Wan nyun felem fu bigin Bijbelstudie
Wan syatu felem di nen „Fu san ede wi musu studeri Bijbel?” de na tapu a jw.org website èn furu sma o man si en. A felem disi meki fu gi sma deki-ati fu teki wan Bijbelstudie sondro fu pai. Wan sma kan luku a felem te a e klik na tapu a faki di nen „Aksi wan Bijbelstudie”. A sma kan feni a faki disi na ondrosei fu a home page, noso a kan scan a QR code. A code disi de na bakasei fu ibriwan fu den nyun traktaat fu wi. Disi na wan tu fasi fa yu kan gebroiki a felem:
Te yu e tyari wan gobaka, dan yu kan taigi na ososma: „Mi kan sori yu wan syatu felem di e sori fa Bijbel e piki den aksi di yu abi?” Efu na ososma wani, dan yu kan sori en a felem tapu yu cellulair noso tablet, noso tapu en eigi computer.
Efu wi e du okasi preiki noso wi e preiki na presi pe furu sma de èn wan sma teki wan fu den nyun traktaat, dan wi kan sori en a QR code. Wi kan aksi en fu scan a code disi nanga en cellulair noso tablet. Na ini furu tongo a QR code disi o tyari yu go langalanga na a felem, èn dati o meki taki yu kan prei en wantewante gi a sma.
Fruteri skoromati, famiriman, den sma na yu wrokope, nanga tra sma di yu sabi, fu a felem disi. Aksi den efu yu kan sori den a felem. Noso seni wan e-mail gi den di abi wan link di e tyari den go na a felem, èn gi den deki-ati fu luku en.
Te wi e gebroiki a nyun felem disi, dan wi o man feni moro Bijbelstudie èn wi o man yepi den wan di „abi a yoisti denki fu man kisi têgo libi”, fu kon sabi Yehovah.—Tori 13:48.