A banti foe a trowlibi di e kon swaki moro nanga moro
WAN jongoe mama ben brasa èn bosi a beibi foe en di ben abi toe moen. Ne, wantronso, neleki a kisi wan winti, a trowe a beibi na gron. A boi dede wan toe joeroe na baka. „Na foe espresi mi trowe en na gron”, a mama ben taki, „bika a masra foe mi no e ke nanga en osofamiri”. Na presi foe taki foe na afersi nanga en masra, a mama loesoe en atibron na a beibi tapoe di no ben abi noti foe doe nanga a tori.
No foeroe mama sa go doe so wan toemoesi aparti sani di na oema ben doe, ma foeroe foe den abi densrefi firi leki na oema. Moro nanga moro a kon moeilek gi trowpaar foe meki a trowlibi foe den waka boen. „Te na okasi foe abi wan boen trowlibi de nètso pikin leki fa a de na Verenigde Staten ini a ten disi”, a Journal of Marriage and the Family e taki, „dan foe meki wan dorodoro tranga banti de ini a trowlibi . . . de so wan kefarlek sani, taki kwetikweti no wan sma di abi froestan sa doe en”.
Ini den broeja ten disi, hoeroedoe, na agri di sma no man agri nanga makandra, paiman, trobi nanga famiri foe a trowpatna, nanga a prakseri di sma e prakseri densrefi nomo, ala den sani disi e meki moro feti kon ini na osofamiri libi, di e kaba toemoesi foeroe nanga trow di e broko. A situwâsi na Japan de so serjoesoe taki srefi a Lomsoe Kerki, di sma sabi foe a fasti bosroiti di a e teki kontrari brokotrow, ben moesoe poti wan spesroetoe komte foe meki afersi moro makriki gi kerki memre di brokotrow èn di trow baka. Problema di abi foe doe nanga brokotrow abi krakti na tapoe wan nomroe, di e gro nomo, foe sma di e go na kerki.
Ma a nomroe foe brokotrow e sori soso pikinso foe wan problema di bigi srefisrefi. Sani di sma ondrosoekoe na Verenigde Staten e sori taki a de a waarde foe a trowlibi srefi, di e go na baka, di e meki sma brokotrow moro esi, na presi foe soso den sani ini a sociaal libi, di e meki a broko di sma e brokotrow moro makriki. Nanga moro mendri moeiti èn nanga wan banti di e kon moro swaki, a trowlibi e lasi a moi di a sori so moi. Foeroe sma e tan doe neleki den de wan trowpaar, ma den no e prati a sribikamra nanga makandra èn pikinmoro noiti den e taki nanga makandra. Wan toe sma abi a srefi firi leki wan oema foe wan Farawe Owstoesei kondre, di ben bai en eigi grebi di no de nanga trawan, ala di a e taki: ’Mi e weigri foe de nanga mi masra ini a grebi.’ Foe di a no man brokotrow nanga en masra now, a e proeberi foe brokotrow baka te a dede. A de wan sari taki, ala di den sortoe sma disi no brokotrow, a trowlibi no de wan fonten foe kolokoe gi den.
Dati ben de a kefal nanga Isao. A ben trow nanga en wefi, foe di a ben kisi a firi wantronso, so boen no wan sani ben boeweigi en foe kenki a fasi fa a ben libi ala di a ben prakseri ensrefi nomo. Ala di a ben wroko foeroe moni leki wan man di ben e rèi truck, a ben froemorsoe ala moni di a ben meki nanga njanjan èn dringi èn a no ben sorgoe gi en osofamiri. A bakapisi ben de taki den trobi di a ben kisi nanga en wefi, ben go nanga langa. „Ibritron te sani no ben waka so boen gi mi”, Isao e memre, „mi ben go na oso èn mi ben loesoe mi atibron na tapoe mi osofamiri”. Neleki wan bigi faja di sma no man kiri, a tori foe brokotrow ben opo ede kon aladei.
Foeroe man nanga oema e horidoro na ondro wan trowlibi di no boen. Efoe den e brokotrow efoe no, den no e feni kolokoe. Wan fasi de gi den foe meki a trowlibi foe den waka boen? San sma kan doe foe meki a banti ini a trowlibi foe den kon moro tranga?