Yehovah Kotoigi​—Den orga fu preiki a bun nyunsu

Moro leki 100 yari kaba, Yehovah Kotoigi orga fu preiki a bun nyunsu. A preikiwroko disi tron a moro bigi wroko di oiti du na grontapu, èn wi e preiki a boskopu disi na ini hondrohondro tongo èn na ini moro leki 230 kondre (Mat. 24:14). Fu san ede a de fanowdu taki wi e du a wroko disi? Fa a e du na heri grontapu? A video Jehovah’s Getuigen — Georganiseerd om het goede nieuws te prediken e gi piki tapu den aksi fu di a e poti prakseri na den difrenti fasi fa wi e du a wroko disi na heri grontapu. Baka te yu luku a video, dan poti prakseri na den aksi di e kon now.

Fa a video disi yepi yu fu abi moro warderi gi (1) a muiti di Yehovah en organisâsi e meki fu preiki a bun nyunsu? (2 Tim. 4:2) (2) den Bethel famiri na heri grontapu? (3) den skoro di e hori gi den zendeling nanga den owruman? (2 Tim. 2:2) (4) a leisi di wi musu leisi a deitekst ibri dei èn a sreka di wi musu sreka ibri wiki gi den gemeente konmakandra? (Tori. 17:11) (5) den wini di wi e kisi te wi e go na den Kresten konmakandra? (Hebr. 10:24, 25) (6) den blesi di yu o kisi te grontapu tron wan Paradijs baka? (Yes. 11:9) (7) a grani di yu abi fu teki prati na a kotiwroko di e du ete?​—Yoh. 4:35.

A video disi yepi furu sma fu kon sabi moro fu a wroko di Yehovah Kotoigi e du na heri grontapu. (8) O ten a ben o bun fu meki den Bijbelstudie fu wi, den famiri fu wi, nanga trawan si a video disi? (9) Sortu bun sani sma ben taki di yu meki den luku a video disi?

Efu wi e poti prakseri na san Yehovah e du now, dan wi sa agri nanga a psalm skrifiman di ben taki: „Yehovah mi Gado, yu du furu sani. Iya, yu du kefalek moi sani gi wi èn ala ten baka yu e prakseri wi. Nowan sma de leki yu” (Ps. 40:5). Meki wi gebroiki a video disi bun fu yepi trawan fu kon abi warderi gi Yehovah nanga en organisâsi!