Meki Gado de ini joe trowlibi
„Wan dridobroe tité no kan hari koti esi ini toe pisi.” — Prekiman 4:12.
1. Sortoe gronprakseri foe na bijbel di Psalm 127:1 e kari, wi kan tjari kon tapoe na trowlibi?
O PRENSPARI a de dati Jehovah Gado de ini ala sani di wi poti foe doe, den Boekoe alaten baka e poti krakti a tapoe. So wi e lési ini Psalm 127:1: „Efoe Jehovah srefi no e bow na oso, a foe soso den basi e wroko tranga na en. Efoe Jehovah srefi no e loekoe na foto, a de foe soso dati den waktiman hori wakti.” Na waarheid foe na gronprakseri dati, e bewijsi nanga na langa historia foe na naatsi Israël. Te Israël ben gi pasi dati Gado ben teki wan definitief presi ini den afersi foe den, foedi den ben gi en wawan anbegi, dan den moeiti foe den foe kibri densrefi foe den feanti foe den ben abi winimarki. Ma te den ben drai baka gi na troe anbegi foe Jehovah èn ben go dini tra gado, dan den waktiman foe den ben wakti foe soso den foto foe den. Na srefi gronprakseri kan gebroiki te wi wani na trowlibi waka boen.
NA BOEN PRESENTI FOE NA TROWLIBI
2. Foe san-ede wi kan si na trowlibi leki wan boen presenti?
2 Gado Wortoe e ferteri wi dati Gado de na Sma „di e gi ibri boen presenti èn ibri volmaakti kado” (Jak. 1:17). Na boen presenti, a blesi foe na trowlibi, wi moe si leki wan foe den sortoe boen presenti nanga volmaakti kado. Fa foeroe okasi foe de kolokoe de na ini! A de troetroe wan foe den moro bigi blesi di na Mekiman ben gi na a libisma-lo. A no wan froewondroe sani dati di Eva ben tjari go te foe kaba na Adam, a ben kan bari taki: „Disi de now bonjo foe mi bonjo èn meti foe mi meti. Disi sa nen Oeman, foedi disi komoto foe na man”! — Gen. 2:23.
3. San wan kroetoeman ben taki foe Gado presenti foe na trowlibi?
3 Adam ben kan prisiri ensrefi nanga na blesi foe wan lobi kompe, wan sma foe en égi sortoe, nanga soema a ben kan taki, wroko èn prakseri makandra, a ben kan gi san a ben mankeri tapoe wan volmaakti fasi! Boiti dati, den prisiri di e go makandra nanga a trowlibi de troetroe wan bewijsi foe na koni nanga lobi foe wi Mekiman. Nanga reti kroetoeman I. Linton ben kari na fasi fa Gado ben meki na man nanga na oema wan bewijsi dati libisma no de na froktoe foe breni evolutie. Linton skrifi:
„Na boenfasi nanga na bekwaamheid foe Gado sondro kaba, di ben verklari dati a no ben boen gi wan libisma foe de en wawan, foedi a poti ini na ati foe na man na lobi foe na oema èn ini a ati foe na oema na lobi foe na man, foedi a meki na froestan, na skin èn na firi foe den a srefi sodati den kan njan switi foe na kompefasi nanga makandra èn tog so tra fasi dati den e foeroe makandra èn de so moi gi makandra, ben wiki alaten na tangi nanga froewondroe foe mi leki wan krin bewijsi foe wan ontwerp foe wan mekiman; èn na vréde nanga na kolokoe di e kon foe na matifasi foe na trow, te Gado abi wan presi na ini, e gi joe prakseri foe na bekwaam makti foe Gado foe meki kolokoe kon” (Wan afkati e ondrosoekoe na bijbel). Poti prakseri tapoe den wortoe: „Te Gado abi wan presi na ini.” Disi sa man te wi meki Gado de ini wi trowlibi.
4. Foe san-ede wi kan taki dati a blesi foe na trow de wan bewijsi foe Gado no-partijfasi?
4 Na presenti nanga blesi disi foe na trowlibi de sosrefi toe wan bewijsi foe Gado geregtigheid nanga no-partijfasi. Fa so? Foedi den prisiri foe na trowlibi, te Gado abi wan presi na ini, no e anga foe den sortoe sani leki goedoe, wan hé leri, bigi tranga foe skin, ofoe wan moi skin nanga wan moi fesi. Den blesi foe a trowlibi no de toe wawan gi wan bepaald ras ofoe wan bepaalde nationalitelt èn sosrefi toe den no anga foe sortoe weer toe. A no meki no wan difrenti ofoe trow-man nanga oema e libi ini den kowroe kondre ofoe ini den waran kondre.
MEKI GADO DE INI JOE TROWLIBI
5, 6. San a wani taki foe Gado de ini joe trowlibi?
5 Salomo ben skrifi: „Toe sma moro betre leki wán, foedi den abi wan boen paiman foe den tranga wroko. . . . Èn wan dridobroe tité no kan hari koti esi ini toe pisi” (Prékiman 4:9, 12). Wan trowlibi wi kan teki gersi nanga wan tité di e tai wan man nanga oema makandra, èn te wi e gi Gado wan presi na ini, dan a de troetroe wan „dri-dobroe tité di no kan hari koti esi ini toe pisi”. San a wani taki foe Gado de ini joe trowlibi? A de krin dati trowman nanga oema e broko-ede foe meki makandra prisiri èn foe sorgoe foe den fanowdoe foe makandra. Na trowman e broko en ede foe prisiri en oema èn foe gi en prisiri, trowstoe nanga sékerfasi èn na oema e broko en ede foe sorgoe gi en masra èn prisiri en someni leki a kan, soleki na apostel Paulus e taki (1 Kor. 7:33, 34). Meki Gado de ini joe trowlibi, wani taki dati joe e poti leki marki foe miti den markitiki di a poti gi trowman nanga oema. Foe taki en sjatoe, den de disi: „Oen oema, saka oensrefi na oen man ondro, soleki a fiti ini Masra. Oen man, tan lobi oen oema, èn no abi bita atibron nanga en.” — Kol. 3:18, 19.
6 Moro leki dati, meki Gado de ini wi trowlibi, wani taki, dati ala toe patna de ini wan krosbé, persoonlek matifasi nanga Jehovah Gado èn noiti e frigiti foe begi nanga makandra. Prati nanga Gado joe prisiri, joe sari, joe froewakti di no kon troe, joe tesi. Abi belangstelling gi en foe meki a prisiri leki wan Persoon èn prisiri en ati. Ini Psalm 147:11 wi e lési: „Jehovah e prisiri nanga den di e frede en.” Èn Gado e ferteri wi ini Odo 27:11, dati wi kan prisiri en ati te wi handri koni. Soboen, wi no moe abi soso belangstelling foe den marki foe en gi wi, ma wi moe aksi wisrefi toe fa Gado e denki foe a fasi fa wi e poti prakseri tapoe den. Te wi meki Gado de ini wi trowlibi, dan na trowbanti sa de kefalek tranga, èn dan wi kan de séker foe winimarki nanga kolokoe. Ja, dan a de wan „dridobroe tité di no kan hari koti esi ini toe pisi”. — Prékiman 4:12.
NA MARKI FOE BOENFASI NANGA SWITIFASI
7. Foe san-ede wi moe abi boenfasi nanga switifasi, te Gado wani de ini wi trowlibi?
7 Na mindri wan foe den sani di Gado e aksi foe ala en grontapoe mekisani — wan sani di abi wan spesroetoe betekenis gi den trowpatna — de na marki dati den moe abi boenfasi nanga switifasi gi makandra. Jehovah Gado e gi wi ensrefi na eksempre, bikasi en wortoe e gi wi na djaranti dati a de srefi „boen gi den sma di no sabi tangi èn gi den ogrisma” (Luk. 6:35). Ja, wi e lési moro leki hondro tron ini en Wortoe foe en „boenfasi di no ferdini” èn pikinmoro toetron someni foe en „lobi boenfasi”. Foe de séker dati na switifasi èn boen-ati Gado de ini wi trowlibi, dan wi moe poti prakseri tapoe na rai di tanapoe ini Kolossenzen 3:12: „Weri dan, leki sma di Gado teki, santa èn di Gado lobi, nanga safoe fasi foe sari-ati, boenfasi, sakafasi foe jeje, safrifasi nanga pasensi.”
8. San de wan foe den moro fundament èn eenvoudig fasi fa trowpatna kan sori switifasi gi makandra?
8 Fa wi kan sori switifasi gi wi trowpatna èn abi so fasi na djaranti dati Gado de ini wi trowlibi? De nanga switifasi, wani taki foe sorgoe foe den fanowdoe foe makandra. A wani taki foe poti prakseri, èn hori na tanboen foe makandra ini prakseri. Foedi wi no e feni en switi foe de wi wawan, dan wi kan prisiri wi patna foe de nanga en, leki wan foe den moro eenvoudig nanga fundament fasi fa wan trowman nanga oema kan sori switifasi gi makandra. Foe de soso nomo nanga makandra, wi kan bow makandra èn gi makandra na firi dati wi de fanowdoe èn wi e warderi makandra. Ini wán trow-libi di baka foeroe jari broko, a oema ben abi na firi foe teki en wawan, sondro en trowman, langa fakansi.
9, 10. (a) San de wantoe sani di kristen trowman nanga oema ben sa feni en boen foe doe den makandra? (b) Tapoe sortoe tra fasi trowpatna kan sori switifasi gi makandra?
9 Soso foe de nanga makandra, boen, ma a de moro boen srefi foe doe someni sani leki a kan nanga makandra. Joe e lési a bijbel gi joesrefi? Foe san-ede joe no sa lési na bijbel tranga gi joe trow-patna? Joe e sreka joesrefi gi kristen konmakandra? Foe san-ede joe no sa sreka den les makandra, te disi de praktis? Joe leki na trow-man, abi wan prati na a programma? Foe san-ede joe no sa taki en tranga èn meki joe oema de leki na poebliki? Sidon tapoe konmakandra èn so toe na tra okasi sé makandra. Abi makandra wan prati na a formeel kristen prékiwroko. Disi de alamala ekstra fasi fa wi kan sori boenfasi nanga switifasi, èn meki wi trowlibi kon moro tranga, èn meki Gado de ini wi trowlibi.
10 A de wan boen èn switi sani toe te trowpatna e taki nanga makandra èn e meki den sabi foe makandra san de ini den ati nanga froestan. Disi no wani taki nomo dati den kenki bodoi ofoe prakseri nanga makandra, ma dati den e meki den sabi foe makandra fa den e prakseri foe bepaalde sani. No frigiti ini takimakandra foe taki sani di e gi tranga, akroederi nanga na odo: „Na tongo foe na koniwan de leki dresi” (Odo 12:18). Wan trowman nanga oema no de wawan wán skin, ma den moe de wán toe ini den froestan nanga ati, soleki Jezus ben begi toe dati en foetoeboi kan de wán (Joh. 17:21). Foe so wan wanfasi, communicatie (takimakandra) de fanowdoe.
11. Sortoe toemsi boen rai trowman nanga trowoema moe teki te a de go foe mandi?
11 A de spesroetoe wan sori foe switifasi foe taki sani meki a kaba te a wan froestan a trawan verkeerti ofoe te wan mandi-mandi de. Jezus ben ferteri wan gronprakseri foe a demakandra foe libisma, di trowman nanga oema foeroe tron e loekoe psa en ofoe di den no e loekoe na wan ai. Joe e feni, dati wan sma handri nanga joe na wan bepaalde fasi di no de switi ofoe regtvaardiki? Dan ini a geest foe Matteus 18:15, teki ala dekati foe taki foe na afersi tapoe wan ten di fiti, ma doe disi na wan switi èn tactvol fasi. Kande joe ben sa kan leri wan les foe koningin Esther, di ben tjari en man kon so fara tapoe wan tactvol fasi foe firi ensrefi switi, bifo a ben sori en wan prenspari afersi (Esth. 5:1-8; 7:1-10). Ofoe a sani de tra fasi èn a de dati joe meki joe lobiwan mandi? No poti disi na wan sé, ma ini na geest foe Matteus 5:23, 24 tjari a tori kon na fesi tapoe wan switi, tactvol èn sakafasi. Na a fasi disi na vréde, na wanfasi nanga na kolokoe kan kon boen baka.
12. San wi kan taki foe a fanowdoe, dati na wan trowpatna e arki te na trawan e taki?
12 Switifasi no wani taki wawan dati sma e taki nanga makandra, ma dati sma e arki toe nanga respeki. Disi wani taki dati wan sma e poti prakseri te a trawan e taki. Wi no moe arki wawan foe froestan san den wortoe wani taki, ma foe si den firi toe di e meki den wortoe taki. Nanga reti ben taki foe datede dati arki na wan kunst. Ma moro leki dati, te wi wani de boen arkiman, dan wi moe poti prakseri tapoe den sani di no taki. Ja, trowman nanga trowoema moe de boen arkiman. A no wan sori foe switifasi foe poti pikinso prakseri te wan tra sma e taki. Disi wanwan tron kan de troetroe moeilek foedi a sma di e taki, kande e prakseri nomo tranga foe joe jere, na presi dati a de proberi troetroe foe abi wan takimakandra. Efoe disi de na problema, kweki dan na gwenti foe meki san joe o taki bigin nanga wan wortoe di joe e kari en wantewante, soleki „skat”, „Johannes”, „Maria”.
13. San de wan foe den moro boen fasi fa trowpatna kan sori switifasi gi makandra?
13 Wan foe den moro boen fasi fa trowpatna kan sori switifasi gi makandra de moro fara foe poti prakseri tapoe na vermane foe na apostel: „Sori switifasi gi makandra, nanga safoe sari-ati, gi makandra pardon fri, soleki Gado ben gi oenoe pardon fri nanga jepi foe Kristus” (Ef. 4:32). Èn te joe gi pardon nanga sari-ati, no doe disi dan nanga tegoe, ma „en di e sori sari-ati fasi, . . . doe disi nanga prisiri” (Rom. 12:8). Te joe e doe so, dan joe e gi Gado wan presi ini joe trowlibi, bikasi wi e lési dati a „de gi pardon foeroe” (Jes. 55:7). Efoe wi e gi pardon te wi trowpatna doe wan fowtoe, dan a de moro makriki foe froewakti pardon te wi meki wan fowtoe. No sondro rede den wortoe ben taki dati „wan kolokoe trowlibi de a verbontoe foe toe sma di makriki kan gi pardon”.
DE OPREGTI NANGA MAKANDRA
14. Sortoe égifasi kristensma moe sori toe foe meki Gado de ini na trowlibi foe den?
14 A Wortoe foe Gado e sori dati a moro Bigi Skrifiman foe en de toe wan regtvaardiki Gado. A bijbel e taki foe Jehovah: „Na Stonbergi, volmaakti ini en wroko, bikasi ala en pasi de geregtigheid. Wan Gado foe getrowfasi, di kroektoedoe no de ini en; regtvaardiki èn opregti a de” (Deut. 32:4). Te wi wani dati Gado de ini wi trowlibi, dan wi moe de regtvaardiki nanga opregti nanga makandra. Te joe loekoe en boen dan dati wani taki foe libi nanga na Gowtoe wet: „Soleki joe wani dati den sma doe nanga joe, doe nanga den a srefi toe.” — Luk. 6:31.
15. Spesroetoe tapoe a kontren foe sortoe belangstelling trowman nanga oema moe broko den ede foe de opregti nanga makandra, èn sortoe sani e meki dati disi de moeilek?
15 Foeroe sani abi foe doe nanga opregti fasi. A de krin dati moni afersi de ini a tori disi, èn disi kan de wan tjalansi gi trowman leki trowoema. Ma foeroe tra moro prenspari sani de ini disi, spesroetoe na belangstelling foe a seks libi. Wan trowman makriki kan meki en lostoe go wakawaka, spesroetoe foe den tesi di ai tanapoe aladé na den fesi, foe na sé foe onregtvaardiki sma leki foe na sé foe fisti koranti, boekoe nanga so moro fara. Neleki Jehovah Gado, „di nen de Djaroesoe”, e aksi foe na sé foe en dienstknekti foe lobi en wawan, na so trowman nanga trowoema abi na reti foe lobi densrefi wawan tapoe na tori foe belangstelling foe a seks libi foe den trowpatna, aladi densrefi de verprekti foe sori a lobi disi (Ex. 34:14). Odo 5:15-20 e gi trowman ini a tori disi krakti rai, sondro foe kibri wan sani na baka. Na a tra sé trowoema moe loekoe boen dati den teki Paulus rai na ati ini 1 Kor. 7:3-5 èn no gebroiki na doe foe na trowprekti leki wan wrokosani foe kisi ala sani di den wani kisi nanga ala prisiri, soleki krosi, nanga so moro fara.
LOBI SONDRO GRIDIFASI — „AGAPÈ”
16. Soema e gi trowman èn oema na eksempre tapoe a tori foe agapè-lobi, èn foe sainde a lobi disi de so prenspari?
16 Jehovah Gado de ini persoon na lobi di abi en roetoe ini gronprakseri, na sondro gridifasi, agapè ini Grikitongo. Foe datede meki wi e lési dati „Gado na lobi”. Soboen, te wi wani Gado de ini wi trowlibi, dan a de fanowdoe dati wi no abi wawan lobi di abi en roetoe ini natuurlek lobi, namkoe belangstelling foe seks libi (eros), nanga na lobi di abi en roetoe ini na agri foe prakseri nanga firi (philia), ma so toe na sortoe lobi sondro gridifasi di abi en roetoe ini gronprakseri. Na lobi disi sa hori wan trowlibi na wán, srefi efoe den toe tra lobi e go na baka. — 1 Joh. 4:8.
17. (. . . ?)
17 Na apostel Paulus e skrifi toemsi moi wortoe ini 1 Korente 13:4-8 foe a fasi fa na lobi disi e sori ensrefi: „Na lobi de hori pasensi, èn a de sori switi fasi, lobi no sabi djaroesoe, lobi no de soekoe foe prodo, a no de meki ensrefi bigi, a no de soekoe wini foe en égi, a no de kisi atibron. A no de memre ogri foe trawan. A no abi prisiri nanga kroektoe, ma a abi prisiri nanga waarheid. A de verdrage ala sani, a de bribi ala sani, a de howpoe ala sani, a de horidoro ini ala sani. Na lobi no de fadon noiti.” Nanga den wortoe dati foe Paulus ini prakseri, wi no kan lon komoto foe na sani disi, dati a no de foe taki dati wan boen kristen de wan boen trowpatna. Problema ini na trowlibi moe si leki tjalansi foe meki den froktoe foe na jeje gro èn lobi de na moro prenspariwan foe den (Gal. 5:22, 23). Èn hori ini prakseri: „LOBI NO E FADON NOITI”!
18, 19. (a) San agapè-lobi e aksi foe wan trowoema? (b) Na sortoe fasi wan man di abi agapè-lobi, sa handri nanga en oema?
18 San ai aksi foe wan trowoema di e sori na lobi disi sondro gridifasi di abi en roetoe ini gronprakseri? A de aksi foe en dati a erken en man leki en edeman (Ef. 5:22-24). Disi no sa de alaten makriki, ma lobi sa jepi en nanga dati; lobi sa meki en moro makriki gi en foe poti den afersi foe en man moro hé leki di foe ensrefi. Foe eksempre, joe abi trowoema nanga lobifasi, di e froestan dati a man foe den moe njan bepaalde sani, no e bori no wan njanjan di a man foe den no kan njan makandra nanga den. Den sabi dati disi de wan pina gi densrefi ma de foe troe srefi moro boen gi den.
19 San a de aksi foe wan trowman di e sori lobi sondro gridifasi? A de aksi foe en dati a poti prakseri tapoe na rai: „Oen man, tan lobi oen oema, soleki Kristus ben lobi na gemeente èn ben gi ensrefi abra gi en. Na so fasi den man moe lobi den oema foe den leki den égi skin” (Ef. 5:25, 28). Fa foeroe sani e aksi foe wan man nanga disi! Neleki fa a de sorgoe boen gi en égi skin tapoe a tori foe njanjan, krosi, oso, rostoe, ontspanning nanga jeje afersi, na so a moe sorgoe tapoe a srefi fasi foe en oema. Neleki a no wani kisi sjen na fesi foe trawan, na so a no moe meki na oema kisi sjen pe trawan de. Efoe a lobi en leki en ègi skin dan a sa libi toe na en nanga sabi èn sori switifasi nanga froestan tapoe den moro krosbé matifasi foe na trowlibi. Noiti a sa moe pasa dati den gi en na nen dati a go didon na en oema nanga tranga. — 1 Petr. 3:7.
20, 21. (a) Te wi gebroiki sortoe tra gronprakseri foe a bijbel sa kon na krin dati Gado de ini wan sma trowlibi? (b) Sortoe tra tori wi sa loekoe, èn sainde?
20 Fa foeroe okasi de foe kolokoe ini na trowlibi! Jezus ben taki dati „a moro switi foe gi sani leki foe teki sani”, èn na gronprakseri disi abi foe doe toe nanga trowman nanga oema (Tori foe den Apostel 20:35). Fa trowman nanga oema abi foeroe okasi foe gi sani: den kan gi wan sani foe den srefi, den ten, den prakseri, den denki nanga den firi, èn den kan gi sani na skin fasi! Ini na matifasi foe den na gronprakseri disi de ini na tori toe: „Na sma di e sai pikinso, sa koti pikinso toe, èn na sma di e sai pasa marki, sa koti pasa marki toe.” Te joe poti ala den rai disi ini joe trowlibi, dan joe sa meki Gado de ini joe trowlibi. — 2 Kor. 9:6.
21 Tokoe a de foeroetron so, dati sma di trow èn di e taki den de kristen di gi den srefi abra na Gado, e misi ini disi. Nanga disi ini prakseri, meki a de fanowdoe foe go behandel na tra tori tapoe wan krin fasi: „Na Gado foe lobi no kan si broko-trow na ai.”