Frede de alaten wan sani di fowtu?

A KAN pori koloku èn way howpu puru. A de vergif gi na frustan èn wan poriman fu krin denki, èn sma e feni en moro ogri leki na moro takru skinsiki. lya, a de wan tranga firi. Ma a de alaten ogri?

Kon wi taki taki yu e rèy tapu wan pasi di yu no sabi. Na pasi e go na loktu, na ini den bergi, èn a e bigin meki ala sortu boktu nanga kronkron. Neti e doro èn lekti fini snew e kon. Yu oto e seyri pikinso èn yu e frustan taki yu doro wan hey, pe na pasi e bigin grati.

Now yu musu luku bun. Aladi yu e teki ibri grati boktu forsegtiki, toku yu e frustan o makriki yu ben sa kan lasi a makti tapu a stuur èn ben sa kan fadon go na ini a lagi presi na ondro. Boyti fu dati yu no sabi sortu tra kofar e luru na ini a dungru. Aladi den sortu prakseri dati e kon na yu, dan yu e bigin kisi wan drey mofo èn yu ati e bigin naki moro esi. Yu de na ay srefi srefi. Awinsi pe yu ben de nanga yu prakseri na a momenti disi, now na wroko di yu de nanga en e du e teki yu krinkrin abra: fu hori na oto tapu a pasi èn fu luku taki wan onkoluku no psa.

Te fu kba na pasi e saka go na ondro. Strati lanpu de now èn èys no de moro. Safrisafri na span e gwe libi yu skin. Yu e ontspan yu èn yu e soktu fu frulekti. Na frede dati ben de fu noti!

Ma a ben de trutru fu noti? Te yu luku en bun, nôno. Wan reydelek kisi fu senwe ondro den sortu omstandigheid disi de wan normaal sani. Disi e meki wi e luku bun èn e de na ay. Wan gosontu frede kan yepi wi fu no du sani esi-esi, so taki wi du wi srefi ogri. Iya, frede no de alaten wan sani di e pori wan frustan di e denki krin ofu de leki vergif gi na frustan. Na son omstandigheid a kan de srefi heri bun.

Na beybri e taki fu frede èn e poti wi prakseri na tapu tu aparti sortu frede. Wán sortu fu frede de trutru vergif gi na frustan. Ma na tra sortu no wwan de normaal èn gosontu, ma de fu na moro prenspari belang gi wi frulusu. San na den tu sortu fu frede? Èn fa wi kan leri fu kweki na wan sortu èn no meki a trawan kisi wi? Disi sa behandel na ini na tra artikel.