Begi gi makandra
„Tan hori doro na ini begi gi wi.” — 2 THESSALONIKASMA 3:1.
1-3. (a) Foe san-ede meki Jehovah pipel nanga foeroe fertrow kan go ini begi na en? (b) Foe san-ede meki Jehovah Kotoigi moe de sma di abi wan libi pe den e begi fajafaja?
JEHOVAH de na bigi „jereman foe begi” (Psalm 65:2). Foe dat’ede meki en loyaal dienstknegti nanga foeroe fertrow kan go na en nanga den sakafasi begi foe den èn wortoe foe gi tangi. Ija, Jehovah Kotoigi abi foeroe réde foe kan de sma nanga wan libi pe den e begi fajafaja.
2 Na ini na fosi presi Jezus Kristus ben leri en bakaman foe begi. A ben taigi den: „Te oenoe e begi, taki dan: ’Tata, joe nen moe de santa. Joe kownoekondre moe kon. Gi wi wi brede foe na dé soleki na dé aksi dati. Èn gi wi pardon foe wi sondoe, bikasi wi ooktoe e gi pardon na ibri sma di de na wi na ini paiman; èn no tjari wi go na ini tesi’” (Lukas 11:2-4). Na ini a begi dati, dan nanga reti Gado e kon na tapoe na fosi pres ala di a ben teki toe na ini na begi persoonlek sani. A model begi disi e sori ooktoe dati wi no moe loekoe psa tra sma na ini wi begi.
3 Jezus apostel ooktoe ben gi tranga na kompe prékiman foe abi wan libi foe begi fajafaja. Foe eksempre na apostel Paulus ben taki: „Tan hori doro na ini begi” èn „begi sondro foe stop” (Romeini 12:12; 1 Thessalonikasma 5:17). Èn na apostel Petrus ben taki: „Na kaba foe ala sani kon krosbé kaba. De foe dat’ede gosontoe foe ferstan èn de na ai na ini a tori foe begi” (1 Petrus 4:7). Fa disi de wan toemsi moi rai!
San begi kan doe gi wi
4. San de fanowdoe efoe Gado moe jere den begi foe den dienstknegti foe en di gi densrefi abra?
4 Na poewemaman Alfred Tennyson, di ala sma sabi ben skrifi: „Moro e doe kon nanga jepi foe begi leki na grontapoe disi e dren foe den.” Fa den wortoe disi de troe! Ma efoe den dienstknegti foe Gado di gi densrefi abra wani dati Gado jere den begi foe den, dan den moe seni den begi foe den na ini bribi go na Jehovah via Jezus Kristus; den begi disi moe de ini akroederi nanga na wani foe Gado èn moe taki na tapoe na joisti fasi (Joh. 14:6; 1 Joh. 5:13-15). Den wortoe di e kon now moi: „Gado no e loekoe o boen joe taki den begi foe joe, o moi den de ooktoe, èn ooktoe a no e loekoe na meetkunde foe joe begi, o langa den de ooktoe èn ooktoe no na a rekenkunde foe den joe begi oemeni den de toe èn ooktoe no na a logica foe joe begi, o methodis den de toe; ma a e loekoe na na opregtifasi foe den.” — Na di foe tin na sébi jarhondro Ingrisi puritein prékiman Thomas Brooks.
5. (a) San begi kan doe gi wi? (b) Sortoe aksi ini a tori foe begi wi sa go loekoe?
5 Te wi e begi geregeld èn nanga wan opregti ati, dan wi e kon krosbé na Jehovah. Sakafasi begi di begi fajafaja e jepi wi foe doe a prékiwroko-komando foe wi (Mattéus 24:14; 28:19, 20; 2 Korintesma 2:17). Den e jepi wi foe teki bosroiti di e plisi wi hemel Tata. Begi e jepi wi ooktoe foe hori doro ini ferfolgoe èn foe kibri wi soifri-fasi na fesi foe Gado (Psalm 109:3, 4; 119:86). A de gi wi na okasi foe ferteri foe na dipi tangi di wi e firi gi Jehovah. Ma na ini a tori foe den laatste begi disi di wi kari dja na aksi e kon: Fa den kan tjari wini gi wi nanga wi kompe bribiman?
Foe san-ede foe begi gi makandra
6. Gi soema Jezus ben begi, èn gi soema wi kan begi foe dat’ede?
6 Jezus, wi eksempre, ben begi foe a boen foe en discipel. A ben begi tranga na Jehovah: „Mi e begi gi den; mi no e begi gi na grontapoe, ma gi den di joe ben gi mi; bika den de foe joe.” Aladi Jezus ben dede gi na libismafamiri, tokoe a no ben begi gi na „grontapoe” di ben kon de vreemd gi Gado. Ma ete Jezus ben begi wel gi den sma di ben komoto na ini na grontapoe dati èn di ben poti bribi na ini en (Johannes 3:16, 17; 17:8, 9; teki gersi 2 Petrus 2:5; 3:6). Nanga na eksempre foe Jezus na ini prakseri meki wi e begi nanga reti gi den sortoe sma dati, di abi respeki gi Gado.
7. Sortoe eksempre foe den apostel e gi a pipel foe Jehovah dek’ati foe begi gi makandra?
7 Na apostel Paulus ben begi gi kompebribiman. A ben taki foe eksempre gi den kristensma na ini Efese: „Foe di mi ben jere foe na bribi di oenoe ben abi na ini Masra Jezus èn gi ala santa wan, [meki mi no e stop] foe taki tangi gi oenoe. Mi e tan prakseri oenoe na ini mi begi” (Efesesma 1:15, 16). Boiti dati, Paulus no ben draidrai foe gi trawan tranga foe begi gi en nanga tra sma. Baka di a ben gi den Efesesma tranga ’foe weri na heri jeje fetisani’ èn foe teki na feti-owroe foe na jeje, a Wortoe foe Gado, meki a ben go doro foe taki: „Aladi oenoe e tan begi nanga ibri sortoe foe begi nanga tranga begi na ibri okasi ini jeje. Èn tan na ini disi na ai nanga ala stanfastefasi èn nanga tranga begi foe na boen foe ala santa wan, ooktoe gi mi dati mi kan kisi na koni foe mag taki te mi e opo mi mofo, foe kan taki nanga ala fri èn sondro frede foe na boen njoensoe” (Efesesma 6:11-19). A pipel foe Jehovah e kisi dek’ati ooktoe nanga na eksempre disi foe den apostel foe begi gi makandra.
8. Foe san-ede a de wan sani di fiti dati salfoe kristen nanga den sma foe na „bigi ipi” moe begi gi makandra?
8 Jehovah Kotoigi de wan bradafasi na a heri grontapoe. Den bakaman foe Kristus di ben kon njoen gebore nanga jeje a mindri den abi prati noso „gemeenschap” nanga Gado en Manpikin nanga den tra salfoe kristen (1 Johannes 1:3, 7; teki gersi na Njoen Vertaling foe na Nederlands Bijbelgenootschap). Ma Jezus ben sori dati ala en discipel ben sa abi lobi gi makandra, èn na apostel Petrus ben taki: „Abi lobi gi na heri gemeenschap foe brada” (1 Petrus 2:17; Johannes 13:34, 35). Fa a de wan sani di fiti foe dat’ede dati salfoe kristen nanga den kompe foe den, na „Bigi ipi”, e begi gi makandra! (Openbaring 7:9). Ma san ben sa de na inibere foe den sortoe begi disi?
Foe begi gi wánfasi, tiri nanga koni
9. Foe san-ede wi moe begi foe na wánfasi foe wi kristen bradafasi?
9 Wi moe begi foe lobi-ati wánfasi na ini wi kristen bradafasi. Jezus ben begi ofoe en bakaman ben kan de ini wánfasi nanga en nanga en Tata, èn Paulus ben gi dek’ati na kompe anbegiman foe Jehovah foe de ’krosbé ini wánfasi ini na srefi jeje èn ini na srefi fasi foe prakseri’ (1 Korintesma 1:10; Johannes 17:20, 21). Wan troe jeje foe bradafasi ben de alaten na marki foe wan sma di gi ensrefi krinkrin na Jehovah. ’O boen a de efoe brada e libi makandra na ini wánfasi!’ (Psalm 133:1-3) Èn wán fasi foe meki na wánfasi dati kon, de na begi foe en.
10. Foe san-ede meki wi moe begi foe tiri nanga jepi foe na santa jeje?
10 Wi moe begi efoe Jehovah wani tiri èn jepi den activiteit foe en pipel nanga jepi foe en jeje. Son sma moe doe kande boen moeilek toewijzing ini na dienst foe Jehovah, sani di noiti nanga soso libisma krakti ben sa kan doe kon. Foe dat’ede meki den loyaal kristen disi, èn ooktoe wisrefi, abi Jehovah jepi fanowdoe nanga jepi foe en santa jeje. — Zacharia 4:6; teki gersi Lukas 11:13; Tori foe den Apostel 8:14, 15.
11. Fa wi kan begi na wan fasi di fiti ini a tori foe koni?
11 Wi kan begi efoe wi brada kan kisi koni foe Gado. Paulus ben begi efoe kristensma na ini Kolosse „ben kan kon foeroe nanga soifri sabi foe Gado wani na ini ala koni èn jeje tranga foe si san na boen nanga ogri, sodati den kan waka na tapoe wan fasi di warti Jehovah foe plisi en dorodoro” (Kolossesma 1:9, 10). A de foe dat’ede wan sani di fiti toe foe begi efoe den sma di e tiri na prékiwroko èn e sreka wi boekoe a fesi, kan abi „wan jeje foe koni” (Efesesma 1:15-17). Joe e begi foe na boen foe den sma di e teki fesi na ini a préki foe a kownoekondre èn na sreka foe boekoe pe jeje ’njan e gi na a reti ten’? — Mattéus 24:45-47.
Foe begi foe wan prékiwroko di e waka boen, aladi ferfolgoe de
12. Fa 2 Thesalonikasma 3:1 de ini a tori foe a begi gi tra sma?
12 Wi moe begi ooktoe efoe sani kan waka boen gi kompe bribiman te den e prati na kownoekondreboskopoe. Paulus ben gi na dek’ati: „Brada, hori doro na ini begi gi wi, sodati na wortoe foe Jehovah es’esi mag go na fesi èn kan kisi grani, soleki a de ooktoe na oen” (2 Thessalonikasma 3:1; teki gersi Efesesma 6:18, 19). Ija, Paulus ben aksi kompe bribiman foe begi ofoe en nanga en kompe ben kan si winimarki ini na meki bekenti foe „a wortoe foe Jehovah”. Ooktoe wi moesoe begi foe na prati foe na Wortoe foe Gado èn na go na fesi foe den kownoekondre-afersi waka es’esi. Natuurlijk a de so dati tra sma de ini a tori na den sortoe begi disi — ala sma di ini den „laatste dé” e doe fajafaja a wani foe Jehovah. — 2 Timotéus 3:1-5.
13. (a) San 1 Timotéus 2:1, 2 e sori foe begi gi grontapoe tiriman? (b) Foe sortoe sani wi kan begi te wi e kisi ferfoloe leki kownoekondre barwrokoman?
13 Jehovah pipel nanga reti kan begi gi grontapoe tiriman. Paulus ben taki: „Na a fosi presi mi e fermane foe dat’ede dati tranga begi, begi, begi a fesi, taki tangi doe gi, ala sortoe foe sma. kownoe, èn ala sma di de ini wan hé positsi.” Den tra wortoe foe Paulus e sori dati den begi disi de foe na boen foe a pipel foe Gado, „sodati wi kan tan abi wan tiri nanga korostoe libi nanga a dini foe Gado nanga respeki èn serjoesoe fasi” (1 Timotéus 2:1, 2). Na wan toemsi moi sani dati den toe katiboman na ini Babylon e kisi na komando foe begi foe na vréde foe na foto dati, ’bika ini a vréde foe en vréde ben sa sori taki a de gi den’ (Jeremia 29:7). Foe dat’ede meki wi e begi leki Kotoigi foe Jehovah nanga reti gi grontapoe tiriman, sodati wi nanga wi jeje brada nanga sisa kan abi wan tiri nanga korostoe libi, di e jepi wi foe doe a wroko foe wi leki kownoekondre barwrokoman. Ma te den e ferfolgoe wi, dan nanga foeroe fertrow wi kan begi efoe wi nanga wi kompe kotoigi kan kisi na fanowdoe jepi foe Gado foe tan taki na Wortoe foe Gado fri èn sondro frede na ini den sortoe omstandigheid dati. Èn wi kan de séker dati den begi dati Gado sa jere. — Tori foe den Apostel 4:29-31; 5:29.
14. Sortoe fundamenti foe a bijbel wi abi foe begi dati wi brada nanga sisa di e kisi ferfolgoe kan kisi na jepi nanga trowstoe foe Gado?
14 A de séker wan joisti sani foe begi efoe wi brada nanga sisa, di e ondrofeni ferfolgoe kan kisi na trowstoe nanga jepi foe Jehovah. Ini na distrikt Asia, pe na foto Efese ben didon, dan na apostel Paulus ben tanapoe ’na ondro wan toemsi tranga druk, sodati a ben de na ini degedege foe en libi’. Ija, kande a ben feti na ini wan arena na ini Efese nanga wilder meti! Awansi fa a no fa Paulus ben skrifi foe den kristen na ini Korinte: „ooktoe oenoe kan jepi nanga na begi foe oen gi wi, sodati foeroe sma foe na boen foe wi kan tjari tangi foe san Gado gi wi na wan boen fasi leki wan bakapisi foe foeroe fesi di ben opo go na tapoe na ini begi” (2 Korintesma 1:8-11; Tori foe den Apostel 19:23-41; 1 Korintesma 15:32). Degedege ooktoe no de foe dat’ede dati wi moe begi efoe wi brada nanga sisa di e ondrofeni na ini a ten disi pina kan kisi na jepi nanga na trowstoe foe Jehovah. — 2 Korintesma 1:3-7.
15. San wi kan doe gi wi kompe bribiman di e kisi ferfolgoe, awinsi wisrefi de na ini doengr’oso?
15 Te wi kompe dienstknegti foe Jehovah tanapoe na fesi ferfolgoe, benawtoe ofoe kefar, dan den abi troetroe den begi foe wi fanowdoe. A den sortoe momenti dati kande wi de farawe foe den èn kande wi no kan jepi den na now wan enkri tra fasi. A kan de dati wisrefi de na ini doengro’oso! Tokoe ete wi kan doe foeroe boen te wi e begi gi wi kompe bribiman. So langa wi de na libi, wi féjanti no kan tapoe wi foe doe disi. Den begi foe wi kan doe srefi na ini wisrefi, ma den de foe troe wan boen sani nanga wan marki. — Teki gersi Nehemia 2:4-6.
Abi wan boen jeje gosontoe
16. Ini akroederi nanga 2 Korintesma 13:7, fa wi kan begi gi kompe kristen?
16 Nanga leti wi kan begi ooktoe dati kompekristen ’no doe noti fowtoe, ma foe doe san de boen’ (2 Korintesma 13:7). So wan lobifasi sondro gridl begi e sori dati wi abi troetroe na winsi dati den tan abi prisiri na ini na boenati foe Gado. Na apostel Paulus ben skrifi: „Wi e [begi] alaten gi oenoe dati wi Gado mag feni oen warti gi en kari èn nanga krakti mag doe ala na boen akroederi en prisiri èn na wroko foe bribi kan doe dorodoro” (2 Thessalonikasma 1:11). Epafras ben begi efoe den kristensma na ini Kolosse ’te foe kaba ben kan tanapoe ini na heri wani foe Gado dorodoro èn nanga wan faste overtoigi’ (Kolossesma 4:12). Aladi den wortoe disi ben taki gi salfoe kristen tokoe den begi foe wi nanga reti na ini a ten disi kan tjari den srefi firi disi kon na fesi foe na boen foe ala ama di e dini Jehovah nanga den heri ati.
17. Sortoe begi fiti ini a tori foe na jeje gesontoe foe wi brada?
17 Wi kan begi foe na jeje gosontoe foe wi kompe anbegiman. Te son sma e kon siki na jejefasi, dan den owroeman di den poti e begi nanga leti gi den èn nanga den, ini wan moeiti foe meki den kon boen baka. Na discipel Jakobus ben skrifi: „Na begi foe bribi sa meki na sma di no e firi ensrefi boen kon betre baka, èn Jehovah sa opo en tanapoe” (Jakobus 5:13-16; 1 Samuël 12:18-25). Wi kan kari kompe bribiman na den nen èn taki na winsi dati den ’kan tan de gosontoe na ini bribi’ (Titus 1:13; 2:1, 2). Natuurlek a de wan fowtoe sani foe begi gi sma di e trowe a seti foe Gado foe na ferloesoe-paiman. — Hebrewsma 10:26-29.
Winimarki foe na begi gi makandra
18, 19. San na wantoe persoonlek winimarki foe na begi gi makandra?
18 Wi kan de séker dati a de gi foeroe winimarki te wi e begi gi makandra. Den begi foe wi foe eksempre sa kon moro goedoe. Te wi e begi gi kompe bribiman, dan wi matifasi nanga den, sondro degedege sa go na fesi. Den sortoe begi disi a no de foe taki sa meki wi kisi moro pasensi, de moro sondro gridifasi. nanga moro lobi-atifasi èn broko-ede moro nanga trawan. Boiti foe dati, dan den begi foe wi foe na boen foe wi jeje brada nanga sisa sa sori Jehovah dati wi abi belangstelling gi en organisaatsi èn gi den den activiteit nanga na tan boen foe en,
19 A de gi foeroe trowstoe foe sabi dati wi jeje brada nanga sisa e begi gi wi soleki wi e begi ooktoe gi den. Fa a de wan switi sani foe ferstan dati wi begi gi kompe kotoigi foe Jehovah, na „Jereman foe begi” e jere den! Meki foe dat’ede, foe meki den kownoekondre afersi go na fesi nanga foe na lobi nanga wánfasi na wi mindri, begi gi makandra.
Fa joe ben sa piki?
◻ Foe san-ede meki Jehovah Kotoigi moe abi wan libi pe den e begi fajafaja?
◻ San begi kan doe gi wi?
◻ Foe san-ede meki wi moe begi gi makandra?
◻ Foe sortoe sani wi kan begi gi wi kompe bribiman?
◻ San de wantoe winimarki foe a begi gi makandra?
[Prenki na tapoe bladzijde 3]
Joe e begi taki a sa waka boen gi kompe-kotoigi foe Jehovah na ini a prati foe a boen njoensoe foe a Kownoekondre?
[Prenki na tapoe bladzijde 4]
O foeroetron joe e begi gi kristensma di e ondrofeni ferfolgoe?