Wan tumusi prenspari video
„A video disi e poti yu na prakseri broki trutru!”
„A naki mi ati wantewante!”
„Mi krei di mi si a video disi!”
1 Na so yu ben firi tu di yu si a video Jonge mensen vragen — Hoe kom ik aan echte vrienden? (Yongu sma e aksi—Fa mi kan meki trutru mati?) Wan tu yari pasa, wan yongu brada ben abi problema na ini en libi, fu di a no ben abi bun mati. Den mati disi ben meki taki a no poti prakseri moro na a tru bribi èn taki a no ben abi wan banti moro nanga Yehovah. Ne na Echte vrienden-video kon na doro. A skrifi: „Ibri tron baka te mi ben luku a video disi, mi ai ben lon watra. Mi e taigi Yehovah tangi fu a yepi di a gi mi na a yoisti ten.” A video ben gi en deki-ati fu drai en libi èn fu suku den yoisti sortu mati. A ben taki moro fara: „A de krin fu si taki den sma di meki a video disi, sabi trutru nanga san yonguwan e broko den ede na ini a ten disi.” Papa nanga mama èn sosrefi yonguwan, a ben o bun fu luku a video disi ete wan leisi te unu e hori na osofamiri studie fu unu. Baka ibri pisi, unu kan stop a video fu hori wan takimakandra pe unu e taki krin nanga makandra fu san unu e denki fu a video. Yu kan gebroiki den aksi na ini den paragraaf di e kon.
2 Na a bigin fu a video: Suma na wan trutru mati?—Odo 18:24.
3 Sani di kan tapu yu fu tron wan mati fu trawan: San yu kan du fu no firi taki sma no wani de wan mati fu yu? (Fil. 2:4) Fu san ede yu musu de klariklari fu kon tron wan moro bun sma, èn suma kan yepi yu fu du dati? San kan gi yu na okasi fu kisi moro mati, èn pe yu kan feni den mati disi?—2 Kor. 6:13.
4 Matifasi nanga Gado: Fa yu kan kisi wan moro bun banti nanga Yehovah, èn fu san ede a bun fu du dati? (Ps. 34:8) Suma kan yepi yu fu tranga a matifasi di yu abi nanga Gado?
5 Takru mati: Suma na takru kompe? (1 Kor. 15:33) Fa takru mati kan pori a matifasi di yu abi nanga Gado? San a Bijbel tori fu Dina e leri yu?—Gen. 34:1, 2, 7, 19.
6 Wan disiten drama: Tara ben lasi-ati fu di a ben firi leki a de en wawan. Sortu krakti a firi disi ben abi na en tapu? Tara ben feni taki a de wan takru sani fu abi demakandra nanga yongusma fu grontapu? San a ben taki fu sori taki a ben abi leti? Na ini sortu kefar Tara ben kon de? Fu san ede a papa nanga mama fu Tara no ben si na ini sortu kefar a ben de? Fa den kenki a fasi fa den ben denki, so taki den ben kan yepi Tara fu kon bun baka nanga Gado? Fa wan pionier sisa sori taki a ben de wan trutru mati fu Tara? Fu san ede Kresten musu gi yesi na san skrifi na Odo 13:20 nanga Yeremia 17:9? Sortu prenspari sani Tara leri?
7 Na a kaba fu a video: San yu leri fu a video disi? Fa yu kan gebroiki a video fu yepi trawan?—Ps. 71:17.