Fa foe meki a banti ini a trowlibi kon moro tranga
DEN Fariseiman, di ben proeberi foe tjari a Moro Bigi Leriman, Jesus Krestes, kon na ini wan trapoe, ben aksi: „Wan man abi pasi foe brokotrow nanga en wefi tapoe a gron foe ibri sortoe sani?” A ben piki den nanga a sori di a ben sori den tapoe a fosi libisma trow èn a ben meki wan markitiki gi na afersi disi bekènti: „San Gado tjari kon na wán, meki no wan sma prati foe makandra.”
Den Fariseiman ben strei taki Moses ben seti sani foe broko wan trow, foe di a ben taki foe gi a wefi „wan papira taki a kan gowe”. Jesus ben piki den: „Moses ben gi oenoe pasi foe broko a trow nanga oen wefi, foe di a ben hori a tranga-atifasi foe oenoe na prakseri, ma disi no ben de so ini a bigin. Mi e taigi oenoe taki a sma di e brokotrow nanga en wefi, boiti tapoe a gron foe hoeroedoe, èn e trow wan trawan, e doe soetadoe.” — Mateus 19:3-9.
Ini a bigin, a ben de a prakseri taki a trowlibi ben moesoe de wan froebontoe di ben moesoe tan foe ala ten. Srefi dede no ben sa prati a fosi trowpaar, bika Gado ben meki den leki volmaakti libisma di ben abi têgo libi na den fesi. Ma den ben sondoe. A sondoe foe den ben pori a trowlibi foe libisma. A feanti dede ben bigin prati trowpaar. Gado e si dede leki a kaba foe a trowlibi, so leki wi e leisi ini bijbel: „Wan wefi tai ala den dei di a masra foe en de na libi. Ma efoe a masra foe en sa go sribi ini dede, a fri foe trow nanga soema a wani, ma soso ini Masra” (1 Korentesma 7:39). Disi de heri tra fasi leki den sortoe kerki prakseri leki sutti, pe sma soekoe foe overtoigi noso dwengi a wefi na a ten foe a dede foe a masra, foe bron ensrefi kiri ini a bribi taki a trowfroebontoe e go doro ini wan sortoe libi baka dede.
Sani di a Wet foe Moses seti
Di a Wet foe Moses ben gi, a matifasi ini a trowlibi ben go so foeroe na baka taki Jehovah, foe di a ben hori a tranga-ati foe den Israèlsma na prakseri, ben seti sani taki sma kan broko wan trow (Deuteronomium 24:1). A no ben de a prakseri foe Gado taki den Israèlsma ben sa meki wan fowtoe gebroiki foe a wet disi, foe broko a trow nanga den wefi foe den leki wan bakapisi foe ala sortoe pikin fowtoe, so leki a de krin foe si na a komando foe en taki den ben moesoe lobi den kompe neleki densrefi (Levitikus 19:18). Srefi wan papira foe brokotrow di den ben gi, ben de leki wan sani foe skreki den, bika leki wan pisi foe a tori foe skrifi a papira, a masra di ben wani broko a trow, ben moesoe go soekoe rai na man di ben de serjoesoe èn di den ben poti foe handri den tori disi, èn di ben sa doe moeiti foe meki den toe sma kon boen baka nanga makandra. Nôno, Gado no ben gi a wet disi foe horibaka gi sortoe reti toe foe wan man broko a trow nanga en wefi „tapoe a gron foe ibri sortoe sani”. — Mateus 19:3.
Ma den Israèlsma te foe kaba no ben arki san a wet ben wani taki troetroe èn den ben meki wan fowtoe gebroiki foe a pisi disi foe a wet foe kisi brokotrow tapoe ala sortoe gron di den ben feni boen. Na a ten foe a di foe feifi jarihondro bifo Gewoon Teri, den ben handri na wan triki fasi nanga a wefi foe den jongoe jari, foe di den ben brokotrow nanga den tapoe a gron foe ibri sortoe sani. Na wan krakti fasi Jehovah ben taigi den taki, a no ben wani si brokotrow na ai (Maleaki 2:14-16). A ben de nanga den sani disi na prakseri taki Jesus ben kroetoe brokotrow, so leki fa den Israèlsma ben e doe en ini en ten.
A wan enkri gron foe brokotrow, di wet e horibaka gi
Ma Jesus ben kari wán gron foe brokotrow, di a wet e hori baka gi: hoeroedoe (Mateus 5:31, 32; 19:8, 9). A wortoe di den vertaal dja nanga „hoeroedoe” wani taki ala sortoe sekslibi di no mag na dorosei foe bijbel trow, efoe a de now na mindri man nanga man noso oema nanga oema, noso wan man nanga wan oema, noso nanga wan meti.
Na so Jesus no ben rikomanderi toe foe brokotrow nanga wan patna di no de getrow. Na a patna di no abi fowtoe moesoe wegi den bakapisi di de ini a tori, go-kon èn teki a bosroiti efoe a wani broko a trow. Wefi di e prakseri foe brokotrow tapoe a bijbel gron disi, sa wani foe hori na prakseri toe san Gado ben taki di a leisi strafoe gi a fosi oema foe a sondoe di a ben doe. Boiti a dedestrafoe, Gado ben taigi Eva spesroetoe: „Joe tranga lostoe sa de gi a masra foe joe, èn a sa basi joe” (Genesis 3:16). Commentary on the Old Testament, di C. F. Keil nanga F. Delitzsch skrifi, e taki foe a „tranga lostoe” disi leki „wan lostoe di de pikinmoro leki wan siki”. Wi moesoe erken taki a no na ala wefi, a tranga lostoe disi de so tranga, ma te wan wefi di no abi fowtoe e prakseri foe broko wan trow, a ben sa de wan koni sani te a e hori na emotioneel fanowdoe di oema kisi foe Eva, na prakseri. Ma foe di a sekslibi, di a patna di abi fowtoe ben abi dorosei foe a trowlibi, kan meki taki a patna di no abi fowtoe kisi wan siki nanga jepi foe seks, pe joe abi na ini toe AIDS (SIDA), meki sonwan foe den ben bosroiti foe broko a trow so leki fa Jesus ben tjari kon na krin.
Fa problema ini na osofamiri bigin
A tranga-atifasi foe sma bigin nanga a sondoe di a fosi libisma paar sondoe na Gado (Romesma 5:12). Trobi ini na osofamiri ben bigin di a fosi libisma paar ben sondoe na den hemel Tata. Fa so? Di a sneki ben kori a fosi oema, Eva, foe njan foe a bon ala di a no ben mag njan, Eva ben go langalanga na a bon èn a njan a froktoe. A ben de soso baka di a ben teki a prenspari bosroiti dati, taki a ben taki nanga en masra san a sneki ben taigi en (Genesis 3:6). Ija, a ben doe wan sani sondro foe go aksi rai na en masra. Dja joe abi a fosi model foe problema di foeroe osofamiri ini a ten disi e tanapoe na fesi — a misi di den e misi foe abi wan ati-foe-ati komunikâsi nanga makandra.
Baka ten, di Adam nanga Eva ben tanapoe na fesi den bakapisi foe a sondoe foe den, den ala toe ben gebroiki densrefi taktik di foeroe paar e gebroiki ini a ten disi te den kon ini problema, dati wani taki, foe gi trawan a fowtoe. A fosi man, Adam, ben gi en wefi èn Jehovah toe a fowtoe di a ben meki, di a ben taki: „Na oema di joe ben gi foe de nanga mi, na en ben gi mi a froktoe foe a bon èn foe dati ede mi njan.” Na oema foe en sei ben taki: „A sneki — na en bidrigi mi èn foe dati ede mi njan.” — Genesis 3:12, 13.
A strafoe di Jehovah ben leisi gi Adam nanga Eva ben sori na fesi wan tra sani ete foe den problema di ben sa kon. Ini a tori foe a matifasi foe en nanga en masra, Jehovah ben taigi Eva: „A sa basi joe.” Foeroe masra ini a ten disi, neleki Isao di wi ben kari ini a fosi artikel, e basi den wefi foe den na wan grofoe fasi sondro foe hori den firi foe den wefi foe den na prakseri. Tokoe foeroe wefi e tan abi wan tranga lostoe foe kisi a prakseri di a masra moesoe abi gi den. Te a tranga lostoe dati no e kisi satisferi, a wefi sa kan aksi nanga tranga foe a masra poti a prakseri dati na en tapoe èn a kan doe wan sani di e sori taki a e prakseri ensrefi nomo. Foe di foeroe masra e basi den wefi èn foe di foeroe wefi abi a tranga lostoe gi a masra foe den, meki a prakseri di den e prakseri densrefi nomo e tiri den, èn vrede no de foe feni moro. Ini wan raport di den ben tjari kon na doro èn di nen „Fa foe ondrosoekoe brokotrow ini a ten disi”, a man Sjoensoeke Serisawa ben taki: „Efoe wi e loekoe pasa a moro prenspari problema di abi foe doe nanga a tori disi, dati wani taki dati sma abi a firi foe poti den eigi belang na a fosi presi, dan wantronso a no ben sa kan moro foe ondrosoekoe brokotrow ini a ten disi.”
Ma Jehovah ben gi tiri ini en Wortoe, so taki trowpaar di e gi jesi kan njanboen foe wan pisi kolokoe ini a trowlibi, srefi ala di den de ini na onvolmaaktifasi foe den. Isao ben waka baka a tiri foe Gado èn now a e njanboen foe wan kolokoe osofamiri libi. Meki wi go loekoe fa bijbel gronprakseri e jepi sma foe meki a banti ini a trowlibi kon moro tranga.
Taki nanga makandra foe seti afersi
Ini foeroe trowlibi, a mankeri foe komunikâsi, a fasi foe gi a trawan a fowtoe, nanga den fasi foe prakseri densrefi nomo, e meki a de moeilek gi masra nanga wefi foe froestan den firi foe makandra. „Foe di a taki di sma moesoe taki foe den firi foe den nanga makandra na a fosi sani di moesoe doe, dan foe de krosibei foe makandra wani taki froetrow makandra dorodoro. Èn ini a ten disi sma no e froetrow makandra foeroe”, Caryl S. Avery, wan oema di e ondrosoekoe sani, e taki. Ala den moro dipi firi di den taigi makandra, e bow so wan froetrow. Disi e aksi wan ati-foe-ati komunikâsi na mindri masra nanga wefi.
Odo e gebroiki wan agersitori foe gi deki-ati na so wan taki nanga makandra foe dipi prakseri, te a e taki: „Rai ini na ati foe wan man de leki dipi watra, ma a man di abi a koni foe si sani na a wan di sa tjari en kon na tapoesei” (Odo 20:5). Trowpatna moesoe abi a koni foe si sani èn tjari den prakseri di de dipi inisei foe na ati foe a patna foe den, kon na tapoesei. Kon wi taki dati a patna foe joe mandi. Na presi foe piki: „Misrefi ben abi wan moeilek dei”, foe san ede joe no e aksi na wan switifasi: „Joe ben abi wan moeilek dei? San pasa?” A kan teki ten nanga moeiti foe arki a trowpatna foe joe, ma nofotron a e gi moro prisiri, satisfaksi èn ten e wini, foe gi ten na a patna foe joe na a fasi dati, leki te joe no abi bisi nanga en èn kisi foe doe nanga firi di span èn di kan bòs baka ten.
Foe kisi froetrow, ibriwan foe den moesoe de eerlijk èn proeberi foe taki foe den firi foe den na wan fasi di a tra patna kan froestan. „Taki waarheid”, Gado Wortoe e gi deki-ati foe doe, „bika wi na memre di de foe makandra” (Efeisesma 4:25). A taki foe waarheid e aksi foe wan sma, taki a abi a koni foe si sani. Kon meki wi taki, dati wan wefi abi a firi taki a masra no e arki en. Fosi a e taki, meki a poti en prakseri na tapoe na odo: „Wan sma di no e taki sani esi-esi abi koni, èn wan man di abi a koni foe si sani abi wan safri jeje” (Odo 17:27). Na presi foe a gi a masra foe en fowtoe nanga den wortoe: „Noiti joe e arki mi!”, a ben sa de troetroe moro boen foe a taki na wan safri fasi foe den firi foe en, bifo broeja nanga froewakti di no kon troe, e gro kon na ini en. Kande a ben sa kan sori fa a e firi, foe di a e taki wan sani leki: „Mi sabi taki joe abi foeroe foe doe, ma foe de pikinso moro nanga joe ben sa meki mi toemoesi kolokoe.”
Foe troe, „plan no sa waka boen pe no wan froetrow takimakandra no de” (Odo 15:22). Joe patna lobi joe, ma dati no wani taki dati a kan leisi joe prakseri. Na wan switifasi joe moesoe meki joe patna sabi fa joe e firi. Disi sa jepi oenoe, leki wan kresten trowpaar, foe tjari kenki kon na wan lobifasi foe „meki a wánfasi foe a jeje kon, ini a banti foe vrede di e tjari sma kon na wán”. — Efeisesma 4:2, 3.
Teki Kasoewo foe eksempre, di ben de wan masra di ben meki a wefi foe en prei en basi èn di ben abi wan tranga lostoe gi dòbel. Te foe kaba paiman ben kon lai te na en noso èn den ben kren kon hei te wan toe hondrodoesoen koloe. Di a ben leni moni foe pai den paiman foe en, a ben soengoe go moro dipi ini paiman. Ne a bigin studeri bijbel èn te foe kaba a ben feni a deki-ati foe froeteri en wefi foe den problema foe en. A ben sreka ensrefi foe teki den fowtoe di en wefi ben o gi en foe a tori. Ma a ben froewondroe di en wefi, di ben studeri bijbel moro langa, ben piki na wan safri fasi: „Meki wi proeberi foe go loekoe fa wi kan pai den paiman.”
A tra dei foe en, den ben bigin fisiti den sma di den ben leni moni foe den èn den bigin pai den paiman foe den, den ben seri na oso foe den srefi. A ben teki pikinmoro wán jari foe pai den paiman. San ben meki Kimie, en wefi, kon kenki? A ben taki: „Den wortoe di mi ben feni ini Filipisma kapitel 4, vers 6 nanga 7, troe srefisrefi. ’No broko oen ede foe no wan sani, ma meki ini ala sani nanga jepi foe begi èn geme makandra nanga taki tangi, joe tranga begi kon bekènti na Gado èn a vrede foe Gado di pasa ala prakseri sa kibri oen ati nanga oen jeje koni nanga jepi foe Jesus Krestes.’” A ben taki moro fara: „Wan mati foe mi, di ben froewondroe foe si omeni prisiri mi ben abi, ala di problema ben de, bigin studeri bijbel nanga mi.” Kasoewo nanga en wefi dopoe sensi a ten dati èn now den e njanboen foe wan kolokoe osofamiri libi.
Boiti taki den ben froetrow makandra foe di den ben taki waarheid, den masra nanga den wefi di ben ondrofeni den sani di skrifi na tapoesei, ben doe wan sani di kan jepi trowpaar foe loesoe den problema foe den ini a trowlibi. Den ben taki nanga a Sma di poti a seti foe a trowlibi, Jehovah Gado. Nanga ala druk nanga problema di trowpaar e miti, a sa blesi den nanga a vrede foe Gado di e pasa ala prakseri, efoe den e doe ala san den man foe poti den gronprakseri foe en ini den libi èn foe libi ala den tra sani na ini en anoe. Foe begi nanga makandra na wan spesroetoe jepi. A masra moesoe teki fesi èn ’tjari san de ini en ati’ kon na fesi Gado, èn a e soekoe en tiri na ini ala problema di en nanga en wefi e miti (Psalm 62:8). Jehovah Gado seiker sa arki den sortoe begi dati.
Ija, a kan foe meki a banti ini a trowlibi kon moro tranga. Srefi now, ala di wi e libi nanga ala wi onvolmaaktifasi ini wan broeja libimakandra, tokoe trowpaar kan feni nofo prisiri ini a matifasi foe den. Joe kan feni moro praktis rai di e kon foe Gado ini a boekoe Bow wan kolokoe osofamiri, di a Watchtower Bible and Tract Society of New York, Inc. tjari kon na doro. Boiti dati, trowpaar di e wroko serjoesoe foe poti den gronprakseri foe bijbel ini den libi, abi a howpoe foe tai na makandra na ini lobi ini a njoen grontapoe foe Gado di sa kon heri esi.