LES 49
San yu musu du fu abi wan koloku osofamiri?—Pisi 1
Te tu sma e trow, dan den e howpu taki den o de koloku nanga makandra den heri libi langa. Èn a sani dati kan. Kresten di trow omeni yari kaba èn di e meki muiti fu du san Bijbel e taki, sabi taki disi kan.
1. Sortu rai Bijbel abi gi masra?
Yehovah poti a masra leki edeman fu na osofamiri. (Leisi Efeisesma 5:23.) Yehovah wani taki a e teki bosroiti di bun gi en osofamiri. Bijbel e taigi masra: „Tan lobi un wefi” (Efeisesma 5:25). Fa wan masra kan du dati? Wan masra di lobi en frow e sori switifasi gi en te den de na oso èn te den de nanga tra sma. A e du ala san a man fu no meki ogri miti en frow. A e sorgu taki en frow de koloku èn taki a abi ala sani di a abi fanowdu (1 Timoteyus 5:8). A moro prenspari sani di a musu du na taki a musu yepi en frow fu de wan mati fu Yehovah (Mateyus 4:4). Wan fasi fa a kan du dati na fu begi nanga en frow èn fu leisi Bijbel nanga en. Te wan masra e sorgu bun gi en frow, dan Yehovah o breiti nanga en.—Leisi 1 Petrus 3:7.
2. Sortu rai Bijbel abi gi wefi?
Gado Wortu e taigi wefi taki den ’musu abi bigi lespeki gi den masra’ (Efeisesma 5:33). Fa wan frow kan du dati? A kan prakseri den bun fasi fu en masra èn a muiti di a e du fu sorgu gi en nanga den pikin fu den. Wan tra fasi fa a kan sori lespeki gi en masra na taki a e horibaka gi den bosroiti di a e teki. A musu taki na wan switi fasi nanga en masra èn a musu taki bun fu en awinsi en masra no e dini Yehovah.
3. San wan trowpaar kan du fu abi wan koloku trowlibi?
Bijbel e taki fu trowpaar: „Den tu sma dati o de wán skin” (Mateyus 19:5). Sobun, den musu luku bun nanga iniwan sani di kan meki taki den no lobi makandra moro. Den musu abi a gwenti fu du sani nanga makandra èn fu taki nanga makandra na wan switi fasi. Den musu taki krin nanga makandra fa den e denki èn fa den e firi. Nowan sani èn nowan sma mag prenspari moro yu trowpatna. Na Yehovah wawan yu mag lobi moro yu trowpatna. Wan masra noso wefi musu luku bun taki a no kisi firi gi wan tra sma.
SORTU TRA SANI YU KAN LERI?
Wi o si fa den rai na ini Bijbel kan yepi yu fu abi wan koloku trowlibi.
4. Wan masra musu lobi en frow èn a musu sorgu bun gi en
Bijbel e taki dati ’wan masra musu lobi en wefi leki en eigi skin’ (Efeisesma 5:28, 29). Fa a kan du dati? Prei a FELEM èn taki fu na aksi disi:
San na wan tu fasi fa wan masra kan sori lobi gi en frow èn fa a kan sorgu bun gi en?
Leisi Kolosesma 3:12 èn taki fu na aksi disi:
Fa wan masra kan sori den fasi disi na ini a trowlibi?
5. Wan wefi musu lobi en masra èn a musu lespeki en
Bijbel e taki dati wan frow musu lespeki en masra awinsi a e dini Yehovah noso awinsi a no e du dati. Leisi 1 Petrus 3:1, 2 èn taki fu den aksi disi:
Efu yu masra no e dini Yehovah, dan seiker yu wani taki a bigin dini en. San yu denki o moro bun? Fu preiki heri dei na en yesi noso fu du bun sani gi en èn fu sori lespeki gi en? Fu san ede yu taki so?
Masra nanga wefi kan teki bun bosroiti makandra. Ma a kan taki son leisi wan frow no e agri nanga en masra. Efu dati de so, a kan fruteri en masra na wan lespeki fasi fa a e denki. Ma a musu frustan taki Yehovah gi en masra a frantwortu fu bosroiti san moro bun gi en osofamiri. A musu meki muiti fu horibaka gi a bosroiti fu en masra. Te a e du dati a o sorgu taki ala sma na ini na osofamiri o de koloku. Leisi 1 Petrus 3:3-5 èn taki fu na aksi disi:
Fa Yehovah feni en te wan frow e sori lespeki gi en masra?
6. Bijbel kan yepi yu te yu abi problema na ini yu trowlibi
Ala trowpaar e kisi problema. Dati meki trowpaar musu meki tranga muiti fu lusu den problema disi. Prei a FELEM èn taki fu den aksi disi:
San e sori taki sani no ben go bun na ini a trowlibi fu a trowpaar?
San den du fu de koloku baka na ini den trowlibi?
Leisi 1 Korentesma 10:24 nanga Kolosesma 3:13. Baka te yu leisi ibri tekst, dan taki fu na aksi disi:
Te yu e du san a tekst disi e taki, dan fa a trowlibi fu yu o de?
Bijbel e taki dati wi musu sori lespeki gi makandra. Te yu e lespeki wan sma, dan yu o sori switifasi gi en. Leisi Romesma 12:10 èn taki fu den aksi disi:
Wan masra noso wan wefi musu wakti teleki en patna fosi sori lespeki gi en? Fu san ede yu piki so?
SON SMA E TAKI: „Mi nanga mi patna no de so bun moro nanga makandra.”
Fa yu ben o sori a sma taki Bijbel kan yepi den?
SAN YU LERI?
Wan masra nanga en wefi kan de koloku te den lobi makandra, te den e lespeki makandra èn te den e du san Bijbel e taki.
Fa yu ben o piki den aksi disi?
Fa wan masra kan sorgu taki sani go bun na ini en trowlibi?
Fa wan wefi kan sorgu taki sani e go bun na ini en trowlibi?
Efu yu trow, dan sortu Bijbeltekst kan yepi yu fu abi wan moro koloku trowlibi?
TRA SANI DI YU KAN LUKU
Na ini a brochure disi yu o feni bun rai di kan yepi yu fu abi wan koloku osofamiri.
Na ini a video-clip disi yu o si taki te yu e wroko nanga den rai fu Bijbel, dan yu o abi wan koloku trowlibi.
Na ini na artikel disi yu o si fu san ede wan uma musu saka ensrefi na ondro en masra.
„Umasma, fu san ede un musu saka unsrefi na ondro un edeman?” (A Waktitoren, 15 mei 2010)
San wan trowpaar du di den ben wani broko a trow fu den? Luku fa den lusu den seryusu problema di den ben abi nanga makandra.