’Wi sabi taki den sa opo baka na ini na opobaka’

NA ALMAKTI GADO ben gi a libisma famiri libi. A kan gi a libi baka tu na den sma di dede. A gi wi so srefi tu na moro bun buku fu sabi sani fu libi nanga dede di yu kan bow a tapu: Den Hebrew nanga kresten Griki Buku, di makandra de na beybri. Na buku disi abi na boskopu di gron na tapu tru tori, taki moro furu fu den dedewan kan èn sa dray kon baka na libi. — Yohanes 5:28, 29.

Luku leki wan eksenpre pikinso na historiya tori fu Lasarus fu Betaniya, di ben de wan bun sabiman fu Yeyses Krestes. Lasarus ben kon siki, èn dan ben dede. Baka dati Yeyses ben taygi Lasarus sisa Marta: „ Yu [dede] brada sa opo baka.” Marta ben piki: „Mi sabi taki a sa opo baka na ini a opobaka na a kriboy dey” (Yohanes 11:23, 24). Iya, a ben sabi dati. Tapu a gron fu tori di ben de tru a no ben tweyfri taki en lobi brada Lasarus ben sa dray kon baka „na a kriboy dey”.

Te yu e leysi na historiya tori na ini Yohanes kapitri 11, dan yu sa feni finifini pisi fu san ben psa baka dati. Yeyses ben wiki Lasarus agen kon na libl, aladi a man ben dede fo dey kba. Na opobaka dati na wan buweysi taki Gado kan meki en pramisi fu tyari den dedewan kon baka a libi „na a kriboy dey” kon tru. Ma pe Marta ben fruwakti fu si Lasarus baka? Leki fa tra kotrow dyu ben e bribi dan pe na opobaka di ben o kon ben sa feni presi?

’Wan kondre de pe yu no kan dray kon baka?’

Gado ben teki grontapu leki na natuurlijk libipe gi libisma. Na psalmsingiman e tyari disi kon a fesi nanga den wortu disi: „Fu taki fu heymel, na heymel na fu Yehovah, ma grontapu a ben gi na den libismapikin” (Psalm 115:16) Noti na ini den Santa Buku e sori a tapu taki efu Adam nanga Eva ben tan kotrow na Gado, den ben sa libi fu têgo na wan tra presi leki grontapu. Awinsi fa a no fa, na bon fu libi no ben de dya na grontapu na ini na paradeysi pe na fosi libisma-paar ben abi prisiri na ini bifo den ben trangayesi Gado? (Genesis 2:9; 3:22) Den kotrow futuboy fu Gado na dorosey fu na dyari fu Eden (bigin nanga na manpikin fu Adam Abel di ben frede Gado), nanga logika fasi ben sa tyari wan opobaka kon ini akruderi nanga na wán enkri libipe gi libisma di den ben sabi — na grontapu, fu di no wan sani ben de bekènti fu Gado pe a tra sey fu na tori ben kon na krin.

’Iya, ma wakti pikinso’, son sma ben sa taki, di sabi a beybri, ’Yob na ini kapitri 16 vers 22, no ben taki taki a ben sa „gwe” „psa na pasi pe a no ben sa dray kon baka”? Èn na ini Yob 7:9 a ben poti krakti na tapu: „A sma di e saka go na ini Sjeool, no sa komoto fu drape.” Na ini vers 10 Yob ben taki moro fara: „A no sa dray go moro na en oso, èn en presi no sa erken en moro.”’

Den vers disi nanga den sortu wortu disi no e sori dan taki Yob ben si dede leki ’wan kondre pe yu no kan dray kon baka’, so leki son sabiman e taki? Den sortu wortu disi wani taki taki Yob no ben e bribi na ini wan opobaka na ini a ten di kon? Fu kisi a piki tapu disi dan wi musu luku den wortu disi na ini na leti fu na kontekst èn teki den gersi tu nanga tra prakseri di Yob ben taki fu a tori disi.

Yob no ben sabi fu san-ede a ben nyan pina. Wan heri pisiten a ben prakseri no nanga leti taki Gado ben de frantiwortu fu na pina fu en (Yob 6:4; 7:17-20; 16:11-13). Nanga sari a ben prakseri taki na grebi ben de na wan enkri presi pe a ben kan feni wantron wantron frulekti (Yob 7:21; 17:1; teki gersi 3:11-13). Drape den no ben sa si en, te yu sa luku en nanga na ay fu den sma di ben libi na ini a ten fu en, a no ben sa dray go baka na en oso, sma no ben sa erkèn en moro, no ben sa dray kon baka èn no ben sa abi no wan enkri fruwakti a tapu dati bifo na faste ten fu Gado. Fu di den ben libi en na en srefi èn sondro fu Gado kon a mindri, dan Yob nanga ala tra bakapikin fu Adam no ben man fu opo komoto fu dede.a — Yob 7:9, 10; 10:21; 14:12.

Bribi na ini na opobaka

Wi no musu denki taki Yob no ben bribi na ini wan opobaka te wi prakseri na onseykerfasi san a ben ondrofeni èn fu en bita wortu fu en wantewante tamara. Taki a ben bribi toku na ini wan opobaka ini a ten di e kon e kon krin na fesi na ini Yob 14:13-15. Na ini na pisi dati Yob ben taki fu en winsi fu kisi ’kibri na ini Sjeool’ èn a ben fruteri taki Gado bakaten ’ben sa denki na en’. Boyti fu dati a man disi fu bribi nanga soyfri retifasi ben taki na ini Yob 19:25-27 taki a ben abi wan „frulusuman” èn bakaten ’ben sa si Gado’. Iya, Yob ben bribi na ini wan opobaka. A ben bribi taki Gado ben kan èn ben sa tyari en kon baka na libi, neleki Abraham a fesi fu disi ben abi na overtoygi taki Gado ’ben kan opo den dedewan’ — Hebrew sma 11:10, 16, 19, 35.

Den dyu ben bribi te na a dey fu tide na ini wan opobaka fu na ten di e kon fu libi na grontapu. Na Encyclopaedia Judaica (1971) e taki: „Na bribi taki den dedewan te fu kba sa tyari kon baka na libi na ini den eygi skin èn sa libi baka na grontapu”, de „wan fu den moro prenpari leri” fu na dyu bribi. Na encyclopedie e go moro fara: „Sma e teki na denki disi so seryusu nanga letterlijk taki vroom dyu e broko den ede nofotron ini sortu krosi den sa beri den, ofu den sa beri den krinkrin nanga ala den pisi fu den skin èn efu den sa beri den na ini Israèl.”

Na wan moy sani fu si taki a beybri no e taki taki Gado ini na opobaka sa tyari den pisi kon makandra fu na libisma skin fu wan dede sma di pori gwe. Te yu luku en bun dan den atoom fu a sma di dede langaten kba fu sensi a ten dati panya go na a heri grontapu èn nofotron ben tron bakaten wan pisi fu a libi fu bon nanga meti — iya, srefi fu tra libisma, di so srefi tu ben dede baka. A de krin taki na ini na opobaka a no den srefi atoom kan kobroyki gi moro leki wán sma di e wiki kon baka. Na presi fu dati Gado sa tyari sma kon baka na libi èn gi den wan skin di fiti èn di en e feni bun, di na ini ala den pisi fu en sa de bun dorodoro èn di no sa sori den mankeri di a sma fosi a ben dede ben abi fu du nanga en. — Teki gersi nanga 1 Korente sma 15:35-38.

Den mati nanga famiriman di sa tyari kon baka tu a libi sa herkèn den sma disi di sa opobaka? Dati gersi wan logika sani, bika efu wi no kan sabi den dedewan di sa wiki opo èn den no sa sabi wi, fa wi ben sa sabi dan efu wi dede lobiwan trutru ben dray kon baka? Awinsi na skin fu Lasarus ben de kba ini wan fasi fu pori, toku famiriman nanga sabiman ben herkèn en baka di Yeyses ben opo en baka. Na so tu kan fruwakti taki Yehovah Gado na wan lobifasi sa sorgu taki wi sa si èn herkèn makandra na ini na opobaka fu kisi libi na grontapu.

Wan heymel howpu gi wan pikin nomru

So leki wi ben si, dan grontapu de na oso di Gado gi libisma. Toku Yeyses Krestes ben tyari a fruwakti kon na krin taki wan nomru di den ben piki puru fu a libisma sa wiki opo go kisi yeye libi sondro fu pori èn sondro fu dede moro makandra nanga en na ini heymel (2 Timoteyus 1:10). Bakadi Yeyses ben opo na „nyun libipasi fu go ini heymel libi, dan wan heri pisiten ala kresten ben kisi na kari fu teki prati na ini na howpu dati (Hebrew sma 9:24; 10:19, 20). Omeni sma te fu kba ben sa kisi na payman dati? Na ’openbaring, di skrifi nanga krakti fu Gado yeye, èn di Gado ben gi Yeyses, fu sori en srafu den sani di musu psa’, e poti na nomru fu den sma „di bay puru fu na grontapu”, tapu 144.000. — Openbaring 1:1; 7:4-8; 14:1, 3,

Fu san-ede so wan pikin nomru fu sma ’di ben bay puru fu na grontapu’ fu kisi libi na ini heymel? Na srefi buku Openbaring e fruteri wi na reyde fu na skotu nomru. Wi e leysi na ini kapitri 20, vers 5 nanga 6: „Disi na a fosi opobaka. Koloku èn santa ibriwan sma de di abi prati na a fosi opobaka; tapu dan disi na di fu tu dede no abi makti, ma den sa de pristri fu Gado èn fu Krestes, dusun yari nanga en leki kownu.” — Luku so srefi tu Openbaring 5:9, 10.

Grontapu onderdaan fu na kownu

A de krin taki a no ala sma sa tiri leki kownu nanga pristri, bika efu den alamala ben de kownu, tapu suma den ben sa musu ’tiri’ dan? Na presi fu dati dan na spesrutu grupu disi di ben piki puru, èn di bow lontu den kotrow apostru fu Yeyses, sa tiri tapu wan grontapu di fu wan pisi ten abi „na bigi ipi” sma a tapu di Openbaring kapitri 7 vers 9 nanga 17 e taki fu den. Milyun milyun sma fu na ipi dati e luku now nanga furu fruwakti go na a ’feti di e kon krosibey fu na bigi dey fu Gado na Almaktiwan’, so taki na grontapu sa kon krin fu ala onregtfardikifasi. Nanga a no-frudini bunfasi fu Gado wi sa psa libilibi na bigi banawtu dati sondro fu abi fu dede wanten. — Openbaring 16:14; 21:14; Odo 2:21, 22.

’Ma fa a de nanga den sma di dede, so leki mi lobiwan?’ yu e aksi kande. Yeyses srefi ben fruteri Marta taki tra sma, ’awinsi den dede, sa kon baka na libi’ (Yohanes 11:25). Dati sa de na ini wan opobaka na grontapu. Na a ten fu na tiri fu Krestes nanga en 144.000 konpe kownu nanga pristri na ini heymel, dan furu milyun milyun dedewan di Gado e memre na wan bun fasi sa wiki opo èn sa kisi na okasi krinkrin fu leri sabi na tru anbegi fu Yehovah. Efu den de kotrow, den sa kisi na payman fu têgo libi tapu wan paradeysi grontapu. Ala disi sa feni presi na a ten fu na „kriboy dey” di Marta ben taki fu en di a ben agri nanga Yeyses taki en brada Lasarus ben sa opo baka kon a libi. — Yohanes 5:28, 29; 11:24; Lukas 23:43.

Wan dyaranti howpu

Den eksenpre na ini beybri fu sma di ben wiki opo, de eksenpre nanga dyaranti taki na opobaka howpu di a beybri e gi abi bun gron. A tori disi e fruteri fu sma di den profeyti Eliya nanga Elisa ben wiki opo na ini ten bifo Krestes, sma di na Manpikin fu Gado (Lasarus fu eksenpre), den apostru Petrus nanga Paulus, èn spesrutu Yehovah Gado di ben wiki en Manpikin. Yu kan leysi den tori disi na ini yu beybri: 1 Kownu 17:17-24; 2 Kownu 4:32-37; Mateyus 28:1-10; Lukas 7:11-17; 8:40-56; Yohanes 11:38-44; Tori fu den apostel 9:36-42; 10:38-42; 20:7-12.b

Tapu a gron fu so wan opobaka howpu di abi krakti buweysi Paulus ben kan dyaranti den Athene sma: „Gado ben poti wan dey di a abi na prakseri fu krutu na ini regtfardikifasi na grontapu pe libisma e libi nanga yepi fu wan man di a poti, èn a gi ala libisma wan dyaranti fu di a ben wiki en opo fu dede.” — Tori fu den apostel 17:30, 31.

Iya, na opobaka fu Yeyses na a moro prenspari dyaranti taki na opobaka howpu na wan trutru sani. Wi abi fu dati-ede wan bun fondamenti tu fu frutrow sondro fu poti wan kondisi na tapu na makti nanga lobi fu Yehovah Gado. Wi kan taki nanga netso furu overtoygi leki Marta: ’Wi sabi taki den dedewan sa opo baka na ini na opobaka na a kriboy dey!’

Bakadi den arkiman fu Paulus tapu na Marsbergi ben yere en kotoygi fu wan „opobaka fu den dedewan”, dan den ben panya na ini dri grupu: „Sonwan [ben go] spotu, aladi trawan ben taki: ’Wi sa yere fu disi fu yu wan tra tron ete.’ Ma son man ben kon moksi na en èn ben tron bribiman.” — Tori fu den apostel 17:32-34.

Fa yu e teki na opobaka howpu? Yehovah sa hori en srefi na en pramisi fu wiki milyun milyun, iya, milyard milyard sma puru fu dede. Efu yu sa de drape fu si den baka èn taki den si yu, e anga moro furu fu san yu e du. Yu de klari fu sabi moro fu den weti fu Gado fu kisi têgo libi èn fu handri ini akruderi nanga dati? Yehovah Kotoygi sa yepi yu nanga ala prisiri fu kon sabi moro fu den sani disi fu na howpu fu den dedewan èn fa yu kan psa na kba fu na seti fu sani disi libilibi. — Yohanes 17:3.

[Futuwortu]