Du ala sani gi na bun nyunsu

„Mi e du ala sani fu na bun fu na bun nyunsu fu mi kan teki prati nanga trawan na en.” — 1 KORENTE SMA 9:23.

1. Sortu fasi wi alamala abi makandra, ma fu san Gado ben sorgu fu a fondamenti?

ALADI wi e kenki fu makandra na ini difrenti fasi, toku wi alamala abi wan srefi eygifasi. Fu di wi kisi sondu fu Adam meki wi koboru leki sondari di de farawe fu na Moro Heywan, Yehovah Gado (Romen 5:12; Kolose sma 1:21). Na kresten apostru Paulus ben skrifi: „Den alamala sondu èn no e doro na glori fu Gado” (Romen 3:23). Fu kisi frulusu dan sma fu ibri grupu fu ras nanga nâsi musu kon bun baka nanga Gado. Èn fa wi kan de grantangi, taki Yehovah na ini en lobi nanga sari-atifasi di no abi en speri ben sorgu gi na fondamenti fu kon bun baka nanga en.

2. (a) Sortu diniwroko salfu kresten ben kisi? (b) Fu na eksenpre fu suma wi kan leri, èn fu san-ede? (1 Korente sma 11:1)

² Tinaneygi yarihondro psa kba, dan salfu kotoygi fu Yehovah ben kisi „na diniwroko fu kon bun baka nanga Gado”. Paulus ben taki: „Leki sma di e teki presi fu Krestes wi e begi unu tranga: ’Kon bun baka nanga Gado’” (2 Korente sma 5:18-20). Nanga sortu yeyefasi na apostru ben du na diniwroko disi? „Aladi mi de fri fu alamala,” a ben taki, „toku mi meki mi srefi tron wan srafu fu alamala, fu wini moro furu sma” (1 Korente sma 9:19). A no de fu taki, taki Paulus ben span en srefi nanga en heri konsensi fu presenteri en boskopu na wan tumusi bun fasi, bikasi a ben taki tu: „Mi e du ala sani fu na bun fu na bun nyunsu fu mi kan teki prati nanga trawan na en” (1 Korente sma 9:23). We, san wi kan leri fu na eksenpre fu Paulus?

Yepi sakafasi dyu

3. Fa na wani di Paulus ben wani fu du ala sani fu na bun fu na bun nyunsu ben sori ini na tori fu Timoteyus nanga den dyu?

³ Na sabi di Paulus ben sabi en dyu kulturu èn a wani di a ben wani fu du ala sani fu na bun fu na bun nyunsu ben sreka en fu yepi sakafasi dyu fu teki Yeyses leki den Mesiyas. Luku pikinso na eksenpre san na apostru ben du di a ben teki Timoteyus leki en patna fu waka lontu. Timoteyus, di ben abi wan Griki ppa, no ben besnij so leki dati ben psa nanga dyu pikin boy (Leviticus 12:2, 3). Paulus ben sabi taki disi ben kan meki dyu sma kon naki futu efu wan yonkuman di no ben besnij ben pruberi fu yepi den fu kon bun baka nanga Gado. San Paulus ben du so bun, so taki opregti dyu sma no ben sa ondrofeni hendri fu teki Yeyses? A „ben teki [Timoteyus] èn a ben besnij en fu den dyu ede”. Disi ben du aladi besnijdenis no ben de wan sani san Gado ben aksi fu kresten sma. — Tori fu den Apostru 16:1-3.

4. Leki fa 1 Korente sma 9:20 e taki, dan san ben de na marki di Paulus ben abi na prakseri?

⁴ Na lobi sorgu di Paulus ben sori gi konpe dyu ben de fu dati-ede wan afersi fu du sani fu na bun fu na bun nyunsu. A ben skrifi: „Gi den dyu [mi ben ] tron leki wan dyu, fu wini dyu; gi den di de na ondro na Wèti, mi ben tron leki wan sma di de na ondro na Wèti, aladi mi srefi no de na ondro na Wèti, fu wini den di de na ondro na Wèti” (1 Korente sma 9:20). Iya, so leki na tori fu Timoteyus e sori, dan Paulus ben du san a ben man fu wini dyu, fu yepi den tron kresten. Ma a ben du sani na a srefi fasi nanga hèyden sma?

Pruberi fu yepi hèyden sma

5. Gi suma Paulus ben preyki na ini Korente, èn nanga sortu bakapisi?

⁵ Bakadi Paulus ben doro na wan pisiten fu na bigi dreyten fu 50 G.T. na ini na foto Korente, a ben hori alawiki taki ini na snoga gi sma di ben de dyu nanga Griki proseliti sma. Ma na faya preykiwroko fu en ben meki someni gens kon, taki a ben taygi en gensman: „Meki na brudu fu unu de tapu unu ede. Mi de krin. Fu bigin nanga now mi sa go na den sma fu den nâsi.” Yehovah ben blesi na bosroyti disi, bika „ furu fu den Korente sma di ben e arki, ben bigin fu bribi èn teki dopu” leki kresten. Iya, ini wan fisyun Masra ben gi Paulus tranga fu tan na ini na presi dati di a ben kisi fu wroko èn ben taygi en: „Mi abi furu sma na ini na foto disi.” — Tori fu den Apostru 18:1-10.

6. San ben pusu Paulus fu sori belangstelling gi den sma di a kulturu fu den ben de tra fasi leki di fu en?

⁶ Na opregti winsi fu Paulus fu wini hèyden sma fu teki na krestendom ben tyari en go so fara fu sori belangstelling gi sma di na kulturu fu den ben de heri tra fasi leki di fu en. „Gi den [den hèyden] di de sondro wèti, mi ben tron leki wan sma sondro wèti, aladi mi no de sondro wèti fu na sey fu Gado, ma ondro na wèti fu na sey fu Krestes, fu wini den di de sondro wèti” (1 Korente sma 9:21). Fa na apostru ben pruberi fu wini den hèyden?

7. Fu san-ede Titus ben de na ini wan heri tra situwâsi leki Timoteyus ini na tori fu na besnijdenis?

⁷ Di Paulus ben go na Yerusalen na wan sani fu 49 G.T. fu de na a prenspari konmakandra fu na Tiri Skin fu na kresten gemeente, dan na Griki disipri Titus ben go nanga en. Paulus ben fruteri den brada, di ben konmakandra, fu en preykiwroko a mindri den sma fu den nâsi, èn a ben skrifi bakaten: „Srefi Titus di ben de na mi, den no ben dwengi fu meki a besnij, aladi a ben de wan Griki” (Galasiya sma 2:1-3). Tra fasi leki Timoteyus, dan Titus ben du en diniwroko morofuru a mindri sma fu den nâsi di no ben besnij. Fu dati-ede meki a tori fu besnijdenis no ben de wan problema gi en. — 2 Korente sma 8:6, 16-18, 23; 12:18; Titus 1:4, 5.

8. Fa Paulus ben gi kotoygi na ini Athene?

⁸ Di Paulus ben e gi kotoygi na ini Athene a ben sori agen taki a ben du ala sani fu na bun fu na bun nyunsu. Fu di a ben hori na denki fu den sma di ben e libi na ini na Griki mamafoto na prakseri, meki a ben fruteri den fu wan Gado di den no ben sabi èn a ben teki wortu fu den puwemaman fu den, Aratus nanga Cleanthes, di ben taki: „Bika wi de so srefi en bakapikin.” Na apsotru ben pruberi na a fasi disi fu yepi en arkiman fu frustan taki den ’no ben musu prakseri taki na Persoon fu Gado de leki wan sani di anu meki nanga na koni fu libisma fu meki moy sani nanga fu feni nyun sani’. Boyti fu dati, na so Paulus ben taki-go-taki-kon, ’Gado luku psa den ten fu so wan don, ma e taygi den sma now taki den alamala na ala sey musu abi berow’. Tapu wan tumusi moy fasi a ben poti prakseri tapu ’na Masra fu heymel nanga grontapu’, Yehovah. Èn san ben de a bakapisi? „Son man ben moksi den srefi na en èn ben tron bribiman” (Tori fu den Apostru 17:22-34). Iya, Paulus fasi fu preyki ben abi bun bakapisi!

9. Fa Paulus ben kon de ’swaki gi den swakiwan’, èn fu san-ede?

⁹ „Gi den swakiwan mi ben kon swaki fu wini swakiwan”, Paulus ben taki (1 Korente sma 9:22a). Aladi a taki fu en ben de krakti, toku na apostru ben hori na swaki konsensi fu den dyu nanga hèyden sma na ini na gemeente na prakseri. A ben taki tranga nanga Romen kresten: „Teki a sma di abi swakifasi na ini en bribi, ma no fu teki bosroyti na ini en bribi fu inisey degedege-aksi.” Na presi fu Paulus ben tanapu klariklari nanga wan krutu, a ben taki: „Feti na baka den sani di e meki vrede go a fesi èn den sani di e bow makandra” (Romen 14:1, 13, 19). A ben gi na ray: „Ma wi di tranga, musu tyari den swakifasi fu den di no tranga èn no prisi wi srefi” (Romen 15:1). Nanga ini prakseri a fruplekti di a abi fu fiti en fasi fu taki nanga du, so taki a kan yepi tra sma, meki a ben skrifi: „Mi ben tron ala sani gi ala sortu fu sma.” — 1 Korente sma 9:22b; Galasiya sma 3:28.

Meki na koni fu yu leki preykiman kon moro bigi

10. Fa wi kan waka baka Paulus na ini na ten disi?

¹⁰ Yehovah Kotoygi na ini na ten disi musu waka na baka Paulus neleki fa en ben waka na baka Krestes (1 Korente sma 11:1). Na apostru ben de wan koni preykiman di ben abi na spirit fu na zendingwroko. Na srefi kan de so nanga wi awinsi den omstandigheid fu wi no e gi wi pasi fu dini na ini wan tra kondre. Neleki Paulus na so wi musu ’du ala sani fu na bun fu na bun nyunsu, fu wi kan teki prati nanga trawan na en’ (1 Korente sma 9:23). Ma san kan meki na koni fu wi na ini na preyki fu na Kownukondre nanga na meki fu disipri kon moro bigi? — Mateyus 28:19, 20.

11. Fu san-ede yu musu meki na man di yu musu man fu si sani gaw leki wan bedinari kon moro bigi?

¹¹ Poti yu srefi a tapu fu meki na koni fu man fu si sani gaw kon moro bigi. Te yu man fu si sani gaw yu kan kon sabi furu sani di sa yepi yu fu fiti yu presenteri fu na bun nyunsu na aparti ososma. Efu fu eksenpre yu e gi kotoygi na sma di e libi na ini wan foto, luku spesrutu na den sroto di de na a doro, den kerki prenki, den wortu di skrifi kande na tapu plakpapira. Den sani disi kan yepi yu fu gi kotoygi di kande sa doro na ati fu den sma di e libi na ini den sortu oso disi. Paulus seyker ben man fu si sani gaw. Na ini Athene a ben kobroyki wan altari pe den wortu ben tanapu: „Gi wan Gado di wi no sabi” leki wan fu den elementi ini na tumusi moy kotoygi ini na tori „fu na Gado di meki grontapu nanga ala sani di de na ini” (Tori fu den Apostru 17:22-25). Yu kan du den srefi sortu sani disi na ini yu diniwroko.

12. Sortu ròl na koni fu man fu si fa fu du sani e prey na ini wi diniwroko?

¹² Kobroyki na koni fu man fu si fa fu du sani na ini na diniwroko. No lasi ati fu te biginbigin wan sma e draydray fu opo na doro taki nanga yu. Sori switifasi nanga na koni fu man si fa fu du sani na presi fu yu meki wan sma swa fesi yagi yu gwe. Pruberi fu fiti na kotoygi fu yu na den omstandigheid. Te na ini wan syatu begi yu wegi yu wortu go-kon, dan kande yu sa man fu taki wan sani di sa naki wan titey fu a firi fu a sma ati di e teki sani esi-esi . — Teki gersi nanga Nehemiya 2:4-6.

13. Fa wi ben kan sori taki wi e hori den sma na ini prakseri di wi e preyki gi?

¹³ Sori taki yu e hori na sma na prakseri. Na ini disi difrenti sani kan du fu na bun fu na bun nyunsu. Fu eksenpre, na hori di yu e hori grani nanga siki sma na prakseri sa tapu yu fu meki den tanapu tumusi langa na a doro. Yu ben sa kan tyari kon a fesi taki yu wani taki nanga den na inisey, pe den sa firi den srefi moro makriki èn switi. Ofu yu ben sa kan teki na bosroyti fu meki a fisiti fu yu syatu na ondro den omstandigheid disi. Awinsi fa a no fa, sori taki yu e hori na sma na prakseri. Sori taki yu e broko-ede nanga en! — Mateyus 9:35,36.

14. Fa wi kan meki den arkiman firi den srefi switi te wi e gi den kotoygi?

¹⁴ Taki tapu wan fasi di e meki den arkiman fu yu firi den srefi makriki en switi. Bigin a gi fu kotoygi fu yu nanga wan switi odi so leki sma gwenti dati na ini na kontren fu yu (Mateyus 10:12). Hori na prakseri na frede di sma e frede kande ofu a krutu di sma e krutu sani na fesi. De nanga respeki èn opregti ini switifasi ini san yu e taki. Disi sa yepi fu dyaranti na ososma taki yu de drape fu yepi èn taki yu no abi tra prakseri.

15. Fu san-ede yu sa musu fruteri den nofo fu yu srefi èn na reyde fu san-ede yu e kon na den oso?

¹⁵ Ososma musu sabi suma kon na den doro èn fu san-ede. Fruteri fu dati-ede nofo fu yu srefi. Na ini son kontren, spesrutu na ini Afrika nanga Asiya, sma abi someni belangstelling ini fisitiman taki den wani sabi so te den piki tapu den sortu aksi leki: Suma na yu? Pe yu e libi? Yu trow? Yu abi wan osofamiri? Fu du wan sani meki na okasi disi de wan switiwan, dan gwenti e aksi taki yu piki den aksi disi bifo yu tyari kon a krin na marki fu yu fisiti. No si den sortu taki-odi disi leki sani di no de fanowdu, ma kobroyki na ten fu luku na sma èn fu bow wan respeki ay kontakti nanga en.

16. Fa bun aksi kan de wan yepi na ini na hori fu kommunikâsi nanga na ososma?

¹⁶ Kobroyki bun aksi fu hori kommunikâsi nanga na ososma. Aladi na fesi fu wan sma kan fruteri yu wan sani, toku en prakseri nanga firi de sani di yu musu kon frustan. Nanga dati na prakseri, meki tapu wan konifasi yu kan kobroyki aksi fu tyari wan ososma go so fara fu fruteri fa a e luku sani èn den firi fu en. Fu gi wan eksenpre: Wan uma sma di no abi pikin èn di e poti furu prakseri tapu meti ben taki fu na fisiti fu wan kotoygi den wortu disi: „San mi kan memre fu a lafufesi fu en ben de na vrede. A ben grabu mi prakseri. Na uma disi ben aksi mi san mi e broko ede nanga en moro furu fu den toestand na grontapu. Mi ben taygi en taki mi e broko mi ede fu na fasi fa libisma e handri nanga meti, èn a ben sori mi Yesaya 11:6-9 di e taki fu meti di e libi ini tru vrede. Mi ben wani fu sabi moro.”

17. Fu san-ede wi musu poti bun prakseri na san na ososma e taki fu en srefi ofu den omstandigheid fu en ?

¹⁷ De nanga opo yesi gi san na ososma e taki fu en eygi omstandigheid, spesrutu na ini gebied di wroko furutron. Na ini na fasi disi, yu kan leri kande srefi ini wan syatu takimakandra wan sani fu a sma san kan de heri bun gi wan tra takimakandra. Baka te yu komoto fu na doro, skrifi syatu den sortu sani disi tapu na oso fu oso rapport. Ma fa a de now efu na ososma e aksi wan aksi di yu no kan piki? Go suku na ini den buku fu na Wachttorengenootschap fu si san na a moro bun fasi fu fruteri na bun nyunsu na a sma na tra leysi te yu de na en doro.

Wan eksenpre gi zendeling

18. San zendeling nanga trawan kan leri fu Paulus?

¹⁸ Na mindri den sma di e du ala sani fu a bun fu na bun nyunsu yu abi zendeling di kisi leri na a Wachttoren-Beybri Skoro Gilead. Den kan leri furu fu Paulus di ben abi wan tumusi moy zendeling spirit. Fu eksenpre, a no ben wani de frantiwortu fu sani di ben kan tapu dyu nanga hèyden sma fu teki na waarheid. We, fu dati-ede na apostru ben luku bun san a ben nyan èn ben warskow kresten sma fu Korente fu luku bun, taki na reti di den ben abi fu nyan seyker nnyan no ben musu meki trawan naki futu (1 Korente sma 8:8, 9). Na ini na New Century Bible, professor F.F. Bruce ben taki: „Na ini ala den sani di a no ben sabi bun (so leki wan nnyan di ben de ini na tori [1 Korente sma] kapitri 8), [Paulus] e fiti en srefi na den gwenti fu den sma di a ben abi fu du nanga den na a momenti dati, fu no poti wan sani ini den pasi fu ’wini’ den gi na evangelium.” (Romen 14:21). Na a srefi fasi a de taki zendeling na mindri Yehovah Kotoygi no e pruberi fu kenki den gwenti fu sma na ini a presi di den kisi fu wroko, aladi nyunwan e kisi yepi na yeyefasi fu tyari den fanowdu kenki kon fu plisi Gado. — Romen 12:1, 2.

19. Ini a meki fu disipri,dan sortu kenki di musu tyari kon kan de fanowdu (a) gi den sma di de na ini na zendingdienst? (b) gi ala Kownukondrepreykiman?

¹⁹ Den wan di e bigin nyun na ini wan presi di den kisi fu wroko leki zendeling musu leri sabi den fasi nanga gwenti fu den sma. Disi na wan ondrofeni di e meki wi kon sabi furu sani èn kan yepi zendeling fu du a preykiwroko fu den moro bun. Te yu luku en bun, fu den no meki tra sma naki futu, dan kande den musu fiti den srefi na ini afersi leki krosi nanga fa den e sorgu den srefi na dorosey. Fu eksenpre, di wan zendeling sisa fu na fosi tron ben doro na ini West-Afrika a ben kon si taki a fasi fa a ben kobroyki sani fu moy en srefi ben kan meki sma si en makriki leki den uma nanga yayo libifasi na ini na kontren dati. Fu dati-ede, fu trawan no degedege ini en buweygi fu ati, esi-esi a kenki a fasi fu moy en srefi. A no de fu taki, taki ala Kotoygi fu Yehovah musu krutu sani bun ini afersi fu krosi nanga sorgu yu srefi na dorosey fu kan yepi trawan na yeyefasi. Kresten sma di e kisi na warskow ’fu no poti wan ston fu naki futu gi wan brada’ èn fu feti na baka sani di e bow makandra, seyker no sa wani fu no wan tra sma naki futu. — Romen 14:13, 19.

20. (a) Fu taki en syatu, san sa yepi wi ’fu du ala sani fu na bun fu na bun nyunsu’? (b) Sortu aksi musu kisi wan piki ete?

²⁰ Fu sani waka bun leki Kownukondre preykiman e anga fu na fosi presi fu na blesi fu Yehovah (1 Korente sma 3:6, 7). Toku ete a de so, taki wi tu musu fu du muyti. So bun, man fu si sani gaw neleki fa Paulus ben man fu du na ini en diniwroko. Kobroyki na koni fu man fu si fa fu du sani, sori taki yu e hori sma na prakseri, meki na ososma firi en srefi switi, èn kobroyki aksi fu hori kommunikâsi nanga en. Fiti yu srefi na gwenti di kande luku law, ma di no de kontrari na beybri. Iya, meki wi ’du ala sani fu na bun fu na bun nyunsu, fu wi kan teki prati nanga trawan na en’ (1 Korente sma 9:23). Ma san e psa te wan sma de wan memre fu wi kresten bradafasi? Fa wi e handri nanga den?

Fa yu ben sa piki?

◻ San Paulus ben du fu yepi dyu sma kon tron kresten?

◻ Fa Paulus ben suku fu wini hèyden sma?

◻ San na wan tu fasi fu meki na koni fu wi fu preyki kon moro bun?

◻ Sortu eksenpre Paulus e gi zendeling nanga tra Kownukondrepreykiman?