Disi na a pisi foe na bijbel di moe lési na a theokratis skoro leki lezing nomroe toe (2) na ini a wiki foe
2 Dec. Jozua 10:1-14
Now a ben psa dati so esi leki Adoni-Zedek, a kownoe foe Jeruzalem, ben jere dati Jozua ben wini Ai èn dan ben gi en abra a pori, dati a ben doe nanga Ai neleki fa a ben doe nanga Jericho nanga na kownoe, èn dati den sma foe Gibeon ben sroto vréde nanga Israël èn dati den ben tan a libi na den mindri, 2 dati a ben kon frede srefsrefi, foe di Gibeon ben de wan bigi foto, leki wan foe den kownoe-foto, èn foe di a ben bigi moro leki Ai, èn ala den man foe en ben de tranga man. 3 Foe dat’ede Adoni-Zedek, na kownoe foe Jeruzalem, ben seni gi Hoham, na kownoe foe Hebro, èn gi Piream, na kownoe foe Jarmuth, èn gi Jafia, na kownoe foe Lachis, èn gi Debir, na kownoe foe Eglon, na boskopoe di e kon now: 4 „Hari kon na mi èn jepi mi èn meki wi naki Gibeon, bikasi a sroto vréde nanga Jozua nanga den manpikin foe Israël.” 5 Tapoe dati den ben konmakandra èn hari go, féfi kownoe foe den Amorietsma, na kownoe foe Jeruzalem, na kownoe foe Hebron, na kownoe foe Lachis, na kownoe foe Eglon, den nanga ala den legrekampoe, èn den ben go legre densrefi na fesi foe Gibeon èn bigin feti nanga en.
6 Ne den man foe Gibeon seni na boskopoe di e kon now gi Jozua na ini na kampoe na Gilgal: „No meki joe anoe kon slap na ini na tori foe den srafoe foe joe. Hari kon esi na oenoe èn fri oenoe èn jepi oenoe, bikasi ala den kownoe foe den Amorietsma di e libi na ini na bergikontren, bondroe kon na wan tége oenoe.” 7 Soboen, Jozua ben hari komoto foe Gilgal, en èn ala den fetiman nanga en èn ala dek’ati, èn tranga man.
8 Moro fara Jehovah ben taigi Jozua: „No frede den, bikasi mi gi den na ini joe anoe. Nowan man foe den no sa man foe tanapoe na joe fesi.” 9 Jozua now ben fadon na den tapoe dondro foe den ben froewakti. Na heri neti a ben hari komoto foe Gilgal. 10 Ne Jehovah ben tjari den kon ini broeja na a fesi foe den manpikin foe Israël, na tapoe san den ben tjari wan bigi srakti kon na mindri den na ini Gibeon èn baka dati ben bigin lon na den baka na a pasi di e kren go na Beth-Horon èn ben e tan naki den te na Azeka nanga Makkeba. 11 Now a ben psa dati di den ben e lon gi Israël èn den ben e de na tapoe na sé (foe na bergi) foe Beth-Horon, Jehovah trowe komoto foe hemel bigi stonn na den tapoe, te na Azeka, sodati den dede. Nanga den agraston moro ben dede leki di den manpikin foe Israël ben kiri nanga fetowroe.
12 Ne a ben psa dati Jozua ben bigin foe taki nanga Jehovah, tapoe a dé di Jehovah ben gi den Amorietsma abra na den manpikin foe Israël, èn moro fara a ben taki na fesi den ai foe Israël:
„Son, tanapoe sondro foe bewégi tapoe Gibeon
Èn moenkenki, tapoe den lagipresi foe Ajalon.”
13 Foe dat’ede a son ben tan tanapoe sondro foe bewégi, èn a moenkenki ben tanapoe troetroe pi, te leki a naatsi ben kan teki refensi na tapoe en féanti. Disi no tanapoe na ini a boekoe foe Jasjar? Èn a son ben tan tanapoe let na mindri foe na hemel èn a no ben e meki hasti foe dongo so wan heri dé langa. 14 Èn no wan dé ben de leki dati, no na fesi, no na baka foe dati, foe di Jehovah ben arki na a sten foe wan libisma, bikasi Jehovah srefi ben feti gi Israël.