Fu san-ede wi musu frede Gado èn no libisma?

„NA BEYFI gi libisma, dati de leki wan trapu, ma en di frutrow tapu Yehovah, sa kisi kibri” (Odo 29:25). Nanga den wortu disi na owru odo e poti wi prakseri na tapu na sortu fu frede di trutru de vergif gi wi frustan — na frede fu libisma. Na frede disi den e teki gersi nanga wan trapu. Fu san-ede? Fu di wan pikin meti, so leki wan konikoni de sondro yepi te a kon na ini wan trapu. A wani lon gwe ma na trapu e hori en sondro pardon. Na meti di a trapu kisi de sondro makti.

Te frede gi libisma teki wi abra, dan na furu fasi wi de leki na konikoni dati. Kande wi sabi san wi musu du. Kande wi wani du dati tu nanga wi heri. Ma frede abi wi na ini en makti. Wi de sondro makti èn no man tu fu du wan sani.

Na trapu fu frede gi libisma

Prakseri pikinso wantu sma fu beybri ten di ben meki frede gi libisma teki den abra. Na ini Yosuwa ten den ben seni twarfu man go fu sipiyon na kondre Kanan bifo den Israèl sma ben sa fadon go ini na kondre leki fa den abi na prakseri. Den sipiyon ben kon baka èn ben fruteri taki a kondre ben fatu èn ben abi gudu, precies leki fa Gado ben taki. Ma tin fu den sipiyon ben meki na tranga di den sma fu a kondre ben tranga ben teki den abra. Nanga na a frede disi gi libisma, den ben musu fruteri sani psa marki na den Israèl sma fu a tranga disi èn ben meki na heri nâsi kon beyfi fu frede. Den Israèl sma ben weygri fu gi yesi na a komando fu Gado fu hari go na ini Kanan èn fu teki na kondre abra. Ini na tra fotenti yari leki wan bakapisi fu disi dan na heri grupu fu mansma di ben de bigisma na a ten dati, te yu puru soso wantu sma na ini ben dede na ini na sabana. — Numeri 13:21—14:38,

Yona so srefi tu ben fadon gi na frede fu libisma. Di a ben kisi na wroko fu go preyki gi den sma di ben libi na ini na foto Ninefey, „Yona ben opo tanapu èn ben lowe gwe na Tarsis, fara fu na fesi fu Yehovah” (Yona 1:3). Fu san-ede? Den Ninefey sma ben abi na takru barinen fu wan pipri di no ben abi sari-ati èn di ben ogri, èn Yona seyker seyker ben sabi disi. Frede gi libisma ben meki a go na a tra sey fu pe a ben musu go. Te fu kba a ben teki awinsi fa a no fa a wroko fu en, ma pas baka di Yehovah ben gi en trangaleri tapu wan ongewoon fasi. — Yona 1:4, 17.

Srefi kownu kan abi frede gi libisma. Na wan seyker okasi kownu Saul langalanga ben sori trangayesi gi na kobòt fu Gado. Fa a ben krin ensrefi? „Mi ben psa na komando fu Yehovah nanga den wortu fu yu, fu di mi ben frede na pipri èn fu dati-ede mi ben arki na den sten” (1 Samuwèl 15:24). Wantu yarihondro a baka, di Babilon sma ben lontu Yerusalen, dan Yeremiya, wan kotrow profeyti ben gi kownu Sedekiya na ray fu gi en srefi abra èn meki na a fasi disi Yerusalen kon fri fu a trowe fu furu brudu. Ma Sedekiya ben weygri fu du disi. Fu san ede? A ben piki na fesi Yeremiya: „Mi frede den dyu di abra go na den Kaldew sma, taki wan dey sma ben sa kan gi mi abra na ini den anu èn den ben sa handri trutru na wan syen fasi nanqa mi.” — Yeremiya 38:19.

Te fu kba srefi wan apostel ben kan frede. Tapu na dey di Yeyses ben sa dede, a ben warskow en bakaman taki den alamala ben sa gowe libi en. Ma Petrus ben taki nanga deki-ati: „Masra, mi klariklari fu go nanga yu na dungru-oso èn na ini dede” (Lukas 22:33; Mateyus 26:31, 33). O fowtu den wortu disi ben sori taki den de! Soso wantu yuru na baka Petrus nanga frede ben fruteri taki noyti a ben de nanga Yeyses èn taki srefi a no ben sabi en. Frede gi libisma ben teki en abra! Iya, frede gi libisma trutru de vergif gi na frustan.

Suma wi musu frede?

Fa wi kan wini frede gi libisma? Te yu o poti na ini a presi fu en wan moro gosontu frede. Fu abi na sortu frede disi meki na srefi apostel Petrus ben gi deki-ati di a ben taki: „Frede Gado” (1 Petrus 2:17). Na engel di Yohanes ben si na ini wan fu den fisyun fu Openbaring ben bari gi libisma: „Frede Gado èn gi en glori” (Openbaring 14:7). Na koni kownu Salomo ben gi deki-ati fu abi so wan sortu frede di a ben taki: „Na kba fu na tori, now di ala sani ben yere, de: Frede na tru Gado, èn ondrow en kobòt bika disi na a heri fruplekti fu libisma” (Preykiman 12:13). Iya, frede gi Gado na wan fruplekti!

Frede gi Gado e tyari winimarki kon. Na Psalm singiman fu owruten ben singi: „Fu tru, [Yehovah] frulusu de krosibey fu den sma di e frede en” (Psalm 85:9). Wan odo fu beybri e poti krakti a tapu tu: „A de a frede gi Yehovah di sa meki dey kon a tapu” (Odo 10:27). Iya, frede gi Yehovah de gosontu, de bun. ’Ma’, na so wi ben sa kan aksi, ’Yehovah de toku wan lobi-ati Gado. Fu san-ede wi ben sa frede wan Gado fu lobi?’

Yu musu frede wan Gado fu lobi?

Fu di frede gi Gado no de wan ranpu frede di e lan wan sma èn di e kisi sma hori na ini son situwâsi. A de a sortu fu frede di wan pikin kan firi gi en tta, aladi a e lobi en tta èn sabi taki en tta lobi en.

Frede gi Gado de trutru wan dipi respeki gi na Mekiman èn a e kon fu na sabi taki Gado na regtvaardikifasi, geregteghèyt, koni nanga lobi ini persoon dorodoro. A wani taki wan gosontu frede fu Gado no mandi, fu di a de na Moro Hey Krutuman di abi na makti fu pay èn fu strafu. „A de wan kofarliki sani fu fadon na ini den anu fu na libi Gado”, na apostel Paulus ben skrifi (Hebrew sma 10:31). A Lobi fu Gado no musu dini leki wan sani di e kon fu en srefi, èn so srefi tu wan sma no musu soso na krutu fu en. Fu dati-ede na beybri e memre wi na san e kon: „Na frede gi Yehovah na a bigin fu koni.” — Odo 9:10.

Ma wi musu hori na prakseri taki aladi Yehovah abi na makti fu strafu den sma di trangyesi en — san nofotron a ben du — seyker a no de wan Gado di wani si brudu ofu di abi ogri-ati. Te yu luku en bun a de wan Gado fu lobi, aladi, neleki wan lobi ppa ofu mma, nanga reti en ati e bron sontron (1 Yohanes 4:8). Fu dati-ede meki frede gi en de wan bun sani. A e tyari wi go so fara fu gi yesi na en weti, di meki nanga a prakseri fu na bun fu wi. Gi yesi na Gado weti e gi wi koloku, aladi trangayesi abi alaten takru bakapisi (Galasiya sma 6:7, 8). Na Psalm singiman ben fruklari ondro krakti fu Gado yeye: „Frede Yehovah, unu en santawan, bika mankeri fu sani no de gi den sma di e frede en”. — Psalm 34:9.

Suma yu e frede?

Fa na frede gi Gado e yepi wi fu wi? We, sma e spotu ofu e frufolgu wi kande fu di wi e du bun èn disi e poti wi ondro druk. Ma wan respeki frede gi Gado e poti wi ondro druk fu hori tranga na wan yoysti libifasi, fu di wi no wani meki a mandi. Boyti fu dati, lobi gi Gado sa tyari wi go so fara fu du sani fu prisiri en ati. Moro fara wi sa hori na prakseri taki Gado e pay wi bun te wi du bun, san e tyari wi go so fara fu lobi en moro èn e gi wi na lostu fu du en wani. Wan balansi luku tapu Gado e yepi wi so bun fu wini ibri frede gi libisma di ben sa kan de.

Furu sma fu eksenpre den e dwengi go du takru sani fu di den e frede san den sma fu den yari fu den ben sa denki fu den. A de heri bun taki yongu sma e smoko, e taki doti-taki, e meki bigi (fu san de trutru so ofu sani di den e prakseri) fu ondrofeni tapu a kontren fu seks èn srefi e go pruberi sopi ofu drugs. Fu san-ede? No ala ten fu di den wani disi sote, ma fu dl den e frede fu san den sma fu den yari fu den sa taki efu den handri tra fasi. Kosi nanga dreygi kan de gi wan tini netso muylek fu frudrage leki frufolgu na skinfasi.

Wan bigisma tu kan abi na firi taki a de na ondro druk fu handri fowtu. Na so wan fasi na wrokope ben sa kan komanderi wan wrokoman fu hey na preys tapu na rekening fu wan kranti ofu fu meki na belasting papira fu wan firma tapu wan bidrigi fasi, so taki moro pikinso belasting abi fu pay. Wan kresten kan abi a firi efu a no sa gi yesl, a kan lasi en wroko. Na so frede gi libisma e poti en na ondro druk fu handri fowtu.

Ini ala tu kefal wan gosontu frede gi Gado èn respeki gi en kobòt sa tapu wan kresten fu kon lan fu a frede gi libisma. Èn lobi gi Gado sa tapu en fu du wan sani san Gado no wani (Odo 3:13). Boyti fu dati en bribi na ini Gado sa gi en na dyaranti taki efu a handri ini akruderi nanga en konsensi di beybri ufen, Gado sa hori baka gi en, awinsi fa den bakapisi sa de. Na apostel Paulus ben tyari en bribi kon na fesi na ini den wortu disi: „Gi ala sani mi abi na tranga fu en di e gi mi krakti.” — Fillipi 4:13.

Na beybri e gi bun furu eksenpre fu man nanga uma di srefi na ondro den moro hebi tesi ben tan kotrow na Yehovah. Den „ben kisi na tesi fu den nanga yepi fu spotu èn krawasi, nanga yepi fu buy nanga strafu-oso. Den ben ston den, den ben kisi tesi, den ben sa den na ini pisi, den ben dede fu di den ben srakti den nanga feti-owru” (Hebrew sma 11:36, 37). Ma den no ben gi pasi taki frede gi libisma teki den frustan abra. Na presi fu dati den ben waka na baka na srefi koni libifasi di Yeyses bakaten ben taygi en disipel: „No frede den di e kiri na skin ma no kan kiri na sili; ma frede moro furu en [Gado] di kan pori sili nanga skin na ini Gehèna.” — Mateyus 10:28.

Na waka na baka na ray disi fu Yeyses fu frede Gado na presi fu libisma, ben yepi den fosi kresten so srefi fu horidoro ondro ala sortu pina, tesi nanga frufolgu, „fu na bun nyunsu ede” (Filemon 13). Na apostel Paulus de wan aparti eksenpre fu disi. Na ini en di fu tu brifi gi den Korente sma a e sori fa frede gi Gado ben gi en na deki-ati fu horidoro na ondro strafu-oso, fonfon, ston di den ston en, boto di ben naki broko, difrenti kofar tapu den pasi, neti sondro fu sribi, angri, watra di ben kiri en, kowru nanga sososkin. — 2 Korente sma 11:23-27.

Frede gi Gado ben tranga so srefi tu den fosi kresten dati fu kaka futu gi hebi frufolgu na ini na Romen kownukondre, di sonwan fu den ben trowe go srefi gi den ogri meti na ini na fetigron. Na ini a ten fu den Mindri-yarihondro deki-ati bribiwan tapu udufaya ben lasi libi na publiki fu di den ben weygri fu skeki ini na tori fu a bribi fu den. Ini na ten fu na kriboy grontapufeti kresten sma ben wani moro furu fu nyan pina èn dede na ini den konsentrasi kanpu leki fu du sani di ben sa meki Gado mândi. Fa respeki frede gi Gado abi wan tranga krakti! Efu a ben tranga kresten fu wini frede gi libisma na ondro den sortu omstandigheid disi fu tesi, dan seyker a kan tranga wi fu tan kotrow na ini sortu situwâsi di wi sa de na ini.

Nownow Satan Ddibri e poti druk na ala sortu fasi tapu wi fu tyari wi go so fara fu Gado atibron, Tru kresten fu dati-ede musu abi na srefi fasti bosroyti leki di na apostel Paulus ben tyari kon na fesi di a ben skrifi: „Wi no de fu na sortu di e dray baka, san e tyari pori kon, ma fu na sortu di abi bribi, san e meki na sili tan na libi” (Hebrew sma 10:39). Na frede gi Yehovah de wan trutru fonten fu krakti. Meki nanga yepi fu a frede disi wi „abi deki-ati èn taki: ’Yehovah na mi yepiman; mi no wani frede. San wan libisma kan du mi?’” — Hebrew sma 13:6.

[Prenki na tapu bladzijde 11]

Frede gi Gado ben gi Paulus na deki-ati fu frudrage ala sani, èn so srefi tu fonfon, strafu-oso nanga srefi na sungu fu boto. — 2 Korente sma 11:23-27.