Disi na a pisi foe bijbel di moe lési na a theokratis skoro leki lezing nomroe 2 na ini a wiki foe 11 december.
A boen foe kibri a Wachttoren disi èn tjari en go na zaal na a wiki dati.
6 Èn a go doro foe taki: „Mi na a Gado foe joe tata, na Gado foe Abraham, na Gado foe Izaäk èn na Gado foe Jakob.” Ne Mozes kibri en fesi bikasi a ben frede foe loekoe na a [troe] Gado. 7 Èn Jehovah ben taki moro fara: „Sondro foe degedege mi ben si na pina foe mi pipel, di de na ini Egypte, èn mi ben jere na tranga babari foe den leki wan bakapisi foe den sma di e poesoe den nanga tranga foe wroko, bikasi mi sabi heri boen sortoe skin-ati den e njan. 8 Èn mi sa saka go foe ferloesoe den poeroe foe na anoe foe den Egyptesma èn foe tjari den komoto foe na kondre dati go na wan boen èn bigi bradi kondre, na wan kondre pe merki nanga oni e lon, na a presi foe den Kanaänsma nanga den Hethietsma nanga den Amorietsma nanga den Ferezietsma nanga den Hevietsma nanga den Jebusietsma. 9 Èn now loekoe! a tranga kari foe den manpikin foe Israël psa kon doro te na mi, èn sosrefi toe mi ben si na kwinsi nanga san den Egyptesma e kwinsi den. 10 We now, kon èn meki mi seni joe go na Farao, èn tjari mi pipel, den manpikin foe Israël komoto foe Egypte.”
13 Tokoe ete Mozes taki gi na [troe] Gado: „Kon wi taki dati mi kon now na den manpikin fee Israël èn dati mi taki gi den troetroe taki: ’Na Gado foe joe fostentata seni mi kon na oenoe’, èn den taki gi mi troetroe taki: ’San na en nen?’ San mi sa taki gi den dan?”
14 Tapoe disi Gado taki gi Mozes: „MI SA BEWIJSI FOE DE SAN MI SA BEWIJSI FOE DE.” Èn a ben taki moro fara: „Disi joe moe taki gi den manpikin foe Israël: ’MI SA BEWIJSI FOE DE ben seni mi kon na oenoe.’” 15 Ne Gado taki gi Mozes ete wantron. „Disi na san joe moesoe taki gi den manpikin foe Israël. ’Jehovah, na Gado foe oenoe fosten tata, Na Gado foe Abraham, na Gado foe Izaäk èn na Gado foe Jakob, ben seni mi kon na oenoe.’ Disi na mi nen te ten di no abi marki, èn disi na a prakseri na mi foe geslagti te geslagti. 16 Go, èn joe moe tjari den owroeman foe Israël konmakandra, èn joe moe taki gi den taki: ’Jehovah, na Gado foe oenoe fostentata, ben sori ensrefi na mi, na Gado foe Abraham, Izaäk nanga Jakob’, èn a ben taki: ’Sondro foe misi mi sa poti mi prakseri na tapoe oenoe èn na tapoe san e psa nanga oenoe na ini Egypte.’ 17 Èn foe dat’ede mi e taki: ’Mi sa tjari oenoe komoto foe na pina di den Egyptesma tjari kon na tapoe oenoe go na a kondre foe den Kanaänsma nanga den Hethietsma nanga den Amorietsma nanga den Ferezietsma nanga den Hevietsma nanga den Jebusietsma, na wan kondre pe oni nanga merki e lon.’”