A ben swari Jona?
BIJBEL e froeteri wi taki Jona, wan profeiti foe Jehovah, di ben libi ini a di foe neigi jarihondro bifo G.T., ben e lowe gi wan toewijzing. A teki sipi. Tapoe a rèis dati, pe wan bigi winti ben wai na a Mindrikondre Se, den sipiman trowe en ini se. „Jehovah ben meki wan bigi fisi swari Jona, so taki Jona ben kon ini den inisei pisi foe a fisi dri dei nanga dri neti.” — Jona 1:3-17.
Wan toe sma e taki: ’A no kan! No wan libisani na ini se kan swari wan libisma.’ Ma wan potfisi so boen leki wan bigi weti sarki ben sa kan doe dati. National Geographic (december 1992) ben taki foe wan tra sani di man — a walvis sarki. A moro bigi sarki di sma sabi, a kan gro kon langa 20 meter èn a e wegi 70.000 kilo.
„Na anatomie foe a freimde fasi fa a walvis sarki e njan sani, e fiti a tori foe Jona boen. A makriki foe tjari kon na ini joe prakseri, fa a bigi mofo foe wan walvis sarki e swari joe sondro foe joe sabi. . . . A mofo di lai olo-olo foe srefi wan pikin mama noso papa walvis sarki, ben kan hori makriki toe foe Jona.”
A walvis sarki e njan pikinpikin plankton nanga njanjan foe walvis, di „e spoeroe pasa na atimofo go ini a boen bigi njanjanzaal di kan bradi ensrefi èn di de a mofo foe a njanjansaka”. Ma tokoe, fa wan sma kan komoto foe drape? National Geographic e taki: „Sarki abi wan fasi di no ogri, taki den e poeroe bigi sani di den swari èn di den no de seiker taki den man njan en . . . Wan sarki kan leigi a mofo foe en njanjansaka, foe di a e drai na inisei kon na dorosei èn e poesoe en komoto na en mofo. . . . Na so joe kan grati komoto tapoe wan matamata di tapoe nanga loli, ala di joe skin lai loli, ma joe kon moro koni kande foe di joe leri wan sani foe na ondrofeni.”
Ini a ten disi walvis sarki no de foe feni ini a Mindrikondre Se, ala di den ben feni den te a noordsei foe a foto foe New York. Den ben de ini a Mindrikondre Se ini a ten foe Jona? No wan sma sabi dati seiker. Bijbel no e taki finifini sortoe mekisani foe se Jehovah ben gebroiki, ma Jesus srefi ben taki dati a tori foe Jona de troe. — Mateus 12:39, 40.
[Sma di abi a reti foe a prenki na tapoe bladzijde 32]
Norbert Wu/Peter Arnold Inc.