„Kownoekondre Preikiman” doronomo e waka nanga boto ini den foeroe watra foe Gajana

GAJANA.a Na Ingi wortoe disi wani taki „kondre foe watra”. Fa dati na wan joisti fasi foe taki foe a gron foe a wan enkri Ingrisitongo kondre disi ini Zuid-Amerika. Foeroe liba nanga den anoe foe den, e koti dwarsi pasa ini a kondre komoto foe den heipresi foe Gajana èn den e meki kronkron pasi na ini a tropis boesi go na a Atlantis Se. Den watrapasi disi, na prenspari pasi foe den foeroe dorpoe kan miti makandra èn so srefi den gron, pe boeroe abi den meti foe kweki èn di didon panja-panja na den sjoro foe den.

Jehovah Kotoigi ini Gajana e froestan taki di Jesus ben taki na fesi dati „a boen njoensoe disi foe a kownoekondre ben sa preiki na heri grontapoe lontoe leki wan kotoigi gi ala nâsi”, dati ben sa wani taki toe foe preiki a boen njoensoe gi den sma di e libi ini den kontren disi na libasei (Mateus 24:14). So boen, jari langa, groepoe foe Kotoigi, foeroe foe den ben de pionier, gebroiki boto, bigiwan nanga pikinwan, foe waka nanga boto doronomo ini den watra foe Gajana foe tjari a boen njoensoe gi den sma.

Foe jepi nanga a wroko, a Waktitoren Genootschap na Gajana bigin gebroiki, te nanga a ten disi, feifi oedoe boto di den ben kari Kownoekondre Preikiman 1 te nanga Kownoekondre Preikiman 5. Disi na oedoe boto di langa 7 meter, di opo na tapoesei èn na ondrosei foe den boto wroko skoinsi go na ondro ini wan penti, oedoe boto di sma ben kari balahoos, di wan Kotoigi famiri ben bow èn ben ondrow. Nanga wan waran firi den Kotoigi foe Gajana e sori go na den toe fosi boto leki Preikiman, di den no e gebroiki moro, baka di den ben doe dienst tintenti jari langa. Ma den nomroe 3, 4 nanga 5, e wroko tranga ete na Pomeroon, Mahaica nanga Demerara liba.

Tapoe Demerara liba

Na Ingrisikondre nanga tra kondre foe Europa, a wortoe „demerara” kan tjari ini wan sma prakseri wan gowtoe-broin kloroe, kristal foe ken-soekroe, spesroetoe di foe den pranasi di de langalanga na sei a liba disi di lai nanga tokotoko èn santi. Na a westsei libakanti, a pasi di e waka na a sjoro, e go te pe a ken pranasi e stop. Boiti dati, den Kotoigi no man tjari a switi boskopoe foe a Kownoekondre foe Jehovah go na den sma di e libi na libakanti — Hindoe, Moeslim, nanga den sokari kresten, sondro a Kownoekondre Preikiman boto.

Preikiwroko na tapoe Demerara liba kan de wán dei rèis noso a kan teki wan toe wiki, foe go foe lanpresi na lanpresi, foe mamanten te neti. Te den moesoe tan sribi, a no bori nanga njanjan wawan den pionier e doe ini a boto, ma den e sribi na ini en toe. Te neti e fadon, den e tai a Preikiman na wan mangrobon noso den e tjari en na seisei foe wan lanpresi ondro wan dak efoe dati de. Toe isri tiki, di langa 2,5 meter den e poti leti-opoe na a boto-ede èn na a botolasi. Wan titei e tai boen steifi dwarsi na tapoesei foe den tiki disi di tanapoe leti-opoe èn wan bigi tapoe-oli (pela) e bradi na tapoe dati foe meki wan dak noso wan afdaki. Oedoe planga e doe wroko leki bedi èn wan deiken nanga wan laken e gebroiki leki matrasi. Awansi fa no fa, sribi e kon esi-esi baka wan langa dei.

„Joe e wasi ini a tokotoko watra?” den ben aksi den pionier.

„No efoe a kan tra fasi!” na so den e piki. „Ibri joeroe te wi e pasa wan kriki nanga krin watra, wi e foeroe den baki foe wi nanga watra foe e bori, dringi nanga wasi.”

A horidoro foe den ben kisi foeroe moi ondrofenitori leki pai. Na wán okasi, wan man ben kon na a lanpresi, a ben tanapoe nanga en foetoe pikinso bradi foe makandra, en anoe na en sei èn ben e loekoe wi nanga foeroe belangstelling. „Kownoekondre Preikiman 5”! A ben leisi a nen, na a fesisei foe a boto, nanga wan tranga sten. „Oenoe moesoe de Jehovah Kotoigi. Oenoe wawan e gebroiki a wortoe ’kownoekondre’ na a fasi disi. Oenoe abi oen Kownoekondre Zaal èn now Kownoekondre Preikiman.”

Foe Gilead go na Pomeroon

Wroko na Pomeroon liba de pikinso tra fasi, so leki Frederick McAlman e memre dati. Wán jari baka di a ben komoto na a Waktitoren Bijbel Skoro Gilead ini 1970, a ben kon na Charity, wan pikin pranasi kondre na a liba di didon 34 kilometer go na ini a kondre na a owstoe bangi foe Pomeroon liba, pe wan groepoe foe feifi Kownoekondre preikiman ben de.

„Feifi jari langa wi ben abi a ’grani’ foe pari Preikiman 2 go-kon tapoe Pomeroon liba bifo den ben kisi wan siksi-PK buitenboord motor, di ben gebroiki kaba”, na so brada McAlman ben e froeteri. „Ala di wi e pari go na a sei pe a watra e lon go, wi ben e preiki go na bilosei foe na owstoe libakanti te leki wi ben miti Hackney, 11 kilometer foe a bigin foe a se mofo. Drape wi ben sa kisi wan boen neti sribi na a oso foe sisa DeCambra, na oema di e gi jepi te wan pikin moesoe gebore èn di ben e jepi ini a kontren na a pisi ten dati. A tra mamanten froekoe, wi ben sa saka go moro fara na a liba mofo bifo wi koti abra go na a west bangi. Dan wi ben sa wroko a pasi foe wi go 34 kilometer baka na Charity.”

A siksi-PK motor ben doe boen wroko gi den so wan tin jari langa. Dan, ini 1986, wan njoen 15-PK model ben kon na en presi. Baka wan getrow diniwroko na Pomeroon liba moro leki 21 jari, brada McAlman kan loekoe, nanga wan boen firi taki a doe wan sani na a njoen Kownoekondre zaal di bow na Charity, di a gemeente foe 43 preikiman, di kon foe oposei nanga bilosei foe a liba, e gebroiki now. A gemiddelde nomroe foe sma di e fisiti den konmakandra pasa 60 èn na a Memrefesa foe a dede foe Jesus Krestes ini 1992, den ben abi wan ipi sma foe 190!

Den rèis di zendeling meki go na boesi

Ini den lasti jari a Waktitoren Genootschap ben e horibaka doronomo gi den waka foe zendeling te dipi na ini a boesi. Nanga jepi foe boto di ben abi buitenboord motor, friwani wrokoman di ben de klariklari foe doe sani foe tesi a prisiri foe tjari a boen njoensoe go gi sma di e libi na den Ingikondre èn pe den e kapoe oedoe èn na pranasi di de pe sma no man go koemakriki ini den fara watrapasi foe a boesikondre. Troetroe pionier, na den abi a grani foe tjari a „nen foe Jehovah” di e kibri libi foe a fositron gi den farawe presi disi (Romesma 10:13-15). Den brada abi foe horidoro ondro foeroe pina, sontron ala di den moesoe waka nanga den boto na den watrapasi dri heri dei langa, foe kan miti sonwan foe den presi disi.

Den sma di e go na den zending rèis disi moesoe òfer den koemakriki sani foe oso, nanga a kefar taki den kan kisi den siki leki malaria èn den e horidoro ondro den risiko foe a boesi libi. Ma denwan di tan na oso e tjari òfer toe. Famiri e misi den lobiwan foe den, sontron wiki langa. Gemeente moesoe tan sondro den owroeman nanga tra jonkoeman, so taki ini son kefal, den libi soso wan brada na baka foe loekoe den fanowdoe foe a gemeente. Ma, fa a de wan prisiri èn e gi deki-ati te a gemeente e jere den ondrofenitori, di e gi tranga, te den drai kon baka! Te joe teki den prisiri gersi nanga den òfer dan den òfer gersi leki den de soso sani.

Den Kownoekondre preikiman di e go nanga boto doronomo tapoe den foeroe watra foe Gajana nanga a boen njoensoe, e njanboen foe wan troetroe ondrofeni. Makandra nanga den kompe wrokoman na heri grontapoe, dan nanga deki-ati èn nanga friwani den e „òfer wan srakti ofrandi foe prèise gi Gado, dati na, den froktoe foe den mofoboeba foe wi di e meki en nen bekènti na poebliki”. — Hebrewsma 13:15.

[Foetoewortoe]

[Prenki na tapoe bladzijde 32]

Kroektoe-anoesei: Preiki na wowojo dei

Tapoesei: Takimakandra foe a boen njoensoe na Demerara liba

Tapoesei na leti-anoesei: Wan groepoe foe zendeling e pari go baka na den kampoe