LES 23
Te yu o dopu yu o kisi furu blesi!
Yesus leri wi taki Kresten musu dopu. (Leisi Mateyus 28:19, 20.) Ma san na dopu? Èn san wan sma musu du fu man dopu?
1. Fa wan sma musu dopu?
A wortu „dopu” e kon fu wan Griki wortu di wani taki „dukrun” go ondro watra. Di Yesus dopu na ini a Yordan-liba, en heri skin go ondro a watra èn baka dati a „opo komoto na ini a watra” (Markus 1:9, 10). Na a srefi fasi tru Kresten e dopu. Den heri skin e go ondro a watra.
2. Te wan sma dopu, dan san dati e sori?
Te wan sma dopu, dan dati e sori taki a gi ensrefi abra na Yehovah Gado. Fa wan sma e gi ensrefi abra na Gado? Fosi a dopu, dan a e begi Yehovah èn a e pramisi en taki a o dini en fu têgo. Nowan sma no de nanga en te a e du a sani disi. A e pramisi Yehovah taki a o anbegi en wawan èn taki a wani fu en o de a moro prenspari sani na ini en libi. A ’no e teri ensrefi moro’ èn a e tan du san Yesus leri (Mateyus 16:24). Te wan sma e gi ensrefi abra na Yehovah èn a e dopu, dan dati e meki taki a man tron wan bun mati fu Yehovah. A o tron bun mati tu fu den tra sma di e anbegi Yehovah.
3. San wan sma musu du fosi a kan dopu?
Fosi yu kan dopu a prenspari taki yu leri sabi Yehovah èn taki yu kon abi wan tranga bribi na ini en. (Leisi Hebrewsma 11:6.) Te yu e kon sabi Yehovah moro bun èn te a bribi fu yu e kon moro tranga, dan yu o kon lobi Yehovah moro. Te yu lobi Yehovah, dan yu o wani fruteri trawan fu en èn yu o wani libi leki fa a wani (2 Timoteyus 4:2; 1 Yohanes 5:3). Te wan sma e libi „na wan fasi di Yehovah feni bun”, dan a kan bosroiti fu gi ensrefi abra na Gado èn fu dopu.—Kolosesma 1:9, 10.a
SORTU TRA SANI YU KAN LERI?
Wi o si san wi kan leri fu a dopu fu Yesus èn san wan sma musu du fu man dopu.
4. San wi kan leri fu a dopu fu Yesus?
Leisi Mateyus 3:13-17 fu leri moro fu a dopu fu Yesus. Baka dati taki fu den aksi disi:
Yesus ben de wan beibi di a ben dopu?
Fa a dopu? Den kanti wan pikinso watra tapu en ede?
Baka di Yesus dopu a bigin du a wroko di Gado ben gi en. Leisi Lukas 3:21-23 nanga Yohanes 6:38. Baka dati taki fu na aksi disi:
Baka di Yesus dopu sortu wroko ben de a moro prenspari wroko gi en?
5. Yu no abi fu frede fu dopu
Wan sma kan frede fu gi ensrefi abra na Gado èn fu dopu. Ma efu yu kon sabi Yehovah moro bun èn yu kon lobi en, dan yu no o frede fu teki a prenspari bosroiti disi. Meki wi go luku wan tu eksempre fu sma di du dati. Prei a FELEM.
Leisi Yohanes 17:3 nanga Yakobus 1:5. Baka dati taki fu na aksi disi:
San kan yepi wan sma fu teki a bosroiti fu dopu?
Wi e gi wisrefi abra na Yehovah te wi e pramisi en taki wi o dini en fu têgo
Te wi e dopu, dan wi e sori tra sma taki wi gi wisrefi abra na Gado
6. Te yu o dopu, yu o kon na ini a bigi famiri fu Yehovah
Te yu o dopu yu o abi brada nanga sisa na heri grontapu. Wi e tan na ini difrenti kondre èn wi de fu difrenti kulturu. Toku wi e bribi den srefi sani èn wi e gi yesi na den srefi wet fu Gado. Dati meki wi abi wánfasi. Leisi Psalm 25:14 nanga 1 Petrus 2:17. Baka dati taki fu den aksi disi:
Te wan sma dopu, dan fa a matifasi fu en nanga Yehovah o de? Fa a matifasi fu en nanga den tra anbegiman fu Yehovah o de?
SON SMA E TAKI: „Mi no klari ete fu dopu.”
Efu na so yu e firi, yu wani tan meki muiti fu dopu?
SAN YU LERI?
Yesus leri wi taki Kresten musu dopu. Fosi wan sma kan dopu a musu abi wan tranga bribi na ini Yehovah, a musu libi leki fa Yehovah wani èn a musu gi ensrefi abra na en.
Fa yu ben o piki den aksi disi?
Fa wan sma musu dopu èn fu san ede a prenspari fu dopu?
Te wan sma dopu, dan san dati e sori?
San wan sma musu du fosi a kan gi ensrefi abra na Gado èn dopu?
TRA SANI DI YU KAN LUKU
Na ini na artikel disi yu o si san na dopu èn sortu fowtu denki sma abi fu dopu.
Na ini na artikel disi yu o si san wan sma musu du fu man dopu.
„Te yu lobi Yehovah, yu o wani dopu” (A Waktitoren, maart 2020)
Na ini na artikel disi yu o leisi fu san ede wan man teki a bosroiti fu dopu.
„Den ben wani taki mi srefi kon sabi san Bijbel e leri trutru” (A Waktitoren, 1 februari 2013)
Luku fu san ede a prenspari fu dopu èn san yu musu du fu man dopu.
„Mi musu dopu?” (Sani di yongusma e aksi—Piki di kan yepi den, Pisi 2, kapitel 37)
a Efu wan sma ben dopu na wan tra kerki, a musu dopu baka. Fu san ede? Fu di a kerki dati no leri en san Bijbel e leri trutru.—Luku Tori fu den apostel 19:1-5 nanga les 13.