LES 51
A prenspari gi Yehovah fa wi e taki nanga trawan
Di Yehovah meki libisma a gi wi wan moi kado. A gi wi wan mofo fu taki. A prenspari gi en fa wi e taki nanga trawan? Iya, a prenspari gi en! (Leisi Yakobus 1:26.) Sobun, fa wi kan taki na wan fasi di Yehovah feni bun?
1. Fa Yehovah wani taki wi musu taki nanga trawan?
Bijbel e taki dati wi musu ’tan gi makandra deki-ati èn wi musu tan yepi makandra’ (1 Tesalonikasma 5:11). Yu sabi wan tu sma di abi deki-ati fanowdu? San yu kan du fu meki den firi moro bun? Taigi den taki yu lobi den. Kande yu kan fruteri den san yu lobi fu den. Yu sabi wan tekst di yu kan gebroiki fu gi wan sma deki-ati? Den tekst disi lai. Hori na prakseri taki a no soso den sani di yu o taki prenspari, ma a fasi fa yu o taki prenspari tu. Dati meki ala ten yu musu pruberi fu taki na wan switi fasi.—Odo 15:1.
2. Fa wi no musu taki?
Bijbel e taki: „No meki nowan pori taki komoto na un mofo.” (Leisi Efeisesma 4:29.) Disi wani taki dati wi no musu kosi, wi no musu taki dotitaki èn wi no musu taki sani di e hati trawan firi. Wi no musu taki sma tori tu èn wi no musu fruteri lei fu trawan.—Leisi Odo 16:28.
3. San o yepi wi fu taki sani di e gi trawan deki-ati?
Nofo tron den sani di wi e taki e sori fa wi e denki èn fa wi e firi (Lukas 6:45). Dati meki wi musu leri fu denki sani di bun. Wi musu prakseri sani di reti, sani di krin, sani di o meki wi sori lobi nanga sani di warti fu sma prèise den (Filipisma 4:8). Fu man prakseri den sani disi, dan wi musu luku bun san wi e arki noso luku èn suma wi abi leki mati (Odo 13:20). Wan tra sani di o yepi wi na fu denki bun fosi wi taki. Prakseri fa den sani di yu o taki o meki tra sma firi. Bijbel e taki: „Sma de di e taki sani sondro fu denki, neleki na dyuku den e dyuku trawan nanga wan feti-owru, ma a tongo fu den koniwan na dresi.”—Odo 12:18.
SORTU TRA SANI YU KAN LERI?
Wi o si fa wi kan taki na wan fasi di Yehovah feni bun èn di e gi trawan deki-ati.
4. Luku bun fa yu e taki
Wi alamala taki wan sani wan leisi di wi no ben musu taki (Yakobus 3:2). Leisi Galasiasma 5:22, 23 èn taki fu den aksi disi:
Efu yu wani taki sani di e gi trawan deki-ati, dan fu sortuwan fu den fasi disi yu kan begi? Fa den fasi disi kan yepi yu?
Leisi 1 Korentesma 15:33 èn taki fu na aksi disi:
Fa den mati di yu abi nanga den sani di yu e luku noso arki kan meki yu taki?
Fa den mati fu yu nanga den sani di yu e luku noso arki kan meki yu taki?
Leisi Preikiman 3:1, 7 èn taki fu na aksi disi:
O ten a bun fu no taki noti noso fu wakti wan moro bun ten fu taki wan sani?
5. Taki bun fu trawan
San o yepi wi fu no taki sani di o meki trawan firi syen noso di o hati den firi? Prei a FELEM èn taki fu den aksi disi:
San yepi a brada na ini a felem fu kenki a fasi fa a ben taki fu trawan?
San a du fu kenki?
Leisi Preikiman 7:16 èn taki fu na aksi disi:
San wi musu hori na prakseri te wi e kisi a firi fu taki ogri fu trawan?
Leisi Preikiman 7:21, 22 èn taki fu na aksi disi:
Fa a tekst disi kan yepi yu fu no atibron te wan sma taki wan sani fu yu di hati yu?
6. Taki na wan switi fasi nanga yu osofamiri
Yehovah wani taki wi taki na wan switi fasi nanga wi osofamiri. Prei a FELEM èn taki fu na aksi disi:
San o yepi yu fu taki na wan switi fasi nanga yu osofamiri?
Leisi Efeisesma 4:31, 32 èn taki fu na aksi disi:
Fa wi musu taki nanga den sma fu wi osofamiri efu wi wani taki den firi taki wi lobi den?
Yehovah ben taki dati a lobi Yesus, a Manpikin fu en. Leisi Mateyus 17:5 èn taki fu na aksi disi:
Fa wi kan teki na eksempre fu Yehovah te wi e taki nanga wi osofamiri?
Suku okasi fu taigi trawan san yu lobi fu den
SON SMA E TAKI: „Mi e taki fa mi e denki. Mi no e span efu tra sma no lobi san mi taki.”
Yu feni taki a sma abi leti? Fu san ede yu taki so?
SAN YU LERI?
Wortu abi krakti. Dati meki wi musu luku bun san wi e taki, o ten wi e taki èn fa wi e taki.
Fa yu ben o piki den aksi disi?
San yu kan taki fu gi trawan deki-ati?
Fa yu no musu taki?
San kan yepi wi fu taki na wan switi fasi ala ten?
TRA SANI DI YU KAN LUKU
San o yepi yu fu taki sani di e gi trawan deki-ati?
Na ini na artikel disi yu o si san kan yepi yu fu no kosi.
„Na wan ogri sani fu kosi noso fu taki dotitaki?” (Web-artikel)
Na ini a felem disi yu o si san kan yepi yu fu no taki ogri fu trawan.
Na ini na artikel disi yu o si fa Yehovah yepi wan man fu no taki dotitaki moro.
„Mi bigin aksi misrefi fa mi libi o waka” (A Waktitoren, 1 augustus 2013)