Kweki pikin a mindri a pipel fu Gado
„Meki a de so dati Yehovah meki yu kon dusuntron moro furu ete.” — DEUTERONOMIUM 1:11.
1. Fa a bijbel e taki fu a meki fu pikin?
„LUKU! Manpikin de wan famiri gudu fu Yehovah; na froktu fu na bere na wan paiman. Leki peiri ini a anu fu wan tranga man, na so den manpikin fu den yongu yari de. Koloku na tranga man na skinfasi de di ben furu en peiri kokro nanga dati.” Na so wi e leisi na Psalm 127:3-5. Iya, meki pikin na wan tumsi moi grani di na Mekiman Yehovah ben gi na fosi libismapaar nanga den bakapikin fu den. — Genesis 1:28.
Meki pikin ini Israël
2. Fu san-ede sma ben wani abi bigi osofamiri a mindri den baka pikin fu Abraham, Isaäk nanga Yakob?
2 A mindri den bakapikin fu Abraham di ben waka via Isaäk nanga Yakob dan bigi osofamiri ben de wan sani di sma ben wani srefsrefi. Srefi pikin di ben gebore na di fu tu uma ofu concubine den ben si wettig. Disi ben de na geval nanga wantu fu den manpikin fu Yakob di ben tron den famiri edeman fu den twarfu lo fu Israël (Genesis 30:3-12; 49:16-21; teki gersi 2 Kronieken 11:21). Aladi na trow nanga wan patna ben de na seti fu Gado ini na bigin fu na trowlibi, toku a ben ferdrage a mindri den bakapikin fu Abraham trow nanga moro leki wan patna èn concubinaat, èn disi ben meki wan moro esi gro fu na bevolking kon. Den Israëlsma ben sa tron „wan pipel di ben de so furu leki den stof fu na grontapu” (2 Kronieken 1:6; Genesis 13:14-16). Na pramisi „siri” nanga yepi fu suma „ala natie fu na grontapu” ben sa man blesi densrefi ben sa kon gebore leki wan memre fu na natie dati. — Genesis 22:17, 18; 28:14; Deuteronomium 1:10, 11.
3. San ben de na situwasi na ini Israël na ini a ten fu na tiri fu Salomo?
3 Na meki fu pikin a ben de krin ben tron ini Israël leki wan marki fu na blesi fu Yehovah (Psalm 128: 3, 4). Ma wi musu fu taki dati den biginwortu fu na artikel disi di komoto fu Psalm 127 ben skrifi nanga anu fu kownu Salomo, èn wan bigi pisi fu na tiri fu na kownu disi ben de wan tumsi bun ten gi Israël. Na bijbel e taki fu na pisten dati: „Yuda nanga Israël ben kon de furu, so furu leki dan ai santi di de na se kanti aladi den ben nyan èn ben e dringi èn ben e prisiri. Èn Yuda èn Israël ben tan libi na ini seykerfasi, ibriwan sma ondro en eigi droifibon èn ondro en eigi figabon, fu Dan [ini a noordsei] te na Berseba [ini na zuidsei] ala den dei fu Salomo.” — 1 Kownu 4:20, 25.
Muilek ten gi pikinnengre ini Israël
4, 5. (a) Fu san-ede na meki fu pikin no ben de alaten wan reide fu prisiri na ini Israël? (b) Sortu kefarlek hati sani ben psa na moro pikinso tu okasi ini Yerusalem?
4 Ma tra pisten ben de ini Israël historia na ini san na meki fu pikin ben de fara fu de wan prisiri sani. Ini a ten fu na fosi pori fu Yerusalem na profeiti Yeremia ben skrifi: „Mi ai kon na a kaba fu den ini soso watra ai . . . Fu na dede fu pikin èn pikin na bobi tapu na publiki pren fu na foto . . . den uma mu tan nyan fu den eigi froktu, den pikin di ben gebore bun dorodoro?” „Srefi den anu fu den uma di abi sar’ati ben bori den eigi pikin.” — Kragisingi 2:11, 20; 4:10.
5 Pikinmoro seibi yarhondro a baka a de krin dati den sortu hati sani disi ben feni presi baka. Na dyu historia skrifiman Yosephus e ferteri dati ini a ten fu na lontu di srudati ben lontu Yerusalem ini 70 G.T. pikinnengre e grabu nyanyan puru ini a mofo fu den papa fu den èn mama ben grabu puru nyanyan fu na mofo fu den pikinengre fu den. A ferteri finifini fa wan dyu uma ben kiri a pikin fu en na bobi, ben bori na pikin skin èn ben nyan wan pisi fu en. Te papa nanga mama ini den laste yari di ben waka a fesi na tyari kon fu Yehovah krutu teige Yerusalem. ini 607 bifo G.T. èn 70 G.T. ben meki pikin ini na dyu grontapu, dan muilek wi ben kan poti en na ondro na meki pikin na wan frantwortu fasi.
A meki fu pikin a mindri den fosten kristen
6, 7. (a) Sortu gwenti Yesus ben puru a pasi gi kristensma? (b) Fa na Israël na yeyefasi ben sa gro èn san de na bewijsi fu dati?
6 Fa den fosten kristen ben de nanga a meki fu pikin? Ini a fosi presi wi mu taki dati Yesus ben puru a trow nanga moro leki wan patna èn concubinaat a mindri den disipel fu en. A ben meki Yehovah markitiki di ben de na bigin kon bun baka, dati wani taki trow nanga wan patna ofu na trowlibi na mindri wan man nanga wan uma (Mattéus 19:4). Aladi na Israël na skinfasi èn a meki fu pikin ben kon furu, dan na Israël na yeyefasi ben sa gro nanga yepi fu disipel. — Mattéus 28:19, 20; Tori fu den Apostel 1:8.
7 Efu na kon moro bigi fu na kristendom moro furu ben sa musu kon nanga a kisi fu pikin, dan Yesus no ben sa gi en disipel dek’ati fu meki presi ’gi na pasi’ fu de sondro fu trow „fu na bun fu na kownukondre fu hemel” (Mattéus 19:10-12). Na apostel Paulus no ben sa skrifi: „Ooktu wan sma di e trow en nyunwenke-fasi e du bun, ma a sma di no trow en, sa du moro bun.” — 1 Korinte 7:38.
8. San e sori dati furu sma fu den fosten kristen ben trow èn ben abi pikin?
8 Ma aladi Yesus nanga Paulus ben gi dek’ati fu tan sondro fu trow fu na bun fu na Kownukondre afersi, toku nowan fu den tu ben taki nomonomo wan sma musu teki na pasi fu de sondro fu trow. Alatu ben si a fesi dati bun furu kristen sma ben sa trow. A ben de te yu luku en bun wan natuurlek afersi dati sonwan fu den sma disi ben sa kisi pikin. Den kristen Griki Buku fu a bijbel abi difrenti pisi na ini san fosten kristen ben kisi langalanga rai fu a kweki fu pikin (Efese 6:1-4; Kolosse 3:20, 21). Efu owruman ofu dinari na ini a diniwroko ben trow, dan den ben musu de papa nanga mama di ben de bun eksempre. — 1 Timotéus 3:4, 12.
9. Fa leki fa na apostel Paulus taki na meki fu pikin ben sa de gi seiker kristen uma wan kibri, ma san den ben abi fanowdu ini disi?
9 Na apostel Paulus ben taki srefi dati na abi fu pikin gi son kristen uma ben kan de wan kibri. Fu a gi fu yepi na skinfasi na mofina weduwe a ben skrifi: „Poti yongu weduwe a wan sei . . . na asrefi ten den e leri ooktu fu de sondro wroko fu di sondro wan marki den e waka lontu na den oso fu sma; iya, no wawan sondro wroko, ma den tron ooktu konkruman ma den e go bumui ooktu nanga tra sma tori èn e taki fu sani fu san den no mag fu taki. Fu dat’ede mi e winsi dati den yongu weduwe e trow, e meki pikin, e luku wan oso èn no e gi den gensman wan okasi fu skempi. Sonwan, te yu luku en bun, ben drai densrefi kaba puru fu go waka baka Satan.” Den sortu uma dati ben sa „tan kibri bun nanga yepi fu na meki fu pikin efu den ben horidoro ini bribi èn lobi èn santafasi makandra nanga gesontu frustan”. — 1 Timotéus 5:11-15; 2:15.
’Benawtu ini na skin’
10. Sortu tra sani ini a tori fu weduwe Paulus ben gi ini en fosi brifi na den Korintesma?
10 Ma a de wan moi sani fu si dati na srefi apostel Paulus ini en fosi brifi gi den Korintesma e tyari wan tra lusu kon gi den weduwe. A ben taki fu a rai fu en ini a tori fu trow den wortu dati èn ben gi dati „ini a fasi fu wan concessie [skeki]”. A ben skrifi: „Gi den sma di no trow èn den weduwe now mi e taki dati a de bun gi den efu den tan soleki mi. Ma efu den no abi na krakti fu dwengi densrefi meki den trow dan bika a moro bun fu trow leki den krasi fu lostu. Ma leki fa mi e prakseri en wan weduwe de moro koloku efu a tan soleki a de. Mi seiker e denki dati ooktu mi abi a yeye fu Gado.” — 1 Korinte 7:6, 8, 9, 40.
11. (a) San den sma di e trow e ondrofeni, èn fa na verwijstekst na 1 Korinte 7:28 e tyari krin kon ini a troi disi? (b) San Paulus ben bedoel di a ben taki: „Mi e spaar yu fu disi”?
11 Paulus ben tyari kon na krin: „Efu wan sma ini en nyunwenke fasi ben sa trow, sowan sma no ben sa du sondu. Ma den di e du en, sa abi benawtu ini den skin. Ma mi e spaar unu fu disi” (1 Korinte 7:28). Na ’benawtu ini den skin’ wi e feni ini na Nyun-Grontapu-vertaling leki verwijstekst Genesis 3:16, pe wi e leisi: „Gi na uma Yehovah ben taki: ’Mi sa meki na sari fu na ten di yu de nanga bere kon moro furu; nanga berepen yu sa meki pikin èn na tranga lostu fu yu sa go na yu man, èn en sa basi yu.’” Boiti trow problema di ben sa kon dan na ’benawtu ini den skin’ di den sma di e trow ben sa ondrofeni, e sori sondro degedege ooktu tapu problema ini a meki fu pikin. Aladi Paulus no e tapu na trow èn ooktu na meki fu pikin,toku a ben firi ensrefi ferplekti fu warskow en kompe-kristen dati nanga disi problema nanga sani di ben o puru yu prakseri ben kan du kon èn di ben sa kan skotu den ini den dienst gi Yehovah.
„Na ten di tan abra kon de syatu”
12. Sortu rai na apostel Paulus ben gi na kristen di trow èn fu sortu reide?
12 Ini na fosi yarhondro gewoon teri kristensma no ben abi na fri fu libi net soleki grontapu sma. A situwasi fu den ben sa abi srefi krakti tapu a trowlibi fu den. Paulus ben skrifi: „Boiti fu dati, mi e taki disi, brada: na ten di tan abra kon de syatu. Meki fu dat’ede den sma di abi wan uma, de leki den no abi no wan, . . . èn den di e meki gebroiki fu na grontapu, leki den di no e meki gebroiki dororodoro fu en; na toneel fu a grontapu disi de bezig fu kenki. Iya, mi wani dati unu de fri fu sondu. . . . Ma mi e taki disi fu na eigi bun fu unu, no fu trowe wan trapu lontu yu, ma fu beweigi yu te na a sani san de bun èn na san wani taki dienst dorodoro gi na Masra, sondro fu sani puru yu prakseri.” — 1 Korinte 7:29-35.
13. Na sortu fasi ’na ten di tan abra ben kon de syatu’ gi den fosi yarhondro kristen?
13 Na bijbel sabiman Frédéric Godet ben skrifi: „Aladi na ini na denki fu sma di no e bribi seiker na grontapu sa tan te ten di no abi marki dan toku tanapu gi na kristen alaten na bigi fruwakti fu na parousia [na de-noya].” Kristus ben gi en disipel a marki fu en de-noya èn a ben warskow den: „Tan fu dat’ede alaten na ai, bika un no sabi tapu sortu dei un Masra e kon” (Mattéus 24:3, 42). Na ten di ben tan abra ben do „syatu” ini a fasi disi dati den fosi yarhondro kristen dati ben mu libi doronomo na ini a fruwakti fu Kristus. Boiti fu dati den no ben sabi omeni ten den ben abi gi densrefi bifo „ten nanga sani di ben o psa èn di yu no kan si na fesi” ben sa tyari den libi kon na wan kaba èn nanga dati ooktu wan kaba na ibri tra mogelekheid gi den fu ’meki na kari fu den kon de faste’. — Preikiman 9:11; 2 Petrus 1:10.
14. (a) Fa wi musu frustan Mattéus 24:19? (b) Fa na warskow fu Yesus ben kon de moro tranga fanowdu o moro na yari 66 G.T. ben kon moro krosbei?
14 Gi kristen ini Judéa nanga Yerusalem wan tumsi tranga fanowdu ben de fu ’tan na ai doronomo’. Di Yesus ben warskow fu na di fu tu pori fu Yerusalem, a ben taki: „Elu fu den bere-uma een den di gi bobi na wan pikinnengre ini a ten dati!” (Mattéus 24:19). A de tru dati Yesus no ben tapu den fosi yarihondro kristen dya fu abi wan osofamiri. A ben taki soso a profeitifasi fu wan situwasi di ben sa sori ensrefi èn a ben sori dati efu na marki fu na pori fu Yerusalem di ben de fu kon ben sori ensrefi, a ben sa de gi bere-uma ofu uma nanga yongu pikin moro muilek fu lon gwe (Lukas 19:41-44; 21:20-23). Ma di na ini den yari di ben waka na fesi 66 G.T. na dyugudyugu na mindri den dyu ini Yudéa ben kon gro, dan sondro degedege dan na warskow fu Yesus ben sa kon ini na prakseri fu den kristen èn ben abi krakti na tapu a fasi fu den ini a tori fu a meki fu pikin ini a muilek ten dati.
A meki fu pikin ini a ten disi
15, 16. (a) Fa na ’ten di ben tan abra ben kon syatu’ gi kristensma di e libi ini a ten disi? (b) Sortu aksi kristensma musu aksi densrefi?
15 Fa kristen ini a ten disi „fu na kaba” mu de nanga a trowlibi èn a meki fu pikin (Daniël 12:4). A de now moro leki iniwan ten tru dati ’na toneel fu na grontapu disi de bezig fu kenki’, ofu soleki wan tra vertaling e taki ’a disi ten seti fu sani e psa gwe esesi’. — 1 Korinte 7:31, Phlillips.
16 Now na „ten di tan abra” leki noiti na fesi „kon syatu”. Iya, soso wan skotu pisten tan abra ini san Yehovah pipel kan klari na wroko di a ben gi den fu du, dati wani taki: „Na bun nyunsu fu na kownukondre sa mu preiki na a heri grontapu pe sma e libi leki wan kotoigi gi ala natie, èn dan a kaba sa kon” (Mattéus 24:14). A wroko dati mu du bifo a kaba kon. Fu dat’meki a de gi kristen wan sani di fiti fu aksi densrefi fa te den go ini wan trowlibi, ofu efu den trow kaba, na abi fu pikin sa abi krakti tapu a prati fu den na a tumsi prenspari wroko dati.
Wan eksempre fu owruten
17. (a) Sortu wroko Noach nanga en dri manpikin ben mu du bifo na Frudu, èn olanga disi te yu luku en bun ben hori? (b) Sortu reide Noach manpikin nanga den uma fu den ben kan abi fu ben tan ini a ten bifo na Frudu sondro fu abi pikin?
17 Yesus ben teki na ten fu „a de-noya fu a Manpikin fu libisma” gersi nanga „den dei fu Noach” (Mattéus 24:37). Noach nanga en dri manpikin ben abi bifo na Frudu wan spesrutu wroko. Disi ben de na bow fu wan kefarlek bigi ark èn fu preiki (Genesis 6:13-16; 2 Petrus 2:5). Di Yehovah ben gi instructie ini a tori fu a bow fu na ark, dan den manpikin fu Noach ben trow kaba (Genesis 6:18). Wi no sabi precies olanga na bow fu na ark ben ori, ma nanga ala seikerheid a ben teki difrenti tintin yari. A de wan kefarlek moi sani dati den manpikin fu Noach nanga den uma fu den ini na heri pisten disi bifo na Frudu ben de sondro fu meki pikin. Na apostel Petrus e ferteri spesrutu dati „aiti sili”, dati wani taki fo trowpaar sondro pikin, „ben tyari psa a watra bun” (1 Petrus 3:20). Dati den manpikin ben tan sondro fu meki pikin, ben kan abi tu reide. Ini na fosi presi Gado ben gi den wan wroko di ben teki ala den prakseri te yu luku a pori di ben o kon nanga yepi fu wan frudu fu watra. Ini a di fu tu presi den no ben firi fu meki pikin ini wan grontapu ini san „na takru fasi fu den libisma ben kon de furu pasamarki ini a grontapu èn . . . ibri firi fu den prakseri fu den ati ben de soso takru”, wan grontapu „furu nanga tranga ogridu”. — Genesis 6:5, 13.
18. Fa na eigifasi fu Noach man pikin nanga den uma fu den sondro fu a dini now leki wan markitiki e gi sani fu go denki fu en?
18 Disi no wani taki dati na libifasi di Noach manpikin nanga den uma fu den ben waka na en baka bifo na Frudu, noodzakelijkerwijs mu de wan markitiki gi trowpaar di e libi now. Ma fudi Yesus e teki den dei fu Noach gersi nanga na pisten na ini san wi e libi now, dan na eksempre fu den e gi wi sani fu go prakseri.
Muilek ten
19. (a) Fa na ten fu wi kan teki gersi nanga den dei fu Noach? (b) San Paulus ben taki a fesi fu den „laste dei”, èn fa na profeititori fu en ben abi fu du nanga a meki fu pikin?
19 Net leki Noach nanga en osofamiri na so ooktu wi e libi ini „wan grontapu fu goddelowsusma” (2 Petrus 2:5). Net leki den, na so wi e libi ini den „laste dei” fu wan goddelowsu seti fu sani di de a pasi fu kisi pori. Na apostel Paulus ben taki a fesi dati „den last dei” fu Satan seti ben sa abi leki marki „tranga ten di muilek fu psa”. Dati ooktu na meki fu pikin ben sa de a mindri den sani di ben sa de muilek, a kon a krin ini den tra wortu dati pikin „no ben sa gi yesi na mama nanga papa”. A ben taki dati den sma ini algemeen, pikinnengre èn yonguwan di e gro kon di no de a dorosei fu disi, „ben sa de sondro tangi” èn „deloyaal”, „sondro natuurlek lobi” (2 Timotéus 3:1-3). Aladi Paulus e taki dya a fesi fu toestand di ben a de a mindri grontapusma, toku a de so fu si dati den sortu fasi disi di ben de moro furu ini a kweki fu pikin ben sa meki en moro muilek gi kristensma, soleki furu sma ben ondrofeni disi ooktu.
20. San wi sa go ondrosuku ini a tra artikel?
20 Ala san ben taki dya a fesi ben sori dati a de fanowdu fu si na kweki fu pikin na wan balansi fasi. Aladi a kan gi furu prisiri, toku a kan tyari ooktu furu pen na ati kon. A abi winimarki ma ooktu lasimarki, Wantu fu disi wi sa ondrosuku ini na tra artikel di e kon.
Punt fu luku ete wantron
◻ Fu san-ede bigi osofamiri ben de wan sani di ala sma ben wani na ini Israël?
◻ San e sori dati dten ben de ooktu ini san na meki fu pikin ben tyari pen na ati gi den dyu?
◻ Na sortu fasi na Israël na yeyefasi ben sa kon furu?
◻ Na sortu fasi na ’ten di ben tan abra ben kon syatu’ gi den fosten kristen?
◻ Sortu reide Noach manpikin nanga den uma fu den ben abi fu tan sondro pikin bifo na Frudu èn san wi kan taki fu na disi ten situwasi?
[Prenki na tapu bladzijde 3]
Wan es’esi lon komoto fu Yerusalem ben sa de moro muilek gi den sma di ben abi yongu pikin