LES 14
Wan srafu di ben e gi yesi na Gado
Yosef ben de wan fu den yongu manpkin fu Yakob. Den bigi brada fu Yosef ben si taki den p’pa ben lobi Yosef moro den. Fa yu denki den ben e firi? Den ben dyarusu tapu Yosef èn den ben teige en. Wan leisi Yosef kisi wan tu aparti dren èn a ferteri den brada fu en san a dren. Den dren ben e sori taki den o boigi gi Yosef wan dei. A sani disi meki taki den ati ben bron moro nanga en!
Wan dei den brada fu Yosef ben e luku den skapu fu den p’pa krosbei fu a foto Sikem. Yakob seni Yosef fu go luku fa a e go nanga den. Yosef ben de farawe ete, di den si taki a e kon. Den taigi makandra: ’A man di e dren den bigi dren e kon. Kow kiri en.’ Den grabu en èn den trowe en go na ini wan dipi peti. Ma Yuda, wan fu den brada fu en taki: ’No kiri en, ma meki wi seri en leki wan srafu.’ Na so den seri Yosef gi bisnisman fu Midian gi 20 pisi solfru. Den man disi ben e go na Egepte.
Baka dati den brada fu Yosef dopu a langa krosi fu en na ini brudu fu wan bokoboko. Den seni en gi den p’pa, dan den taki: ’Disi a no a krosi fu yu manpkin?’ Yakob ben denki taki wan ogri meti kiri Yosef. A ben sari srefsrefi. Nowan sma ben man trowstu en.
Di den bisnisman fu Midian doro na Egepte, den seri Yosef leki srafu gi Potifar, wan man di ben e wroko gi a kownu fu Egepte. Ma Yehovah ben de nanga Yosef. Potifar si taki Yosef ben e du en wroko bun èn taki a ben kan fertrow en. Dati meki heri esi Potifar gi Yosef a frantwortu fu luku ala den sani di a ben abi.
A frow fu Potifar ben si taki Yosef moi èn taki a tranga. Ala dei a ben e aksi Yosef fu kon d’don nanga en. San Yosef du? A no ben wani. A taigi a frow: ’Nôno! A sani disi no mag. Mi basi e fertrow mi èn yu na en frow. Efu mi d’don nanga yu, dan mi o sondu teige Gado!’
Wan dei a frow fu Potifar ben wani dwengi Yosef fu d’don nanga en. A grabu en krosi hori, ma Yosef lon gwe. Di Potifar doro na oso, en frow taigi en taki Yosef ben pruberi fu d’don nanga en. Ma a frow ben e lei. Potifar kisi wán bigi ati bron. Dati meki a poti Yosef na straf’oso. Ma Yehovah no ben fergiti Yosef.
„Sobun, saka unsrefi na ondro a bigi èn makti Gado, so taki a kan hei unu na a reti ten.”—1 Petrus 5:6