San na a roetoe foe osofamiri problema?
’A LESI!’ Robby ben bari. ’A no sabi doe osowroko!’
’Dati no troe kwetikweti!’ Johana ben piki faja baka. ’A no e warderi no wan enkri sani san mi e proeberi foe doe. A de wan man di e feni fowtoe moro leki iniwan tra man di mi miti oiti.’
San ben go fowtoe ini a libi foe Robby nanga Johana?a Na njoenjoen trow foe den ben abi fo moen nomo, ma a ben de krosibei kaba foe tron wan rampoe. Tokoe, na kefal foe den no de wan aparti wan, bika lijst nanga nomroe e sori taki kesekese a mindri trowpatna na wan aladei sani. Sabiman e taki now, taki afoe foe ala njoen trow na ini Amerkankondre sa kaba ini wan broko-trow. Den srefi sortoe lijst nanga nomroe di no e gi foeroe howpoe e kon foe foeroe tra kondre. Tokoe broko-trow na soso wán pisi foe na situwâsi. Osofamiri de ini problema ini nomroe di noiti bifo ben de so hei èn foe difrenti reide.
Wan toe reide gi osofamiri problema
A abi bigi krakti tapoe pikin te sari situwâsi de ini wan osofamiri. Na Newsweek tijdschrift e froeteri: „Wan di foe dri pisi foe ala pikin di gebore [na ini Amerkankondre] ini na pisten foe tin jari di pasa, sa libi leki fa a e sori ini wan kwekifamiri bifo den doro tin-a-aiti jari. Wan tapoe ibri fo pikin ini a ten disi, e kweki na wan papa noso mama di de en wawan. Pikinmoro 22 procent foe den pikin ini a ten disi, ben gebore dorosei foe na trow; foe denwan dati, pikinmoro wan di foe dri pisi ben gebore foe wan mama di de ini en tinijari.”
J. Patrick Gannon, sabiman ini a tori foe na meshandri foe pikin, e kari wan roetoe di abi foe doe nanga osofamiri problema, te a e taki: „Den lasti ondrosoekoe sori taki tintin miljoen sma ben kweki ini osofamiri pe sani no ben e go gewoon, pe tranga, incest (sekslibi nanga sma foe na srefi osofamiri) noso na meshandri foe wan sma firi, san ben doe kon foe na de foe wan srafoe di sma de wan srafoe foe sopi, ben de wan troetroe sani foe ibri dei.” A no wan sani foe froewondroe taki foeroe pikin di ben kisi foe doe nanga den sortoe sani disi, kande no sabi foe wai pasi gi osofamiri problema te den tron bigisma.
Wan toe sma di e loekoe sani ben kan poti a fowtoe foe osofamiri problema tapoe den ekonomia, sociaal nanga moreel kenki di ben feni presi na ini den kondre pe a meki foe sani na ini fabriki de na moro prenspari fasi foe kisi moni. Foe eksempel, na wroko di oema sma e go wroko ini bigi nomroe ben meki, taki den wroko èn frantiwortoe foe oso foeroe tron na wan broeja fasi ben seti baka njoen. Mama na wan senoewaktiki fasi e meki owroe bekwaamfasi foe doe wan wroko kon moro betre, den papa nanga tegoe e feti nanga osowroko èn den pikin nanga den ai di e lon watra e fiti den srefi na a libi na den presi pe den e tan a deiten.
Foeroe famiri de ondro hebi druk ini kondre na a grontapoe lontoe. Wán foe den papa nanga mama di e wroko ben agersi disi nanga na „libi ini wan doronomo nowtoe situwâsi.” A no wan froewondroe sani taki pikinmoro afoe foe denwan di den ben aksi san den ben prakseri, ini wan Gallup ondrosoekoe no so langa pasa kaba, ben taki, taki ’a e go moro ogri nanga na Amerkan osofamiri ini a ten disi, leki a ben go 10 jari pasa kaba’, èn pikinso sma nomo ben bribi taki na situwâsi ben sa kon betre.
Foe dati-ede osofamiri problema na wan doronomo tori foe takimakandra na telefisi èn radio takimakandra programa. Na poebliki e leisi pasa marki den boekoe foe jepi joesrefi, di e go foe na osofamiri libi èn di wan toe foe den e gi wan pikinso koni èn praktis rai. Ala di na tranga di sma e gi foe ’taki moro fri nanga makandra’ noso foe ’taki foe joe firi nanga makandra’ kan jepi, dan tokoe a e misi foe doe wan sani nanga a troetroe roetoe foe den oso problema. Na tra artikel sa doe disi èn sa sori fa foe handri nanga osofamiri problema.
[Foetoewortoe]
a Kibrinen gebroiki foe hori na froetrowfasi.