solanga wi e du dati na wan lespeki fasi (1 Kroniki 17:16; Nehemia 8:6; Danièl 6:10; Markus 11:25). San moro prenspari gi Yehovah na a lespeki fasi fa wi e taki nanga en, èn taki wi e fruteri en san de na tapu wi ati. Wi kan begi nanga wan tranga sten noso na ini wi ati. Wi kan begi na iniwan presi èn na iniwan ten fu a dei. Te wi e begi Yehovah, wi kan de seiker taki a e yere wi, awinsi nowan tra sma man yere wi.​—Nehemia 2:1-6.

11. Fu sortu sani wi kan taki nanga Yehovah?

11 Fu sortu sani wi kan begi? Wi kan begi fu iniwan sani di Yehovah feni bun. Bijbel e taki: „Awansi san wi e aksi en, a e yere wi, solanga a e kruderi nanga a wani fu en” (1 Yohanes 5:14). Wi kan taki nanga Yehovah fu sani di abi fu du nanga wisrefi? Iya. Te wi e taki nanga en a musu de neleki te wi e taki nanga wan bun mati. Wi kan taigi Yehovah iniwan sani di de na tapu wi ati (Psalm 62:8). Wi kan aksi en fu gi wi a santa yeye fu en fu yepi wi fu du san bun (Lukas 11:13). Wi kan aksi Yehovah tu fu gi wi koni fu teki bun bosroiti èn fu gi wi krakti fu man horidoro te wi abi problema (Yakobus 1:5). Wi musu aksi Yehovah fu gi wi pardon fu wi sondu (Efeisesma 1:3, 7). Wi musu begi tu gi trawan, soleki wi famiri nanga wi brada nanga sisa na ini a gemeente.​—Tori fu den apostel 12:5; Kolosesma 4:12.

12. San na den moro prenspari sani fu san wi musu begi?

12 San na den moro prenspari sani fu san wi musu begi? Wi musu begi fu sani di abi fu du nanga Yehovah nanga a wani fu en. Nanga wi heri ati wi musu gi en tangi fu ala san a du gi wi (1 Kroniki 29:10-13). Wi sabi disi fu di Yesus ben leri en disipel fa fu begi di a ben na grontapu. (Leisi Mateyus 6:9-13.) A taigi den taki den musu begi fosi taki a nen fu Gado musu de santa. Baka dati a sori taki wi musu begi taki Gado Kownukondre musu kon èn taki a wani fu Yehovah musu pasa na grontapu. Yesus sori taki baka te wi begi fu den prenspari sani disi, dan wi kan begi gi den sani di wi abi fanowdu. Te wi e poti Yehovah nanga a wani fu en na a fosi presi na ini wi begi, dan wi e sori san moro prenspari gi wi.

13. O langa den begi fu wi musu de?

13 O langa den begi fu wi musu de? Bijbel no e taki dati. Den begi fu wi kan syatu noso langa. Fu eksempre, te wi e go nyan wi kan taki wan syatu begi, ma te wi e taki Yehovah tangi, noso te wi e fruteri en den problema fu wi, dan wi kan begi moro langa (1 Samuel 1:12, 15). Wi no wani begi langa, soso fu du sma-ai sani neleki fa son sma ben du na ini a ten fu Yesus (Lukas 20:46, 47). Yehovah no lobi den sortu begi dati. San prenspari gi en, na taki wi musu taki san de na wi ati.

14. Omeni leisi wi kan begi èn san disi e leri wi fu Yehovah?

14 Omeni leisi wi kan begi? Yehovah e taigi wi fu taki ala ten nanga en. Bijbel e taki dati wi musu „begi doronomo” èn taki wi musu „tan begi” (Mateyus 26:41; Romesma 12:12; 1 Tesalonikasma 5:17). Yehovah de klariklari fu arki wi. Ibri dei wi kan gi en tangi fu a lobi di a e sori wi èn gi ala den sani di a e gi wi. Wi kan aksi en tu fu tiri wi, fu gi wi krakti èn fu trowstu wi. Efu wi e si en leki wan bigi grani fu taki nanga Yehovah, dan wi o gebroiki ibri okasi fu taki nanga en.

15. Fu san ede wi musu taki „amen” na a kaba fu wan begi?

15 Fu san ede wi musu taki „amen” na a kaba fu wan begi? A wortu „amen” wani taki „seiker” noso „na so a de”. Te wi e taki „Amen” na a kaba fu wi eigi begi, dan wi e sori taki wi begi nanga wi heri ati (Psalm 41:13). Bijbel e leri wi taki a bun tu fu taki „amen” nanga wan tranga sten noso na ini wi ati na a kaba fu a begi fu wan tra sma fu sori taki wi e agri nanga san a taki.​—1 Kroniki 16:36; 1 Korentesma 14:16.

FA GADO E PIKI DEN BEGI FU WI?

16. Yehovah e piki den begi fu wi trutru? Fruklari dati.

16 Yehovah e piki den begi fu wi trutru? Iya, a e du dati. Bijbel e taki dati en na „a sma di e arki begi” (Psalm 65:2). Yehovah e arki den begi fu milyunmilyun sma èn a e piki den begi na difrenti fasi.

17. Fa Yehovah e gebroiki den engel nanga den anbegiman fu en na grontapu fu piki den begi fu wi?

17 Yehovah e gebroiki den engel nanga den anbegiman fu en na grontapu fu piki den begi fu wi (Hebrewsma 1:13, 14). Furu ondrofenitori de di e sori taki sma ben begi Gado fu yepi den fu frustan Bijbel èn syatu baka dati wan Yehovah Kotoigi kon na den. Bijbel e sori taki engel e yepi prati a „bun nyunsu” na heri grontapu. (Leisi Openbaring 14:6.) Boiti dati, furu fu wi begi Yehovah fu wan problema di wi abi noso fu wan sani di wi abi fanowdu èn baka dati wi kisi yepi fu wan Kresten brada noso sisa.​—Odo 12:25; Yakobus 2:16.

Wan Kresten trowpaar e yepi wan mati fu den di owru kaba èn di no man waka so bun

Te wan Kresten brada noso sisa kon yepi wi, dan dati kan de wan fasi fa Yehovah e piki den begi fu wi

18. Fa Yehovah e gebroiki en santa yeye nanga a Bijbel fu piki den begi fu wi?

18 Yehovah e gebroiki en santa yeye fu piki den begi fu wi. Te wi e begi Gado fu yepi wi nanga wan problema fu wi, dan a kan gebroiki en santa yeye fu tiri wi èn fu gi wi krakti (2 Korentesma 4:7). Yehovah e gebroiki a Bijbel tu fu piki den begi fu wi èn fu yepi wi fu teki bun bosroiti. Te wi e leisi Bijbel, dan wi kan feni tekst di kan yepi wi. Yehovah kan sorgu tu taki wan sma na a konmakandra e gi wan piki di e gi wi a deki-ati di wi abi fanowdu noso wan owruman fu a gemeente kan taki fu wan Bijbeltekst nanga wi.​—Galasiasma 6:1.

19. Fu san ede a kan gersi leki Yehovah no piki den begi fu wi?

19 Son leisi wi kan aksi wisrefi: ’Fu san ede Yehovah no piki den begi fu mi ete?’ No frigiti taki Yehovah sabi o ten èn fa a musu piki den begi fu wi. A sabi san wi abi fanowdu. A kan taki wi musu tan begi fu wan pisi ten fu sori taki den sani di wi e taigi en prenspari gi wi trutru èn fu sori en taki wi e bribi na ini en (Lukas 11:5-10). Son leisi Yehovah e piki den begi fu wi na wan fasi di wi no ben denki. Fu eksempre, kande wi begi Yehovah fu wan problema, ma a kan taki na presi fu puru a problema, a e gi wi a krakti fu horidoro.​—Leisi Filipisma 4:13.

20. Fu san ede wi musu begi Yehovah ala ten?

20 Na wan grani trutru fu begi Yehovah! Wi kan de seiker taki a o arki wi (Psalm 145:18). O moro wi e begi Yehovah nanga wi heri ati, o moro bun mati wi o tron fu en.

SAN WI LERI

1 YEHOVAH WANI ARKI DEN BEGI FU WI

„Yehovah de krosibei fu ala den wan di e kari en. A de krosibei fu ala den wan di e bari kari en nanga wan krin ati.”​—Psalm 145:18

San wi musu du efu wi wani taki Yehovah arki den begi fu wi?

  • Hebrewsma 11:6

    Wi musu abi bribi.

  • Psalm 138:6

    Wi musu abi sakafasi nanga lespeki.

  • Yakobus 2:26

    Wi musu gi yesi na Yehovah efu wi wani taki a arki den begi fu wi.

  • Mateyus 6:7, 8

    Te wi e begi Yehovah, dan wi musu begi komoto fu wi ati na presi fu taki den srefi wortu ibri leisi baka.

  • Yesaya 1:15

    Wi musu libi soleki fa Gado wani.

2 AKSI DI ABI FU DU NANGA BEGI

  • Suma wi musu begi?

    Mateyus 6:9; Yohanes 14:6

  • Wi musu sidon noso tanapu na wan spesrutu fasi te wi e begi?

    1 Kroniki 17:16; Nehemia 8:5, 6; Danièl 6:10; Markus 11:25

  • Yehovah e yere wi te wi e begi na ini wi ati?

    Nehemia 2:1-6

  • O langa den begi fu wi musu de?

    1 Samuel 1:12, 15; Lukas 20:46, 47

  • Omeni leisi wi kan begi?

    Romesma 12:12; 1 Tesalonikasma 5:17

  • Fu san ede wi e taki „amen” na a kaba fu wan begi?

    1 Kroniki 16:36; 1 Korentesma 14:16

3 FU SORTU SANI WI KAN BEGI?

„Awansi san wi e aksi en, a e yere wi, solanga a e kruderi nanga a wani fu en.”​—1 Yohanes 5:14

Fu sortu sani wi kan begi?

  • Mateyus 6:9, 10

    Begi taki sma du a wani fu Yehovah.

  • 1 Kroniki 29:10-13

    Begi fu taki Gado tangi.

  • Mateyus 6:11-13

    Taki nanga Yehovah fu den sani di yu abi fanowdu èn fu den problema fu yu.

  • Lukas 11:13

    Begi fu aksi santa yeye.

  • Yakobus 1:5

    Begi Yehovah fu gi yu koni fu teki bun bosroiti.

  • Filipisma 4:13

    Begi Yehovah fu gi yu a krakti fu horidoro.

  • Efeisesma 1:3, 7

    Begi fu kisi pardon fu sondu.

  • Tori fu den apostel 12:5

    Begi gi trawan.

4 YEHOVAH E PIKI DEN BEGI FU WI

„Yu na a sma di e arki begi. Na yu ala sortu sma o kon suku yepi.”​—Psalm 65:2

Fa Yehovah e piki den begi fu wi?

  • Odo 12:25; Openbaring 14:6

    Yehovah kan gebroiki engel nanga libisma fu yepi wi.

  • 2 Korentesma 4:7

    En santa yeye e gi wi a yepi di wi abi fanowdu.

  • Filipisma 4:6, 7, 13

    A e gi wi a freide nanga a krakti di wi abi fanowdu fu horidoro.

  • Galasiasma 6:1; 2 Timoteyus 3:16, 17

    A e gebroiki a Bijbel nanga a gemeente fu gi wi koni rai.

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma