Lobi — „Wan pasi di pasa ala trawan”
„Mi e (sori) joe wan pasi di pasa ala trawan”. — 1 Kor. 12:31.
1. Wan owroe historia-skrifiman ben tjari en stoeka foe libisma afersi kon sjatoe ini sortoe rai?
„LOBI makandra”. Wan 92 jari historia-skrifiman ben tjari en langa stoeka foe libisma afersi konmakandra nanga a gi foe a sjatoe rai disi. „A leri foe mi foe a historia te foe kaba” so Will Durant ben verklari, „de a srefi leki di foe Jezus . . . proeberi en gewoon wan dé. Lobi de a moro praktis sani san de ini grontapoe.”
2. San Jezus ben taki di a ben gi en foetoeboi „wan njoen komando”?
2 Na a laatste neti foe en Grontapoe libi Jezus Kristus ben tagi en discipel: „Mi e gi oenoe wan njoen komando, taki oenoe moe lobi makandra; so leki mi ben lobi oenoe, a so oenoe moe lobi makandra toe. Nanga disi ala sma sa sabi taki oenoe de mi discipel, te oenoe abi lobi gi makandra” (Joh. 13:34, 35). San ben sa de soboen a moro prenspari marki foe kon sabi Jezus troe discipel? A de krin taki den ben sa lobi makandra, taki den ben sa abi wan lobi di ben sa de krin foe si a mindri den. Ini sortoe fasi disi ben de „wan njoen komando”? Fa den ben moe lobi makandra so leki Jezus ben lobi den?
SO LEKI JEZUS BEN LOBI EN DISCIPEL
3. Ini sortoe fasi Jezus komando tapoe a tori foe lobi ben de „njoen”?
3 Sjatoe bifo Jezus ben gi a njoen komando, a ben wasi den foetoe foe en discipel nanga sakafasi. San a ben doe na a okasi dati, e sori kristen sma taki den moe dini den kompe-bribiman foe den nanga lobi, srefi foe doe sakafasi wroko gi den (Joh. 13:1-16). Ma a njoen komando wani taki moro srefi. A komando dati tapoe a tori foe lobi ben de „njoen” foedi a ben go moro fara leki a wet di Mozes ben gi a den Israëlsma, wan wet di Jezus nanga en discipel ben de a ten dati a ondro. A wet dati ben taki: „Oenoe moe lobi oen naaste leki oensrefi” (Lev. 19:18; Matt. 22:39). A de aksi lobi gi a naaste, ma no wan lobi foe gi joe srefi abra, di ben sa go so fara taki wan sma ben sa gi en libi foe a boen foe wan tra sma.
4. Fa Jezus ben sori a sortoe foe lobi, di a „njoen komando” ben aksi?
4 „Wan sma no kan abi wan moro bigi lobi” so Jezus ben taki, „dan taki a gi en sili abra foe a boen foe en mati” (Joh. 15:13). Tog Jezus ben doe disi nanga a gi foe en libi leki wan verloesoeprijs foe a boen foe na onvolmaakti, sondoe libisma-famiri di e dede (Matt. 20:28; Joh. 3:16; 10:14-18; Rom. 5:12; 6:23. Èn nanga Jezus grontapoe libi èn nanga en dede ben sori foe sortoe lobi a „njoen komando” disi e taki. Ondro a tiri foe Kristus a kristen no wawan moe doe boen te a okasi kon, ma a moe teki fesi foe jepi trawan a jeje fasi nanga tra fasi.
5. San de wan moro bigi bewijsi foe lobi?
5 Ja, wan foetoeboi foe Jezus Kristus moe de alaten bézeg foe doe boen na en naaste. Èn san de wan foe den moro bigi bewijsi foe lobi? We, a de a prékiwroko a tra sma foe leri den a „boen njoensoe”, foedi disi kan abi leki bakapisi taki den kisi tego libi! Foe taki foe disi wan kristen ’no wawan moe prati a boen njoensoe foe Gado, ma en égi sili toe’, foedi a de wroko makandra nanga den sma di teki a boskopoe disi èn e jepi den (1 Thess. 2:8). Ja, a moe de klari foe gi en sili ofoe libi abra foe a boen foe den. — 1 Joh. 3:16.
6. O fara den foetoeboi foe Jezus ben moe lobi en?
6 Foedi Jezus ben doe sani nanga lobi, a no ben waka a moro makriki pasi. A presi foe disi „ben fadon na en tapoe den koskosi foe den di ben kosi Gado” èn a ben waka getrouw wan pasi di ben tjari a moro bigi gens foe a sé foe Satan nanga en wrokosani (Rom. 15:3). Soboen Kristus troe foetoeboi no ben sa abi en makriki. Jezus ben sori ini a pisi tori disi taki den ben moe lobi en moro leki a moro krosbé famiri, èn srefi moro leki den égi sili (Luk. 14:25-27). Jezus discipel ben sa moe lobi den kompe ini Jehovah diniwroko èn den ben sa moe meki jeje froktoe, srefi, awinsi ebi vervolgoe ben kon. — Mark. 10:29, 30; Joh. 15:8.
PAULUS E SORI WAN „PASI DI E PASA ALA TRAWAN”
7, 8. San ben de „a pasi di ben pasa ala trawan” di a apostel Paulus e taki foe en ini 1 Korinte 12:31 èn san a ben pasa?
7 Di a kristen apostel Paulus ben skrifi kompe-bribiman ini Korinte, a ben poti krakti na a prenspari fasi foe lobi. Ini a ten dati pikinso boekoe foe den Santa Boekoe ben de, sodati a sabi foe den ben gi abra nanga mofo. Foe dat’ede meki den wondroe presenti foe a jeje (spesroetoe sabi, taki ini tongo, nanga so moro fara) ben de toemsi prenspari gi a gemeente. „Tokoe” so Paulus ben skrifi, „mi e sori oenoe wan pasi di pasa ala trawan” (1 Kor. 12:4-11, 27-31). San ben de „a pasi disi di ben pasa ala trawan”?
8 A ben de a pasi foe lobi, èn krakti ben poti so tapoe a prensparifasi foe en: „Awinsi mi e taki den tongo foe libisma nanga foe èngel (jeje abi den égi tongo), ma mi no abi lobi, mi ben tron leki wan pisi koproe ofoe gengen di e meki babari. Èn awinsi mi abi a presenti foe profétitaki èn mi sabi ala kibritori nanga ala sabi, èn awinsi mi abi ala bribi, sodati mi kan drifi bergi (kande moeilijkheid di gersi bergi ofoe troetroe bergi efoe a de Gado wani), ma mi no abi lobi, dan mi no de noti. Èn awinsi mi e gi ala mi goedoe foe gi trawan njanjan, èn awinsi mi e gi mi skin abra foe kan meki bigi, ma mi no abi lobi, dan a no abi wini gi mi kwetkweti.” — 1 Kor. 13:1-3; Mark. 11:23.
9. San wi kan taki foe den moeiti foe wi ini Gado diniwroko efoe wi no e libi akroederi „a pasi foe lobi di pasa ala trawan”?
9 Ja, srefi doe di ben sa kan abi waarde, e tron „dede wroko” efoe den no doe nanga lobi gi Gado nanga na naaste (Matt. 22:37-39; Hebr. 6:1). Ala moeiti nanga ofrandi foe wi ini Gado diniwroko no wani taki noti efoe wi no libi akroederi a „pasi foe lobi di pasa ala trawan”. A no ala fosten kristen ben kan doe krakti wroko, dresi sma, taki ini tongo èn vertaal wan tongo ondro a krakti foe santa jeje (1 Kor. 12:29, 30). Ma den ben kan sori alamala lobi, wan froktoe foe Jehovah santa jeje, di ala kristen sma moe kweki. — Gal. 5:22; 1 Joh. 4:16.
EKSEMPRE FOE LOBI DI WI MOE WAKA A DEN BAKA
10. Fa Jehovah ben sori wi wan eksempre ini a sori foe lobi?
10 Èn Jehovah Gado èn en Manpikin Jezus Kristus ben gi wan eksempre ini a sori foe lobi. Loekoe disi pikinso: den mekisani foe stof de wan sori foe a lobi foe Gado, foedi a de bewijsi pasa marki a sorgoe foe a gosontoe, a prisiri nanga a tanboen foe a libisma-famiri. Libisma no ben meki soso foe kan de nomo. Te wi taki en normaal, den kan njan switi foe njanjan, smeri switi bromki, si den fansortoe kloroe nanga a moi foe den meki-sani, njan switi foe a matifasi foe tra sma èn lafoe foe den komedi foe den meti di lobi pré, foe no taki srefi noti foe den tra moi sani foe a libi (Ps. 139:14). Wan foe den demonstratie fa Jehovah e gi ini lobi sondro gridi, de toe a troe tori taki a ben meki libisma na en prenki nanga foe gersi en nanga a makti foe lobi sani èn libi wan jeje libi (Gen. 1:26, 27). A sorgoe foe wan paradijs-oso nanga a seker pramisi foe wan tra grontapoe paradijs e sori Gado lobi toe, èn toe taki a ben tjari ensrefi kon a krin nanga jepi foe en Wortoe nanga en santa jeje (Luk. 23:43; 1 Kor. 2:10-13). A no de foe taki dati Jehovah lobi e sori toe nanga den sani di a seti foe verloesoe a libisma-famiri foe sondoe nanga a dede di e kon foe dati. — Rom. 5:7, 8.
11, 12. A sortoe fasi Gado Manpikin ben sori lobi gi a libisma-famiri?
11 Gado Manpikin ben lobi a libisma-famiri srefi ini a ten di a no ben de libisma. Na agersi fasi, leki a koni di de lek wan sma wi e kon sabi en leki „Gado méster-wrokoman”, di nanga prisiri e doe wroko èn a ben taki: „Den sani di mi ben lobi srefsrefi ben de den manpikin foe libisma” (Spr. 8:30, 31; Joh. 1:1, 14). Nanga ini prakseri a fanowdoe foe libisma foe kon verloesoe, Jehovah foe dat’ede ben teki wan sma di ben lobi spesroetoe a libisma-famiri — En wan-enkri gebore Manpikin, di ben „légi ensrefi, ben teki a skin foe wan srafoe èn ben tron leki libisma” (Fil. 2:5-7). Ja, Gado Manpikin ben sori wan lobi foe offer ensrefi foe tron wan libisma.
12 Lobi ben kon toe a krin ini a leri foe Jezus Kristus nanga a switifasi nanga respeki gi trawan. Te a ben si wan bigi ipi sma, „a ben firi sari nanga den èn ben dresi den sikiman foe den”. „Foedi den ben de leki skapoe sondro skapoeman”, Jezus ben firi sari èn a ben „bigin foe leri den foeroe sani” (Matt. 14:14; Mark. 6:34). A no de foe taki dati Jezus ben sori wan lobi di ben pasa ala trawan di a dede a wan paal èn gi „wan verloesoeprijs ini a presi foe foeroe sma” (Matt. 20:28; Fil. 2:8). Tapoe disi nanga foeroe tra fasi Jehovah nanga Jezus e gi eksempre foe lobi di kristensma kan waka na en baka. — Joh. 13:34; 1 Joh. 4:10.
„ABI TRANGA LOBI” GI KOMPEBRIBIMAN
13. (a) Petrus ben gi tranga foe sori sortoe lobi gi kompe-bribiman, èn bewijsi de taki so wan lobi de a mindri den? (b) Sortoe krakti lobi abi tapoe disiten kristensma?
13 Lobi e kon a krin nanga a de klari foe gi ensrefi abra èn a de leki a fundamenti foe wan Gado-libi (Ps. 110:3). Na apostel Petrus ben gi tranga a kompe-anbegiman foe Jehovah foe „abi tranga lobi gi makandra” (1 Petr. 4:8). Dati so wan lobi ben de mindri den fosten kristensma, ben de foe si ini den taki, bikasi a de bekenti taki den ben gebroiki switi wortoe te den taki foe makandra èn nanga makandra, soleki „mi lobi pikin”, „a lobiwan, di mi lobi troetroe” nanga so moro fara (1 Kor. 4:14; 3 Joh. 1). So wan srefi lobi a mindri troe kristensma ini disi ten e gi dek’ati èn e tranga wi ini ten foe tesi. A de „bow wi” (1 Kor. 8:1). Aladi ongolokoe nanga vervolgoe kan de, tog wi no de sondro mati ini wan grontapoe sondro lobi. Kristensma sabi taki den jeje brada nanga sisa foe den lobi den troetroe, èn na „volmaakti banti disi foe wanfasi” e jepi den foe si a ten di e kon nanga froetrow. — Kol. 3:14.
14. (a) Fa Paulus e tjari konmakandra ini 1 Korinte 13:4-8 san a lobi? (b) Sortoe aksi kan jepi wan kristensma sori lobi akroederi nanga den wortoe foe Paulus?
14 Ma na aksi de: Fa wi e man wisrefi foe sori lobi gi kompe-bribman? Na apostel Paulus ondro a krakti foe santa jeje e tjari kon makandra san a lobi, sodati wi e kisi jepi foe tesi a kwaliteit foe a lobi foe wi gi makandra. De so boen foe lési 1 Korinte 13:4-8. Teki now ten foe prakseri dipi foe den wortoe disi ini a leti foe den aksi disi:
Mi abi pasensi nanga switifasi èn mi e verdrage nanga pasensi omstandigheden di no boen?
Mi e tan farawe foe djaroesoe, foe eksempre te den djompo mi èn wan tra brada e kisi bepaalde grani ini a gemeente?
Mi abi sakafasi, a presi taki mi e meki bigi foe san Jehovah kande ben meki mi doe ini a diniwroko?
„Mi e tjari misrefi na wan fasi di no fiti” ini mi fasi foe doe, ofoe ini a fasi fa mi e behandel bepaalde kompe-kristen?
„Mi e soekoe mi égi afersi” soleki ini a pikin afersi tapoe congres foe go bifo mi beurt doro?
Foe eksempre „mi e kisi ati bron” leki owroeman, foedi trawan no e teki wantron wantron rai foe a bijbel?
„Mi e prakseri ogri”, ofoe foe sondoe di ben doe jari pasa kaba, ofoe mi e gi pardon a mi brada nanga sisa ini a bribi, soleki misrefi wani kisi pardon sote?
Mi e sori nansa mi takimakandra taki mi e tan farawe foe grontapoe onrregtvaardikifasi èn mi e prisiri moro foeroe ini a waarheid?
„Mi e verdrage ala sani” sondro foe mi verwakti foe onvolmaakti kompe-kristensma volmaaktifasi?
„Mi e bribi ala sani” sondro foe mi prakseri tapoe wan onregtvaardikifasi takroe foe kompe-kristen?
„Mi e howpoe ala sani”, dati wani taki, mi e howpoe troe troe ini ala san skrifi ini Gado Wortoe, èn mi verwaki de troetroe a tapoe leki wan fundamenti?
Mi abi a sortoe foe lobi gi Gado di sa jepi mi „foe oridoro ini ala sani”, vervolgoe foe wan kristen toe?
Den sortoe aksi disi kan jepi wan kristen boen ini en moeiti foe sori lobi.
15. Lobi ben gi Jehovah pipel tranga foe doe san gi den kompe-bribiman?
15 Troetroe wi kan sori a foeroe fasi lobi gi kompe-bribiman. Foe eksempre lobi e tja wi so fara foe jepi den a skin fasi te dati kan de fanowdoe (Jak. 2:14-17). A so den dienst-knegti foe Jehovah baka a Grontapoefeti Toe ben jepi mofina kompe-anbeginan ini den kondre di oorlog ben priti. Ini wan toe nanga afoe jari jepi-wroko na a eri grontapoe, Jehovah kotoigi ini Amerkankondre, Zweden, Canada Zwitserland nanga tra kondre ben sori lobi nanga a tjari kon makandra foe krosi narga moni foe bai njanjan gi kristen ini België, Bulgarije, China, Denemarken, Doisrikondre, Ingrisikondre, Filippijnen, Finland, Fransikondre, Grikikondre, Hongarije, ltaliakondre, Nederlanti, Noorwegen, Oostenrijk, Polen, Roemenië nanga Tsjechoslowakije. Dan ete Jehovah kotoigi ini den jari di pasa nanga lobi ben gi jepi a skin fasi te kompe-bribiman ben abi dati fanowdoe te den ben miti natuurrampoe.
16. Sortoe krakti kristelek lobi moe abi tapoe owroeman di Gado poti?
16 Kristen lobi e meki toe dati owroeman foe a gemeente de foe joe kan go a den èn e froestan joe. Disi moe de so efoe den e waka baka den pasi foe Jehovah, èn wi e lési foe en: „So leki hemel hé moro grontapoe, a so en lobi boen-atifasi de moro bigi gi den di e frede en” (Ps. 103:10-14). Wan sakafasi, lobifasi e troesoe kristen opziener foe doe foeroe moeiti foe jepi kompe-bribiman ini jeje fasi.
17. Tapoe sortoe fasi lobi kan sori gi owroe nanga siki kristen?
17 Ma kristen lobi sa gi tranga na ala sma di e frede Gado èn no soso owroeman di Gado poti foe gi jepi fope assisteri kompe-anbegiman. Foe eksempre, lobi kan gi wi tranga foe doe boskopoe gi owroe nanga siki kristen. A kan troesoe wi foe lési a bijbel nanga tra kristelek boekoe gi den, efoe disi de fanowdoe. Ja, okasi kan de foe jepi den nanga osowroko, foe go nanga den ini a wroko foe Gado nanga tapoe tra ten abi switi demakandra nanga den. Lobi sa gi wi tranga tapoe difrenti fasi foe doe boen gi trawan — jongoe of owroewan — sondro foe den aksi foe dati.
SORI LOBI GI FAMIRI NANGA NAASTE
18. Wi abi régel fanowdoe foe sori lobi ini ala pisi foe a libi?
18 Na apostel Paulus ben skrifi: „No abi paiman a no wan sma leki foe lobi makandra” (Rom. 13:8). Ja, foe troe, kristensma abi wan paiman foe sori lobi gi trawan. Foe sori a fasi disi, wi no abi regel fanowdoe di e go foe ala pisi foe a libi. Lobifasi wortoe nanga doe e kon ini wi nanga jepi foe a libisma konsensi èn nanga jepi foe Gadofasi koni di abi en roetoe ini a Bijbel (Rom. 2:14, 15). Wi leki kristensma foe dat’ede sabi ini bepaalde sitoewasi efi wi ben sori lobi. Ma ete, a sabi dati wi moe sori lobi, a wan eri tra sani leki foe sori a lobi troetroe.
19. San sa jepi wi ini a osofamiri foe sori lobi èn tapoe sortoe fasi disi kan sori?
19 Insé foe a osofamiri wi ben kan abi sonten a firi foe kisi ati bron esesi èn foe no sori lobi. Foe sanede? Foedi wi sabi den sma foe wi osofamiri boen-boen, èn kande no abi someni pasensi nanga den leki gi tra sma. Tokoe den srefi bijbel gronprakseri moe tjari kon wroko tapoe a osofamiri leki ini wi demakandra nanga tra sma, so leki den sma ini a kristen gemeente ini a presi pe wi de. Wi kan èn moesoe soekoe ini begi a jepi foe Jehovah foe sori lobi gi den sma foe wi osofamiiri. Wi sa kisi jepi ini disi te wi ori ini prakseri taki a de prisiri Jehovah Gado te trowman lobi den oema „leki den égi skin”, te oema lobi den masra nanga pikin foe den èn te pikin sori lobi gi den mama nanga papa foe den nanga gi jesi a den (Ef. 5:28; 6:1-3; Tit. 2:4). Srefi pikin di de bigisma kan sori lobi gi den grani papa nanga mama foe den, no foe libi den a wan sé, ma foe sorgoe foe den a skin nanga jeje fasi te disi de fanowdoe. Lobi gi Gado wawan wani taki dati wi e teki a frantwortoe disi a wi tapoe. A no de foe taki dati a de wan sori foe lobi te kristen trowman e loekoe èn si taki den osofamiri foe den sorgoe boen a jeje nanga skin fasi. — Loekoe Spr. 19:26; 1 Tim. 5:4, 8.
20. Fa lobi gi a naaste kan sori, spesroetoe foe a sé foe kristensma?
20 Lobi gi a naaste kan sori te wi e doe ondro difrenti omstandigheden sani gi sma. Den sma foe Malta ben behandel na apostel Paulus nanga trawan di ben songoe nanga boto nanga „toemsi bigi lobi” (Tori foe den apostel 28:1, 2). A konsensi foe den heiden sma dati foe na eilanti ben tjari den so fara foe handel so. Omeni moro a konsensi foe kristen di oefen nanga a Bijbel moe bewégi den foe sori lobi gi den naaste. A de a lobi disi foe a naaste di spesroetoe e bewégi wi foe prati a „boen njoensoe” nanga den. Wi no ben sa kan doe wan moro boen ofoe lobi sani leki foe jepi den foe kon ini a boen-ati foe Jehovah. — 1 Tim. 1:8-11.
SORI MORO FOEROE LOBI GI GADO
21, 22. (a) San de wan prenspari fasi foe sori wi lobi gi Jehovah? (b) San wi kan aksi wisrefi foe dat’ede, èn dat’ede, sortoe faste bosroiti wi moe abi leki sma „di lobi Jehovah”?
21 Wan foe den moro prenspari demonstratie foe lobi gi tra sma de foe troe foe leri den a „boen njoensoe” èn nanga disi wan sma e jepi den foe kisi wan boen presi na fesi Jehovah Gado. Gi wan kristen na activiteit disi de wan prenspari fasi foe sori lobi gi Na Sma di verdini disi moro foeroe — wi lobifasi Gado, Jehovah. En Manpikin ben taki: „Oenoe moe lobi Jehovah, oen Gado, nanga oenoe eri ati èn nanga oen eri sili èn nanja oen eri krakti nanga oen éri froestan.” — Luk. 10:27.
22 ’Wi e tan tanapoe faste leki wi e si Na Wan Di No De Foe Si’? (Hebr. 11:27). Wi e tjari en bigi nen, Jehovah, leki en getrouw kotoigi? Wi e prisiri nanga wi eri ati foe taki foe en nanga en prakseri? Disi no de wan gron réden foe a de foe wi leki a gemeente foe en pipel? Ja, foe troe! Ondro a krakti foe en santa jeje wi kan tan feti baka „a pasi foe lobi di pasa ala trawan” foe a boen foe tra sma. Ma meki wi moro foeroe nanga sondro frede meki bekenti na grani foe wi Gado, aladi wi lobi na boen èn wi e prisiri ini en leki getrouwsma „di lobi Jehovah”. — Ps. 97:10-12.