Kownoekondre preikiman e froeteri
Wan jonkoe man di abi fajafaja lobi gi loko, e leri sabi a waarheid
EFOE na ati foe wan sma abi a firi gi regtfardikifasi, dan Jehovah Gado, di e gebroiki Krestes Jesus èn den engel foe hemel, sa sorgoe taki so wan sma di gersi skapoe, te foe kaba sa kisi foe doe nanga a boen njoensoe foe a Kownoekondre. Baka wan pisi ten a sma dati kan kon na Jesus en reti-anoesei foe feni boen (Mateus 25:31-33). Disi ben de so nanga wan jonkoeman na Oostenrijk, di ben abi wan fajafaja lobi gi loko èn di ben kon sabi waarheid na wan toemoesi aparti fasi.
A moro span pisi foe a hobby foe a jonkoe man disi, ben de foe rèi ini a pisi foe a loko pe a tjariman e sidon, nanga a primisi foe den lokobasi. A ben poti ibri rèis na tapoe en video, so taki a ben kan loekoe en baka na en oso. Na wan rèis di a ben meki foe Wenen go na Salzburg, a tjariman foe a loko ben de wan Kotoigi foe Jehovah. A ben gebroiki na okasi foe taki foe a Kownoekondre nanga a jonkoeman di ben abi wan fajafaja lobi gi loko. Ini a bigin a jonkoeman ben froewondroe foe jere a tjariman foe a loko e taki foe Gado èn foe bijbel, ma na a ten foe a rèis a ben poti a prakseri foe en moro na tapoe den sani di ben de foe si na dorosei, leki tapoe san a tjariman foe a loko ben e taigi en.
Di a ben de na oso baka, a jonkoeman disi, di ben lobi a hobby foe en, ben loekoe den sani di a ben poti na tapoe video no soso wán tron ma tin tron, foe di a ben abi foeroe belangstelling gi a rèis disi. Foe di a ben poti den sani di a ben jere na tapoe video toe, a ben jere ibritron baka san a Kotoigi ben taigi en. Omoro a ben loekoe a video, omoro betre a ben kon froestan san a kotoigi ben taigi en. Now a bigin prakseri foe san a man ben taki èn te foe kaba a ben kon faja gi a toemoesi moi bodoi di a ben kisi foe bijbel. A ben wani sabi moro.
A ben memre a nen foe a tjariman foe a loko èn a ben sabi taki a man ben libi na wan presi na Wenen. A ben go foe dati ede na a postkantoro èn bigin drai a wan telefon-nomroe baka a trawan di ben de na ondro a nen dati ini a telefon boekoe. Na aksi di a ben poti gi den sma di ben teki a telefon, ben de: „Joe na wan tjariman foe loko?” Efoe a piki ben de nôno, dan a ben drai wan tra nomroe. Te foe kaba, a ben feni a tjariman foe a loko. A ben froeteri en a tori foe en èn taki a ben abi belangstelling gi a bijbel boskopoe di a ben jere na tapoe a video.
A Kotoigi ben seti sani nanga jepi foe a bijkantoro taki wan sma di ben libi krosibei foe a jonkoeman, ben fisiti en. A kon so taki ini a gemeente foe a presi drape, wan tra Kotoigi ben de di ben de wan tjariman foe loko toe. A tra tjariman foe loko disi, ben fisiti a jonkoeman di ben abi wan fajafaja lobi gi loko èn ben bigin wan bijbelstudie. Ini a waran pisi ten foe a jari 1991, a jonkoeman ben teki dopoe.
Jehovah, di e ondrosoekoe ala ati, ben sa moesoe si taki a sma disi ben abi wan troetroe lobi gi regtfardikifasi. Foe dati ede a ben meki a kisi kontakti nanga a waarheid foe bijbel — ala di a ben de na wan toemoesi aparti fasi. — 1 Kroniki 28:9; Johanes 10:27.
[Sma di abi a reti foe a prenki na tapoe bladzijde 31]
Nanga a primisi foe den lokobasi foe Oostenrijk