Gado Wortoe abi libi

San Gado Kownoekondre sa doe?

NA INI en barinen Bergipréki Jezus Kristus ben leri en bakaman na begi di sma gwenti kari Na Wi Tata. Kande joe ben taki den wortoe foe en kaba someni tron. Miljoen miljoen sma e doe disi. Den e begi na Gado: „Joe Kownoekondre moe kon” (Matt. 6:10). Joe sabi foe san joe e begi te joe e aksi dati?

Kande neleki a moro bigi pisi foe sma, joe ben taki den wortoe disi sondro foe go denki dipi foe den. Ma san sa psa nanga den disiten tiri foe grontapoe te Gado Kownoekondre di de troetroe wan tiri kon? Joe ben prakseri pikinso kaba foe dati?

Na bijbel na ini na tori disi no e meki no wan degedege de nanga na piki. Na ini wan profétitori di e sori tapoe wi ten, na bijbel e taki: „Na ini den dé foe den kownoe dati na Gado foe hemel sa opo wan kownoekondre [namkoe Gado Kownoekondre, pe kristensma ben begi foe en] di noiti sa go na ondro . . .. A sa masi broko ala den kownoekondre disi [den disiten tiri foe na grontapoe] èn tjari wan kaba kon na den, -èn ensrefi sa tan te ten di no abi marki.” — Daniël 2:44.

Tanapoe prakseri disi pikinso! Gado Kownoekondre sa wai poeroe ala disiten tiri foe na grontapoe. Èn te joe e begi: „Joe kownoekondre moe kon”, dan joe e begi ofoe disi kan pasa.

TOG sowan kenki de séker fanowdoe. Noiti ete ini na historia wan libisma tiri ben de di gi satisfaksi dorodoro. Soboen san ben sa kan de moro boen leki wan volmaakti tiri foe Gado di e teki na presi foe ala libisma tiri!

Foe di Jehovah Gado de almakti, dan en kownoekondre sa meki den lostoe foe ala reti-ati sma kon troe. „Joe kownoekondre de wan kownoekondre foe ala . . . ten”, a bijbel e tjari kon na krin. „Joe e opo joe anoe èn e foeroe a bere foe a lostoe foe ala san e libi” (Ps. 145:13, 16). Sortoe lostoe joe ben sa wani sote kon troe? Na kaba foe feti, angri, ongeregtiheid, brokobroko oso, kiri, siki èn srefi dede? Ala den problema disi èn foeroe moro ete, Gado Kownoekondre sa loesoe. Na bijbel e pramisi „vréde sa de psa marki, te leki na moenkenki no sa de moro”. „Foe taki foe den ogri-sma”, a bijbel e taki, „den sa koti poeroe srefi foe na grontapoe.” Ija, den libisma „sa bow séker oso èn libi na ini den”. „Gado srefi sa de na den èn a sa figi poeroe ala watra na den ai.” — Ps. 72:7, 8; Odo 2:22; Jes. 65:21-23; Openb. 21:3, 4.

Fa disi de foeroe blesi gi na libisma-lo! Joe ben sa wani de sote wan onderdaan foe Gado kownoekondre? Leri sabi dan fa joe kan tron disi. Stoeka Gado Wortoe èn poti den sani di joe e leri ini joe libi. — Joh. 17:3.

[Prenki na tapoe bladzijde 12, 13]

wai na seti disi poeroe . . .

. . . tjari wan njoen seti kon