Yepisani fu Gi Sma Leri, Deki-ati, Nanga Krakti
1 Den bun fu gi sma leri fu Bijbel èn fu Yehovah Kotoigi. Den gi furu sma deki-ati fu teki wan fasti bosroiti gi a waarheid. Den meki a pipel fu Gado di gi densrefi abra na en kisi wan moro tranga bribi èn moro warderi. Sortu sani na dati? Den video di na organisâsi fu Yehovah meki. Yu luku ala tin fu den kaba? O langa pasa yu du dati? Yu e gebroiki den na ini a diniwroko fu yu? Na a distrikt kongres den brada ben meki bekènti taki a di fu erfu video, Onze gehele gemeenschap van broeders (A Heri Libimakandra fu Wi Brada), kon na doro. Wi kan bisteri a video disi te a Genootschap meki bekènti na ini Wi Kownukondre Dienst taki a de fu kisi. Fa yu kan kisi moro wini fu den kefalek bun yepisani disi?
2 Na Waktitoren artikel „Studeri Gado Wortu Leki Osofamiri Doronomo” fu 1 yuli 1999, ben gi a rai fu „poti wan pisi fu yu studie ten na wan sei . . . fu luku wan pisi fu den video fu a Genootschap di e leri sma sani . . . èn dan taki fu en”. Akruderi a bun rai dati, dan ibri mun wi sa taki fu wan tra video na a Diniwroko Konmakandra. Wi e gi ibri sma fu a gemeente deki-ati fu luku a video na oso bifo wi sa taki fu en na a Diniwroko Konmakandra.
3 A mun disi wi sa bigin nanga a fosi video di wi meki, Jehovah’s Getuigen — De organisatie achter de naam. Luku èn arki fu kan sabi den piki tapu den aksi disi:
◼ San e meki taki sma sabi Yehovah Kotoigi?
◼ Ala sani di sma e du na Bethel abi fu du nanga sortu bijbeltekst?
◼ Sortu pisi tori fu Bijbel yu si taki sma e prei, e meki fotow fu en, èn e meki skedrei fu en fu gebroiki en na ini den publikâsi?
◼ San yu feni moi fu a fasi fa den publikâsi fu wi e meki?
◼ Omeni publikâsi a Genootschap ben druk fu 1920 te kon miti 1990?
◼ Suma spesrutu fu a pipel fu Gado musu suku fu kisi a grani fu du Bethel diniwroko?—Odo 20:29.
◼ Na sortu fasi a Bethelfamiri de wan tumusi bun eksempre gi ala den Kotoigi fu Yehovah?
◼ San yu feni moi fu a wroko di e du na Bethel fu kan miti someni sma leki a kan nanga a bun nyunsu?
◼ Fa na organisâsi e pai den kostu fu man du a wroko di e du na heri grontapu?
◼ Sortu wroko wi kan horibaka gi fayafaya, èn fa wi musu denki fu a wroko dati?—Yoh. 4:35; Tori. 1:8.
◼ Fa yu feni na organisâsi di e tyari a nen fu Yehovah Kotoigi?
◼ Fa yu kan gebroiki a video disi na ini a diniwroko?
Na ini december wi sa taki fu a video De bijbel — Nauwkeurige geschiedenis, betrouwbare profetieën.