Den prisiri trutru nanga en!

¹ Kresten osofamiri na alasei taki dati den warderi a video trutru di nen Jonge mensen vragen — Hoe kom ik aan echte vrienden? (Yongu sma e aksi—Fa mi kan meki trutru mati?) Wan papa na ini Amerkankondre ben taki dati den tu manpikin fu en ben sidon sondro fu taki wán wortu baka di den ben luku a video, bika den ben man si fa ibri sani di ben de na ini a video ben abi fu du nanga den! Wan tori fu Malawi e taki dati den yongu brada nanga sisa drape man si heri bun tu fa a video ben abi fu du nanga den, fu di den musu kakafutu gi a srefi druk na skoro leki fa a video e sori. Wan papa na ini Doisrikondre e taki fu a video: „Mi e si a video disi leki wan piki tapu den begi fu mi.” Wan yongu umapikin ben taki: „Grantangi taki yu memre mi taki Yehovah e broko en ede trutru nanga mi.” Wan owruman na ini Nyun Zeeland e fruteri: „A video ben yepi wan fu den tini fu unu fu kon baka na tapu a pasi fu libi.” Wan uma di trow kaba èn di luku a video ben taki: „Mi e winsi srefisrefi taki ibri yongu sma di de na waarheid luku a video disi èn taki a video gi den a deki-ati fu meki a waarheid tron wan pisi fu en libi.” A ben o bun efu unu leki osofamiri ben o luku a video disi baka ete wan tron. Te yu kaba luku en, dan yu kan taki makandra fu den aksi di e kon now:

² A fosi pisi fu a video: San na wan trutru mati?—Odo 18:24.

³ Sani di kan tapu yu fu tron wan mati fu trawan: San yu kan du fu no firi taki sma no wani de wan mati fu yu? (Fil. 2:4). Fu san ede yu musu de klariklari fu kweki moro bun maniri èn suma kan yepi yu fu du dati? San kan yepi yu fu tron wan mati fu trawan, èn pe yu kan feni den mati disi?—2 Kor. 6:13.

⁴ Matifasi nanga Gado: Fa yu kan tron wan mati fu Yehovah, èn fu san ede yu no e lasi yu ten te yu e du dati? (Ps. 34:8) Suma kan yepi yu fu meki a matifasi di yu abi nanga Gado kon moro bun?

⁵ Takru mati: Suma na takru kompe? (1 Kor. 15:33). Fa takru mati kan pori a yeye fasi fu wan sma? San a Bijbel tori fu Dina e leri yu?—Gen. 34:1, 2, 7, 19.

⁶ Wan disiten drama: Sortu krakti a ben abi tapu Tara taki a ben e firi ensrefi en wawan? San a ben taki fu sori taki a ben de wan bun sani fu abi demakandra nanga yongu sma fu grontapu? Na ini sortu problema a demakandra disi ben poti Tara? Fa a du kon taki a papa nanga mama fu Tara no ben man si na ini sortu problema a ben de? Toku, fa den yepi Tara fu kon bun baka na yeye fasi? Fa wan pionier sisa ben sori taki a ben de wan trutru mati fu Tara? Fu san ede Kresten musu gi yesi na san skrifi ini Odo 13:20 èn Yeremia 17:9? Sortu prenspari sani Tara ben leri?

⁷ A kaba pisi fu a video: San yu leri fu a video disi? Fa yu kan gebroiki en fu yepi trawan?—Ps. 71:17.