Gi yesi na den di e teki fesi
„Gi yesi na den di e teki fesi a mindri unu èn saka un srefi, bika den e hori ay tapu unu sili leki sma di musu gi frantiwortu.” — HEBREW SMA 13:17.
1. Fa wi e nyanbun fu na wroko fu kresten opziener?
YEHOVAH sorgu taki opziener de na ini en organisâsi ini ’na ten disi fu na kba’ (Danièl 12:4), Den e teki fesi na ini na sorgu fu den memre fu en di yu kan teki gersi nanga skapu, èn na hori di den e hori ay tapu sani de leki kowru-ati (Yesaya 32:1, 2) Boyti fu dati, na lobi fasi fu hori ay tapu sani fu na sey fu owruman di e handri na ipi fu Gado nanga safufasi, de wan kibri kontrari Satan nanga na gadolowsu seti fu sani disi. — Tori fu den apostru 20:28-30; 1 Petrus 5:8; 1 Yohanes 5:19.
2. Fa son sma ben si na apostru Paulus, ma sortu fasi fiti taki wi abi gi den owruman?
2 Ma fa yu e si den owruman? Yu e taki na ini yu ati: ’Mi no e go noyti moro na wan otiruman na ini na gemeente disi te mi abi wan problema, bika mi no abi frutrow ini no wan fu den’? Efu yu e luku a tori so, dan kande yu e poti krakti tumusi furu tapu den onvolmaaktifasi fu den? Na ini na owru Korente son sma ben taki fu na apostru Paulus: „En brifi de prenspari nanga krakti, ma en denoya leki wan sma di swaki èn a taki fu en wan wisiwasi sani.” Toku Gado ben gi Paulus wan diniwroko fu du èn a ben kobroyki en leki „wan apostru fu den nâsi” (2 Korente sma 13:10; Romen 11:13; 1 Timoteyus 1:12). Wi e howpu dan taki yu firi de moro ini akruderi nanga di fu na sisa di ben taki: „Wi abi na moro bun skin fu owruman ini grontapu. Den ben de leti drape fu yepi te disi ben de fanowdu.”
Fu san-ede yu musu gi yesi na den?
3. Fa wi musu si kresten ondrohèrder, efu wi wani taki Masra musu de nanga a yeye di wi e sori?
3 Fu di na Gran Hèrder, Yehovah Gado gi ondrohèrder, fa yu denki a e wani unu si den? Gado e fruwakti seyker taki wi waka na baka na a tiri di abi en gron tapu a beybri èn di wi e kisi nanga a yepi fu lobi opziener ondro na ay fu na Tiri Skin fu Yehovah Kotoygi. Dan ’Masra sa de nanga na yeye di wi e sori’, èn wi sa nyanbun fu vrede èn wi sa kon tranga na yeyefasi. — 2 Timoteyus 4:22; teki gersi nanga Tori fu den Apostru 9:31; 15:23-32.
4. Fa wi srefi kan poti Hebrew sma 13:7 na ini wi libi?
4 Paulus ben gi tranga: „Hori den na ini prakseri di e teki fesi na mindri unu, di taki a wortu fu Gado gi unu, èn waka baka na bribi fu den, aladi yu e hori ay tapu fa na waka nanga libi fu den o kon de” (Hebrew sma 13:7). A mindri den fositen kresten a ben de na fosi presi den apostru di ben teki fesi. Ini na ten disi wi kan si den sma di de fu na Tiri Skin fu Yehovah Kotoygi, tra salfu opziener nanga man fu na „bigi ipi” di e teki fesi a mindri wi (Openbaring 7:9). Aladi wi no e kisi tranga fu suku fu abi na sten, fu na postiri nanga tra libisma fasi fu den, toku wi musu man fu meki na waka nanga libi fu den waka bun fu di wi e waka baka na bribi fu den.
5. Suma na ini na ten disi na grontapu kisi na moro prenpari frantiwortu fu sorgu gi na kresten gemeente èn san den warti fu kisi?
5 Ini na ten disi na moro prenspari frantiwortu a grontapu fu na sorgu fu wi yeye fanowdu gi na „a kotrow èn koni srafu”. Na Tiri Skin di e teki presi gi na „srafu” disi e teki fesi èn e tyari na Kownukondre preykiwroko na a heri grontapu kon na wan (Mateyus 24:14, 45-47). Spesrutu den owruman disi di kisi salfu nanga santa yeye wi kan si den leki yeye tiriman, bika Hebrew sma 13:7 kan poti abra nanga: „Hori den na ini prakseri di e tiri unu” (Kingdom Interlinear). Nanga moro leki 57.000 gemeente èn moro leki 3.500.000 kownukondre preykiman dan den 12 owruman di na Tiri Skin e teri, ’abi furu fu du na ini na wroko fu Masra’ (1 Korente sma 15:58). Te yu luku na wroko di den kisi fu Gado, dan den de warti fu wi wroko makandra dorodoro nanga den netso leki fa den fosi kresten ben wroko makandra nanga na fosi yarihondro Tiri Skin. — Tori fu den apostru 15:1, 2.
6. San na wan tu sani di owruman e du fu na bun fu Yehovah pipri?
6 Na santa yeye poti opziener fu sorgu gi den yeye fanowdu fu na gemeente (Tori fu den apostru 20:28). Den e sorgu taki na Konnukondre boskopu e preyki na ini kontren fu na gemeente pe wi de. Den man disi di miti den marki fu na beybri e sori so srefi tu na pasi na yeye sey na wan lobi fasi. Den e frumane, e gi deki-ati èn e gi kotoygi na den yeye brada nanga sisa fu den, so taki den disi kan go doro fu waka tapu wan fasi di warti Gado (1 Tesalonika 2:7, 8, 11, 12). Srefi te wan sma meki wan fout bifo a kisi ensrefi, dan den man disi e pruberi fu tyari en kon baka „na ini wan yeye fu safri-atifasi”. —Galasiya sma 6:1.
7. Sortu ray Paulus ben gi ini Hebrew sma 13:17?
7 Wi ati e pusu wi fu wroko makandra nanga den sortu opziener disi di e sori lobi. Disi fiti, so leki Paulus ben skrifi: „Gi yesi na den di e teki fesi na mindri unu èn saka un srefi, bika den e hori ay tapu unu sili leki sma di sa musu gi frantiwortu; taki den sa mag du disi nanga prisiri èn no nanga geme, bika disi ben sa du unu ogri” (Hebrew sma 13:17). Fa wi musu frustan na ray disi?
8, 9. (a) Fu san-ede, leki fa Hebrew sma 13:17 taki, wi musu gi yesi na den di e teki fesi? (b) Sortu bun bakapisi na gi yesi fu wi èn a saka di wi e saka wi srefi kan abi?
8 Paulus e gi wi tranga fu wi gi yesi na den sma di e tiri wi na yeye fasi. Wi musu ’saka un srefi’, fiti un srefi na den ondrohèrder disi. Fu san-ede? Fu di ’den e hori ay tapu wi sili, ofu libi di wi gi abra na Gado. Èn fa den e „hori ay a tapu”? Na vorm di kobroyki dya (indicativus fu na praesens activum) fu na Griki werkwortu a.gru’pne.o wani taki trutru taki den owruman „e tan farawe fu sribi”. Disi e meki wi denki na a hèrder di de en wwan èn no e sribi fu kan kibri na ipi fu en gi den kofar fu na meti. Owruman sontron neti langa e de sondro sribi na ini begi fu na broko di den e broko ede nanga na ipi ofu e gi yepi na yeyefasi na konpe bribiman. O fa wi musu warderi na kotrow wroko fu den srefi srefi! Seyker wi no wani de leki den „gadolowsu sma” fu den dey fu Yudas di ’ben wisiwasi makti èn ben e skenpi gloriwan’, salfu kresten owruman di Gado ben gi glori ofu grani. — Yudas 3, 4, 8.
9 A no ben sa plisi Yehovah efu wi ben misi fu gi yesi èn saka wi srefi na ondro kresten owruman. Disi ben sa sori taki a de wan hebi gi den èn ben sa du wi ogri na yeye fasi. Efu wi no e wroko makandra nanga den owruman, dan kande nanga geme den ben sa sorgu ofu du den wroko, kande na ini wan spirit fu lasi-ati di ben sa kan tyari wan lasi fu prisiri kon na ini wi kresten aktiviteit. Ma na gi di wi e gi yesi èn a saka di wi e saka wi srefi na den ondro e meki wan waka nanga libi ini na dini fu Gado go a fesi èn a e tranga wi bribi. ’Masra de nanga na yeye di wi e sori’, èn prisiri e gro ini so wan klimaat fu wroko makandra, vrede nanga wanfasi. — 2 Timoteyus 4:22; Psalm 133:1.
10. Leki fa 1 Timoteyus 5:17 e taki, dan fu san-ede den sma di e teki fesi tapu wan tumusi moy fasi warti fu kisi grani?
10 Taki wi e gi yesi èn e saka wi srefi na ondro gemeente owruman no wani taki, taki wi de fu prisiri sma. Dati no ben sa de akruderi na Beybri, bika den ben taygi kresten srafu ini a fosi yarihondro fu gi yesi na den meystri fu den, „no nanga du fu sma ay si, leki sma di e prisiri sma, ma nanga opregti fasi fu ati, nanga frede gi Yehovah” (Kolose sma 3:22; Efeyse sma 6:5, 6). Opziener di na tapu wan ’tumusi moy fasi e teki fesi èn e wroko tranga na ini taki nanga gi leri’, spesrutu warti fu kisi grani fu di a leri fu den abi a wortu fu Gado leki fondamenti. Paulus ben skrifi: „Den owruman di tapu wan tumusi moy fasi e teki fesi, de warti fu kisi dobru grani, spesrutu den wan di e wroko tranga ini taki èn ini a gi fu leri. Bika na tekst e taki: ’Yu no musu banti na mofo fu wan burukaw te a e masi karu’ èn ’Na wrokoman warti en payman.’” — 1 Timoteyus 5:17, 18.
11. Fa wan owruman kan kisi „dobru grani”, ma san a musu tan farewe fu en?
11 Den wortu fu Paulus di teki poti dya e meki wi si taki nanga reti yepi kan gi na skinfasi na den sma di e sorgu fu den yeye belang fu trawan. Ma disi no wani taki taki owruman musu kisi wan moni, èn ’dobru grani’ seyker no wani taki san wan owruman e aksi fu kisi. Disi musu kon fu en srefi fu den memre fu na gemeente, ma a owruman no musu kobroyki en wroko di a kisi noyti fu kisi makti ofu gudu na skinfasi. A no musu suku en eygi grani ofu moro furu suku fu de nanga den moro guduwan fu kon moro bun fu dati na skinfasi, aladi a e libi trawan na wan sey (Odo 25:27; 29:23; Yudas 16.) Na presi fu dati, wan owruman musu wey na ipi fu Gado ’klariklari, no nanga lobi fu oneerlijk wini, ma nanga faya’. — 1 Petrus 5:2.
12. Sortu sani sa yepi wi fu gi yesi na den di e teki fesi a mindri wi?
12 A sa yepi wi fu gi yesi èn gi grani na den di e teki fesi efu wi e prakseri taki Gado srefi ben sorgu taki den owruman de (Efeysiya sma 4:7-13). Fu di na santa yeye ben poti den man disi na wroko èn Gado organisâsi e teki wan tumusi prenspari presi na ini na libi fu Yehovah Kotoygi, meki seyker wi sa de nanga tangi èn wani sori respeki gi teyokrasiya seti. Boyti fu dati, wi kan yepi nyunwan fu kweki na yeyefasi disi te wi e gi wan tumusi moy eksenpre na ini a gi di wi e gi yesi èn a saka di wi e saka wi srefi na den di e teki fesi.
Fu san-ede wi musu warderi na diniwroko fu den?
13. (a) Sortu meyne fu na wroko fu wan tiriman na ini grontapu de kontrari fu di fu Gado organisâsi? (b) Sortu bun reyde wi abi fu frutrow ini den man di e teki fesi a wi mindri? (c) San wi musu du na presi fu meki den onvolmaaktifasi fu owruman e wroko tranga kon moro bigi leki fa a de?
13 Na ini grontapu wan fasi e sori en srefi fu poti sma di abi makti fu tiri a wan sey. Na ini wan mofo di a ben go, wan sma ben taki fu dati: „Na kon moro hey fu na marki fu leri meki na voorraad talenti di de kon so furu taki bakaman kon de so kritik-man taki pikinmoro yu no man fu tyari den.” Ma ini Gado organisâsi wan yeye fu srefidensi denki no de, èn wi abi bun reyde fu abi frutrow na ini den man di e teki fesi a wi mindri. Fu kari wan tu: Soso den wan di e doro den beybri vereiste, e kisi a wroko leki owruman (1 Timoteyus 3:1-7). Den e kisi skoro fu de nanga switifasi, nanga lobi èn fu lobi fu yepi sma, ma nanga fasti bosroyti fu hori den regtfardiki markitiki fu Yehovah hey. Den owruman e hori tranga na a waarheid fu na beybri, ’e hori steyfi na kotrow wortu so taki den man fu frumane nanga yepi fu na gosontu leri’ (Titus 1:5-9). A no de fu taki taki wi no sa meki den onvolmaakti libisma fasi fu den moro bigi leki a de bika wi alamala de onvolmaakti (1 Kownu 8:46; Romen 5:12). Na presi fu wi firi bruya fu a skotu di den skotu ini du fu den èn fu teki na ray fu den lekti, a de moro bun fu wi warderi èn teki na tiri fu owruman, di abi a beybri leki gron, leki a kon fu Gado.
14. Sortu fasi fu luku sani wan owruman musu abi fu na diniwroko di a kisi te yu luku en ini a leti fu 1 Timoteyus 1:12?
14 Paulus, wan man di ben abi warderi, ben taki: „Mi de Krestes Yeyses, wi Masra di ben gi mi krakti grantangi, fu di a ben feni mi kotrow fu gi mi wan diniwroko” (1 Timoteyus 1:12). A diniwroko ofu dienst dati abi na ini en na preyki èn na dini fu konpe bribiman. Ala di wan opziener kisi wan wroko fu santa yeye fu dini leki hèrder, dan toku disi no musu meki a firi en srefi moro hey leki trawan, bika en srefi de wan pisi fu na ipi fu Gado di yu kan teki gersi nanga skapu (1 Petrus 5:4). Na presi fu dati, a musu de grantangi taki na Ede fu na gemeente Yeyses Krestes, feni en warti fu a dini den memre fu na ipi èn taki Gado meki en bekwaam fu di a gi en wan marki fu sabi, koni nanga frustan (2 Korente sma 3:5). Fu di wan owruman abi reyde fu de grantangi fu den grani di a kisi fu Gado, meki tra memre fu na gemeente musu abi warderi gi na diniwroko ofu dienst disi.
15. San de na prenspari sani fu na ray fu Paulus na ini 1 Tesalonika sma 5:12, 13?
15 Yehovah Kotoygi de grantangi gi na organisâsi di Gado bow na ini de lasti dei disi, èn a warderi dati e buweygi wi fu respeki den owruman. Nanga ala prisiri wi musu wroko makandra krinkrin nanga den seti di den seti sani fu na bun fu wi. Paulus ben taki: „Now wi e begi unu, brada, fu abi dipi respeki gi den di e wroko tranga a mindri unu èn di e teki fesi fu unu ini Masra èn e frumane unu seryusu, èn fu sori den moro leki aparti respeki ini lobi fu den wroko ede.” (1 Tesalonika sma 5:12, 13) Na poti fu na ray disi na ini wi libi e tyari prisiri nanga Yehovah blesi kon.
Teki ray esi-esi
16, 17. Sortu ray owuman kande e gi irn na tori fu na trowlibi èn san na a bakapisi fu a teki fu na ray?
16 Paulus ben gi tranga na Timoteyus ’fu tan frumane èn gi piri-ay nanga ala makti’ (Titus 2:15). Na a srefi fasi den sma di e teki presi gi Gado na ini na ten disi e sori wi tapu den gronprakseri nanga weti fu beybri. Bun reyde de fu teki na deki-ati di e gi alaten baka fu poti na ray nanga na tiri fu Yehovah organisâsi èn den owruman na ini wi libi.
17 Fu sori fa disi e wroko: Den owruman kande e gi wan kresten tranga fu waka baka na beybri ray ’fu trow soso ini Masra’ (1 Korente sma 7:39; Deuteronomium 7:3, 4). Den e sori kande a tapu taki fu trow nanga wan sma di no dopu kan tyari seryusu problema kon, soleki kownu Salowmow srefi ben lasi pasi seryusu fu di a ben teki dorosey uma, di ben beni en ati go na falsi Gado èn ben dray baka gi Yehovah (1 Kownu 11:1-6). Den owruman kande e tyari kon tu na krin taki Esra ben meki den dyu man seni den heyden uma fu den gwe, èn Nehemiya ben taki taki den di ben trow nanga sma di no de ini bribi, ’e du wan bigi ogri fu di den e handri ontrow na fesi fu Gado’ (Nehemiya 13:23-27; Esra 10:10-14; luku Na Wachttoren 1 yuni 1982, blz. 29, 30; 15 november 1986, blz. 26-30 ini Bakratongo), Blesi nanga na satisfaksi fu plisi Yehovah de na bakapisi te den sortu beybri ray disi di lobi owruman e gi e poti ini wi libi.
18. Fa wi musu du tapu na poti fu wan sma na dorosey fu na gemeente di de wan famiriman efu wi hori na prakseri san Paulus ben skrifi na ini 1 Korente sma 5:9-13?
18 A de so srefi tu yoysti fu respeki den krutu bosroyti fu owruman. Paulus ben taygi sma na ini Korente „fu no de moro langa ini konpani fu wan sma, di den kari wan brada èn di de wan huruman, ofu wan gridiman, ofu wan kruktugado anbegiman, ofu wan skenpiman ofu wan drunguman ofu wan bidrigiman èn srefi no nyan nanga so wan sma”. Den ben musu ’puru na gadolowsuman dati na den mindri’ (1 Korente sma 5:9-13). Ma fa yu ben sa handri, efu wan fu yu famiriman ben sluit uit? Aladi na ini wan skotu marki kontakti ben sa de fanowdu fu seti famiri afersi toku wan kba ben sa kon na ala yeye demakandra nanga na famiriman di sluit uit. (Luku Na Wachttoren, 1 december 1981, blz. 41.) Loyaliteit na Gado nanga en organisâsi seyker musu pusu wi fu respeki den krutu bosroyti fu den opziener.
19. San wi musu du efu den owruman e meki wi si taki na yeye fasi wi e go na wan pasi di no bun?
19 A no de makriki fu tan tapu na smara pasi di e go na libi. Fu du disi, dan wi musu waka na baka na tiri di e gi na ini a Wortu fu Gado èn den wan di kisi hèrder frantiwortu na ini en organisâsi (Mateyus 7:13, 14). Efu wi e rèys nanga oto fu a wan foto go na a trawan èn koti go ini wan fowtu pasi, dan wi ben sa musu du wan sani fu komoto ini a pasi pe wi go na ini. Efu wi no du dati, dan noyti wi ben sa doro pe wi musu go. Na netso a de tu efu den owruman e meki wi si taki na yeye fasi wi e go na wan fowtu pasi, kande fu e freyri nanga wan sma di no de ini bribi, dan wi musu poti beybri ray esi-esi na ini wi libi. Disi ben sa de wán fasi fu sori taki wi „e frutrow trutru tapu Yehovah”. — Odo 3:5, 6.
Respeki srefi na ini pikin sani
20. Sortu aksi wi kan aksi wi srefi so taki srefi na ini pikin sani wi kan sori respeki gi na tiri fu owruman?
20 Wi musu sori respeki srefi na ini pikin sani gi na tiri fu den owruman. Fu dati-ede wi ben sa kan aksi wi srefi: ’Mi e wroko makandra nanga den owruman efu den aksi mi fu fisiti sikiman ofu fu gi leri na nyunwan na ini na velddienst? Mi e de klariklari fu teki prati gi konmakandra èn sreka den bun? Mi de klariklari fu handri te owruman e gi tiri ini na hori fu sdonpresi tapu kongres ofu wi fasi fu weri krosi nanga so moro fara? Mi e wroko makandra te den aksi wi fu asisteri ini na krin fu na Konnukondrezaal, fu meki rapport wante wante fu wi velddienst ofu de biten na konmakandra?’
21. Na sortu wortu fu Yeyses wi kan denki na ini na sori fu respeki gi owruman?
21 Gemeente opziener e warderi a wroko makandra fu wi, èn furu bun e kon fu dati. Iya, taki wi e sori respeki èn srefi e wroko makandra na ini pikin sani, kan meki wi denki heri bun na Yeyses wortu: „A sma di de kotrow na ini a moro mendri sani de so srefi tu kotrow na ini furu sani” (Lukas 16:10). Wi wani de seyker kotrow.
Tan teki na wan lobi fasi na hori di owruman e hori ay tapu sani
22. San na wan tu fu den winimarki di e kon fu na hori di na kotrow srafu nanga gemeente owruman e hori ay tapu sani na wan lobifasi?
22 Den winimarki di e kon fu na hori di na kotrow srafu nanga gemeente owruman e hori ay tapu sani na wan lobi fasi e buweysi taki Yehovah bigi blesi de tapu en organisâsi. Boyti fu dati, na bekwaam tiri fu owruman e tyari den aparti bekwaamheid fu den kon na wan èn e meki wanfasi mindri wi go na fesi. So srefi tu a abi leki bakapisi a muyti fu wroko makandra di e waka bun fu meki den Kownukondre belang go na fesi. Iya, wan positief bakapisi fu na warderi di wi warderi na hori di den wan di e teki fesi e hori ay tapu sani de, taki Gado e blesi wi na ini wi preykiwroko èn a meki fu disipri (Mateyus 28:19, 20). A wroko makandra fu wi nanga den owruman so srefi tu e sreka wi tapu têgo libi na ini na nyun seti fu sani.
23. Te wi luku 1 Yohanes 5:3 dan san disi musu buweygi wi fu du?
23 Fu di wi lobi Yehovah, dan a gi di wi e gi yesi na en no de wan fruplekti di no switi. Na apostru Yohanes ben skrifi: „Disi wani taki a lobi gi Gado, taki wi ondrow en kobòt; èn toku den kobòt fu en no de wan hebi lay” (1 Yohanes 5:3). Loyaal kresten nanga prisiri e gi yesi na Yehovah kobòt èn sani e buweygi den fu wroko makandra nanga den di a gi a wroko fu hori na ay tapu na gemeente. Fa wi de grantangi taki wi mag de ini Yehovah organisâsi èn mag abi den sortu ’presenti disi ini libisma’! (Efeysiya sma 4:8) Meki fu dati-ede ala ten wi gi yesi na den di abi na grani fu teki fesi na mindri Yehovah Kotoygi na ini na frutrow dorodoro taki Gado e tyari en pipri.
San yu sa piki?
◻ Fu san-ede wi musu gi yesi na den di e teki fesi mindri wi?
◻ Sortu yeyefasi wi musu abi gi na dienst di owruman e du di e wroko tranga?
◻ Fu san-ede wi musu teki ray di owruman e gi esi-esi?
◻ Sortu winimarki e kon te wi e teki nanga warderi di ay e hori na wan lobi fasi?
[Prenspari pisi na tapu bladzijde 40]
Yu e wroko makandra nanga den owruman fu di yu e teki prati gi konmakandra, e yepi fu krin na Kownukondrezaal, e gi rapport wantewante fu yu velddienstaktiviteit, èn na ini tra fasi?
[Prenki na tapu bladzijde 38]
Paulus ben feni prisiri na ini na preyki fu na bun nyunsu èn na dini fu konpe bribiman. Yu de grantangi leki wan owruman gi den dienstgrani di yu kisi fu Gado?