Wan brifi fu a Tiri Skin

Lobi brada nanga sisa:

Lobi gi Gado èn gi sma e meki taki wi e ’go na sma fu ala kondre fu meki den tron disipel èn fu dopu den’ (Mat. 28:19, 20; Mark. 12:28-31). Te wi abi trutru lobi gi sma, dan wi o man doro na ati fu den wan di „abi a yoisti denki fu man kisi têgo libi”.​—Tori 13:48.

Fosi, wi ben e du furu muiti fu memre takmakandra gi a preikiwroko èn fu libi buku na baka gi sma. Now wi musu du muiti fu leri taki moro bun nanga sma. Wi wani sori lobi gi sma fu di wi e taki fu tori di den lobi. Dati wani taki dati wi musu fiti wisrefi na ini difrenti situwâsi. Wi musu prakseri bun tu nanga san ibri sma e broko en ede èn san e hari en prakseri. Fa a brochure disi o yepi wi fu du dati?

A brochure abi 12 les di e taki fu difrenti fasi di o yepi wi fu sori lobi èn fu meki disipel. Ibri les e taki fu wan spesrutu fasi di Yesus noso wan tra disipel ben sori na ini a preikiwroko. Den les disi a no fu meki wi memre takmakandra, ma den o yepi wi fu luku na sortu fasi wi kan sori lobi gi sma. Aladi ala den fasi disi de prenspari fu man du a preikiwroko, wi o luku sortuwan fu den fasi disi de spesrutu fanowdu fu bigin takmakandra, fu tyari gobaka, èn fu hori Bijbelstudie.

Te yu e luku ibri les, dan prakseri bun fa yu kan sori a fasi dati te yu e taki nanga sma na ini a birti pe yu e preiki. Du muiti fu sori moro lobi gi Yehovah èn gi tra sma. Awinsi sortu koni yu abi fu du a preikiwroko, a moro prenspari sani di o yepi yu fu meki disipel na lobi.

Wi e warderi a bigi grani di wi abi fu wroko makandra nanga yu (Sef. 3:9). Meki Yehovah blesi yu gi a muiti di yu e du fu sori lobi gi sma èn fu meki disipel!