Kownoekondre preikiman e froeteri
Den ben kenki den fasi foe libi
DEGEDEGE no de taki joe si dati den e taki nanga trawan na strati, e fisiti sma oso-foe-oso, noso e go na kresten konmakandra ini den Kownoekondrezaal foe den. Wi e taki foe den jongoe wan foe Kotoigi foe Jehovah di weri krosi na wan boen fasi. A kande taki joe kisi a prakseri dati den na Kotoigi foe di den papa nanga mama ben leri den foe de dati, èn dati de so nanga foeroe foe den. Na a trasei, joe abi wan toe foe den jongoesma disi di abi wan heri tra background èn di a fosi fasi foe libi foe den ben de krinkrin trafasi leki a fasi fa den e libi now. Te joe loekoe en boen, den wan di den e sori na a bladzijde di e kon, den ben gwenti foe de nanga groepoe pe ogridoe nanga a fowtoe gebroiki foe drugs ben de wan sani di ben pasa ala dei. San meki den kenki a libi foe den so krinkrin? Meki wi fisiti wan foto ini Norweige èn miti wan toe foe den jongoesma di tjari den sortoe kenki disi kon.
A fondamenti gi a kenki
Di toe Kotoigi miti Annette ini na oso-foe-oso wroko, a ben abi 19 jari. „Foeroetron sma ben taigi mi foe no taki noiti nanga Jehovah Kotoigi, ma mi ben e angri foe sabi sani, èn ben kari den kon na inisei”, a e memre. A ben de wan sma di ben gebroiki drugs sensi di a ben abi 11 jari èn ben abi prati ini difrenti broko di den ben broko go na ini oso foe sma èn ini a foefoeroe foe oto.
A boen njoensoe foe a Kownoekondre ben wroko na ini en ati. Spesroetoe a howpoe foe na opobaka ben gi en deki-ati, foe di a ben lasi en mama di a ben abi feifi jari. So boen a ben teki wan fri bijbelstudie èn ben bigin kon na den konmakandra na a Kownoekondrezaal. A ben froeteri en freiri nanga trawan san a ben e leri. San den ben doe na tapoe dati? Den no ben wani abi noti foe doe nanga disi èn ben iti fowtoe na Annette tapoe taki sma ben e drai en ede krinkrin. Tokoe, wan toe foe den di ben opo densrefi moro den trawan ben bigin bakaten foe studeri na bijbel.
Leki wan eksempel, teki Espen, wan jonkoeman foe 20 jari. A ben jere foe a Kownoekondre boen njoensoe foe Annette en freiri èn wantewante a ben wani wan bijbelstudie. Ma, a ben wakti foe go sidon fo moen na doengroe oso, foe di a ben abi prati ini a smokkel foe drugs èn, neleki Annette, ini difrenti broko di den ben broko go na ini sma oso. A ben de wan sma toe di ben gebroiki tabaka, marihuana nanga tra drugs. Now, san ben kan meki wan sma di ben abi prati ini den sortoe sani disi wani foe bigin wan bijbelstudie? Espen ben bigin foe froestan a leigi di en fasi foe libi ben leigi èn taki a no ben abi wan marki ini en libi. So boen mi ben bigin foe studeri foe kon sabi efoe den ben froeteri mi a waarheid.”
Trawan wani studeri a bijbel
Na a ten disi, wan jonkoeman foe na srefi groepoe foe jongoe sma ben kon kisi foe jere a boen njoensoe èn en toe ben bigin foe studeri èn foe fisiti den konmakandra. Bakadati, wan studi ben bigin nanga ete wan foe den jongoewan disi, èn a ben bigin foe fisiti den konmakandra. Sjatoe na baka, ete wan tra jonkoeman ben moksi ensrefi na den mati foe en foe studeri a bijbel èn go na fesi na jeje fasi. Di den mati foe en ben tjari kenki kon, dan dati, ben abi so wan krakti na tapoe ete wan tra jongoewan ini a srefi groepoe èn a no kisi langa, dan a ben wani foe studeri a bijbel.
Gilbert, wan jongoe pokoeman foe a srefi groepoe, bigin now foe studeri a bijbel. En papa nanga mama ala toe ben dede foe kanker ede, so boen na bijbel howpoe foe na opobaka ben gi en trowstoe (Johanes 5:28, 29). En toe ben e gebroiki marihuana èn ben e libi wan jajo libi, èn a ben feti na baka foe tron wan rockpokoeman di abi barinen. Ma, di ten ben pasa, a ben go moi na fesi na jeje fasi èn heri esi a ben gi ensrefi abra foe tron wan Kotoigi foe Jehovah. Te foe kaba, Espen en moro jongoe brada ben bigin foe ondrosoekoe a bijbel èn foe moksi ensrefi nanga den Kotoigi.
Bijbel waarheid e kenki libi
Wan bigi kenki ben feni presi ini den jongoesma disi di ben gwenti foe weri dotidoti krosi, di ben abi wiwiri di no kan èn di abi foe doe nanga drugs, foefoeroe foe sani, nanga tra orgidoe. Annette na wan toemoesi boen preikiman foe a Kownoekondre èn a dini leki pionier so wan jari langa. Espen nanga Gilbert dini leki jepipionier èn den de so srefi dinari ini a diniwroko. Den ala toe trow na ini a kresten gemeente. Fo sma moro foe a groepoe foe fosi de so srefi fajafaja Kownoekondre preikiman!
Fa foe na fo-moen sidon di Espen ben moesoe go sidon na ini doengroe oso? Foe den kenki disi di a ben tjari na ini en libi, den ben kenki a strafoe foe en kon ini 80 joeroe foe wroko na poebliki. Nanga na agri di skowtoe nanga trawan ben agri nanga dati, a ben gebroiki den joeroe disi foe wroko na a Kownoekondrezaal foe Jehovah Kotoigi ini a birti dati. Den skowtoe ben prisiri srefisrefi nanga a seti disi.
Ija, foeroe tra jongoesma na heri grontapoe abi wan background foe ogridoe. Ma na waarheid foe a Wortoe foe Gado gi den piki tapoe prenspari aksi èn wan seiker howpoe gi a ten di e kon. Dati ede meki den no de moro langa nanga ogridoeman noso sma di e gebroiki drug, èn den no e go waka lontoe nanga krosi di dotidoti. Foe di den kenki a fasi foe libi foe den, den de soifri neleki den sma di den kari na tapoesei — jongoe Kotoigi foe Jehovah di e weri boen krosi en di e wroko tranga. Den wani foe meki trawan kon sabi a bijbel loesoe, di e tan, foe den problema di someni jongoesma abi ini a ten disi. — Loekoe 1 Korentesma 6:9-11.