Frede Jehovah èn gi en santa nen glori
„Soema no sa frede joe troetroe, Jehovah èn gi joe nen glori, foe di joe wawan de loyaal?” — OPENBARING 15:4.
1, 2. (a) Fa Jehovah ben opo den sroisi foe hemel ini 1991? (b) Sortoe ondrofeni ini en libi ben meki wan getrow zendeling gi sma rai: “Frede Jehovah”? (Loekoe so srefi na Jariboekoe foe 1991, bladzijde 187-9, Bakratongo)
JEHOVAH ’ben opo den sroisi foe hemel èn troetroe kanti wan blesi te leki sani no ben mankeri moro.’ Wi kan fiti den wortoe dati someni tron baka tapoe Jehovah Kotoigi ini a ten disi (Maleaki 3:10). Foe eksempel, na fajafasi foe den Kotoigi di ben fisiti den spesroetoe kongres èn foe den wan di ben libi ini den kondre pe den kongres dati ben hori, ben de foe si di den ben moksi densrefi ini kresten demakandra, na den spesroetoe kongres di den ben hori na heri grontapoe — foe den „Soifri tongo”-kongres na Buenos Aires ini Zuid-Amerika; Manila, Taipei, nanga Bangkok ini na fara Owstoe, te na den „Sma di lobi fri”-kongres na Boedapest, Praag, èn Zagreb (16-18 augustus 1991) ini Owstoe Europa.
2 Fa den fisitiman foe abra-watra ben prisiri foe miti Kotoigi di tan getrow langa ten, na den presi dati! Foe eksempel, ini Bangkok, Frank Dewar — di wan tron ben de na wan enkri Kownoekondre preikiman na Thailand — ben froeteri foe den 58 jari di a dini kaba ini a zendingsdienst. A ben wroko foe den eilanti foe na Bigi Oceaan te go miti Zuidowstoe Asia, srefi te na China. A ben kisi foe doe nanga kefar: foe soengoe na se, boesi meti ini den boesi, tropisch siki, èn a takroe-ati tiri foe den Japansi fetimasra. Di den ben aksi en sortoe rai a ben sa wani gi den kongresfisitiman, en piki ben de: „Frede Jehovah!”
3. Foe san ede wi moesoe sori taki wi e frede Gado?
3 „Frede Jehovah!” O prenspari a de foe wi alamala kweki a gesontoe frede dati! „Frede gi Jehovah na a bigin foe koni” (Psalm 111:10). A frede disi no de wan ongesontoe frede gi Jehovah. Na presi foe dati, a de wan dipi respeki gi na kefarlek hei fasi fa a e sori ensrefi èn gi den gado eigifasi foe en di e gi foe frede en. A frede disi gron tapoe na koni di wi e kisi foe man si sani, nanga jepi foe wan studie foe Gado Wortoe. Ini Openbaring 15:3, 4, wi kan leisi na singi foe Moses èn foe na Pikin Skapoe: „Bigi èn moi srefisrefi den wroko foe joe de, Jehovah Gado, na Almaktiwan. Regtfardiki èn troe den pasi foe joe de, Kownoe foe têgo. Soema no sa frede joe troetroe, Jehovah èn gi joe nen glori, foe di joe wawan de loyaal?” Ini en loyaalfasi na den anbegiman foe en, Jehovah meki den skrifi „wan memre boekoe na fesi en, gi den sma di e frede Jehovah èn gi den sma di e prakseri en nen”. Den e kisi têgo libi leki pai.—Maleaki 3:16; Openbaring 20:12, 15.
Frede gi Gado e wini
4. Sortoe froeloesoe ini owroeten moesoe gi wi deki-ati foe frede Jehovah?
4 Di Israèl ben gowe libi Egipitikondre foe Farao, Moses ben sori krinkrin taki a ben frede Jehovah wawan. Heri esi, den Israèlsma ben fasi na mindri a Redi Se èn a makti sroedati legre foe Egipti. San den ben kan doe? „Moses ben taigi a pipel: ’No frede. Tanapoe fasti èn si a froeloesoe foe Jehovah, di en sa wroko tide gi oenoe. Bika, den Egipitisma di joe e si tide ete, joe no sa si moro, nôno, noiti moro. Jehovah srefi sa feti gi joe, en joe, joe sa tan pî.’” Na wan froewondroe fasi Jehovah ben prati den watra. Den Israèlsma ben hari pasa abra a drei gron foe na se. Dan den watra ben fadon kon baka. Na legre foe Farao ben pori. Jehovah ben kibri na nâsi dati di ben e frede Gado, ala di na a srefi ten a ben tjari kroetoe kon tapoe Egipti di ben wisiwasi Gado. Na so wan fasi toe, a sa sori en loyaalfasi foe di a e froeloesoe en Kotoigi, di e frede en, foe na grontapoe foe Satan.—Exodus 14:13, 14; Romesma 15:4.
5, 6. Sortoe sani di ben pasa ini a ten foe Josua e sori taki wi moesoe frede Jehovah moro leki libisma?
5 Baka na komoto foe Egipti, Moses ben seni 12 spion go na a Pramisi Kondre. Tin foe den ben frede srefisrefi, di den ben si den bigi langa sma di ben libi drape èn den ben proberi foe tapoe Israèl foe no go ini a kondre. Ma den toe trawan, Josua nanga Kaleb, ben froeteri den: „[A] de wan toemoesi boen kondre. Efoe Jehovah abi prisiri nanga oenoe, dan seiker a sa tjari oen go ini a kondre disi èn wi sa kisi en, wan kondre pe merki nanga oni e lon. Soso, no meki oproeroe nanga Jehovah; èn oenoe, oen no frede a pipel foe na kondre; bikasi den de brede gi wi. A skotoe di ben kibri den, wai komoto foe den èn Jehovah de nanga wi. No frede den.”—Numeri 14:7-9.
6 Ma, den Israèlsma dati ben fadon gi a frede foe libisma. Leki bakapisi, noiti den doro a pramisi kondre. Ma Josua nanga Kaleb, makandra nanga wan njoen lo foe Israèlsma, ben abi na grani foe go ini a boen kondre dati èn foe wroko den windroifidjari èn olijf-djari. Ini en lasti taki di a ben hori gi Israèlsma di ben kon na makandra, dan Josua ben gi na rai disi: „Frede Jehovah èn dini en sondro fowtoe èn ini waarheid.” Èn Josua ben taki morofara: „Ma foe na sei foe mi nanga mi osofamiri, wi sa dini Jehovah” (Josua 24:14, 15). Fa den wortoe disi e gi deki-ati na famiri-edeman èn ala trawan foe frede Jehovah, now di wi e sreka wisrefi foe go na ini a regtfardiki njoen grontapoe foe Gado!
7. Fa David ben poti krakti tapoe a prensparifasi foe frede Gado?
7 Na herder boi David, ben sori wan toemoesi boen frede gi Jehovah di a ben tjalansi Goliat ini a nen foe Gado (1 Samuèl 17:45, 47). Tapoe en dedebedi, David ben kan froeklari: „A ben de a jeje foe Jehovah di ben taki nanga jepi foe mi, èn en wortoe ben de na tapoe mi tongo. A Gado foe Israèl ben taki; nanga mi a Krepiston foe Israèl ben taki: ’Te a wan di e tiri tapoe libisma, de regtfardiki, e tiri ini a frede gi Gado, dan a de leki a mamanten leti, te son e skèin, wan mamanten sondro wolkoe’” (2 Samuèl 23:2-4). A frede disi gi Gado, so leki fa a sori, no de na mindri den tiriman foe grontapoe, èn fa dati abi sari bakapisi! O tra fasi a sa de te Jesus, „a Manpikin foe David”, sa tiri grontapoe ini a frede gi Jehovah!—Mateus 21:9.
Handri ini a frede gi Jehovah
8. Foe san ede a ben waka boen nanga Juda ondro a tiri foe Josafat, èn san dati e bodoi gi a ten disi?
8 So wan hondro jari baka di David dede, Josafat ben tron kownoe ini Juda. Djaso joe ben abi wan kownoe baka di ben dini ini a frede gi Jehovah. A ben meki a theokratis seti ini Juda kon boen baka, a ben poti kroetoeman ini a heri kondre, èn a ben gi den den bodoi disi: „Bika no gi wan libisma joe e kroetoe, ma gi Jehovah; èn en de nanga joe ini a afersi foe taki reti. We now, meki na frede gi Jehovah kon abra joe. Loekoe boen èn handri, bika na Jehovah, wi Gado, onregtfardikifasi, fasi foe teki sei, nanga a teki foe tjoekoe no de. . .Na so joe moesoe doe, ini a frede gi Jehovah, ini getrowfasi èn nanga heri joe ati” (2 Kroniki 19:6-9). Dati ede, a ben go boen nanga Juda di den ben frede Jehovah, neleki fa Gado pipel ini a ten disi e njan boen foe a dienst foe owroeman di abi sari-ati.
9, 10. Fa Josafat ben wini ini a frede gi Jehovah?
9 Ma, Juda ben abi feanti. Den disi ben bosroiti foe pori na nâsi foe Gado. Den moksi sroedati makti foe Ammon, Moab, èn foe a Bergi Se-ir, ben kon ini bosoe na a kontren foe Judea èn ben tapoe skreki gi Jerusalem. A ben de wan makti legre. Josafat ben drai go na Jehovah ini begi ’ala di ala sma foe Juda ben tanapoe bifo Jehovah, srefi den pikinwan, den wefi nanga den manpikin foe den.’ Dan, leki piki tapoe a begi dati, Jehovah en jeje ben kon tapoe a Lefiti, Jahasièl, di ben taki: „Disi na san Jehovah ben taigi oenoe: ’No frede, èn no beifi foe a bigi ipi sma disi ede; bika a no de wan feti foe oenoe, ma foe Gado. Saka go miti den tamara. . .Ini a kefal disi joe no abi foe feti. Teki oen presi èn si na froeloesoe foe Jehovah foe na boen foe oenoe. O Juda nanga Jerusalem, no frede èn no beifi. Hari go na den tamara, èn Jehovah sa de nanga oenoe.’” — 2 Kroniki 20:5-17.
10 Na tra dei, den man foe Juda ben wiki froekoe mamanten. Ala di den ben gi jesi foe go miti a feanti, dan Josafat ben opo tanapoe èn ben taki: „Arki mi, o Juda nanga joe, sma foe Jerusalem! Poti bribi ini Jehovah, joe Gado, so taki a kan sori taki joe sa tan libi langa. Poti bribi ini den profeiti foe en èn meki sma si taki joe abi boen bakapisi.” Den singiman ben singi makandra gi Jehovah, ala di den ben waka fesi den man di ben abi fetisani: „Prèise Jehovah, bika na lobi boen-atifasi foe en e tan te ten di no abi marki.” Jehovah ben sori a lobi boen-atifasi dati foe di a ben tjari so wan broeja na mindri den feanti dati den ben kiri makandra. Ne, di den man foe Juda ben doro a waktitoren na sabana, dan soso den dede skin foe den feanti ben tan abra.—2 Kroniki 20:20-24.
11. Fa den nâsi, ini a tori foe frede, e difrenti foe Gado pipel?
11 Di nâsi foe a birti drape ben jere foe a wondroe froeloesoe disi, „na beifi gi Gado” ben kon na den tapoe. Na a tra sei, a nâsi di ben handri ini a frede gi Jehovah, ben kon abi „rostoe lontoe den” now (2 Kroniki 20:29, 30). Na a srefi fasi, te Jehovah o tjari kroetoe kon tapoe den nâsi na Armagedon, den sa beifi gi Gado èn gi en Manpikin, Jesus Krestes, di sa tjari na kroetoe strafoe, èn den no sa man tan tanapoe na a bigi dei foe atibron foe Gado.—Openbaring 6:15-17.
12. Sortoe sma wi kan teki leki eksempel foe na sori di den ben sori frede gi Jehovah na wan getrowfasi?
12 Gesontoe frede gi Jehovah e tjari goedoe blesi kon. Noa „ben sori frede gi Gado èn ben bow wan ark gi na froeloesoe foe en osofamiri” (Hebrewsma 11:7). Èn so srefi foe den kresten foe na fosi jari hondro, den skrifi dati baka di den ben kisi froefolgoe, dan a gemeente ben abi „wan ten foe vrede, foe di den ben kon krakti na jejefasi, so srefi te a ben waka ini a frede gi Jehovah èn ini a switifasi foe a santa jeje a ben tan gro — neleki fa dati e feni presi now ini Owstoe Europa. — Tori foe den Apostel 9:31.
Lobi san boen, no wani si takroedoe na ai
13. Oten wawan wi kan ondrofeni a blesi foe Jehovah?
13 Jehovah boen dorodoro. Dati meki, „frede gi Jehovah wani taki foe no wani si takroedoe na ai” (Odo 8:13). Foe Jesus den ben skrifi: „Joe lobi regtfardikifasi èn gadolowsoefasi joe no ben wani si na ai. Dati meki Gado, joe Gado, salfoe joe nanga [na] oli foe prisiri pasa marki” (Hebrewsma 1:9). Efoe wi, neleki Jesus, e angri foe kisi na blesi foe Jehovah, wi no moesoe man si takroedoe na ai srefisrefi, so srefi hoeroedoe, ogridoe, èn a gridifasi foe Satan en heimemre grontapoe. (Teki gersi Odo 6:16-19.) Wi moesoe lobi san Jehovah lobi èn no moesoe si na ai san Jehovah no wani si na ai. Wi moesoe frede foe doe iniwan sani di no sa plisi Jehovah. „Ini a frede gi Jehovah wan sma e drai ensrefi poeroe foe takroedoe.”—Odo 16:6.
14. Fa Jesus e gi wi wan model?
14 Jesus ben libi wan model gi wi na baka so taki wi ben sa kan waka finifini ini en foetoestap. „Te den ben kosi en, a no ben kosi den baka. Te a ben njan hebi skin-ati, a no ben tapoe skreki gi den, ma a ben tan froetrow tapoe a wan di e kroetoe na wan regtfardikifasi” (1 Petrus 2:21-23). Ini a frede gi Jehovah, wi toe kan horidoro ondro den kosi, den spotoe nanga den froefolgoe di Satan grontapoe e lai na wi tapoe.
15. Foe san ede wi moesoe frede Jehovah moro leki den wan di kan kiri a skin?
15 Ini Mateus 10:28, Jesus e froemane: „No frede den di e kiri na skin ma no kan kiri na sili; ma frede moro foeroe den di kan pori sili nanga skin ini Gehèna.” Srefi efoe na feanti sa kiri wan sma di e frede Jehovah, den pen foe dede de foe wan momenti nomo (Hosea 13:14). Te a sma dati e kisi wan opobaka, a sa man taki: „Dede, pe joe fiktori de? Dede, pe joe maka de?”—1 Korentesma 15:55.
16. Fa Jesus ben sori frede èn gi glori na a nen foe Jehovah?
16 Jesus ensrefi e gi wan toemoesi boen eksempel na ala sma di lobi a regtfardikifasi foe Jehovah èn no wani si takroedoe na ai. A frede di a abi gi Jehovah de krin foe si ini den lasti wortoe di a taigi den disipel foe en, so leki fa wi e feni dati ini Johanes 16:33: „Den sani disi mi ben taigi oenoe, so taki nanga jepi foe mi oenoe sa abi vrede. Ini grontapoe joe e pina, ma abi deki-ati! mi wini grontapoe.” A tori foe Johanes e go doro: „Jesus ben taki den sani disi, èn ala di a ben opo en ai go na hemel, a ben taki: Mi Tata, a joeroe doro; gi glori na joe manpikin, so taki joe manpikin kan gi glori na joe. . . . Mi meki joe nen bekènti na poebliki, na den sma di joe ben gi mi foe na grontapoe.’”—Johanes 17:1-6.
Frede Jehovah èn prèise En
17. Na sortoe fasi wi kan waka baka na eksempel foe Jesus?
17 Wi kan waka ,ini a ten disi, na baka Jesus eksempel di e kotoigi foe deki-ati? Seiker wi kan doe dati akroederi a frede gi Jehovah! Jesus ben meki a barinen nanga den eigifasi foe Jehovah bekènti na wi. Foe di wi e frede Jehovah leki wi Soeverein Masra, wi e hei en srefisrefi pasa ala tra gado, nanga so srefi a mistik Driwànfasigado foe krestenhèit di no abi nen. Jesus ben dini Jehovah nanga wan gesontoe frede, ben weigri foe fadon ini a trapoe foe frede libisma di kan dede. „Ini den dei di Krestes ben de na skinfasi, dan nanga tranga babari èn watra-ai a ben seni begi nanga so srefi tranga begi na a Sma di ben kan froeloesoe en foe dede, èn Gado ben jere en foe na frede di a ben abi gi Gado.” Meki wi toe, neleki Jesus, frede Jehovah te wi e go doro foe leri foe gi jesi na den sani di wi e ondrofeni — ala ten nanga têgo froeloesoe leki wi marki. — Hebrewsma 5:7-9.
18. Fa wi kan doe santa dienst gi Gado nanga frede gi en?
18 Moro fara ini a brifi dati gi den Hebrew Kresten, Paulus e gi den salfoe kresten deki-ati: „Meki wi. . . ,foe di wi sa kisi wan kownoekondre di no man seki, tan abi no-froedini boenfasi, nanga jepi foe san wi kan doe santa diniwroko gi Gado na wan fasi di en feni boen, nanga frede èn respeki gi en.” Now, a „bigi ipi” abi prati na a santa dienst dati. Èn san dati wani taki? Baka di a ben taki foe a no-froedini boenfasi foe Jehovah foe a gi di dati ben gi na ofrandi foe en Manpikin, Jesus Krestes, Paulus e taki: „Meki wi nanga jepi foe en, tjari Gado ala ten wan srakti-ofrandi foe prèise, dati wani taki, na froktoe foe na mofoboeba di e meki en nen bekènti na poebliki” (Hebrewsma 12:28; 13:12, 15). Efoe wi e warderi Jehovah en no-froedini boenfasi, wi moesoe wani foe gi ibri joeroe di wi man gi na a santa dienst foe en. Leki loyaal kompe foe a fikapisi foe salfoe kresten, a bigi ipi e doe na moro bigi pisi foe a dienst disi ini a ten disi. Den disi e taki Gado èn Krestes tangi foe a froeloesoe foe den, ala di den e tanapoe na wan agersi fasi bifo a kownoestoeroe foe Gado, ’e doe santa diniwroko gi en dei nanga neti’. — Openbaring 7:9, 10, 15.
Gi Jehovah glori foe têgo
19, 20. San na den toe sortoe frede di sa de foe si na a „dei foe Jehovah”?
19 A glori dei foe na regtfardiki foe Jehovah, e kon krosibei esi-esi! „’Loekoe! a dei e kon di e bron leki wan onfoe, èn ala den sma di abi prefoeroe èn ala den wan di e doe gadolowsoe sani moesoe tron leki na saksi foe den roetoe. Èn a dei di e kon, sa pori den foe troe,’ Jehovah foe den legre taki.” A ten dati di o de wan rampoe, na „a bigi dei foe Jehovah di e gi frede (Maleaki 4:1, 5). A sa poti wan „siki frede” ini den ati foe den gadolowsoewan, èn den „no sa man lon komoto kwetikweti”. — Jeremia 8:15; 1 Tesalonikasma 5:3.
20 Ma, wan tra sortoe frede abi krakti tapoe Jehovah en pipel. Na engel di ben abi a „têgo boen njoensoe” ben kari den nanga wan tranga sten, e taki: „Frede Gado èn gi en glori, bika na kroetoe foe na dei foe en doro” (Openbaring 14:6, 7). Nanga respeki wi sa tanapoe froewondroe foe na kroetoe dati, te na hebi faja foe Har–Magedon o bron a grontapoe foe Satan tron asisi. Den sa skrifi gesontoe frede gi Jehovah tapoe wi ati sondro foe wan sma sa man figi dati poeroe. Meki a de so dan taki wi kisi a grani foe de na mindri den wan ’di feni kibri èn di ben kari na nen foe Jehovah’!—Joèl 2:31, 32; Romesma 10:13.
21. Sortoe blesi, frede gi Jehovah sa tjari gi wi?
21 Toemoesi boen blesi sa kon baka dati, so srefi „jari foe libi” di e go doro te na têgo ten! (Odo 9:11; Psalm 37:9-11, 29) Dati meki, awinsi wi abi na howpoe foe erf a kownoekondre noso foe doe dienst ini en na grontapoe, meki wi tan go doro now foe doe santa dienst gi Gado nanga frede èn respeki gi en. Meki wi tan go doro foe gi en santa nen glori. Èn nanga sortoe blesi bakapisi? A grantangi firi foe têgo, dati wi ben teki na koni rai na ati foe frede Jehovah ala ten!
Fa joe ben sa piki?
◻ San den wani taki nanga „a frede gi Jehovah”?
◻ Fa frede gi Gado ben abi boen bakapisi gi en pipel na owroeten?
◻ Sortoe model foe frede Gado, Jesus ben libi na baka gi wi?
◻ Fa wi kan kibri wi soifri retifasi akroederi a frede gi Jehovah?
[Prenki na tapoe bladzijde 16]
Ini na boekoe Openbaring, den brada foe Jesus de foe si ala di den e singi „a singi foe Moses,” wan singi di e prèise Jehovah
[Prenki na tapoe bladzijde 18]
Josafat en legre e wini foe na frede di den ben frede Jehovah
[Prenki na tapoe bladzijde 21]
Jari foe libi di e langa go ini soso têgo ten, sa de na pai foe den wan di e frede Jehovah