Sma di bondroe kon na wan èn di e meki froktoe

’Tan meki foeroe froktoe èn bewijsi gi oensrefi taki oenoe de mi discipel.’ — JOHANNES 15:8.

1. Fa a bijbel e sori dati Jehovah e feni froktoebon wan warti sani?

’JEHOVAH GADO ben meki iniwan sortoe bon, dl ben de wan lostoe gi na ai èn di ben boen foe njanjan, gro komoto foe na gron (Gen. 2:9). Na ini Israëlkondre den ben meki froktoe bon di ben prani njoenjoen gro dri jari sondro foe na éginari ben gebroiki den froktoe foe sortoe prakseri toe. Srefi den froktoe di ben meki na ini a di foe fo jari ben moe tron leki „wan santa sani, leki wan fesa-babari gi Jehovah”. Na ini a di foe féfi jari na éginari ben kan gebroiki den froktoe soleki fa a ben wani, baka te a ben gi Jehovah den fosi froktoe (Lev. 19:23-25; Deut. 26:1-10; Neh. 10:35-37). Na ondro a wet foe Mozes dan te feti ben de, dan froktoebon ben kisi spesroetoe kibri. — Deut. 30:19, 20

Bon di no e meki froktoe e koti trowe

2, 3. San Jezus ben taki na ini na agersitori foe a figabon di no ben e meki froktoe?

² Na ini na fosi artikel wi ben si dati foeroe natuurlek taki foe na agersi olijfbon (Rom. kap. 11) ben broko poeroe èn taki foe wan wilde olijfbon ben kon na ini den presi. Na ini na agersitori dati den taki, di ben kapoe poeroe ben prenki den djoe di no ben sori bribi èn di ben wégri foe, erken na bonskin foe na olijfbon foe na moro prenspari Siri, na Messias Jezus. Na ini wan tra agersitori Jezus ben agersi na djoe pipel nanga wan heri bon — no wan olijfbon, ma wan figabon.

³ Na ini a bakajari foe 32 G.T. Jezus ben taki: „Wan séker man ben prani wan figabon na ini en droifidjari, èn a ben kon soekoe froktoe na en, ma a no feni no wan. We a taki gi na djariman: ’Na dri jari kaba mi e kon soekoe froktoe na a figabon disi, ma mi no e feni no wan. Koti en trowe! Foe san-ede a sa tan teki presi na tapoe na gron foe soso?’ Dan a piki en taki: ’Masra, libi en ete a wan jari disi te leki mi diki lontoe en èn mi poti mest; èn efoe a meki froktoe ini a ten di e kon, dan a boen; ma efoe a no de so dan joe moe koti en trowe.’” — Luk. 13:6-9.

4. Fa Jezus ben sori taki a de wan getrow „djariman”?

⁴ Na a ten di Jezus ben taki foe a figabon, dan en leki na „djariman” ben span ensrefi dri jari langa foe kweki bribi a mindri den djoe. Ma aladi den ben abi someni winimarki na ondro na Abrahamitis èn na Wetferbontoe, tokoe na soso wan pikin fikapisi foe na djoe naatsi ben teki na Messias (Rom. 9:4, 5, 27). Na ini a di foe fo jari foe en diniwroko, Jezus ben meki moro foeroe moeiti a mindri den djoe, na agersifasi a ben diki èn poti mest lontoe a djoe „figabon” foe di a ben préki èn leri fajafaja na ini Judéa, Peréa èn te foe kaba na ini èn lontoe Jeruzalem. — Luk. kap. 10 te leki 19.

5. Fa èn foe san-ede a djoe „figabon” ben koti trowe èn oten a ben „iti go na ini faja”?

⁵ Na, afoepasi foe a di foe fo jari dati, wantoe dé bifo en dede, Jezus ben kré foe Jeruzalem ede èn a ben taki gi na ede foto foe na djoe naatsi, dati en oso ben libi légi na baki gi en (Matt. 23:37-39). Jehovah, na éginari foe na djoe „figabon” ben go ondrosoekoe en ete wantron na ini a di foe fo jari disi foe truetroe heri boen sorgoe. Foe di a no feni froktoe na en leki naatsi, meki a gi komando foe koti en trowe akroederi nanga a gronprakseri di Jezus ben taki na ini Mattéus 7:19. Na sofasi na Kownoekondre foe Gado ben teki poeroe foe a djoe naatsi èn a ben gi na wan naatsi, jeje Israël, di e meki den froktoe foe en (Matt. 21:43). A tjari go abra foe a sani disi ben feni presi na tapoe a Pinksterdé foe na srefi jari dati 33 G.T. Dritenti na sébi jari a baka, na ini 70 G.T., a „figabon” di ben koti trowe ben „iti go na ini faja” di Jeruzalem nanga a djoe naatsi ben kisi pori. — Matt. 3:9, 10; Luk. 19:41-44.

„A no kan tra fasi efoe joe tan na ini en boenfasi”

6. Fa den agersitori foe na figabon di no ben meki froktoe nanga na olijfbon na tapoe san den taki ben ènter e poti krakti tapoe Gado boenfasi èn en krasifasi?

⁶ Neleki fa na agersitori foe na figabon e sori taki skotoe de na a pasensi foe Jehovah, na so na agersitori foe Paulus foe na olijfbon, ala di a e poti krakti na tapoe a boenfasi foe Jehovah, e sori ooktoe na tapoe en krasifasi. Na ini en boenfasi Jehovah ben seni Johannes na Dopoeman go na den „natuurlek taki” foe den djoe foe taki gi den foe „meki froktoe di e fiti beraw” èn foe bribi na ini Jezus (Matt. 3:8; Tori. 19:4). Foe di den ben mankeri bribi meki den „ben broko poeroe”. A kon moro mendri na ini a nomroe foe djoe „natuurlek taki” ben wani taki „goedoe gi den sma foe den naatsi”, foe di heiden ’taki foe na wilde olijfbon’ ben ènter na tapoe na Abrahamitis-ferbontoebon foe kon tron wan pisi foe na jeje siri foe Abraham. — Rom. 11:12, 17, 20, 21

7. Sortoe warskow Paulus ben gi na ini a tori disi?

⁷ Ma Paulus e gi wan warskow na ini disi. Di a ben taki nanga salfoe kristen di no ben de djoe, a taki. „Bikasi efoe Gado no ben kibri den natuurlek taki, a no sa kibri joe toe. Loekoe foe dat’ede, Gado boenfasi èn krasifasi. Krasifasi gi den [djoe] di fadon, ma a boenfasi foe Gado gi oenoe [heiden], a no kan tra fasi efee joe tan na ini en boenfasi; noso oenoe toe o kapoe poeroe” (Rom. 11:21, 22). Foe kan tan na ini Jehovah boenfasi, dan heiden kristen di ènter na tapoe na Abrahamitis-ferbontoebon ben moe sori tranga bribi na ini na moro prenspari Siri foe Abraham. Den ben ’tan tanapoe nanga jepi foe bribi’, wan bribi di den ben moe sori, nanga jepi foe kristen froktoe èn ’pristeri den skin leki wan srakti-ofrandi di de a libi, santa èn boen na Gado, wan santa dienst’. — Rom. 11:20; 12:1.

8. Sortoe tra praktis leri Paulus ben poeroe na ini na agersitori foe na olijfbon?

⁸ Paulus ben poeroe ete wan tra praktis leri na ini na heri moi fasi fa Jehovah ben meki na Abrahamitis-ferbontoebon ben kan meki na heri nomroe foe 144.000 djoe nanga heiden „taki” doe kon. A e go moro fara foe taki foe den toe sortoe „taki”: „Mi e taki gi ibriwan a mindri oen, no foe prakseri moro foe ensrefi dan de fanowdoe; ma foe prakseri nanga wan gesontoe ferstan, ibriwan sma na a marki foe bribi Gado gi en. Bika neleki fa wi abi na ini wan skin foeroe memre, ma den memre no abi alamala na srefi wroko, na so wi, aladi wi do foeroe, de wan skin na ini wánfasi nanga Kristus” (Rom. 12:3-5). Ala toe soboen, den djoe kristen soleki den no-djoe kristen ben kisi okasi foe kon na ini na jeje siri foe Abraham foe na „boenfasi foe Gado” ede. Paulus ben memre den: „A no no joe e tjari na roetoe (Jehovah) ma na a roetoe e tjari joe” (Rom. 11:18). Foe den no meki den „kapoe den poeroe”, meki den ben sa abi foe tan na ini Gado boenfasi, foe di den ben sa tan hori den wánfasi leki „wán skin na ini wánfasi nanga Kristus”. — Rom. 11:22.

9. Sortoe leri de na ini disi gi den „tra skapoe”, èn foe sortoe sani den moesoe loekoe boen?

⁹ A warskow disi di de gi salfoe kristensma abi wan leri gi kristensma na ini a ten disi di no de jeje Israëlsma? Dati de séker so. Aladi den no de wan pisi foe na jeje siri di na Abrahamitis ferbontoe ben meki doe kon èn foe dat’ede „no de foe na skapoepen disi”, tokoe den „tra skapoe” disi de troetroe wan pisi foe den „naatsi foe grontapoe” di kan blesi densrefl nanga jepi foe na siri (Joh. 10:16a; Gen. 22:18). Foe disi wi kan froestan taki den moesoe abi na srefi bribi leki Abraham, di ooktoe ben abi a howpoe foe libi na grontapoe, èn den ben moe waka na wan orde fasi na baka den foetoe marki foe na bribi dati’ (Rom. 4:11, 12, 16). Den moesoe sori den sakafasi na a Toemsi Boen Herder, Kristus, na prenspari Siri foe Abraham. Den moesoe wroko makandra nanga na tweederang siri foe Abraham foe tron nanga den „wán ipi” na ondro na „wán herder” (Joh. 10:14, 16b). Efoe a de so, taki salfoe kristen di no e tan na ini Gado boenfasi, e teki na risico foo den koti den poeroe foe na Abrahamitis-ferbontoebon, dan a no de so, taki den „tra” skapoe moesoe loekoe boen, taki den no doe noti san ben kan meki dati den lasi Gado boenfasi? — Rom. 11:22.

„Efoe den no tan „na ini den sondro-bribi fasi”

10. San ben sa kan psa efoe wan djoe no ben tan na ini en mankeri foe bribi, èn san disi ben sa wani taki gi en?

¹⁰ Na agersitori foe na olijf-bon abi ete wan tra algemeen leri di kan tjari kon tapoe a libi foe den salfoe kristen èn tapoe di foe den „tra skapoe”. Wi e feni disi na ini Romeinisma 11:23, pe skrifi: „Den ooktoe [den djoe sondro bribi], efoe den no e tan na ini den mankeri foe bribi fasi, den sa ènter den; bikasi Gado man foe ènter den njoen baka.” Djaso wi e si agen wan tra pisi foe Gado boenfasi. Di Paulus ben skrifi a brifi disi (so wan 56 G.T.), a djoe naatsi ben koti trowe langa ten kaba leki wan „figabon di no e meki froktoe. Ofoe, foe kon baka na na agersitori foe na olijfbon, moro foeroe foe den „natuurlek taki” ben „kapoe poeroe” bikasi den no ben sori bribi na ini Jezus, na Messias. Ma efoe ibri aparti djoe ensrefi no ben tan na ini en mankeri foe bribi, dan Jehovah Gado ben de klari foe ènter en baka na tapoe na agersi olijfbon èn meki a kon tron wan memre foe na jeje siri foe Abraham. Te Jehovah ben teki so wan djoe di ben abi beraw baka, dan disi ben wani taki gi en „libi komoto foe dede”. — Rom. 11:14, 15.

11. San ben psa nanga sonwan foe den „tra skapoe”, ma san den ben moe doe?

¹¹ Na ini a ten disi, sonwan foe den „tra skapoe” kon de tevréde nanga densrefi èn foe di den kon mankeri bribi, meki den ben stop foe dini Jehovah. Den koti densrefi poeroe foe demakandra nanga en pipel, Sonwan foe den ben kon de na ini hebi benawtoe èn den warskow di skrifi na ini Gado Wortoe ben ’naki den ati’. Den moesoe firi leki den lasi srefsrefi? Gado Wortoe e ferklari: „Efoe joe e loekoe foe Jehovah, joe Gado foe a presi drape [dorosé a „kondre” foe Gado pipel], joe sa feni en toe foe, troe, bikasi joe sa aksi foe en nanga joe heri ati èn nanga joe heri sili. Te joe de na ini hebi benawtoe èn ala den wortoe disi [foe warskow] ben naki joe ati na a kaba foe den dé, dan joe sa abi foe drai go baka na Jehovah, joe Gado èn arki en sten. Bikasi Jehovah, joe Gado na wan Gado di e sori sari-ati.” — Deut. 4:29-31.

12. (a) Fa na ’getrow srafoe’ ben sori taki a e broko en ede gi den sortoe „tra skapoe” dati di ben las’pasi? (b) Sortoe eksempre joe kan kari foe sori taki sonwan ben kon nanga tangi baka na a ipi?

¹² Leki wan groepoe foe taki di e meki froktoe foe na Abrahamitis ferbontoebon, „na getrow èn koni srafoe”, den wan di tan abra foe Kristus salfoe brada na grontapoe, sabi boenboen na bigi fanowdoe dati sonwan foe den „tra skapoe” moe wiki komoto foe na fasi foe de tevréde nanga densrefi èn den tron kristen baka, di e meki froktoe (Matt. 24:45-47). Nanga dati na ini prakseri, na „srafoe” ben seti sani a fesi foe tjari artikel kon na doro leki „”Drai kon baka na a herder foe oenoe sili” na ini Na Wachttoren foe 1 september 1982. Foe sensi februari 1982 wan lo foe densrefi sortoe tori dati ben tjari kon na doro na ini Wi Kownoekondre Dienst. Na krakti tiri disi foe na „srafoe” foe a Masra ben tjari boen froktoe kon? Son wan ben drai go baka na den Gado Jehovah? Foetroe foeroe foe den ben doe so. Poti prakseri na tapoe den spesroetoe eksempre di skrifi dja na tapoesé.

’Tan meki foeroe froktoe’

13. San iniwan sma di kon de tevréde nanga ensrefi, doe now, èn sortoe wortoe foe Jezus e sori dati?

¹³ Ija, salfoe kristen nanga den kompe foe den „den tra skapoe” di ben kon de tevréde nanga densrefi èn di no ben meki froktoe, moesoe poti prakseri na a warskow, èn den moesoe opo doe wan sani tapoe Jehovah boenfasi èn teki na jepi foe tron kristen baka, di e meki froktoe. Na ini wan agersitori di kenki na difrenti fasi foe di foe na olijfbon nanga di foe na figabon di no ben meki froktoe, Jezus ben agersi ensrefi nanga na bonskin foe wan droifibon, èn en salfoe discipel nanga den taki foe en. A ben taki: „Mi de na troe droifibon, èn mi Tata de na gronman. Ibriwan taki na mi di no e meki froktoe a e koti poeroe, Èn ibriwan taki di e meki froktoe a e krin en, sodati a kan meki moro froktoe . . . Nanga disi mi Tata e kisi glori, dati oenoe e tan meki foeroe froktoe èn e bewijsi taki oenoe de mi discipel.” — Joh. 15:1-8.

14. (a) Na sortoe toe fasi ala kristen moe „e tan meki foeroe froktoe”? (b) Sortoe tra fanowdoe sani gi salfoe kristen e kon na krin na ini na agersitori foe na „troe droifibon”?

¹⁴ Aladi den „tra skapoe” no de taki foe „na Abrahimitis-ferbontoe-”olijfbon” ofoe foe „na troe droifibon”, Jezus Kristus, tokoe den moe sori taki den discipel foe Kristus. Soleki ala de den salfoe kristen „taki”, na so den moesoe „tan meki foeroe froktoe”. Disi den e doe, foe di den e meki kristelek égifasi foe na njoen soema di den de makandra nanga „na froktoe foe na jeje” (Gal. 5:22, 23; Matt. 28:19, 20 Kol. 3:5-14). Ma foe kan meki frektoe troetroe, den e sori fajafaja den sortoe égifasi dati, foe di den e teki prati na a préki foe „a boen njoensoe disi” (Matt. 24:14). Neleki den salfoe slingertaki foe a „troe droifibon” moesoe tan na ini wánfasi nanga Kristus, na so den „tra skapoe” moesoe tan na ini wan krosbé wánfasi nanga na „getrow èn koni srafoe”, Kristus salfoe „brada”. Na soso na sowan fasi den kan abi na howpoe foe ’kisi a Kownoekondre di ben sreka a fesi gi den bifo na fundamenti foe na grontapoe ben poti.’ — Matt. 25:31-40.

„Den naatsi foe grontapoe” di blesi densrefi kaba

15. Te na Abrahamitis ferbontoe e kon na en kabapisi foe meki na pramisi „siri” kon foe de, sortoe ekstra méne Romeinisma 11:12 e kisi?

¹⁵ O moro na Abrahamitis-ferbontoe olijfbon, nanga en santa „roetoe foe fatoe” (Jehovah) nanga en boen stéfi bonskin (Kristus, e meki na heri nomroe foe djoe nanga heiden „taki” doro na amrki, dan grani blesi e kon kaba na tapoe „sma foe den naatsi” di no de jeje Israëlsma. Paulus ben si disi a fesi èn a ben skrifi: „We, efoe a fowtoe stap foe den [den natuurlijk djoe] wani taki goedoe gi na grontapoe foe libisma, èn a kon moro pikinso foe den nomroe wani taki goedoe gi den pipel foe den naatsi, omeni moro a heri nomroe foe den [djoe salfoe kristen] sa wani taki disi!” — Rom. 11:12.

16. (a) Fa na „fowtoe stap” foe den djoe wani taki „goedoe gi den pipel foe den naatsi”? (b) O fara na ènterwroko de?

¹⁶ Wi ben si kaba taki na „fowtoe stap” foe na djoe naatsi leki wán heri groepoe ben wani taki grani jeje goedoe gi den heiden. Ma dati den wilde olijftaki disi ben tron memre foe na jeje siri foe Abraham, no ben wani taki dati den natuurlek taki — getrow djoe kristen — efi den ben tan na a bon, efi ’den ben ènter baka na tapoe’ baka 36 G.T., no ben kan tron wan pisi foe na agersi olijfbon. Na so, den 144.000 taki wani taki na heri nomrne foe djoe èn a „heri nomroe” foe no-djoe (Rom. 11:12, 25). Den troe tori e sori taki na ènter disi ben go doro te na a mindri foe den jari 1930. Na ini a ten disi, na a lati joeroe disi, boen réde de foe bribi, dati den ben ènter na „heri nomroe” foe ala toe, djoe nanga heiden taki. Ala taki di kande den ben ènter sensi 1935, a no kan tra fasi, de taki di kon na a presi foe djoe noso no-djoe taki, di koti poeroe foe di den no tan getrow.

17. Na sortoe fasi na doro foe a marki foe den memre foe a siri wani taki moro goedoe gi den „pipel foe den naatsi”?

¹⁷ Now, Paulus e taki dati na tjari kon doro a marki foe den memre foe na siri foe Abraham wani taki „goedoe gi den naatsi”. Omeni moro disi de so, bikasi den jeje goedoe nanga blesi disi no e abi krakti wawan na tapoe wantoe tin doesoen-doesoen no-djoe, salfoe kristen (leki wan kontroe foe na fosi pisi foe Romeinisma 11:12), ma gi letterlek miljoen-miljoen „sma foe den naatsi” di no de foe na Abrahamitis-ferbontoe ipi,

18. San kan taki foe den pramisi foe na Abrahamitis ferbontoe, èn sortoe pisi foe en moesoe ben bigin troetroe kaba?

¹⁸ Disi e tjari wi go baka na a Abrahamitis ferbontoe. Na prenspari siri, Kristus Jezus, poti now tapoe a troon na ini hemel. A tjari den memre foe na tweederang siri kon makandra na ini na Abrahamitis ferbontoe ipi. A de so fara foe teki „den doro abra foe en féjanti”, foe di a sa pori na grontapoe makti foe falsi religie, Babylon a Bigiwan, èn a pisi di tan abra foe Satan organisaatsi di ai kan si (Gen. 22:17, 18). A no de wan ferwondroe sani foe dat’ede dati na kriboipisi foe na Abrahamitis pramisi bigin foe kontroe: „Nanga jepi foe joe siri ala naatsi foe grontapoe sa blesi densrefi foe troe.”

19. (a) Fa pipel foe „ala naatsi foe grontapoe” ben bigin foe blesi densrefi? (b) San na den howpoe?

¹⁹ Ija, wan „bigi ipi . . . foe ala naatsi”, nanga no pikinso natuurlek djoe, e belsi densrefi kaba. Nanga ala bribi na ini a Moro Bigi Abraham, Jehovah Gado, den ben sroiti densrefi na a fikapisi foe jeje Israël, èn „e gi en santa dienst dé nanga neti na ini en tempel”, nanga tégo libi na grontapoe na den fesi (Openb. 7:4, 9-17). Meki den go doro foe blesi densrefi nanga jepi foe na siri, te na ini a njoen seti foe sani.

Joe e froestan disi?

□ San na figabon di no e meki froktoe ben agersi, oten a ben koti trowe, èn oten a ben bron?

□ Fa wawan djoe nanga heiden kristen ben kan meki a no kon so fara dati den no ben koti poeroe foe na „olijfbon”, èn sortoe les wi kan leri foe disi?

□ Foe san-ede a kan de wan trowstoe gi sma di las’pasi, te den sabi taki djoe di ben sori beraw ben ènter baka tapoe na bon?

□ Na sortoe fasi ala kristen moesoe tan meki froktoe?

□ Fa foeroe „sma foe den naatsi” e blesi densrefi kaba?

[Faki na tapoe bladzijde 10]

Den wan disi ’ben drai go baka na a Herder èn Opziener foe den sili’. — 1 Petrus 2:25.

Wan oema na ini Normandië (Fransikondre) e skrifi: „Baka tin jari foe inactiviteit èn difrenti moeiti, di no ben luk, foe go baka na a gemeente [foe Jehovah Kotoigi], mi ben draidrai ete foe doe wan sani. Nanga ini prakseri na fasi fa mi ben tjari misrefi, di no ben kroederi nanga den Boekoe, sensi a ten di mi ben gwe libi a gemeente, mi ben frede Jehovah tranga leri èn den ai foe den owroeman èn foe na heri gemeente, di ben sa feni fowtoe na mi. Di mi ben de nanga fakansi nanga mi masra papa nanga mama mi ben teki wan eksemplaar foe Na Wachttoren ini mi anoe èn mi ben lési wan tori di ben go foe wan afersi foe wan inactief brada. di ben de a srefi leki di foe mi. Di mi lési fa Jehovah ben sori switifasi gi en, èn fa den owroeman ben gi en lobifasi jepi, èn fa den memre foe na gemeente ben gi en wan switikon baka, mi ben feni na krakti foe drai go baka na Jehovah organisaatsi.”

Suzanne, wan kotoigi na ini noordowstoe foe Fransikondre, e skrifi: „Mi e gi Jehovah, en Manpikin Jezus Kristus èn na ’getrow èn koni srafoe’ opregti tangi foe na jepi di den e gi na den inactiefwan. Misrefi ben de inactief di den owroeman ben kon fisiti mi èn ben pristeri foe seti wan bijbelstudi gi mi. Mi ben teki den pristeri èn now mi de kolokoe troetroe bika mi e teki prati alaten na a prékiwroko. Now mi kan sori sisa-lobi na trawan di abi dek’ati fanowdoe.”

Jolanda, ete wan Fransi kotoigi, no ben go na komakandra wantoe jari kaba èn a ben tapoe nanga begi bikasi a ben firi dati a abi fowtoe foe di a ben afrontoe Jehovah tafra. Bakadi a ben kisi jepi foe kon baka na ini activiviteit di e meki froktoe a e skrifi: „Mi e tjari kon a fesi foe Jehovah mi dipi firi foe tangi, foe di a jepi mi èn foe a gi mi wan tra tjans. Nanga mi heri ati mi e gi ala den sma di slak faart pikinso foe wan ofoe tra réde ede foe drai baka na Jehovah.”

[Schema/Faki na tapoe bladzijde 8 di e tjari sani kon na krin]

(Efoe joe wani si pe den sani disi skrifi, loekoe a tijdschrift)

Paulus agersitori foe na olijfon e sori fa na Abrahamitis ferbontoe e meki na heri jeje „siri” doe kon

ABRAHAMITIS FERBONTOE (Gen. 22:16-18)