Na strei di e go foe na dede foe Jesus

NA A dei foe na Paskafesa na ini 33 G.T., wan kiri ben feni presi foe dri sma makandra. Den ben tjari dri man, di kroetoe ben leisi strafoe gi, go na wan presi dorosei foe den skotoe foe Jerusalem èn ben kiri den na wan foe den moro hati èn lagi fasi: dati na a spikri di den e spikri wan sma na tapoe wan leti-opo oedoe postoe. Den sortoe kiri disi ben de gewoon na ini den ten foe den Romeini sma, foe dati-ede na froewakti ben kan de, taki nownow sma ben sa frigiti langaten kaba den kiri di ben pasa na a Paska dei. Ma wán foe den man di ben dede ben de Jesus Krestes. Na dede foe en ben tjari prenspari kenki èn strei kon na a sei foe relisi.

Pikinmoro toe doesoen jari pasa foe sensi na sani dati ben feni presi, so taki joe abi na firi kande foe si en leki soso historia foe owroeten. Ma, joe e froestan taki na strei di ben opo ede kon, no kaba srefisrefi ete?

Leki fa joe sabi kande, dan miljoenmiljoen sma e hori taki Jesus ben dede gi den. Den e bribi fajafaja taki na dede foe Krestes na a sroto foe kon fri nanga foe kisi pardon foe sondoe, taki bribi na ini a dede foe en wani taki froeloesoe. Ma a e gi froewondroe taki wan artikel na ini na Anglican Theological Review e froeteri taki na diri leri disi de „ini bigi problema”. Èn den „problema” e kon foe na sei foe kerki fesiman.

Na Anglican Theological Review e froeklari: „Na leri foe verzoening na ini na Kresten denki de na ini problema bika sma e tweifri na a fondamenti foe en na ini a bijbel, na fasi fa den ben tjari en kon na ondro wortoe ben kon lai nanga prakseri di no e tan langa . . . , èn na fasi fa a e kon a doro na ini pôpi fasi foe anbegi, ben teki na fasi foe persoonlijk sori foe firi pasa marki, nanga na regtfardiki foe den srefi sondro foe ondrosoekoe sani.” Ija, anitri nanga lomsoe theoloogman (sma di e ondrosoekoe Gadotori.) no ben man foe doro iniwan sortoe foe kroederi ini na tori foe san na dede foe Jesus Krestes wani taki, efoe a wani taki wan sani srefi.

Joe e firi kande taki disi na soso wan pikin kesekese foe wantoe theoloogman, taki a no abi noti foe doe nanga joe libi. Ma prakseri disi: Efoe na dede foe Jesus troetroe abi wan sani foe doe nanga joe posisi na fesi God èn joe froewakti foe têgo libi (na ini hemel ofoe iniwan tra presi), dan na strei disi e aksi foe joe poti prakseri a tapoe.

Foe san-ede den theoloogman e meki trobi foe na tori te now ete? Loekoe foe eksempel, na Lomsoe Katolik Kerki. A abi leri, di tjari boen kon na ondro wortoe ini na tori foe na sili di no kan dede èn na Driwànfasi. Tokoe, na kerki na wan froewondroe fasi no e teki wan bosroiti ini na tori foe kon fri nanga jepi foe na dede foe Krestes. Na New Catholic Encyclopedia e erken: „Den meki foeroe sistema di de difrenti foe makandra foe froeklari fa libisma e kon fri foe na ogri foe sondoe èn fa a e tjari kon baka na ini boen-ati . . . Ma no wan foe den sistema disi ben abi boen bakapisi dorodoro. . . . Foe wan pisi na leri foe na Froeloesoe no klari ete èn a e go doro foe sori en srefi leki wan problema gi den theoloogman.”

A no sa moesoe de wan froewondroe sani gi joe dan, taki foe den miljoenmiljoen sma di nanga foeroe faja e taki taki ’Jesus ben dede gi wi’, wantoe nomo abi moro leki wan frafra prakseri foe san a wani taki troetroe. Leki fa na Anglican Theological Review e poti en: „Te a kon ondro druk . . . dan na Kresten bribiman foeroetron no man foe kari na bijbel fonten foe na leri, ofoe foe froeklari fa a e wroko.” Ondro na hebi foe wan leri di den no e froestan, noso no kan froeklari, dan a moeilek gi anbegiman na ini den kerki foe si fa na dede foe Krestes abi foe doe nanga den libi.

Na man di na Krestenhèit no man foe tjari wan krin leri kon foe na kon fri foe libisma so srefi ben tapoe pasi gi den moeiti foe en foe miti Djoe, Hindoe sma, Boeddhist sma nanga trawan nanga na kresten boskopoe. Aladi foeroe foe den wan disi e froewondroe foe èn e respeki foeroe foe den leri foe Jesus, tokoe na broeja foe na dede foe Krestes èn san a wani taki tanapoe leki wan sani di e tapoe pasi gi bribi.

San na dede foe Krestes wani taki de eenvoudig wan kibritori — toemoesi hei foe libisma froestan en? Ofoe wan reidelek froeklari di abi en fondamenti na tapoe na Bijbel de foe en? Den aksi disi froedini foe joe loekoe den, bika na Bijbel e taki na froewondroe sani disi foe Krestes: ’Ibriwan sma di e sori bribi na ini en, no sa go pori, ma sa abi têgo libi.’ — Johanes 3:16.