Jehovah en lobi osofamiri seti
„Foe dati ede mi e boigi mi kindi gi a Tata, di na en ibri famiri na ini hemel èn na grontapoe kisi a nen foe den.” — EFEISESMA 3:14, 15.
1, 2. (a) Nanga sortoe marki Jehovah ben meki na osofamiri groepoe? (b) Sortoe ròl na osofamiri abi ini a ten disi ini a seti foe Jehovah?
JEHOVAH ben meki na osofamiri groepoe. Nanga jepi foe disi, a ben doe moro leki a gi di a ben gi satisfaksi na a fanowdoe foe libisma foe abi wan kompe, jepi noso krosibei matifasi (Genesis 2:18). Na osofamiri ben de a sani di nanga jepi foe disi a glori prakseri foe Gado foe foeroe grontapoe, ben sa kon troe. A ben taigi a fosi trowpaar: „Meki pikin èn kon foeroe èn foeroe grontapoe èn poti en na oenoe ondro” (Genesis 1:28). A kontren foe na osofamiri di e gi waran èn lobi ben o sori boen gi den heri ipi pikin, di Adam nanga Eva nanga den bakapikin foe den ben o kisi.
2 Ma a fosi trowpaar dati, ben teki wan waka nanga libi foe trangajesi — nanga takroe bakapisi gi densrefi èn den bakapikin foe den (Romesma 5:12). Na osofamiri libi ini a ten disi de so boen wan heri tra sani leki san Gado ben wani foe a de. Tokoe, na osofamiri e go doro foe abi wan prenspari presi ini Jehovah en seti, foe dini leki wan fondamenti groepoe foe a kresten libimakandra. Disi wi no e taki foe di wi no abi warderi gi a boen wroko di den foeroe kresten di no trow èn di de na wi mindri, e doe. Foe taki en moro betre, wi e erken a bigi jepi di osofamiri e gi toe foe meki a heri kresten organisâsi gesontoe na jeje fasi. Tranga osofamiri e meki tranga gemeente. Ma fa sani kan waka boen gi joe osofamiri, ala di joe e tanapoe na fesi den kwinsi foe a ten disi? Foe gi wan piki tapoe disi, dan meki wi go ondrosoekoe san bijbel abi foe taki ini a tori foe na osofamiri seti.
Na osofamiri ini bijbelten
3. Sortoe ròl a trowmasra èn a wefi ben plèi ini na osofamiri foe den famiri-edeman?
3 Adam nanga Eva den ala toe ben trowe a seti foe Gado foe a wroko leki edeman. Ma man di ben abi bribi, so leki Noa, Abraham, Isak, Jakob nanga Job nanga reti ben teki a presi foe den, leki famiri-edeman (Hebrewsma 7:4). Na osofamiri foe wan famiri-edeman ben de leki wan pikin lanti, a papa ben handri leki wan relisi tiriman, leriman nanga kroetoeman (Genesis 8:20; 18:19). Den wefi ben abi wan prenspari ròl toe, den no ben e dini leki srafoe, ma leki jepiman di ben loekoe den afersi foe wan oso.
4. Fa na osofamiri libi ben kenki na ondro a Wet foe Moses, ma sortoe ròl papa nanga mama ben tan plèi?
4 Di Israèl ben tron wan nâsi na ini 1513 bifo G.T., a wet foe na osofamiri ben kon na ondro a Wet foe a kondre di den ben kisi nanga jepi foe Moses (Exodus 24:3-8). A makti foe teki bosroiti, so srefi ini a tori foe afersi di ben abi foe doe nanga libi èn dede, ben gi now na kroetoeman di den ben poti (Exodus 18:13-26). A Leifi priesterwroko ben teki den sani foe a tjari di den ben moesoe tjari ofrandi abra, di ben abi foe doe nanga na anbegi (Levitikus 1:2-5). Ma tokoe, a papa ben go doro foe plèi wan prenspari ròl. Moses ben gi tranga na papa: „Den wortoe disi di mi e gi oenoe tide leki komando, moesoe sori taki den de na oen ati; èn oenoe moesoe poti den ini a manpikin foe oenoe èn taki foe en te oenoe de ini oen oso èn te oenoe e waka na pasi èn te oenoe e go didon èn te oenoe e opo” (Deuteronomium 6:6, 7). Mama ben abi foeroe krakti. Odo 1:8 ben gi jongoesma a komando: „Arki mi manpikin, na a tranga leri foe joe papa èn no libi a wet foe joe mama.” Ija, ini den skotoe foe a seti foe a makti foe en masra, a Hebrew wefi ben kan meki — èn hori — a wet foe na osofamiri. A ben moesoe kisi grani foe den pikin foe en, srefi baka te a ben kon owroe. — Odo 23:22.
5. Fa a Wet foe Moses ben taki foe a presi foe pikin ini na osofamiri seti?
5 A wet foe Gado ben taki krin toe foe a presi di pikin ben e kisi. Deutoronomium 5:16 e taki: „Gi grani na oen papa èn oen mama, so leki fa Jehovah oen Gado, ben komanderi oenoe; so taki den dei foe oenoe kan kon de langa èn a kan go boen nanga oenoe tapoe a gron di Jehovah oen Gado e gi oenoe.” Foe no gi lespeki na wan papa noso mama ben de a moro serjoesoe sondoe di wan sma ben kan doe na ondro a Wet foe Moses (Exodus 21:15, 17). „Efoe wan man de di e begi tranga foe ogri kon na tapoe en papa nanga en mama”, a Wet ben taki, „oenoe moesoe kiri en sondro pardon” (Levitikus 20:9). Opo densrefi kontrari papa noso mama foe den, ben de a srefi leki na opo di wan sma e opo ensrefi kontrari Gado srefi.
A ròl foe kresten trowmasra
6, 7. Foe san ede den wortoe foe Paulus na Efeisesma 5:23-29 ben sori wan bigi kenki gi den leisiman foe en foe a fosi jarihondro?
6 A krestendom ben gi moro bodoi ini a tori foe na osofamiri seti, spesroetoe ini a tori foe a ròl foe a trowmasra. Dorosei foe a kresten gemeente, a ben de wan gwenti taki trowmasra ini a fosi jarihondro ben e handri nanga den wefi foe den na wan fasi di krasi èn di ben kwinsi den. Oemasma no ben kisi den fondamenti reti nanga grani. The Expositor’s Bible e taki: „A Grikisma di ben kisi skoro, ben teki wan wefi foe meki pikin. Den reti foe na oema no ben skotoe den sekslostoe foe a man. Lobi no ben de wan pisi foe a trow froebontoe. . . . A srafoe-oema no ben abi reti. Na eiginari foe en ben man doe san a ben wani nanga a skin foe na oema.”
7 Nanga so wan situwâsi na prakseri, Paulus ben skrifi den wortoe foe Efeisesma 5:23-29: „A man na a ede foe en wefi, neleki fa Krestes srefi de na ede foe a gemeente, en leki froeloesoeman foe a skin disi. . . . Trowmasra, tan lobi a wefi foe joe neleki fa Krestes ben lobi a gemeente toe èn a ben gi ensrefi abra gi en . . . Trowmasra abi a plekti foe lobi den wefi foe den leki den eigi skin srefi. A sma di lobi en wefi, lobi ensrefi, bikasi nowan sma no ben abi oiti bita-ati gi en eigi skin, ma a e gi en njanjan èn a e boboi en.” Gi den leisiman foe a fosi jarihondro, den wortoe disi ben de wan bigi kenki. The Expositor’s Bible e taki: „Noti ini a krestendom ben loekoe moro ongewoon èn moro krasi, te sma ben teki dati gersi nanga den takroe moraal foe a ten dati, leki a fasi fa kresten e si a trowlibi. . . . [A] ben opo wan njoen pisi ten gi a libisma famiri.”
8, 9. Sortoe fasi foe doe di no ben de gesontoe èn di ben doe nanga oemasma, de wan gwenti na mindri mansma èn foe san ede a de prenspari taki kresten mansma e kakafoetoe gi den sortoe fasi dati foe si sani?
8 A bijbel rai gi trowmasra no de wan moro mendri bigi kenki ini a ten disi. Ala di den e taki na ala sei, taki oemasma kon fri, foeroe mansma e si oemasma te now ete leki sani nomo foe satisferi den sekslostoe foe den. Foe di den e bribi na anansitori taki oemasma troetroe e prisiri te sma e basi den, e dwengi den, noso e tapoe skreki gi den, meki foeroe mansma e meshandri den wefi foe den na skin fasi èn e ati a firi foe den. Fa a ben sa de wan sjen gi wan kresten man foe meki a grontapoe fasi foe denki tiri en èn foe meshandri a wefi foe en! „A trowmasra foe mi ben de wan dinari ini a diniwroko èn ben hori poebliki taki”, wan kresten oema e taki. Tokoe, a e tjari kon na krin, „mi ben de wan wefi di ben kisi fonfon”. A krin, taki den sortoe fasi foe handri disi no ben de ini wánfasi nanga a seti foe Gado. A man dati ben de wán aparti kefal; a ben moesoe soekoe jepi foe man handri nanga na atibron foe en efoe a ben howpoe foe Gado feni en boen. — Galasiasma 5:19-21.
9 Gado e gi trowmasra a komando foe lobi a wefi foe den leki den eigi skin. Te den e weigri foe doe so, dan den e opo densrefi kontrari a joisti seti foe Gado èn a kan njan a matifasi di wan sma abi nanga Gado na ondro. Den wortoe foe na apostel Petrus krin: „Oenoe trowmasra, tan libi so srefi nanga [oen wefi] akroederi sabi, gi en grani leki wan moro swaki patoe . . . so taki den begi foe oenoe no e ondrofeni hendri” (1 Petrus 3:7). Te wan sma e handri nanga en wefi na wan krasifasi, dan dati ben sa kan abi takroe krakti toe tapoe a jejefasi foe en èn tapoe a jejefasi foe den pikin foe wan sma.
10. San na wan toe fasi fa trowmasra kan doe wroko leki edeman na wan kresten fasi?
10 Trowmasra, sani sa waka boen gi na osofamiri foe joe di de na joe ondro leki edeman, efoe joe e doe disi na wan krestenfasi. Noiti Krestes ben de krasi nanga sma noso ben meshandri den. Na presi foe dati a ben kan taki: „Leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili” (Mateus 11:29). Na osofamiri foe joe kan taki dati foe joe? Krestes ben handri nanga den disipel foe en leki mati èn ben poti froetrow na ini den (Johanes 15:15). Joe e gi a wefi foe joe a srefi grani? Bijbel ben taki foe wan „bekwaam wefi”: „Na ini en na ati foe en eiginari ben poti froetrow” (Odo 31:10, 11). Dati wani taki foe gi en pasi foe abi wan marki foe fri nanga a fri foe teki san en wani, foe no tapoe en na alasei nanga skotoe di no de reidelek. Moro fara Jesus ben gi den disipel foe en a deki-ati foe taki foe den firi èn den prakseri foe den (Mateus 9:28; 16:13-15). Joe e doe a srefi nanga a wefi foe joe? Noso joe e si na agri di a no e agri nanga joe na wan eerlijkfasi leki wan tjalensi gi a makti foe joe? Foe di joe e hori den firi foe a wefi foe joe na prakseri na presi foe no e si den, joe e bow troetroe a lespeki foe en gi a wroko foe joe leki edeman.
11. (a) Fa papa kan sorgoe gi den fanowdoe na jeje fasi foe den pikin foe den? (b) Foe san ede owroeman nanga dinari ini a diniwroko moesoe gi wan boen eksempel ini a sorgoe di den e sorgoe gi na osofamiri foe den?
11 Efoe joe na wan papa, joe moesoe teki toe a tiri ini a sorgoe di joe e sorgoe gi den fanowdoe na jeje fasi, na a fasi fa den e firi èn na skin fasi gi den pikin foe joe. Dati wani taki foe abi wan boen fasti gwenti na jeje fasi gi na osofamiri foe joe: e wroko nanga den ini a velddienst, e hori wan oso-bijbelstudie èn e takimakandra nanga den foe a deitekst. A de wan moi sani foe si taki bijbel e sori taki wan owroeman noso wan dinari ini a diniwroko moesoe de „wan man di e teki fesi ini en eigi osofamiri na wan toemoesi moi fasi”. Man di e doe wroko ini den posisi disi moesoe de so boen famiri-edeman di de wan boen eksempel. Ala di kande den e tjari wan hebi lai foe gemeente frantiwortoe, den moesoe poti den eigi osofamiri na a fosi presi. Paulus ben sori foe san ede: „Ma, efoe wan man no sabi fa foe teki fesi ini en eigi osofamiri, fa a sa man sorgoe dan, gi a gemeente foe Gado?”. — 1 Timoteus 3:4, 5, 12.
Kresten wefi di e gi jepi
12. Sortoe ròl a wefi e plèi ini a kresten seti?
12 Joe na wan kresten wefi? Dan joe toe moesoe abi wan prenspari prati ini na osofamiri seti. Kresten wefi e kisi a froemane „foe lobi a trowmasra foe den, foe lobi den pikin foe den, de gesontoe foe froestan, abi krinfasi, de wrokoman na oso, boen, e saka densrefi na ondro den eigi trowmasra” (Titus 2:4, 5). Joe moesoe feti so boen foe de wan misi foe oso di de wan eksempel èn di e hori na oso krin èn switi gi na osofamiri foe joe. Sontron osowroko kan de froeferi, ma a no de wan lagi sani èn a no de wan sani toe di no de prenspari. Leki wefi, joe „e loekoe den afersi foe wan oso” èn joe sa njanboen kande foe moro fri ini a tori disi (1 Timoteus 5:14). A „bekwaam wefi” foe eksempel, ben bai sani gi na oso, ben bai èn ben seri sani èn srefi ben tjari moni kon na ini foe di a ben doe pikin bisnis. A no de foe froewondroe, foe dati ede, taki a masra foe en ben prèise en! (Odo, kapitel 31) A no de foe taki, dati den sortoe wroko disi ben doe na ini den skotoe foe den tirilin di a masra foe en ben gi leki na edeman foe en.
13. (a) Foe san ede a saka di oemasma moesoe saka densrefi na ondro mansma kan de wan moeilek sani gi son oemasma? (b) Foe san ede a de wan boen sani gi kresten oema foe saka densrefi na den masra ondro?
13 Ma foe saka joesrefi na joe masra ondro no de ala ten koemakriki. A no ala man e froedini èn e kisi lespeki. Èn joe kan de heri boen bekwaam te joe e kisi foe doe nanga a handri nanga moni, a meki foe plan, noso na orga foe sani. Joe abi wan grontapoewroko kande èn e gi wan bigi bijdrage na a moni di e kon ini na osofamiri. Noso joe ben pina kande na wan fasi foe a basi di man ben basi joe ini a ten di pasa èn e feni en kande wan moeilek sani foe saka joesrefi na wan man ondro. Ma tokoe a sori foe „dipi lespeki” noso „frede” gi a masra foe joe, e sori taki joe e lespeki a wroko foe Gado leki edeman (Efeisesma 5:33, Kingdom Interlinear; 1 Korentesma 11:3). Foe saka joesrefi, de prenspari toe gi a fasi fa sani e waka boen gi na osofamiri foe joe; a e jepi foe tan farawe foe meki banawtoe nanga kwinsi, di no de fanowdoe, kon miti a trowlibi foe joe.
14. San wan wefi kan doe te a no e agri nanga a bosroiti di a masra foe en teki?
14 Ma disi wani taki, dati joe moesoe tan pî te joe abi a firi taki joe masra e teki bosroiti di e wroko kontrari den moro boen afersi foe na osofamiri foe joe? Dati no abi foe de so. Sara, a wefi foe Abraham, no ben tan pî di a ben si taki a boen foe Isak, a manpikin foe en, ben kon ini kefar (Genesis 21:8-10). Na a srefi fasi, joe e firi wan froeplekti kande foe taki foe den firi foe joe wanwan leisi so. Efoe disi e doe na wan lespeki fasi na „a joisti ten”, dan wan kresten man, di e dini Gado, sa arki (Odo 25:11). Ma efoe a no e waka baka den sani di joe ben taigi en èn a no de so taki na wan serjoesoefasi a pasa foe wan gronprakseri foe bijbel de ini a tori, dan joe ben sa pasa a marki foe joe te joe e doe sani kontrari den winsi foe a masra foe joe? Memre taki, „a troetroe koni oema ben bow en oso, ma a law-wan e broko en te na gron nanga en eigi anoe” (Odo 14:1). Wán fasi foe bow na osofamiri foe joe na foe horibaka gi a wroko foe joe masra leki edeman, e prèise den wroko foe en, ala di joe e handri na wan bedarifasi nanga den fowtoe foe en sondro foe meki joe ati e bron.
15. Na sortoe fasi wan wefi kan teki prati ini a gi foe tranga leri èn skoro na den pikin foe den?
15 Wan tra fasi foe bow na osofamiri foe joe na foe teki prati ini a gi foe tranga leri èn skoro na den pikin foe joe. Foe eksempel, joe kan doe joe pisi foe hori oso-bijbelstudie doronomo èn na wan fasi di e bow sma. „No meki na anoe foe joe e rostoe”, te disi abi foe doe nanga a taki di joe e taki foe a waarheid nanga den pikin foe joe na ibri okasi — te joe e rèis noso gewoon e bai sani nanga den (Preikiman 11:6). Jepi den foe sreka den komentaar foe den gi den konmakandra èn nanga den pisi foe a Theokrasia Diniwrokoskoro. Tan na ai ini a tori foe den kompe foe den (1 Korentesma 15:33). Te sani abi foe doe nanga afersi foe Gado en markitiki èn tranga leri, dan meki den pikin foe joe sabi taki joe nanga a masra foe joe de na ini wánfasi. No gi den pasi foe meki den meki joe nanga joe masra kon kisi trobi, so taki den kan kisi san den wani.
16. (a) Sortoe bijbel eksempel de foe gi deki-ati na papa noso mama di de den wawan sondro foe trow èn den wan di trow nanga sma di no de na bribi? (b) Fa trawan ini a gemeente kan jepi den sortoe sma disi?
16 Efoe joe na wan mama di no trow noso joe abi wan trowpatna di no de ini a bribi, dan kande joe sa moesoe teki fesi na jeje fasi heri boen. Disi sa kande moeilek èn kan meki joe lasi-ati sontron srefi. Ma joe no moesoe tapoe foe meki moeiti. Eunice, a mama foe Timoteus, ben abi boen bakapisi ini a leri di a ben leri en den santa Boekoe „foe sensi en pikin-nengre ten”, ala di a ben trow nanga wan man di no ben de na bribi (2 Timoteus 1:5; 3:15). Èn foeroe sma na wi mindri e njanboen foe den sortoe boen bakapisi dati. Efoe joe abi pikinso jepi fanowdoe ini a tori disi, joe sa kan meki den owroeman kon sabi disi. Den sa man foe seti sani kande foe wan sma kon jepi joe foe go na konmakandra èn na velddienst. Den sa gi trawan deki-ati kande foe teki joe osofamiri go koiri pikinso noso na ini prisiri demakandra. Noso den sa seti sani kande foe meki preikiman di abi ondrofeni, jepi joe foe bigin wan osofamiri studie.
Pikin di e warderi sani
17. (a) Fa jongoesma kan jepi foe sani waka boen ini na osofamiri? (b) Sortoe eksempel Jesus ben gi ini a tori disi?
17 Kresten jongoesma kan jepi foe sani waka boen ini na osofamiri, foe di den e waka na baka a rai foe Efeisesma 6:1-3: „Oenoe pikin, oenoe moesoe gi jesi na oen papa nanga oen mama na ini wánfasi nanga Masra, bikasi disi de regtfardiki: ’Gi grani na oen tata èn oen mama’; san de a fosi gebod nanga wan pramisi: ’So taki a kan go boen nanga joe èn joe mag tan libi wan langa ten na grontapoe.’” Foe di joe e wroko makandra nanga a papa èn mama foe joe, joe e sori taki joe e lespeki Jehovah. Jesus Krestes ben de volmaakti èn makriki a ben man taki-go-taki-kon taki a ben sa de wan lagi sani gi a wartifasi foe en foe saka ensrefi na ondro papa nanga mama di no ben de volmaakti. Tokoe „a ben go doro foe saka ensrefi na den ondro. . . . Èn Jesus ben tan gro ini koni èn na skin fasi èn ini a boen di Gado nanga libisma ben feni en boen”. — Lukas 2:51, 52.
18, 19. (a) San a wani taki foe gi grani na wan sma en papa nanga mama? (b) Fa na oso kan tron wan presi foe kowroe na ati?
18 A no na a srefi fasi joe ben sa moesoe gi grani na joe papa nanga mama? Dja „gi grani” wani taki foe erken makti di poti na wan reidelek fasi. (Teki gersi 1 Petrus 2:17.) Ini moro foeroe situwâsi so wan grani de froeplekti, srefi te a papa noso mama foe wan sma no de na bribi noso e misi foe gi wan boen eksempel. Joe ben sa moesoe gi grani na joe papa nanga mama efoe den na kresten di e gi wan boen eksempel. Memre toe, taki a tranga leri nanga tiri di den papa nanga mama foe joe e gi joe, no de foe skotoe joe foe soso. Na presi foe dati den de foe kibri joe so taki joe kan „tan libi”. — Odo 7:1, 2.
19 Fa na osofamiri de foe dati ede, wan lobi seti! Te trowmasra, wefi nanga pikin alamala e waka baka den lin foe Gado gi na osofamiri libi, dan na oso e tron wan lanpresi pe joe kan kisi kowroe-ati. Ma tokoe, problema di abi foe doe nanga komunikâsi èn a gi skoro na pikin kan opo ede kon. Na tra artikel foe wi, e froeteri fa wi kan loesoe wan toe foe den problema disi.
Joe e memre disi ete?
◻ Sortoe eksempel trowmasra, wefi nanga pikin di ben e frede Gado, ben gi ini bijbelten?
◻ Sortoe leti a krestendom ben trowe na tapoe a ròl foe a trowmasra?
◻ Sortoe ròl a wefi moesoe plèi ini a kresten osofamiri?
◻ Fa kresten jongoesma kan jepi foe sani waka boen ini na osofamiri?
[Prenki na tapoe bladzijde 20]
„Noti ini a krestendom ben loekoe moro ongewoon èn moro krasi, te joe ben teki dati gersi nanga den takroe moraal foe a ten dati, leki a fasi fa kresten e si a trowlibi. . . . [A] ben opo wan njoen pisi ten gi a libisma famiri”
[Prenki na tapoe bladzijde 21]
Kresten trowmasra e gi den wefi foe den deki-ati foe den taki foe den firi di den abi èn e hori den firi dati na prakseri