Gado Wortoe abi libi
De leki Hanna, de leki en manpikin
EFOE joe de wan jongoe mama, dan kande joe pikin e tan nanga joe ete. Ma loekoe pikinso na Hanna èn en manpikin Samuël. Hanna e tjari en go na Jehovah tabernakel na ini Silo. Disi de na presi pe den priester e libi èn e dini Gado. Foe san-ede a e tjari en manpikin go drape foe tan? A no lobi a no lobi a boi?
Ija, Hanna lobi Samuël. Ma di a no ben abi pikin ete, a ben begi Jehovah foe kisi wan manpikin, èn na ini en begi a ben pramisi: „Mi sa gi en na Jehovah ala den dé di a de na libi” (1 Sam. 1:10, 11). Na dati Hanna e doe, soboen. A e gi Samuël na ini Jehovah tabernakel foe dini na tra pisi foe en libi.
Hanna sa firi a mankeri foe Samuël toemsi. Tokoe a de klari foe meki a go, foe di a lobi Jehovah Gado èn a sabi taki den kan gebroiki en manpikin djaso na ini Jehovah dienst, Joe leki mama ofoe papa, joe de klari foe den gebroiki joe pikin na ini Jehovah dienst?
Te Samuël e gro kon bigi, dan a abi moro bigi krosi fanowdoe foe weri. Joe kan si fa Hanna e gi en wan njoen mantal sondro mow, di a ben meki gi en. Èn joe kan de séker foe dati, taki ibri jari te a ben kon fisiti Samuël a ben gi en dek’ati foe tan dini getrow na ini Jehovah tabernakel (1 Sam. 2:18, 19). A no de so, taki na eksempre foe Hanna, foe gi dek’ati èn jepi na en manpikin foe tan na ini na foeroeten dienst, de wan moi wan, di papa nanga mama kan waka na en baka na ini a ten disi?
Ma Samuël e gi wi alamala wan heri boen eksempre foe waka na en baka. A ben de klari dati den gebroiki en na ini Gado dienst. Aladi kande te ten na ten a ben lostoe tranga foe go na oso baka èn ben winsi taki a ben kan de baka na oso nanga en papa nanga mama, tokoe a ben tan dini let na ini na tabernakel. Samuël ben miti sosrefi toe nanga tra moro hebi tesi na tapoe en bribi.
Loekoe! den manpikin foe na hépriester Eli e teki den jongoe oema dati, di e doe dienst na a mofodoro foe na tabernakel èn den e go didon nanga den, èn doe hoeroedoe nanga den! Na den takroe sani disi ben e psa di Samuël ben e gro kon bigi, ma Samuël ben doe san ben de joisti (1 Sam. 2:22-26). Wi e sori séker taki wi koni efoe wi e waka na en eksempre baka èn no e go doe makandra nanga den kroektoe fasi foe doe foe den sma di de lontoe wi.