Noiti ete so wan bigi preikiwroko du na grontapu!
Moro leki 100 yari langa, Yehovah Kotoigi orga fu prati a bun nyunsu (1 Kor. 9:23). Noiti ete so wan bigi preikiwroko du na grontapu. Wi e prati a boskopu disi na ini hondrohondro tongo èn na ini moro leki 230 kondre (Mat. 24:14). Ma fu san ede a de fanowdu fu du a wroko disi? Èn fa a wroko disi e du na heri grontapu?
A DVD Jehovah’s Getuigen — Georganiseerd om het goede nieuws te prediken e gi piki tapu den aksi disi, fu di a e sori finifini fa a wroko disi e du na difrenti fasi na grontapu. Te yu e luku a DVD disi, dan poti prakseri na den aksi di e kon now: (1) Fa a wroko fu wi orga èn fa sani seti? (2) Kantoro de pe den brada e skrifi den publikâsi fu wi, pe den e gi yepi so taki a vertaalwroko du moro bun, èn pe den e meki prenki, fowtow nanga felem. Fa den sma na den kantoro disi e yepi wi fu prati a bun nyunsu? (3) Fu san ede den brada e druk so furu publikâsi èn fu san ede den e du so furu muiti fu seni den publikâsi disi gi sma? (Yoh. 17:3) (4) Omeni publikâsi e druk na ini wán yari? (5) Fa den Bijbel publikâsi fu wi abi krakti tapu sma? (Hebr. 4:12) (6) San den brada e du so taki brenisma nanga dofusma kan kon leri sabi Gado? (7) Fa den brada e pai den kostu so taki a preikiwroko kan du? (8) Fa wi e kisi wini fu a wroko di a kantoro e du di e gi bodoi te sma de na ati-oso, èn fu a wroko di a dienstafdeling nanga a kongres afdeling e du? (9) Efu yu na wan fu den Kotoigi fu Yehovah, dan fa a DVD disi yepi yu fu kisi moro warderi gi (a) a muiti di na organisâsi fu Yehovah e du fu preiki a bun nyunsu? (b) den moro leki 100 Bethelfamiri na heri grontapu? (c) a leri di opziener nanga zendeling e kisi? (d) a deitekst, di e meki wi kon frustan o prenspari a de fu bigin a dei nanga wan bijbeltekst èn fu sreka wisrefi gi den gemeente konmakandra di e hori ibri wiki? (e) den winimarki di wi e kisi te wi e go na wi Kresten konmakandra? (f) a frustan di wi kon frustan san a Paradijs na grontapu wani taki? (Yes. 11:9) (g) a prati di wi abi na a kotiwroko di e tan go doro?—Yoh. 4:35.
San den famiriman, den mati, den gobaka, nanga den bijbelstudenti fu yu taki di yu sori den a DVD disi? A ben o bun fu sori tra sma a DVD disi tu, èn fu prati a bun nyunsu nanga den.—Mat. 28:19, 20.