Wan srefi froeloesoe paiman gi ala sma

„Na Manpikin foe libisma no ben kon, foe sma dini en, ma foe dini èn foe gi en sili leki wan loesoe-prijs ini na presi foe foeroe sma.” — MATEUS 20:28.

1, 2. (a) Foe san-ede sma kan taki taki na loesoe-prijs na a moro bigi presenti foe Gado gi na libismafamiri? (b) Fa wi e njanboen foe en efoe wi e ondrosoekoe na loesoe-prijs?

NA LOESOE-PRIJS na a moro bigi presenti foe Gado gi a libismafamiri. Nanga jepi foe „a froeloesoe di na loesoe-prijs” e gi wi, wi kan abi „na pardon foe den fowtoe foe wi” (Efeise sma 1:7). A de na fondamenti foe wan howpoe foe têgo libi, efoe a de now na ini hemel ofoe na tapoe wan paradijs grontapoe (Lukas 23:43; Johanes 3:16). Èn foe na loesoe-prijs ede, kresten kan njanboen now kaba foe wan krin posisi na fesi foe Gado. — Openbaring 7:14, 15.

² Foe dati-ede a loesoe-prijs no de wan sani di de frafra ofoe wan sani di sma no kan si. A loesoe-prijs abi wan fondamenti akroederi na wet ini gronprakseri foe Gado, èn foe dati-ede a kan tjari troetroe wini kon, di sma kan si krin. Bepaalde sani foe na leri disi de kande „tranga foe froestan” (2 Petrus 3:16). Ma joe sa feni taki a warti na moeiti troetroe foe ondrosoekoe na loesoe-prijs soifri, bikasi a e sori na lobi di Gado abi gi na libismafamiri èn di e pasa ala marki. Te wi froestan san na loesoe-prijs wani taki, dan wi kisi froestan foe wan sroto edepenti foe Gado en „goedoe èn koni èn sabi”, di sma no kan froestan. — Rome sma 5:8; 11:33.

Strei-aksi di ben moesoe loesoe

3. Fa a loesoe-prijs ben kon wan fanowdoe sani, èn foe san-ede Gado no ben kan gi na libismafamiri eenvoudig pardon foe na sondoe fasi foe den?

³ Na loesoe-prijs ben tron wan fanowdoe sani foe na sondoe ede foe na fosi libisma, Adam, di ben gi en bakapikin wan soso famiri goedoe foe siki, dede, broko-ede, nanga pen (Rome sma 8:20). Foe na onvolmaakti fasi ede di den ben teki abra, meki ala bakapikin foe Adam de „pikin foe na atibron”, di e froedini dede (Efeise sma 2:3; Deuteronomium 32:5). Gado no ben kan gi en srefi abra na firi sondro gronprakseri èn eenvoudig gi na libismafamiri wantewante pardon sondro foe denki. En eigi wortoe e sori taki ’na paiman foe sondoe, na dede’ (Rome sma 6:23). Foe gi na libismafamiri pardon foe na sondoe fasi foe den, dan Jehovah Gado ben sa moesoe foe afrontoe en eigi reti markitiki, èn ben sa moesoe foe meki en eigi reti doe akroederi na wet lasi krakti! (Job 40:8). Ma, „regtfardikifasi nanga reti na den fasti presi foe [Gado] kownoe-stoeroe” (Psalm 89:14). Ibri drifi komoto foe regtfardikifasi, foe en sei ben sa gi deki-ati wawan foe sma doe kroektoedoe èn ben sa diki na posisi foe en na ondro leki na Universeel Soeverein. — Teki gersi Preikiman 8:11.

4. Sortoe strei-aksi na oproeroe foe Satan ben meki opo kon?

⁴ Gado ben moesoe loesoe so srefi tra strei-aksi di ben opo kon nanga na oproeroe foe Satan, strei-aksi di de foe moro bigi belang leki na kefarlek situwâsi pe libisma ben de na ini. Satan ben trowe wan doengroe skaduw tapoe na boen nen foe Gado foedi a ben kragi Jehovah taki a ben de wan leiman èn wan ogri-ati diktator di no ben wani gi den mekisani foe en sabi èn fri (Genesis 3:1-5). Boiti foe dati, dan Satan ben meki a gersi neleki Gado ben misi foedi a ben meki a tan leki a ben pori na prakseri foe Gado foe foeroe na grontapoe nanga regtfardiki libisma (Genesis 1:28; Jesaja 55:10, 11). Satan ben abi deki-ati toe foe lei gi den loyaal foetoeboi foe Gado, èn ben e gi na kragi taki den ben dini En, soso foedi den boeweigi foe ati ben de na soekoe foe wini gi den srefi nomo. Te den ben kon na ondro druk, na so Satan ben meki bigi, dan no wan foe den ben sa tan loyaal na Gado! — Job 1:9-11.

5. Foe san-ede Gado no ben kan libi den tjalansi foe Didibri?

⁵ Den tjalensi disi sma no ben kan poti na wan sei. Efoe den no ben gi wan piki na tapoe, dan te foe kaba den ben sa meki wan olo na ini a froetrow èn hori baka gi na tiriwroko foe Gado (Odo 14:28). Efoe wet nanga orde ben go na baka, a no de so dan taki broeja ben sa de na ini a heri universum? Soboen Gado ben froeplekti gi en srefi èn gi den regtfardiki pasi foe en foe regtfardiki na Soevereiniteit foe en. A ben froeplekti gi den kotrow foetoeboi foe en foe gi den na okasi foe den sori en na loyaliteit foe den di no e broko. Disi ben wani taki taki den ben moesoe foe handri nanga na takroe situwâsi pe na sondoe libismafamiri ben de na ini, na so wan fasi taki den moro prenspari afersi ben poti na a fosi presi. Bakaten a ben taigi Israèl: „Mi — mi na a sma di e figi den fowtoe foe oenoe poeroe foe mi wani ede.” — Jesaja 43:25.

Loesoe-prijs: a e tapoe sani

6. San na wantoe wortoe di bijbel e gebroiki foe taki foe na methode foe Gado foe froeloesoe na libismafamiri?

⁶ Na ini Psalm 92:5 wi e leisi: „O bigi den wroko foe joe de, o Jehovah! Den prakseri foe joe dipi srefisrefi.” A e aksi foe wi sei foe wi doe moeiti foe froestan san Gado doe gi na libismafamiri. (Teki gersi Psalm 36:5, 6.) Kolokoe, na bijbel e jepi wi foe froestan na afersi foedi a e gebroiki wantoe wortoe di e froeteri foe den gran wroko foe Gado komoto foe wan difrenti foe fasi foe si sani. Na bijbel e taki foe na loesoe-prijs nanga wortoe di abi foe doe nanga a bai foe wan sani, wan meki kon verzoen èn wan zoen-ofrandi (Psalm 49:8; Danièl 9:24; Galasia sma 3:13; Kolose sma 1:20; Hebrew sma 2:17). Ma kande den wortoe di Jesus srefi ben gebroiki na ini Mateus 20:28 e froeteri na afersi moro boen: „Na manpikin foe libisma no ben kon, foe sma dini en, ma foe dini èn gi en sili leki wan loesoe-prijs [Grikitongo, luʹtron] ini na presi foe foeroe sma.”

7, 8. (a) San wi e leri foe den Griki èn Hebrew wortoe gi loesoe-prijs? (b) Gi eksempel fa wan loesoe-prijs abi na ini wan srefi fasi?

⁷ San na wan loesoe-prijs? Na Griki wortoe luʹtron e kon foe na werkwortoe di wani taki „loesoe”. Den ben gebroiki en foe sori tapoe moni di ben e pai na presi foe a meki kon fri foe strafoeman foe wan orlokoe. Ma na ini den Hebrew Boekoe na wortoe gi loesoe-prijs, koʹfer, e kon foe wan werkwortoe di wani taki „tapoe” ofoe „weri”. Foe eksempel, Gado ben taigi Noa foe tapoe (ka·farʹ) na ark nanga tara (Genesis 6:14). Foe na fasi foe loekoe sani disi, dan foe froeloesoe, ofoe foe verzoen sondoe, wani taki soboen foe tapoe sondoe. — Psalm 65:3.

⁸ Na Theological Dictionary of the New Testament e skrifi taki koʹfer „wani taki alaten wan sani di e akroederi”, ofoe afersi di de a srefi. Na so, na tapoen (kap·poʹreth) foe na ark foe na froebontoe ben akroederi na ini vorm nanga na ark srefi. Na a srefi fasi, na regtfardikifasi, foe Gado e aksi ’sili foe sili, ai foe ai, tifi foe tifi, anoe foe anoe, foetoe foe foetoe’ foe verzoen sondoe, ofoe foe bai loesoe (Deuteronomium 19:21). Ma sontron, a kande reti efoe wan sani di e akroederi e pristeri na presi foe na leti strafoe. Foe gi wan eksempel: Exodus 21:28-32 e taki foe wan mankaw di e boekoe wan sma meki a e dede. Efoe na eiginari ben sabi taki a mankaw e boekoe ma a no ben seti den joisti sani foe tapoe na kefar, dan den ben kan strafoe en foe a tapoe ofoe pai nanga en eigi libi gi na libi foe na sma di ben dede! Ma, fa a ben de efoe na eiginari ben de frantiwortoe soso foe wan pisi nomo? A ben sa abi wan koʹfer, fanowdoe, wan sani foe tapoe na fowtoe foe en. Kroetoeman di den ben poti na wroko, ben kan poti en foe pai: wan loesoe-prijs, wan boetoe, leki wan froeloesoe-prijs.

9. Fa wan situwâsi di abi foe doe nanga den fosi gebore wan foe Israèl e sori na soifri fasi di den ben aksi ini a tori foe wan froeloesoe-prijs?

⁹ Wan tra Hebrew wortoe, di abi foe doe nanga „bai-loesoe” abi foe doe nanga pa·dhahʹ, wan werkwortoe di te joe loekoe en boen wani taki „froeloesoe.” Numeri 3:39-51 e sori o soifri na prijs foe na froeloesoe ben moesoe de. Foedi Gado ben froeloesoe Israèl na fosi gebore wan foe pori na a Paska 1513 bifo Gewoon Teri, meki a ben de den eiginari. A ben kan aksi tranga soboen foe ibri fosi gebore manpikin foe Israèl ben sa dini en na ini a tempel. Na presi foe dati Gado ben teki wan „loesoe-prijs” (pidh·johmʹ, wan naamwortoe di komoto foe pa·dhahʹ), èn ben taki: „Èn joe moesoe teki den Leifi sma gi mi . . . na presi foe ala den fosi gebore wan a mindri den manpikin foe Israèl.” Na kon na presi foe na trawan ben moesoe de soifri. Den ben teri na lo foe Leifi: 22.000 mansma. Bakadati, den ben teri ala den fosi geborewan foe Israèl: 22.273 mansma. Soso te den ben pai wan „loesoe-prijs” foe feifi sikkel gi ibri sma den 273 fosi geborewan, di ben de moro foeroe, ben kan froeloesoe èn de fri foe tempel wroko.

Wan srefi loesoe-prijs

10. Foe san-ede ofrandi foe meti no ben kan tapoe na sondoe foe na libismafamiri na wan boen fasi?

¹⁰ San skrifi a fesi e sori taki na loesoe-prijs moesoe de akroederi na sani di a e kon na presi foe en, ofoe di a e tapoe. Den meti ofrandi di man foe bribi foe bigin foe Abel ben pristeri, no ben kan tapoe den sondoe foe libisma troetroe, foedi libisma de moro hei leki den meti di no abi froestan (Psalm 8:4-8). Paulus ben kan skrifi soboen taki ’a no kan taki broedoe foe mankaw èn foe bokoboko kan poeroe sondoe’. Den sortoe ofrandi dati ben kan dini eenvoudig leki wan agersi, ofoe wan simbôlis, tapoe foe sani ala di sma e wakti na loesoe-prijs di ben sa kon. — Hebrew sma 10:1-4.

11, 12. (a) Foe san-ede a no ben de fanowdoe taki miljoenmiljoen libisma ben dede wan ofrandi dede, foe tapoe na sondoe fasi foe na libismafamiri? (b) Soema wawan ben kan dini leki „wan srefi loesoe-prijs, èn san na a marki di na dede foe en ben dini?

¹¹ Na loesoe-prijs disi di den ben prenki a fesi ben moesoe de soifri akroederi Adam, foedi na dedestrafoe di Gado ben tjari nanga reti tapoe Adam, ben abi leki bakapisi na leisi foe strafoe gi na libisma famiri. „Na ini Adam ala sma e dede” 1 Korente sma 15:22 e taki. Foe dati-ede a no ben de fanowdoe foe miljardmiljard aparti libisma ben dede wan ofrandi dede foe meki dati de a srefi nanga ibri wan foe den bakapikin foe Adam. ’Nanga jepi foe wán man [Adam] sondoe ben kon na ini grontapoe èn nanga jepi foe sondoe dede’ (Rome sma 5:12). Èn „foedi dede de nanga jepi foe wan libisma, froeloesoe foe na libismafamiri ben kan kon toe „nanga jepi foe wan libisma.” — 1 Korente sma 15:21.

¹² Na libisma di ben kan de na loesoe-prijs ben moesoe de wan volmaakti libisma foe skin nanga broedoe — soifri a speri foe Adam (Rome sma 5:14). Wan jeje meki sani ofoe wan „Gado-libisma” (afoe-Gado afoe-libisma) no ben sa tjari na wegi foe retidoe na ini balansi. Soso wan volmaakti libisma, wan sma di no de na ondro na dedestrafoe foe Adam, ben kan pristeri „wan srefi loesoe-prijs”, wan di de volmaakti a srefi leki Adam (1 Timoteus 2:6).a Foedi a ben òfer en libi nanga friwani, dan na „lasti Adam” disi ben kan pai na paiman foe na sondoe foe na „fosi libisma, Adam.” — 1 Korente sma 15:45; Rome sma 6:23.

13, 14. (a) Adam nanga Eva e njanboen foe na loesoe-prijs? Froeklari disi. (b) Fa wan loesoe-prijs abi boen bakapisi gi den bakapikin foe Adam? Gi eksempel foe disi.

¹³ Ma no Adam èn no Eva, e njanboen foe na loesoe-prijs. Na Wet foe Moses ben abi na gronprakseri disi: „Joe no moesoe teki wan loesoe-prijs gi na sili foe wan kiriman, di e froedini foe dede” (Numeri 35:31). Den no ben kori Adam, soboen na sondoe foe en ben de foedi en srefi ben wani espresi (1 Timoteus 2:14). A ben de a srefi leki a kiri foe den bakapikin foe en, foedi now na onvolmaakti fasi foe en ben abra go na tapoe den, na so fasi den ben kon na ondro na strafoe foe dede. A de krin, taki Adam ben froedini foe dede, foedi leki wan volmaakti man, espresi a ben froekisi foe tranga jesi na wet foe Gado. A ben sa de teige den regtfardiki gronprakseri foe Jehovah foe a gebroiki na loesoe-prijs foe na boen foe Adam. Ma a pai foe na paiman foe na sondoe foe Adam e sorgoe taki na dede strafoe di de na tapoe den bakapikin foe Adam e poeroe! (Rome sma 5:16). Na wan fasi di de ini akroederi nanga na wet, na krakti foe sondoe foe pori sani, koti poeroe wantewante na a fonten foe en. Na froeloesoeman ’e tesi dede gi ibri sma’, èn a e tjari den bakapisi foe sondoe gi ala den pikin foe Adam. — Hebrew sma 2:9; 2 Korente sma 5:21; 1 Petrus 2:24.

¹⁴ Foe gi wan eksempel: Teki wan bigi fabriek nanga hondrohondro wrokoman na prakseri. Wan basi di no de eerlijk e bankroetoe na bisnis; na fabriek e sroto den doro foe en. Hondrohondro sma no de na wroko now èn no man pai den paiman foe den. Den trowpatna foe den, den pikin, èn, ija, sma pe den borgoe sani alamala e pina foe na kroektoedoe ede foe na wán man dati! Dan wan goedoeman di e doe boen e kon di e pai na paiman foe na wrokopresi èn e opo na fabriek baka. A pai foe na wan paiman dati, e tjari dorodoro froelekti gi foeroe wrokoman, den famiri foe den èn den sma pe den ben borgoe sani. Ma na fosi basi e njanboen foe na njoen boen bakapisi? Nôno, a de na ini doengroe-oso èn noiti moro a e kisi na wroko foe en baka! Na a srefi fasi, a pai foe na wan enkri fowtoe foe Adam e tjari boen gi miljoenmiljoen sma foe den bakaman foe en, ma no gi Adam.

Soema e gi na loesoe-prijs?

15. Soema ben kan gi wan loesoeprijs gi na libismafamiri, èn foe san-ede?

¹⁵ Na psalm singiman ben kragi: „No wán foe den kan froeloesoe srefi wan brada na wan ofoe tra fasi, èn no kan gi Gado a loesoe-prijs gi en; (èn na loesoe-prijs gi na sili foe den de so diri taki a tapoe te ten di no abi marki).” The New English Bible e taki taki na loesoe-prijs’ ’ben de alaten moro hei leki san a ben man pai’ (Psalm 49:7, 8). Soema, dan, ben sa gi na loesoe paiman? Jehovah wawan ben gi na volmaakti „Pikin Skapoe . . . di e poeroe na sondoe foe grontapoe” (Johanes 1:29). Gado no ben seni wantoe engel foe froeloesoe na libismafamiri. A ben tjari na moro hei ofrandi; foedi a ben seni en wan enkri gebore Manpikin, ’a wan di a ben abi spesroetoe prisiri nanga en.’ — Odo 8:30; Johanes 3:16.

16. (a) Fa na Manpikin foe Gado ben kan gebore leki wan volmaakti libisma? (b) Fa den ben kan kari Jesus na wan wettelijk fasi?

¹⁶ Foedi nanga en friwani a ben teki prati na ini na seti foe Gado, meki na Manpikin foe Gado „kenki en srefi” poeroe na skin foe na hemel natuur foe en (Filipi sma 2:7). Jehovah ben abra na libikrakti èn na model foe na sma di na fosi gebore hemel Manpikin foe en de, go na a moeroe foe wan djoe njoenwenke di ben abi na nen Maria. Dan santa jeje ben ’kibri Maria’, èn ben sorgoe taki na pikin di ben gro na ini na moeroe foe en ben sa de santa, krinkrin fri foe sondoe (Lukas 1:35; 1 Petrus 2:22). Leki libisma, den ben sa kari en Jesus. Ma na wan fasi akroederi na wet, den ben kan kari en ’na di foe toe Adam’, bika a ben de volmaakti a srefi leki Adam (1 Korente sma 15:45, 47). Soboen Jesus ben kan òfer en srefi leki „wan ofrandi foe wan Pikin Skapoe di de sondro fowtoe èn sondro flaka,” wan loesoe-prijs gi na sondoe libismafamiri. — 1 Petrus 1:18, 19.

17. (a) Na soema na loesoe-prijs e pai, èn foe san-ede? (b) Foedi Gado e gi èn e kisi na loesoe-prijs, foe san-ede wan kenki e feni presi dan?

¹⁷ Ma na soema na loesoe-prijs dati ben sa moesoe pai? Hondrohondro jari den theoloogman foe na krestenhèit ben hori tranga taki a ben pai na Satan Didibri. A de troe taki na libismafamiri „seri ondro” sondoe èn ben kon na so wan fasi ondro na makti foe Satan (Rome sma 7:14; 1 Johanes 5:19). Tokoe ete, na Jehovah, èn a no Satan, „e aksi strafoe” gi fowtoe sani di doe (1 Tesalonika sma 4:6). Foe dati-ede, soleki fa Psalm 49:7 e taki krin, na loesoe-prijs moesoe pai „na Gado”. Jehovah e gi na loesoe-prijs, ma bakadi na Pikin Skapoe foe Gado òfer, dan na waarde foe na loesoe-prijs foe en moesoe pai na Gado. (Teki gersi Genesis 22:7, 8, 11-13; Hebrew sma 11:17). Disi no e saka na loesoe-prijs meki a de wan soso, otomatik kenki, neleki moni ben teki poeroe foe na wan saka èn poti go na ini a trawan. Na loesoe-prijs no abi so foeroe foe doe nanga wan kenki na skinfasi, ma nanga wan wettelijk bisnis akroederi. Foedi a ben aksi tranga taki wan loesoe-prijs ben pai — srefi nanga bigi kostoe gi en srefi — Jehovah ben djaranti na kotrow fasi foe en na regtfardiki gronprakseri sondro foe degedege. — Jakobus 1:17.

„A kon na wan kaba!”

18, 19. Foe san-ede a ben de fanowdoe taki Jesus ben moesoe pina?

¹⁸ Ini na pikin dreiten foe 33 G.T., a ten ben doro foe pai na loesoe-prijs. Den ben sroto Jesus na tapoe gron foe falsi kragi, èn ben leisi strafoe gi en èn ben spikri en na wan postoe foe dede. A ben seni tranga begi go na Gado, nanga „tranga babari èn watra ai” foe na hebi pen ede èn na broko saka di ben de na ini a tori (Hebrew sma 5:7). A ben de fanowdoe taki Jesus ben pina so? Ija, bikasi foedi a tan „loyaal, sondro fowtoe, sondro flaka, aparti foe den sondari”, te na a kaba, meki Jesus ben loesoe na strei-aksi foe na soifri retifasi foe den foetoeboi foe Gado nanga wan kefarlek fasti bosroiti. — Hebrew sma 7:26.

¹⁹ Den pina di Jesus ben pina, ben dini toe foe meki a kon volmaakti dorodoro gi na ròl foe en leki Hei Priester gi na libismafamiri. Foe dati-ede, a no ben sa de wan ofoe tra sma di no abi wan waran fasi, èn di e sidon baka wan skrifitafra pe sma no kan kon na en. „Bika foedi en srefi ben pina di den ben tesi en, meki a kan jepi den wan di den e tesi” (Hebrew sma 2:10, 18; 4:15). Nanga na lasti bro foe en, Jesus ben kan bari ini fektori: „A kaba!” (Johanes 19:30). No wawan a ben sori en eigi soifri retifasi ma a ben abi boen bakapisi na ini a poti foe na fondamenti gi na froeloesoe foe na libismafamiri — èn san moro prenspari, na regtfardiki foe na soevereiniteit foe Jehovah!

20, 21. (a) Foe san-ede Jesus ben wiki poeroe foe dede? (b) Foe san-ede den ben meki Jesus Krestes ben „kon a libi ini a jeje”?

²⁰ Ma na sortoe fasi na froeloesoe paiman ben sa gebroiki now gi na sondoe libismafamiri? Oten? Fa? Den afersi disi no ben libi abra na wan omstandigheid di sma no kan si a fesi. Na a di foe dri dei baka na dede foe Jesus, Jehovah ben wiki en foe dede (Tori foe den Apostel 3:15; 10:40). Nanga na toemoesi bigi doe disi, wan troe sani di hondrohondro ai kotoigi taki foe en, Jehovah no wawan ben pai na getrow dienst foe en Manpikin ma ben gi en na okasi toe foe kaba en froeloesoe wroko. — Rome sma 1:4; 1 Korente sma 15:3-8.

²¹ Jesus ben „meki kon na libi na ini jeje”, na skin foe doti foe en di ben tan abra ben pori na wan fasi di no tjari kon na krin (1 Petrus 3:18; Psalm 16:10; Tori foe den Apostel 2:27). Leki wan jeje mekisani, dan na Jesus di ben opo baka ben kan drai go baka now na ini hemel na wan fektori fasi. Fa a ben moesoe de wan prisiri babari, di no ben kan tapoe, na a okasi dati na ini hemel! (Teki gersi Job 38:7.) Jesus no ben drai go baka wawan foe njanboen foe na switikon di den ben sreka gi en. Ma a ben kon foe doe moro wroko ete, nanga na ini toe wroko di e meki a kan taki na heri libismafamiri ben sa njanboen foe na loesoe-prijs foe en. (Teki gersi Johanes 5:17, 20, 21.) Fa a ben doe disi èn san a wani taki gi na libismafamiri, wi sa taki foe en na ini a tra artikel.

[Foetoewortoe]

Overzicht Aksi

◻ Sortoe afersi ben de foe srefi moro bigi belang leki na froeloesoe foe na libismafamiri?

◻ San a wani taki foe „bai [sondari] loesoe?

◻ Nanga soema Jesus ben moesoe akroederi, èn foe san-ede?

◻ Soema e gi na loesoe-prijs èn na soema a e pai?

◻ Foe san-ede a ben de fanowdoe taki Jesus ben wiki poeroe foe dede leki wan jeje?

[Prenki na tapoe bladzijde 25]

Den ofrandi foe meti no ben sari foe tapoe na sondoe foe libisma; den ben de wan prenki foe wan moro bigi ofrandi di e kon