Na suma yu e go fu kisi ray?

YU KISI wan dey falsi moni fu wan sma? Kande disi no ben de so, ma fa yu ben sa du efu wan sma ben fruteri yu taki falsi moni de a waka? Yu ben sa kisi atibron fu dati? Kweti kweti! Yu ben sa de moro furu grantangi taki wan sma ben sori yu a tapu disi èn yu ben sa luku bun taki yu no ben sa kisi fu yu tru tru moni di yu wroko tranga fu en falsi moni na ini na presi fu dati.

Furu fu wi e kisi ten na ten ray ofu warskow. A de tru taki son warskow de moro bun leki trawan. Ma awinsi wi no e si na waarde fu na wan ofu tra ray gi wi srefi, dan disi de wan reyde fu kisi atibron?

A de now wan tru tori taki ibriwan sma abi ten na ten yepi nanga ray fanowdu. No wan sma sabi ala piki. Nanga na ekonomiya nanga politik onseykerfasi di lontu wi meki ibriwan sma abi wan bun howpu fanowdu gi na ten di e kon. Na ini wan grontapu pe pikinmoro afu fu den trowlibi e kon na wan kba na ini wan brokotrow, pe tini di e kisi bere de a tori fu na dey èn pe siki di sma e kisi fu sekslibi de wan algemeen sani, dan wan tranga fanowdu de fu kisi praktis tiri di de nanga na gosontu frustan. Ppa nanga mma abi yepi fanowdu fu kon si fa den kan kweki den pikin moro bun na ini na bruya seti fu sani disi. Tini abi yepi fanowdu fu komoto ini den firi fu den di de kontrari den srefi èn fu kakafutu gi furu sortu fu druk di kan gersi taki den e basi den. Ibriwan sma abi yepi fanowdu fu suku moreel waarde di de praktis na ini wan grontapu pe bidrigifasi, hurulibi nanga bigi ogridu moro nanga moro e de sani di sma e feni bun.

Pe wi kan feni na yepi disi? Na moro bun fonten fu ray fu na fasi fa fu libi na a beybri, na Wortu fu Gado di skrifi ondro krakti fu santa yeye. Na psalm singiman fu owruten ben skrifi: „Yu wortu na wan lanpu gi mi futu, èn wan leti tapu mi pasi” (Psalm 119:105). Den sma di e leysi èn e poti na ini den libi na Wortu fu Gado e tan farawe fu moro furu fu den trapu di de na ini a ten disi. Disi de wán reyde fu san-ede Yehovah Kotoygi ibri yari e gi hondro hondro milyun milyun fu fisiti tra sma èn fu taki nanga den fu na beybri. Toku furu sma no e arki den èn son sma ati e bron srefi nanga a preyki fu den. Fu san-ede disi de so?

Wan yeyefasi di tapu en srefi — Fu san-ede?

We, furu sma e firi san tumusi esi ini na tori fu na teki fu ray, spesrutu tapu na kontren fu fasi fu anbegi. Srefi den memre fu kerki no wani arki ala ten na a ray fu den leriman fu den. Wan Ingrisi leriman ben kragi: „Ibrisma abi en eygi denki, èn den e feni disi netso bun leki di fu na leriman.” A no de fu dati-ede wan fruwondru sani taki sma no wani arki na wan freymde sma di kon na den.

Èn ala di wi e libi na ini wan ten pe ala ten sma e dege dege fu bribi na ini sani, toku furu sma abi te now ete krakti banti nanga firi nanga den kerki fu den. So leki na ini wan encyclopedie-buku ben tyari kon na fesi, „fasi fu bribi e seki den moro dipi firi fu bun furu sma”. Den sortu sma disi kande no sa si na fanowdu fu taki fu na beybri nanga wan sma fu wan tra bribi, awinsi a takimakandra abi fu du nanga wan lusu fu den problema fu den.

Trawan no wani taki fu na beybri fu di den e si someni hoygrifasi nanga bidrigifasi na ini fasi fu anbegi. Den ati e bron taki son kerki fesiman e taki bun fu hurudu, ofu den e tegu fu na sondro syen bigi-ayfasi fu furu telefisi evangelium-preykiman. Kande den e dray baka gi fasi fu anbegi efu wan kerki fesiman e kobroyki en makti fu teki partèy ini wan politik strey. Fasi fu anbegi gersi na ini na ay fu den taki a e tyari moro problema kon leki fu lusu den.

Den problema di den sortu sma disi e kragi fu den de wan tru tru sani. Tapu a kontren fu kerki yu kan taki taki furu „falsi moni” de a waka. Ma seyker, fu weygri fu teki warti yepi fu na beybri fu na reyde disi de netso onlogis fu weygri tru tru moni fu di falsi papira moni de a waka.

Èn so leki wi ben taki kba, wi alamala abi ray fanowdu na ini a grontapu disi di furu nanga muylek bosroyti pe wi musu teki a mindri èn kofarlek situwâsi. Wan fasi de fu kisi yoysti tiri tapu a kontren fu teki ray? A de wan sani di no de fanowdu ofu srefi fowtu fu taki fu na beybri nanga wan sma fu wan tra bribi? A kan taki wi opo wi frustan nofo fu teki bun ray èn toku no meki falsi ray kori wi? San na beybri abi fu taki fu dati?