Schema gi a Diniwroko Konmakandra

Wiki di e bigin 8 april

Singi 39

10 min: Wan tu sani fu a gemeente. Wan tu sani di teki puru fu Wi Kownukondre diniwroko. Gi ala sma deki-ati fu luku a video Jonge mensen vragen — Hoe kom ik aan echte vrienden? (Yongu sma e aksi—Fa mi kan meki trutru mati?), fu di wi sa taki fu en na a Diniwroko Konmakandra na ini a wiki fu 22 april. Wroko nanga den rai di de na bladzijde 8 èn demo fa wi kan pristeri A Waktitoren fu 15 maart nanga Ontwaakt! fu 22 maart. Sori na ini ala den tu demonstrâsi sortu sani wi kan taki te wan sma e suku fu tapu a takimakandra, fu di a e taki: „Mi abi mi eigi kerki.”—Luku a pikin buku Fa foe bigin èn go doro nanga bijbel takimakandra, bladzijde 9, 10.

15 min: „’Fayafaya kownukondre preikiman’ Distrikt Kongres fu Yehovah Kotoigi gi a yari 2002”.a A sekretarsi musu taki fu a pisi disi. A musu poti spesrutu prakseri na paragraaf 4-11. Te a e taki fu paragraaf 3, dan a o leisi a brifi fu 15 december 2001 di abi fu du nanga a kongres. Taigi a gemeente na wan switi fasi fu bigin sreka sani gi a kongres so esi leki a kan.

20 min: „Du bun gi ala sma”.b Baka na aksi-nanga-piki takimakandra, dan taki nanga wán noso tu preikiman èn meki den fruteri san den e du fu man du moro na ini a diniwroko fu den.

Singi 157 nanga lasti begi.

Wiki di e bigin 15 april

Singi 101

10 min: Wan tu sani fu a gemeente. Moni afersi fu a gemeente.

15 min: Unu leki pionier, tan go doro fu yepi trawan. A dienstopziener e hori wan takimakandra nanga wan gemeente bukustudie-opziener, wan pionier, èn wan preikiman, pe a e poti aksi gi den. A dienstopziener e taki pikinso baka fu a Pionier e yepi trawan programa soleki fa a de na ini Wi Kownoekondre Dienst fu september 1998, bladzijde 4. Dan a e taki nanga ibriwan fu den dri sma di de nanga en na tapu a podium, fu a frantwortu di sma leki den abi na ini a programa èn fa a programa abi bun bakapisi. Kari wan tu sani di du kaba fu meki a programa disi abi bun bakapisi. A dienstopziener e gi ala preikiman deki-ati fu taigi en efu den wani fu kisi yepi na ini a diniwroko. Den wan di ben kisi yepi kaba na ini a ten di pasa, kan kisi yepi baka fu go na fesi na wan tra kontren fu wi diniwroko.

20 min: „A prisiri di a furuten diniwroko e gi”.c Gi yonguwan deki-ati fu go na ini a yepi-pionierwroko na ini den mun te den sa abi fakansi.

Singi 199 nanga lasti begi.

Wiki di e bigin 22 april

Singi 90

10 min: Wan tu sani fu a gemeente. Wroko nanga den rai di de na tapu bladzijde 8 èn meki wan dinari ini a diniwroko demo fa fu pristeri a Waktitoren fu 1 april. Meki wan sisa sori fa fu pristeri Ontwaakt! fu 8 april. Na a kaba fu ibriwan fu den pristeri, yu kan kari den bigin wortu baka di a preikiman ben gebroiki fu hari a prakseri fu na ososma.

10 min: De biten! Wan lezing. Den sani di wi e du di abi fu du nanga na anbegi fu wi èn nanga wi diniwroko, na prenspari afersi di wi musu du na „wan fasti ten” (Preik. 3:1). Wi wani nyan bun dorodoro fu den sani di seti gi wi fu dini Gado. Gemeente konmakandra nanga konmakandra gi a preikiwroko, musu bigin soifri na a yuru di ben poti gi dati. Yehovah noiti no lati nanga den sani di a e du (Hab. 2:3). Yu denki taki disi na wan kontren pe yu musu meki go na fesi? A kan taki, wanwan leisi, wan sani kan pasa di kan meki taki wan sma no man yepi taki a kon lati. Ma efu wi seti wi eigi afersi bun, dan a no musu de so taki wi abi a gwenti fu kon lati, taki wi e doro na a konmakandra baka a fosi singi nanga a fosi begi, noso baka di den brada seti ala sani kaba fu go na ini a preikiwroko. Taki fu wan tu bun fasi fa wi kan meki muiti fu kon kisi gwenti di kan yepi wi fu de alaten biten te wi musu du yeye sani.—Luku De Wachttoren fu 15 yuni 1990, bladzijde 29.

25 min: „Den prisiri trutru nanga en!”d Te yu de na paragraaf 1, dan yu kan gi den arkiman na okasi fu taki syatu fu a video Jonge mensen vragen — Hoe kom ik aan echte vrienden? Baka dati yu kan bigin wantewante nanga wan takimakandra nanga yepi fu ibriwan fu den aksi di de na ini paragraaf 2-7. Na ini yuni wi sa luku a video Onze gehele gemeenschap van broeders (A heri libimakandra fu wi brada).

Singi 191 nanga lasti begi.

Wiki di e bigin 29 april

Singi 162

10 min: Wan tu sani fu a gemeente. Memre den preikiman fu no frigiti den preikiwroko raportu fu april.

15 min: „Kownukondre preikiwroko e meki sma tan libi!”e Aksi den arkiman fa den bijbeltekst e horibaka gi a pisi tori.

20 min: Ondrosuku sani nanga yepi fu a Redeneren-buku. Wan takimakandra nanga den arkiman. Furu tron sma na ini a preikiwroko e poti aksi di yu no man feni na a bigin fu a Redeneren-buku na a pisi di nen „Hoofdonderwerpen” (Edeprakseri di de na tapu bladzijde 5-6). Na „Index” (dati de na bladzijde 439-445) kan de wan bigi yepi fu feni den pisi tori di e sori taki Bijbel e horibaka gi san wi e bribi. Aksi den arkiman fu suku a piki tapu den aksi di e kon now, fu di den e suku den wortu di skrifi skoinsi, na ini na index: Fa Kresten e prakseri fu a singi di sma e singi te den e heisi a fraga fu a kondre fu den (luku a pisi di nen Volksliederen) èn fu fraga (luku Vlaggen)? Fu san ede Gado e gi pasi meki rampu de (luku Rampen)? Fa yu ben sa fruklari san Bijbel e taki fu brokotrow (luku Echtscheiding)? Fu san ede èn o ten sisa musu tapu den ede nanga wan krosi (luku Hoofdbedekking)? Pe Moederdag komoto? Fa wi du sabi taki 144.000 na wan trutru nomru fu sma na ini Bijbel? San na agersitori fu a guduman nanga Lasarus (luku Rijke man en Lazarus) wani taki? Gi ala sma deki-ati fu wroko nanga a Redeneren-buku na ini a preikiwroko.

Singi 28 nanga lasti begi.

Wiki di e bigin 6 mei

Singi 141

10 min: Wan tu sani fu a gemeente. Taki fu a pisi tori „Tan kisi winimarki fu A Waktitoren nanga Ontwaakt!”

10 min: Seti sani na fesi gi a fakansi. Wan lezing nanga wan takimakandra nanga den arkiman. Taki fu sani di sma gwenti fu du na ini a fakansi; sani soleki fu de na a Distrikt Kongres ala den dei di a e hori, fu de na ini a yepi-pionierwroko gi wan mun noso moro langa, fu meki den oso kon moro moi, èn kande fu go nanga fakansi noso fu go koiri pikinso. Aksi wan tu sma fu fruteri san den abi na prakseri fu du na ini den mun di e kon èn san den o du fu no misi den osofamiri studie, den gemeente konmakandra, nanga a preikiwroko, aladi den o go koiri na wan tra presi. Efu a gemeente abi kontren di sma no e wroko so furu, dan taigi den arkiman sortu sani seti fu wroko den kontren dati. Memre den alamala taki den musu sorgu taki awinsi pe den de, efu na oso noso den go koiri na wan presi, den musu seni den preikiwroko raportu gi a gemeente bukustudie-opziener.

25 min: „Fa yu kan seti wan osofamiri di tranga na yeye fasi?”f Baka di yu taki fu a pisi tori disi, dan yu kan fruteri wan tu ondrofenitori di fiti. Yu kan puru den na ini A Waktitoren fu 15 februari 1999, bladzijde 10-12.

Singi 17 nanga lasti begi.

[Futuwortu]